Patrick Verstappen
Op het Kieveloeëte Treffe is Patrick Verstappen uitgeroepen tot vastelaovesvierder van Meijel 2023
Beeste Kieveloeëters en Kieveloeëterinne,
Hél géér vraoch ik òllie èndacht vur wér ‘n biezónder moomènt.
Mi de finnisj in zeecht van de Tour de Erwin; mèr mi de koninginnerit vandaach nòch in vólle gang; gòn wéj hier, vandaach, op di moomènt ‘t Roeëj ruchnummer ópspèèlde. Vur iemmes die ‘n bietje wieller ‘minded’ is, wit dè tè is vur de mést stréjtlustichste rènner.
Nie die man in de gééle trèùj (òf in di geval de mèns mi steek èn vééjf vérre óppe kóp); mèr wal die mèns, vraow, òf ‘t gruupke dè de ganse vastelaovend den ènval zuukt. Die aaltitj mee wil zitte in de vruugge vlucht. Oopening 11-11; Prinsebal en Lietjesaovent. Héj òf zéj vat dik ‘t juuste ra èn zit ter mèr wa géér béj.
Die persoon die vervòlleges in die vruugge vlucht zòveul innerzjie verspeult dè se sòmmigge eetappes ók in de bus binnekomen. Vlak vurdè te wétstréjtléjding tusj de sluttel óp ‘t sloot drèèjt. Mèr mi ‘n bietje geluk zit ter nòch wa femiellie in de bus; èn is de kans gròtter dè te sluttel tusj dan ók nòch van een gaat is. Want vastelaovend géft dizze vaader zin wichter mi de paplippel in. Mèr nie allieën tusj. Ók dòrbutje is dizze man ‘n groeët ènjaager van de jeugtvastelaovend in Meel en dòrdör kénne wéj óns blie:ve verheuge óp enne fantastiesse toekómst van vastelaovend in Méél.
As èrvaare vastelaovesvierder hitjie al veul etappes gereeje; èn hitjie zèllefs ménnich eetappe van de vastelaovend mee utjgezit.
Héj hoefde dòr nie persee zèèlèf óp de veurste rééj te fietse; Nee dizze mèns zèùrechde vurral dètjie dienstbaar waar èn de kópman. In die hoedaanechhétj hitjie ok ménnich kópman van CV De Kieveloeët mee wies den éjntstreep gebroocht óp aswoenzich.
Nou zal iedderieën almèr blie:ve dingke dè wéj óp ennen èchte wielrènner èn ‘t aaze zin. Mèr nee, Kieveloeëters èn Kieveloeterinne; di paaste gewoon hél èrrech goe in ‘t teemaa van vandaach.
Ónze néjje vastelaovesvierder hi zen passie vur ‘n hél ander spòrt. De sjuttels vlie:ge um dikker um de orre.
Ut waar ‘n hél geHannes um em vanne middich hier te krie:ge. Mèr blééj dètjie zinne lèptóp èn seedee-kóffer vandaach èn de kant hi geli, um di ‘vastelaovescircus’ mee te maake èn di ‘fiësta carnaval’ SAAME te belééve.
Kieveloeëters en Kieveloeëterinne, wéj zin gröts en verieërt um de titel: “VASTELAOVESVIERDER 2023” te mage gééve èn:
Patrick Verstappen