Prinselééve dél twieë

In dél ieën bén ik vergééte ’n stukske te sjrieve övver min buurt. Stóm van méj en béj dizze de rektiefiekasie.

Ik begin dus di dél óp zòtterdig toe min buurt kwaam versiere béj óns tusj en in de straot. Wa waar dè gezellig zég, de hérre begóse mi kórsbuuëm nérzitte en de dames ware béj van Diepen roeëze ènt make. Gróf gesjut in de vèùrem van ‘ne buldozer woor ingezit um versieringe óp te hange en buuëm te vervoere. Same koffiedrinke en latter woorstebruuëdjes nuttige, niks mi mi. Ze makte d’r 'n sjitterend gehieël van! Sjòn um de buurt wér same te zie.

Zóndigmèèrege héb ik ’n intervjoe vur de próklamasie mage doe mi Hans Martens. Héj zee veuraf mi ’n halef uurke zin we wal klaor mèr utjéjndelek waar ’t wal nao twé uur gezellig wa zanneke dè tjie wér husjwaarts toog.

De zóndig hébbe we verder ’n bietje mage béjkómme en geniete van alles wa t’r allemòl gebeurd waar. Ók wal wér ’s sjòn.

Dinsdig bén ik nòdè ik jeugdkómmissievergaddering béj de tennisklup haa nòg èngesjóvve béj de kómmieteevergaddering van de Kieveloeët. Goe um te zie en te huuëre hoe evaluwasies van dinge léjde tot verbétteringe en veranderinge, dè is nòw sture.

Vréjdig bén ik wér in de weer geweest vur de wòffelaksie van LTC en nòg èfkes kórte utjlég gegévve övver de ivvenementekallender van ’t dörrepsövverlég béj ’t veurzitterskefee. Dòrnao bén ik nòg èfkes béj de ópbòw weese kieke vur de Kééj Knappe Kwéékmiddig. Dòr ware ze nèt klaor, mèr we hébbe nòg èfkes wa naojgepròt.

Zòtterdigmèèrege moocht ik as kootsj fungere óp ’t vòlliebaltoernooj vur groep 7 en groep 8. ’t Tiem van óns Aniek haa me verrast mi leuke sjèùrtjes die ze zèèlef gemakt han in de klas. Èrreg leuk wér! De resultate ware minder mèr de lòl waar d’r nie te minder dur.

Vervòlges ginge we dur nò ’t oefene vur de kwéékmiddig. Hier hébbe we nòg ‘n paar nummerkes belusjterd en bekeke en dòrnao waar d’r nòg ’n sjòn kinjerfésje van óns Bente béj óns tusj.

Zóndig waar de dag van de kwéékmiddig. Nao ’n snèlle en hèktiese verbaowing van de Rabozaal um dè dòr nòg de ruilbeurs inzaat tot 12 ure 30, koose we beginne. Sjitterend um te zie dè dòr zòveul aniemoo is um mee te doe. Ruum hónderd kinjer din mee. ’t Waar natuurlek ók spannend wie de nééj heersers van ’t Kéjsjeuteriek ginge wéére. Utjéjndeleke kwame vorst Sander en prinses Jenna utj mi ‘ne gans néjje Rò van Èllef. Same mi ur gòn we d’r ‘ne sjònne vastelaovend van make. Ik heb d’r zin in.

Prins Wiljan d'n uurste.

Afslutje doe ik mi minne spreuk.

Ók mi dees daag gao ik sture
Mi al min vastelaoveskure

Prinselééve dél dréj

Nao de fantastiese kwéékmiddig haa ik ’n relatief rustige wéék vur de boeg in de ènloeëp nò ’t bónte wiekènd.

Mòdigaovend hébbe we same mi vorst Peter ’t hél prógramma wà we nòg vur de boeg hébbe en wà praktiese zake durgenómme. Utjeraard huuërt dòr de nöddige sjééle waazel béj.

Dinsdigaovend stóng de uurste oefensèssie vur de sluttelövverdracht geplènd. Sjòn as ge dan alle tèkste maagt lééze en persoeënlek dink ik dè tè èrrig leuk gé wéére. Dòr moete géllie béj zin!

Dónderdig waar ik nie as prins aktief mèr han we béj de tènnisklup ’n klaag en jubel sèssie gehad wòrbéj leeje fiedbèk kanne gééve nò ’t bestuur um zò te kómme tot ’n nééj beléjdsplan. De aovend woor in goej bane geléjd dur de man die normaal béj Goe Gehusseld óppe groeëte troom spult. Ruud bedankt!

Vréjdig waar natuurlek de aftrap vur ’t bónte wiekènd. ’t Waar vur méj ’n hél apparte ervaring um as Prins ‘t ‘s ‘ne kieër van de andere kant mee te make. ’t Ware kwallietatief goej aovende en ‘ne middig en ik héb dan ók veul mense gesproke die ’t as èrrig goe ervare hébbe.

Zóndig bónte middig waar ’n ervaring óp zich, dòr waar ik natuurlek nòg nòjt geweest. Sjòn um te zie dè dòr zòveul wardering en lusjterèndacht te zie is. Mi ónze mam en pap óppe uurste rééj waar ik nie allieën gröts mèr zéj zeker ók.

As alles wà ik nòw meemaak ’n veurbode is vur alles wà t’r nòg gé kómme dan wért ’t echt nòg veul sjònner dan ik haa dörve droeëme.

Tot vóllegende wéék!
Prins Wiljan I

Ók mi dees daag gao ik sture
Mi al min vastelaoveskure

Prinselééve dél vééjf

Ók dees wéék wér ’n stukske övver alle dinge die ik héb meegemakt.

Mòndigaovend hébbe we de sluttelövverdracht nòg mèr ’s durgenómme en gezellig wà d’rbéj gezannikt béj Ger. En de viandelle ware èrreg lekker.

Dinsdigaovend waar de prisjutréjking èn de winnaars van de prinsepoel van de Bubs, béj de Zwaan. Annelies daniëls, Monique Strijbos, Frank van den Niewehof en ók nòg ‘ne Bubser Louis Winkelmolen han goe gegòkt. Louis is vòlleges de statute van de poel utjgeslóte as winnaar. D’r moost gelót wéére wie de winnaar zao zin. Dréj balonne mi dòrin briefkes broochte utjkómst. Monique woor de winnaar en ging mi ’t gròtste bierpakket husjwaarts. ’t Woor nòg ‘ne leuke aovend. Bubs bedankt!

Woensdigaovend broochte we ’n bezuuk èn zèùregsentrum St Jozef. ’n Nééj ervaring vur méj. Èrreg sjòn um mee te make.D’r ware veul óptrééjes van kinjer, personieël en Nirkanse artieste, want ók de Uulewappers ware ènwizzig. Annelies Daniëls woor dur allebééj de verénniginge èfkes in ’t zunneke gezit umdè zéj al 11 jaor de prizzentasie van dizze aovend verzèùregd. Same mi de àwwere de vastelaovend viere is méj goe bevalle.D’r woor ‘ne fototaart gesjónke èn ’t persónieël, dòrbéj hébbe Peter en ik óns zèèlef utjgenöddigd um dizze dónderdigmèèrege mee te kómme ópééte.

Dónderdigmèèrege um 10 ure 30 èfkes trug nò ’t zèùregsentrum um de fototaart, ónder ’t genòt van ’n kupke koffie, mee óp te gòn ééte. Waar ók gezellig.

Saoves hébbe we béj de Kéjsjeut de wage mee gereecht. Èrreg leuk mi óptrééjes van versjillende kinjer artieste. Prinses Jenna haa ’ne sjònne spiedsj veurberéjd. Super dè ze dè dee. Vervòlleges zin we ók nò de buurtverénniging ’t Zònnedupke gòn kieke. Die hébbe ‘ne sjònne wage gebaowd.

Vréjdig waar d’n aftrap van de vastelaovesdaag. Uurst béj de sósiejale wéérekplats wòr we wér wèèrem wore óntvange. ’n Bliksembezuuk èn de klas van óns Bente die ware toe nèt èffe in de klas trug. Dòrnao béj de kinjerópvang wòr we mi de allerkléjnste versjillende pólónéézes moochte danse. Sjòn um te zie dè zéj zò mi de prins wille viere.

Vervòlleges ginge we nò de ónderbaow van de bazissjool. In de gimzaal bómvól mi kinjer same pólónéézes loeëpe danse.De hél klas van Bente aachter méj èn. Kiepevèl móment vur méj. Sjitterend um mee te make, dè dees kinjer zò èntóziejast vastelaovend viere.

Nao ‘ne lekkere maaltidj béj de Zwaan ginge we trug nò de bóvebaow. Uurst èfkes ’n bezuuk èn de klas van óns Aniek, die ware nòg druk en ’t knutsele. Alle kinjer han de ópdracht um ’n zò sjòn meugeleke vastelaovesoutfit te make vur de méster of de juf. Dees vastelaovespèkskes mooste vervòlleges in ‘ne modsjów gesjówd wéére. In ‘ne bómvólle gang / aula liepe alle krejasies övver de katwalk. Ik haa de ieër um te mage zjurere. Méster Bram (vur èfkes juffraow Bram) woor de winnaar. Echt ’n geweldige menier um mi dizze groep kinjer zò vastelaovend af te trappe.

Saoves moochte we nò de sluttelövverdracht van de geménjtje Pieël en Maas. Ók wér ’n apparte ervaring. Mi ’ne kwis “Ik haaw van Pieël en Maas” mooste we dur twieë vraoge te beantwoorde probere de sluttel te bemachtige. Gelukkig gemèkkelek geslaagd, wòrnao we de sluttel krege. Dòrnao nòg kórt èfkes durféste mi de Kéjsjeut óp ’t podiejum en toe trug nò Méél um ónze éjge wage te gòn reechte. Super leuke aovend, dikke hamburgers (sòmmige ware iets te pittig Hans!!) en natuurlek de nöddige flèskes bier, dan make wéj wàl lol. We hébbe echt ‘ne sjitterende néjje wage. Kóm zóndig mèr kieke.

Kómmende wéék zal ik min stukske övver de vier vóllegende daag sjrieve. Tot vóllegende wéék en ’n sjònne vastelaovend.

Prins Wiljan I

Ók mi dees daag gao ik sture
Mi al min vastelaoveskure

Prinselééve dél zis

We begóse de vier dólle daag zòterdigmiddig mi ’t durneme van de sluttelövverdracht wòrnao ik èfkes béj minne vriendegroep "De Zök" moocht ènkómme vur ’t wagereechte. Sjiek um te zie hoe òw vriende zich inlééve in min prins zin.

Zòtterdigaovend begóse we mi de vastelaovesmis die sjòn in ’t Mééls woor veurgedrage. Dòrnao de sluttelövverdracht in d’n Binger. Sjòn um de ludieke planne en prójekte dòr te mage vertélle.. Ók de Kéjsjeute prinses Jenna en vorst Sander han leuke planne bedaacht. Goe gedao kids!!

’n Leuke rejaksie van de kèrnwéthawer en zin gevòlleg. Èrreg gelache mi ur leeste èkt. Gelukkig woor ik nie d’n uurste prins die de sluttel nie kreeg.

Toe dur nò ’t kluphusj wòr we ’n kórt fòrmeel samezin han mi de wéthawer Raf, Frits, Fred en Rob. Leuk um te zie en te huuëre hoe zéj di belééve. Dòrnao vòllegde nòg ’n super fést in de zaal. Mi as hògtepunt ’t óptrééje van La Bamba wòr ik mi óp ’t podiejum moocht.

Zóndigmèèrege ware we al wér vruug èn de gang in heuzje Oomen. Natasja snel wég vur d’n óptocht en ik moocht nòg èfkes ’n bezuuk brénge èn Miranda Berben. Dè woor super gewardeerd! Goe um te zie hoe pózietief zéj blieve.. Dòrnao de bónte óptocht. Wà ’n fést zég! Uurst kómme alle délnemers béj ónze wage nééve. Dòrnao van ’t begin tot ’t éjndj vróleke, entósiejaste mense nééve de kant. Ècht super gaaf umdè bóve óppe wage mee te mage make. Spesiejaal is natuurlek dè femielie, vriende, buurt en de tènnesklup zich ópgepakt hébbe um vur méj mee te doe èn dizze sjitterende óptocht. Allemòl super bedankt dè géllie mee din en kwame kieke. Ik waar zò gröts às ‘ne paow.

Às ge dan trug koomt óp ’t Alexanderplein en ’n fésje óntpópt zich dòr, dè is ècht super gaaf. Toe nòg èfkes trug nò de Zwaan wòr ik nòg èfkes óp ’t pódiejum mi de Tòddezèk moocht stao.. Ók wér ’n super gave ervaring.

Nao ’n kórte paowze kwame we um 19.00 ure wér trug béj de Zwaan, wòrnao we ’t nééj óptochtebal van de Kéjsjeut bezoochte béj de Parties. ’t Waar d’r nie mèr super druk mèr wàl allemòl leuke en blééj kinjer, wòr we versjillende pólónéézes mi danste. Prinses Jenna en vorst Sander en urre rò van éllef din super goe mee.

Toe nò de prisjutjréjking van d’n óptocht béj ’t Oranje Hotel. ‘ne Vólle wèèreme zaal wòr iederieén in spanning waachte óppe utjslag. Super gaaf dè min éjge kammerèùj d’n uurste prisj béj de kléénj wages wónne. Zök bedankt dè géllie di vur méj hébbe gedao!!

Nao de prisjutjréjking hébbe we nòg flink gevierd béj de Zwaan, wòrnao ik érre in min nèsje kroop dan Natasja, die vóng ’t nòg gezellig. Han ze béj de Kieveloeët nòg nòjt meegemakt.

Mòndigmèèrege um 9 ure 30, ik lag nòg óp én oeër toe d’r ‘ne hoeëp meziek vur min deur stópte. De Roeëj han d’n óptochtwage van de buurt geregeld wòrmi ze méj kwame verasse. Uurst moocht ik d’r mee óp um èn ’t begin van de straot ’t naambordje te verandere. Hier kwaam ’n roeëj bord mi Prinsediek d’róp vur trug. Ècht super gaaf!! Toe trug nò óns um te óntbéjte, lekker ééjer mi spèk, jammer genóg waar ónze hónd Kyra misselek gewórre. Hà tjie al dukker èfkes gehad, mèr nòw ging ’t nie övver. Toe ik trug kwaam van ’t bezuuk èn Tom Engelen, die éllef jaor geléjje mi de vastelaovend gebórre waar, bén ik mi d’n hónd nò de véjarts moete gegao wòrnao we ur hébbe moet laote inslaope. Wà ‘ne dómper óp dè móment. We weeste wàl dè ze gén éwwig lééve mèr haa mèr mi dees daag zitte ge dòr nie óp te waachte. Toch wéére ge dan wér verwaacht um 13.00 ure, dè viel nie mee. ’t Viel me zwaor, mèr ik dink dè we ’t goe gedao hébbe zoeë. We hébbe d’r béj ’t bezuuk èn de Stoep en béj Colé nòg èfkes óp trug gekeke en dòrnao hébbe we de drò wér ópgepakt. Gelukkig ging dè goe. ’t Bezuuk èn Colé waar spesiejaal. Zeker umdè ónze pap en mam, min sjònawers en min zeuster en sjònzeuster dòr dur méj óndersjééje moochte wéére. De stukskes van de Zök zalle me laang béjblieve. Dank je wel.

Toe veul te snel al wér wég en dur nò ’t Kéjsjeutebal wòr ’t vólle bak waar mi ’n hoeëp èntóziejaste jeugd. De prisjutjréjking vur ur waar natuurlek ók spannend. Di waar vur de Kéjsjeut al ’t leeste òffiesjele fést. Prinses Jenna en vorst Sander ginge wér goe veuróp. Géllei hét ’t fantasties gedao. Ik waar blééj dè ik mi òllie dizze vastelaovend moocht veurgao.

Nao ’n lekker Sjienees buffet kreeg ik nòg wà kure veurgeli dur Goe Gehusseld, die ik mi goe gevòlleg héb durstao. Ik woor óndersjééje às éllefde prins van Goe Gehusseld. Danke wèl!

Toe óp wég nò min kroeg, de Siem. Dòr wòr ik al jòrre mòndig de dólle mòndig vier en nòw às prins dòr ónthalt moocht wéére. Wà ’n fést um zoeë èrreges binne te kómme. Kiepevèl in ‘ne snikhieëte tèmpel. Super bedankt kefee de Siem en al zin bezuukers.

Trug béj de Zwaan nòg ’n sjòn fést gevierd tot in de late mesjien wal vruge uurkes.

Dinsdigmèèrege hébbe we ’n bezuuk gebroocht èn Nina Donkers, gebórre óp 10 fibberwarrie, ’n ècht vastelaoves kiendje. Sjòn um te doe en zeker às ’t dàn zò gewardeerd wért dur de awers.

Um 14.00 ure begoos ’t Kieveloeëte trèffe àlwér mi ‘n “fantasties” óptrééje van óns gezinneke, wòrnao ’n keur van artieste óptrééjes verzèùregde. Sjiek um dè mee te mage make. De Roeëj verraste ók wér mi ’n óptrééje vur méj.

Nao ’t Kieveloeëte trèffe gaow èfkes nò husj um um 19.00 ure te beginne èn de fienale van de vastelaovend. Uurst béj de Nostalgie wòr ’t gezellig waar, zòwàl in de kroeg as in ’t restórant. Dòrnao nò de sjraveltèmpel, de Vangrail. Super hoe dòr óp ur menier vastelaovend wérd gevierd. DJ Fer vuult dè presies èn en umdè tjie àl DJ waar béj de Pannesjóp vruuger haa ik ‘m afgspróke dè we zòn éjndige nèt as vruuger mi Forever Young van Alphaville.

Dòrnao dur nò ’t Kievelmènneke um de vlag te strieke de òffiesjele leeste handeling van de prins en prinses van de Kéjsjeut. Trug béj de Zwaan moocht ik uurst afsjéjd neme van ’t publiek wà ik éjgeleke héllemòl nie wao. Ik haa nòg gén zin um te stóppe. Ók wore prinse Jenna en vorst Sander utj ur taak óntheve.

Wòrnao ik in dè kléénj kémmerke aachter de bar òffiesjeel afgetuugd ging wéére. ’n Emósiejóneel afsjéjd van alle betròkkene. Sjitterend en ónvergéételek, danke wèl!!

Dòrnao nòg ’n paar uurkes héllemòl lós mi ’n spètterend óptrééje van dichter Stefan Winkelmolen en veul gespring en gèkkighéjdj. Super gaaf éjnde!!!!

Woensdigmiddig zin de Kieveloeét en Goe Gehusseld nòg béj méj geweest um same nao te praote, wà te ééte en te drinke. Ók wér gezellig.

Dan zit ’t t’r ècht óp. Veurzitter Sibbe, bedankt dè ge méj di gegeund hét en kómmietee bedankt dè géllie méj gesteund hét. Vorst Peter en adjudant Hans, géllei hét méj óp haand gedrage en veul wèèrek vur méj verzit. Zónder òllie génne Prins!!! Wà ’ne geweldige Rò van Éllef hébbe we, wà méj betrèft. Ik héb ècht mi iederieën ‘ne bepalde band ópgebaowd, wà ók vur Natasja gèlt. Utjeraard ók mi de vraolie van de Kieveloeët, want zónder ur géen rò huuër!! Wà ’n super leuk klupke, gröts dè ik òllie prins moocht zin.

Utjeraard ók nòg ’n dankwoord nò Goe Gehusseld, zónder hofkepèèl gén kómpleet vastelaovesgevuul. In òllie éllefde jaor ók wér super gedao. Ók hier de nééj leje wér super geïntegreerd.

’t Zit t’róp, ik bén gröts dè ik prins van Méél moocht zin en kiek t’r nò utj um de aktievietéjte die ik às prins nòg mag doe mee te mage make.

DANK ÒLLIE WÈL!!!

Prins Wiljan d’n uurste

Ók mi dees daag gao ik sture
Mi al min vastelaoveskure

Prinselééve dél zeuve

We gòn wér van start.

Nao mònde van stilte en butje wa kómmieteevergadderinge wénnig Kieveloeët in min lééve, moochte we mòndig d’n 11e van de 11e wér aftrappe èn moocht éjndelek ’t prinsepak wér utj de kaast.

Um 9.00 ure begoos de dag al. We begooste mi ’t trug in funksie zitte van alle mense naodè ik zèèlef wér dur Arthur as kléjjingméster waar toegesproke en ik de sèpter wér in óntvangst moocht neme. Naodè Peter wér as vòrst waar geïnstalleerd vòllegde adjudant Hans en alle rò van éllef leje, die ik wér de steek moocht ópzitte.

Toe óp wég nò sjool, wòr we de kinjer van groep zis óp ginge hale. Zéj moochte mee nò ’t Kievelmènneke. Dòr han we de tradiesiejonele handelinge van vlag-héjse, wasse Kievelmènneke en éllef kenónsjeut mi dòr tusse in de wense van de kinjer. Èrreg leuk allemòl. Utjeraard moocht ik ók wà zégge. As ónderwèrrep ha ik de éllef gekózze en dòrbéj wà leuke datums en annèkdotes gezoocht. Liep priema vur min gevuul.

Dòrnao wér trug nò óns kluplókaal, mèr nie vur dè we de kinjer wér véjlig óp sjool han afgeleverd en dè we de femielie Berbe ur éllefde buske bloeme han gebroocht, die ze óppe bónte middig han gewónne. Sjòn as ge ziet dè mens wàrdere dè ge di doet!!

Béj Toon en Andrea strumde ’t langsam èn goe vól, wòrnao we ’t middigprógramme kooste starte.

Uurst afsjéjd neme van Louis Winkelmolen. De geesteleke vader van de wèpsajt van de klup, wòrin héj aaltidj veul tidj en innerzjie hi gestoke. Ók afsjéjd van Hay Becks. Wà kan die man spiedsje. ’t Is dè tjie Néérs pròt anders waar d’r ‘ne goeje prins èn verlórre gegao. (ha ha).

Arthur en Jolanda wore ók nòg gehuldigd as jubielares ( éllef jaor béj de klup). Arthur ‘ne man van de aachtergrónd mèr ó zò belangriek. Héj zèùregt t’r tòch mèr vur dè iederieën d’r wér piekóbèlló óp sté as we óp stap gòn mi de Kieveloeët. Arthur super bedankt!

Nao ’t òffiesjele éjnde bleef ’t nòg laang gezellig béj Toon en Andrea wòr ók nog versjillende Mestrichtgèngers trugkwame. Goe bezig allemòl.

Óp dinzig stóng d’r ‘ne edukatieve dag óp ’t prógramma mi smèèreges vastelaovesles óp sjool en smiddes in ’t kader van de kultuurkèrresel ’n bezuuk van kinjer èn óns kluphusj. Èrreg leuk um wér béj de kinjer te zin en te zie hoe d’r mi gewérrekt en eumgegao wért. Ik krieg dòr aaltidj ’n hél spesiejaal gevuul béj. Echt super sjòn. Veul leuke rejaksies gehad en zèllefs min uurste sinjeersessie gehad wòr kinjer handtieëkeninge kwame vraoge. Haha ’t moet nie gekker wéére…

Zoeë nòw wér óp nò de liedjesaovend en ’t sjééle waazelgala. Twieë fantastiese aktievietéjte wà vur min periejode de leeste zin. Óp zóndig 5 jannewarrie zal ik deefienietief afsjéjd neme van min prinssjap!

Ik hoop òllie gaow wér te zie béj de aktievietéjte. Tot gaow!!!

Prins Wiljan d’n uurste

Ók mi dees daag gao ik sture
Mi al min vastelaoveskure

’t Zit t’r óp!!

Óp zóndig 5 jannewarrie héb ik min prinsjap mage afslutje. We kwame béjèlkaar in ‘t Oranje Hotel wòrnao we nao ’t installere van ’n nééj lid van Goe Gehusseld en ’n weurdje en prezentje van ónze veurzitter Sibbe Gielen richting d’n Binger vertròkke. Dòr ware ’n hónderdtal genöddigde mense béjèlkaar gekómme um mi óns ’t afsjéjdsfésje te viere.

’t Waar ’n biezunder móment wòr d’r ók vur méj wér allerléj verrassinge geregeld wore. Zòwàl de Kéjsjeute prinses Jenna en vorst Sander en de kievelkrantkómmissie han leuke verrassinge meegenómme. Minne vriendegroep de Zök han ’n sjòn stuk veurberéjd, wòrbéj ’t emosiejoneel allemòl èffe te veul woor. Sjòn dè ik Brendy van Dijk nog min leeste óndersjééjing moocht övverhandige.

Dòrnao dur nò ’t prinsebal wòr ik natuurlek ók èrreg benéjd waar wie minne òpvòlleger ging wéére. ’t Óntmantele van méj begoos drèk toe we binnekwame, wòrnao ik ók béj de awd prinse woor ópgenómme.

Méélse mense, ’t zit t’r óp! ’n Fantasties jaor gehad wà ik nie haa wille misse. Iederieën die hier èn hi béjgedrage harstikke bedankt hiervur!

Mi prins Rudy II as minne ópvòlleger haa ik méj génne béttere kanne wense. Hier gé de Méélse geménjsjap veul plezier èn belééve.

Groete Wiljan Oomen