Liedjesfèstieval Pieël & Maas

’t Twédde wiekend van jannewarrie sté aaltidj in ’t tieëken van twieje tradiesies: ’t vriendewiekend van Sjuppe Éllef en utjeraard ’t liedjesfèstieval van Pieël & Maas. Mèr wà as ge nòw béj allebééj de aktievietéjte ènwezig maagt zin? Dus vréjdigaovend vól goeje moe mi min maote richting Mechelen (Zuid Limburg) vur ’n wiekend “kuulienéér geniete”. Heerleke hèpkes: ’n winjpruuverééj, wòr génne druppel winj wérd verspild en utjeraard veul lache.

Óp zòtterdig ’n prinselek óntbéjt, ’n verwén-àrranjzjement béj “Therme 2000”, (hél appart mi 17 manne), um hàllefwég de middig hélemòl utjgereust husjwaarts te kieëre nò ’t Kieveloeëteriek.

Ëmmel tusj bleek dè de buurtgenote van Molenoord vandaag nie stil han gezééte. Wà hébbe ze óns husj en de hél straot prachtig versierd. Béj dagleecht waar ’t al goe gekeurd, mèr ónder ènvoering van Jo Luijten griepe ze nòw ók alles èn vur ’n fésje. Dus ’s aoves hél de zwiek wér béjèlkaar óp ’t stoepefést um de versiering in ’t dónker ók nòg ’s te beoordélle. Zòàs ik héb gehuuërd waar ‘t ‘ne ónvergéételeke aovend mi lajf meziek van mónniekaspeuler Jo Luijten. Is ’t traowes ók dur de buurt goegekeurd of moete we dòr nòg ‘ne ekstrà aovend vur belégge?

Terwéjl de buurt de straot óppe kóp zaat, moocht ik mi hél ’t gevòlleg en de Bubs nò Masbree. Wòr di jaor D’n Hab ’t liedjesfèstieval P&M moocht organiezere. Vlak vur vertrék kreeg ik nòg de ópdracht mee dè hél Pieël & Maas èn ’t énjdj van d’n aovend moost wete dè de Kieveloeët d’r waar geweest. Nòw dè kan ik òllie zégge: Ik héb min beest gedao: Spierpinj van ’t hòsse, leechtbesjadigde stembande van ’t meezinge mi de Bubs, ’n bezwét hémd en ’n tópervaring rieker.

De Bubs bedankt vur ’n geweldige béjdrage èn dizze aovend! ’n Óptrééje, dè jammergenóg net te kórt kwaam vur de preesj. Mèr ze wete in éllek geval in hél Pieël & Maas “wòr wéj d’r énne van zin”.

De afterpaartie béj Andrea en Toon waar ók gröts: As Prins moocht ik zèllefs twé kérre ‘ne èntree make. De insajders wete wòrum!! De Kievel-tòffel woor dees wéék nòg gereparreerd en de kater waar vur sommige de dag latter; oftewàl mi de rèmpkesópe nò de Brabantse buute kampiejoensjappe.

Alaaf!

Prins Rudy II

Ge zaalt ’t snappe,
Ik gao vastelaovend tappe

De Bónte Aovende en Middig

Mòndigmiddig aachter de lèptóp en mi ‘ne groeëte glimlach, trugkiekend óp ’t Bónte wiekènd. Sjónge jónge wà héb ik genóte van 3 super dage, mi super artieste en de ènweezighéjd van ruum 1100 Méélse mense in ’n prachtig teejater D’n Binger.

Traone van ’t lache mi buuts, skètsjes, zang en ónvervalste Méélse, Antilliejaanse en zèèlefs “Heldese” inbréng. Zónder èks tekórt te doe, wil ik d’r tòch èffe ’n paar persoeënleke hògtepunte utj hale. Óp vréjdig traone van 't lache béj sirkusdierekteur Bolle Tiny en zeker zin géétj zalle we nòg zeker ’n tidje heuge. Ók Peter Daniëls en Johan Theeuwen hàn ’t zwaor te verdure mi dizze ónvervalste Vlaaming, die ’t nie koost laote um dees twieje hérre ’s flink in de zéjk te zitte.

Óp zòtterdig kiepevèl béj de Érpelmèèndjes (di jaor Patatemanties) toe ze as André Rieu òrkest ’t nummer “I did it my way” spulde. En dan die andere Méélse èkt “Goe Bedoeld”. Wendy, Bertine en Twan ’t waar mieër dan “Goe Bedoeld”, ’t waar geweldig. Vóllegend jaor wér?

De zóndig wér vruug utj de vérre vur de bónte middig. Ieën van de hògtepunte waar natuurlek de énwizzighédj van óns oma van Dijck, en ze hi genóte. Ók de Rò van Éllef haa ’n verrassing vur ’t kómmietee in pèttó. Dizze kieér ware ’t de manne in ’t blaow die same mi “Dubbel Trubbel” ’n dansje moochte doe. Èn ’t ritmegevuul moet nòg wàl gewéérekt wéére vólleges méj. As klap óp de vuurpiel kwaam dizze middig ók nòg Berry Knape ‘ne buut verzèùrege as kneenjsfòkker. Vólleges méj is z’n vraow nòg aaltidj óp zuuk nò ’n nééj koekoeksklok.

En toe kwaam d’r éjndj èn ’t bónte wiekènd. Ónder ’t genòt van ‘ne bòrrel same nòg èffe trugkieke óp ’n geslaagd wiekènd. As prins, mèr ik dink ók names alle artieste: Méél géllie ware ’n tóppubliek!

Vandaag ‘ne dag béjkómme, mèèrege wér fris èn ’t wèèrek en kómmend wiekènd gala Muziekala en de Kwéékmiddig.

Al wér twieje fantastiese aktievietéjte óp ’t prógramma. Zòtterdig 3 X 11 jaor liedjesaovend in ’n hél biezunder jèske en zóndig mieër dan 20 groepe óp de kwéékmiddig. In Méél dòr snappe ze ’t wàl… Utjeraard kumt zóndig ók de jeugdprins(es) utj. ’n Spannende wéék vur de Méélse jeugd en ók ik bén benéjd wie de néjje jeugdprins(es) gé wéére. Zóndig wete we ‘t.

Prins Rudy II

Ge zaalt ’t snappe,
Ik gao vastelaovend tappe

't Gala Muziekala en KKKM

Wér ’n wiekènd aachter de rug as prins van de Kieveloeët. En wà vur ’n wiekènd. Ik dink dè ik afgeloeëpe wiekènd getuuge bén geweest van ‘t mést memórabele vastelaoves-móment in Méél: ’t Gala Muziekala. “Wà ’n fést waar dè”. Nostalgie, fést, ’n traon en 'ne lach. Jóng ’t waar ’n paradisj.

Dan bliekt wér dè ’n kléénj dèùrep groeët kan zin. In rap tempó en mi veul dienamiek is geluuëf ik hél min jeugdsentiement vurbéj gekómme. Kumptjie zao zégge “’t waar TÓP” en ik kan òllie zégge: “’t Is sjòn um ’s énne kieër de prins te zin”, en dan ók nog in ’t jaor dè we 3 X 11 jaor liedjesaovend viere. Laastig um d’r ‘n móment utj te hale, mèr as ge d’n aovend maagt afslutje óppe buun mi ’n keur èn Méélse artieste; die ’n spesjaal, vur di jubielejum gesjrivve odelied brénge èn de Méélse liedjesaovend, dan krieg ik nòw dè ik ’t ópsjrief wér kiepevel.

’n Kómpliement vur alle artieste, dokter henkie en de òrganiezasie. Di waar óngekéént en óndanks de strès in de veurberéjding han de Knoetsòrre ’t in 1995 al goe gezie: “’t Kumt allemòl goe”.

En dòrmi zaat ’t wiekènd t’r pas hallef óp. Óp zóndig hébbe we ’t namelek dunnekes övver gedao mi de jeugd van Méél, oftewàl mi de Kéjsjeuters en Kéjsjeuterinnekes téjdes de KKKM. 23 Groepe, ruum 100 kinjer die nò wééke van oefene dan éjndelek ’t pódiejum van D’n Binger moochte betrééje. ’t Èntóziejasme en talent spatte d’r vanaf en ’t waar béj vlage ‘ne èchte “kwéékmiddig”. Minne naam, mèr ók minne spreuk waar in veul liedjes verwéérekt en dè vuult toch wàl biezunder.

In de pòwze van de Kwéékmiddig waar d’r dan utjeraard ók nòg de prinseónthulling van de Kéjsjeut. Wie woor de néjje heerser en vorstin van de Kéjsjeut in 2014. KVW halde ècht alles utj de kaast en toverfee Froukje Simons haa de ieër um mi ’n prachtig liedje, dur ur zèèlef gezónge, de kinjer wakker te tovere … en ’t lukte ur ók nòg. Nie veul latter stóng d’r ‘ne èntóziejaste Rò van Éllef in vól òrnaat óp ’t pódiejum. Mèr we hàn nòg steeds gén vorstin en génne prins. Toe bleek dè de toverfee nòg ’n verassing in pèttó haa: Froukje Simons waar nie allieën de toverfee, mèr ók nòg ’s de nééj vorstin vur ’t kómmende séjzoen. Mi de rò en de vorstin kómpleet, miste we nòg énne sjakel: en dè waar de néjje heerser van de Kéjsjeut. Inmiddels héllemòl övververhit in die wèèreme piejama waar dizze jóngeman vólleges méj hél blééj dè tjie èn de beurt waar. De néjje heerser vur 2014 is: Dirk Berben. En geluuëf me, ik haa génne béttere as kòllegà prins kànne wense. Dirk, Froukje en hél de rò van éllef: Prófiesiejat en óp nò ‘ne ónvergéételeke vastelaovend vur jónk en àwd.

Dirk, Froukje en ik gòn same vastelaovend tappe en mi ’n bietje tènnes, voetbal en wà geluk, kan urre en minne vastelaovend dan ók nie mèr stuk.

Prins Rudy II

Ge zaalt ’t snappe,
Ik gao vastelaovend tappe

…‘n “Rustig” wéékske

Wa is ’t veurdél van ’n laang vastelaovesséizoen? Dè ge nao twieë drukke wiekènde mi dòrin de bónte aovende, 't Gala Muziekala en de Kééj Knappe Kwéékmiddig, ók ’n wiekènd zónder fòrmele aktievietéjte óp de plènning hét. Érlekhéjd gebiet te zégge dè tè toch ók wal èffe lekker is. De indrukke van de afgeloeëpe wééke ’n plèkske gééve, béj de Nostalgie èffe de sjaowers d’rónder en vur veul leje van de roeëj en blaow ’n wiekèndje mi de femielie.

Gebeurt t’r dan héllemòl niks in zòn wéék? Nòw dè zeker nie. Begin van de wéék bèèlde L1 tv. óp dè ze ’n àjtem wòn make övver dréj prinse in Méél. Òftewal de prins van de Veldmeusj, de Buizerds en de èchte prins van Méél natuurlek. Mèr ieën vastelaovesverénniging en dan dréj prinse in én dèùrep, dè vónge ze toch wal biezunder. Óp vréjdigmiddig waar ’t zòwitj en woore kórte ópnames gesjote van di biezundere geval. De ópnames stónge d’r zoeë óp en ènslutjend woore natuurlek nòg de uurste prinseèrvaringe utjgewisseld ónder ’t genòt van ’n drènkske.

Zòas sommige van òllie warsjinjlek gezie hébbe, hébbe de Buizerds utj de Heibloem de dörrepsgrenze wa ópgerekt, zòdè prins Frank toch ècht óppe Heibloem wónt. Èchter “Méél blieft Méél” en we laote ónze grónd natuurlek nie zónder slag of stoeët inpikke. ’t Waar dan ók zòtterdigmiddig dè we belaaje mi bord en gróndboor óp wég nò de Heibloem zin getròkke um de grenze van ’t Kieveloeëteriek wér in ieëre te herstélle. Prins Frank van de Buizerds vuult zich nòw ók tusj in ’t Kieveloeëteriek. ( Vur wie ’t nie nòg snapt, réj d’r mèr ’s nééve).

Óp zóndig gén Kieveloeëte aktievietéjte, mèr ’t zeuve jèùrig bestao van Nostalgie Ééte en Drinke moost nòg gevierd wéére. Óp twieë fibberwarrie, mi ’t Gala Muziekala, waar ’t al zeuve jaor geléjje dè we vur ’t uurst de durre ópende. Traddiesie getraow viere we iedere verjèùrdag mi de aktievietéjt: “studiejo sport mi ’t bord óppe sjoeët”. Òftewal voetbal/sjatse óppe tilleviezie, ’n bierke en utjeraard die jèùrig is trakteert óp de friet: achtien kieló, dartig krókette, dartig bamies, twénjtig kééssoeflees, fieftig frikandèlle, vieftien bòkwoorste en ‘ne kieló uije…bedankt vur ’n leuk fésje ter gelegenhéjd van ónze zuvvende verjèùrdag.

Kómmende wéék pakke we de drò wér héllemòl óp en gòn we wér vólóp vastelaovend tappe: ’t FF bal van RKMSV: Prins John van de Veldmeusj kumt óp bezuuk in ’t Kieveloeëteriek: en de prisjutjréjking van ’t prinsepoele van de BUBS. Ik héb d’r al zin in…

Groet Prins Rudy II

Ge zaalt ’t snappe,
Ik gao vastelaovend tappe

Óppe foto, ’t èffebal en ’t bezuuk van prins John vd Veldmeusj

’n Klééjn twé wééke tot de vastelaovend en béj dizze ‘ne vóllegende updeet as prins van de Kieveloeët.

Afgeloeëpe wiekènd ‘ne bómvólle agenda óp de zòtterdig. In alle vruugte bén ik same mi vorst Peter vertròkke richting Remeund um de prinsefoto vur de Limburger te make. Peter hi dur de jòrre hin ménnige prins begeléjd nò dees foto en kéént as génne andere de klappe van de zwieëp. Óppe tidj vertrékke, bèkske koffie in de Oranjerie en al vruug óppe juuste stoel gòn zitte…en jao dan zitte ge dòr as Méélse prins óppe uurste rééj, nééve de prins van D’n Uul (stadsprins van Remeund). D’r woor nòg ’n vaat bier èngebójje as ik min plèkse afstóng, mèr ik haa ’n èntal mense beloofd próminènt óppe foto te stao en dòr kan gén vaat bier tegenóp. ’t Reezultaat al gezie??

Nao ’n geslaagde fotoosjoet gaow trug nò husj: kóp soep, bótterham, um dòrnao um 13.00 ure mi ’t hél gevòlleg nò min éjge klup RKMSV te trékke. Dòr vóng alwér vur de 22e kieër ’t èffebal plats. ’n Fantasties jubielejum dè utjeraard dizze middig groeëts gevierd woor. In ’t begin van de middig woor uurst de néjje èffe prins bekéénd gemakt. Vur di jaor is dè niemes minder dan Prins Stef I (Dielissen). Naodè we Stef héllemòl han ópgetuugd mi keep, steek en septer koost ’t fést beginne. Butje haa de òrganiezasie ’n laastig parkoer utjgezit vur ’n vasterees. Prins Stef I woor natuurlek flink èngemoedigd dur zin vriende en ik haa ’t dan ók zwaor. ’t Waar dan ók Stef die mi wal 10 mééter veurspróng wón. Ènslutjend nòg ’n bèlleke trappe, dieverse óptrééjes en ménnige pólónèèze dur de kantiene geloeëpe. Dòrnao héb ik names de Kieveloeët nòg ’n prachtig èndinke mage övverhandige èn RKMSV vur 2 X 11 jaor èffebal. Vieza verza haa RKMSV ók ’n blievend èndinke vur de Kieveloeët. As klap óppe vuurpiel héb ik RKMSV as zinde verénniging ók mage óndersjééje as ridder in de orde van de Kieveloeët (oftewal de Druppel). Al mi al ‘ne biezundere middig béj min éjge RKMSV. Dank je wel hiervur.

Jammergenóg hébbe we nie ’t hél prógramma óp ’t èffebal af kanne make, umdè we um 16.00 ure prins John van de Veldmeusj óp bezuuk krege in ónze éjge reeziedensie “De Zwaan”. Ónder ènvoering van Goe Gehusseld en ’n groeëte ieërehaag dur de Rò van Éllef, bestuur, övverige ènwizzige en mézèèlef woore de Veldmeusj groeëts ónthald. Utjeraard woor prins John flink in ’t zunneke gezit in zin éjge Méél. Mèr prins John, Winjkunningin Lieke en jeugd prins Joey han zèèlef ók de nöddige verrassinge in petto. Veul sjòn weurd, kadoos, ‘ne dans van de dansgarde, ’n prachtige prinseóndersjééjing en ééve sjòn spèldjes woore méj gegévve, eumgedao en óp gespèèld. Hél biezunder um di as prins mee te mage make. Rónd de klok van 10.00 ure kwaam d’r ’n énjdj èn ’t formele gedélte van de dag. De Veldmeusj han nòg ’n ander prógramma en wéj van de Kieveloeët hébbe ónder genòt van ’n goej glas bier nòg èffe naogenóte.

Kómmende wéék vergaddere, veurberéjde vur de sluttelövverdracht, veurberéjde vur “de vriende van de vastelaovend live”, béj de Nostalgie en ik krieg ‘ne sniek-preevjoe óp de vastelaoveskrant. Ik bén hél benéjd hoe die gewórre is. Ge snapt ’t al….

Prins Rudy II

Ge zaalt ’t snappe,
Ik gao vastelaovend tappe

’t Kan beginne….

Ieën van de leeste reustmómèntjes spèndeer ik nòg èffe èn ’t béjwééreke van min dagboek “’t Prinselééve”. De veurberéjdinge zitte d’r béjnao óp en dan kan ’t vastelaovesfést ècht lósbarste.

Afgeloeëpe wéék hébbe we al vurzichtig wèèrem gedrèèjd. Woensdig kreeg ik van de kómmissie (die de karnevalskrant hi gemakt) ’t uurste èksèmplaar van de karnevalskrant èngebójje. Ónder ’t genòt van ’n hèpke en ’n drènkske béj méj tusj, hébbe we de krant ’s rustig durgespit. Èn de inhòwd te zie, hébbe vriende, femielie en kénnisse zich kòstelek geammuuzeerd béj ’t délle van min jeugdzònde. Ge moet utjeraard nie alles geluuëve wa t’r gesjrivve wérd, mèr ikzèèlef héb ’t mi veul plezier nòg ’s belééfd.

Hoewal de sluttelöverdracht nòg moet kómme, héb ik me dòr afgeloeëpe wéék mi bizzig gehawe. Utjeraard hébbe we die ‘ne kieër geoefend. Dòrnééve héb ik de nöddige reejaksies moete parreere van bezèùregde kéérekgangers die ’t stukske in ’t Mééls krèntje iets te lètterlek han genómme. Mèr gén zèùreg....ók zéj zalle ’t nao de sluttelövverdracht snappe.

Vréjdigaovend nòg èffe ’n brulleft tussedur gehad um zòtterdig in alle vruugte dees prachtige karnevalskrant te gòn verkoeëpe. En ’t liep gesméérd. In rap tèmpó hébbe we (rò van éllef, kómmietee, awd prinse en Goe Gehusseld) stapels krante èn de man gebroocht. Ik wèns iederieën die de krant gekaocht hi dan ók veul léésplezier. En diegene die ‘m nòg nie gekaocht hébbe, snèl nò de winkel anders zalle ge ’t nie snappe…

Nao ’t kranteverkoeëpe nòg èffe ’n reustmómèntje ingelast um ’s aoves nò kefee Parties te trékke vur ’t mómbakkesbal. Super um as prins mee te maage maake wa Méélse mense, femielie, vriende, etc. allemòl utj de kaast haale um ‘ne gewèldige èkt nér te zitte: Nijntje, Hertog Jan, stèndin tuk tuk instrukteurs, ‘ne resèrve tapper vur béj Nostalgie Ééte & Drinke, ’n sjuppe éllef, Póttekiekers, watterdraagers utj Malawi, Knabbel en Babbel en zèllefs die zóndigaovend kieners van de Zwaan waare ènwizzig. Utjeraard héb ik nòg wa kreejasies vergééte mèr ik héb ze allemòl gezie en d’rvan genóte.

Nò afloeëp nòg ‘ne besjééje zuute inval gehad, wòrbéj kèlder en keukekèèsjes woore geplunderd um iederieën te kanne vurzie van drank en spéjs. Um 5 ure 11 waar ’t sjòn geweest. Gaow nò béd, want ’n dikke 7 ure latter stóng de taksie klaor vur ’n retoertje Remeund.

Jaojao, …in Remeund weete ze intusse wal wie de Kieveloeët is. Dizze kieër óppe resepsie béj Prins John II van de Vèldmeusj. ’n Uunieke èrvaring um ‘s ’n resepsie van zòn groeëte vastelaoves-verénniging mee te maage maake. Béj binnekómst insjrieve en dan afwaachte tot ge wért afgeroepe. De ieën nò de ander verénniging mag zich in vól ornaat presenteere béj Prins John II. Nao óngevieër dréj uurkes waachte waare wéj van de Kieveloeët èn de beurt. As èchte “Brabanders” woore wéj óntvange, mèr vorst Peter weest dees versprééking van Dre Peeters akkuuraat te parreere en haa de lachers al snèl óp zin haand. Sjòn um dòr ók èffe in ’t middelpunt te maage stao en um Prins John II in zin éjge reeziedènsie in ’t Veld in ’t zunneke te zitte.

Um 17.00 ure mi de taksie trug nò ’t Kieveloeëteriek en ónder ’t genòt van ’n glas Lindeboom ’t weekend afgesloote béj Andrea en Toon.

En nòw mag ’t fést dan éjndelek ècht beginne. Ik stao te poopele; héb d’r zin in; dus...

Prins Rudy II

Ge zaalt ’t snappe,
Ik gao vastelaovend tappe

As ge èn ’n dagboek begeent....

As ge èn ’n dagboek begeent, moete ge ’t ók afmaake. Mèr hoe sjrieve ge alle gebeurtenisse / ervaaringe van ’n wéék as Prins Rudy II trug nò ’n behapbaar verhaal? De kónkluuzie: dè is béjnao ónmeugelek! Mèr ik gao ’t toch próbeere:

De veurberéjdingstidj die vloog vurbéj mi dòrin ’t ieën nao ’t ander hògtepunt. Mèr as ’t dan vréjdigaovend is en de kaar gé ròlle, dan is ‘t ’n ènénréjging van hògtepunte. Laote we d’r ‘s ’n paar probeere te pakke en zò minne karneval samevatte:

• ’t Bezuuk èn Sam Sam, ónder- en bóvebaow van de bazissjool. Super ’t èntóziejasme béj de jeugd. ’t Lééft mede dankzéj ’n èntóziejast tiem medewéérekers béj Den Doelhof en Stichting Kinderopvang Meijel.

• ’t Fést óp ’t pódiejum, same mi de Kéjsjeut, béj de machtsövverdracht in Panninge. We hébbe Méél dòr tòp nérgezit, al zég ik ’t zèèlef.

• De diejaloog mi Dirk in de héjlige mis. Jao d’r moocht ók gelache wéére in de kéérek.

• Ènslutjend de sluttelövverdracht wòrin we 'n pooging hébbe gedao um de Méélse kéérek eum te baowe tot Rudy’s Kievel Pallisj. Prachtig um dizze skètsj mee te maage utjvoere. En kómpliemènte vur de inpoet van Raf, Frits, Fred en Rob as petroeënhéjligge en de dréj kinjer in de toon. En keplaon Roger die hòst vòlleges méj nòg….

• De óptocht óp zóndig. Al wér van ’n hòg nievoo en super um te zie hoe minne spreuk en nòstalgie zò duk trugkwaame in ’t verhaal. En dan zèèlef hòg óppe waage (stutjerend van links nò rèchs óp ’t nummer “vraowkes”) kieloos snoep gòjje.

• Óp mòndig vruug utj de vérre wéére gerammeld dur de Roeëj. Óp gepaaste wéjze woor ik dur de blaow nò de Nostalgie gedraage vur ’n heerlek ónbéjt.

• ’t Maage óndersjééje van min awers, zusse en sjònawers béj Colé.

• ’t Maage óndersjééje van min twédde “vader” Peter van Bree béj Colé. Uurst ’n persoeënleke óndersjééjing en ‘m dan ók nòg maage benoeme tot lid van verdienste van de Kieveloeët. Hoe gaaf?

• Ènslutjend ’t daak t’r af béj ’t Kéjsjeutebal mi “Tsunami” en wér “Vraowkes”: .

• ’s Aoves nòg óp bezuuk in ‘ne bóm vólle Siem wòr we nòg 'n groepsfooto hébbe gemakt mi Sjuppe Éllef. Èn ’t rezultaat te zie, allieën vur intern gebruuk.

• En toe waar ’t al dinzig: ’n Spètterend óptrééje same mi Mieke en Repe Basten as èchte Kievelròkkers.

• Min klasgenote utj de bazissjool die dòr in énne kieër utj ’t niks óp ’t podiejum stónge. Sòmmige haa ik al jòrre nie mèr gezie. Hél biezunder.

• De ónthulling van de vastelaovesvierder van ’t jaor. Di jaor niemes minder dan minne éjge kòlleega Andrea van de Zwaan. ’t Belooft ’n goe jaor te wéére vur de horeka in Méél.

• ’s Aoves óp bezuuk béj min éjge Nostalgie: Traone óppe wange hoe ik dòr woor ónthald. Stadiejonfakkels in roeë, géél, gruun: binne 'n lichjesparrade; éjge waol of feem en in de weurd van vorst Peter “’ne bómvólle arena”. Ik mag wal zégge min persoeënlek hògtepunt.

• Ènslutjend óp bezuuk nò de plats wòr vur méj ’t horekavak is begónne. De Vangrail. ’n Sjòn kadoo van Ronald maage óntvange, bestònde utj ’n footokòllaazje mi veul sjòn herinneringe èn minne tidj béj de Vangrail.

• Nao ’n kórt bezuuk zaat de vastelaovend d’r béjnao óp. Trug dur de dörrepsstraot wòr ze béj de Zwaan al massaal butje stónge um óns toe te zwèèje. ’n Stukske verder béj de Nostalgie waar zèllefs de roeëje luuëper óppe straot utjgeraold.

• Nie veul latter woor de vlag béj ’t Kievelmènneke gestreeke en zónge we vur de leeste kieër di séjzoen: “Lééve de Kieveloeët”.

• Nao ’t vlagstrieke mi de bónte stoet trug richting de Zwaan, mèr nie vurdè we béj de Nostalgie nògmaals óp ’n verrassing woore getrakteerd. Mi lajf meziek hébbe dòr wènsbelònne ópgelaote. Ge kaant wal raoje wòr die van méj övver ging…

• ’n Emósiejoneel slotakkoord béj de Zwaan, toe Prins Dirk en Vorstin Froukje aftróje. Vastelaovend mi ‘ne lach en ’n traon. Ik krieg wér kiepevèl nòw ik ’t ópsjrief.

• En ók ik moost t’r èn geluuëve. ’t Séjzoen 2014 zit t’r óp!

Bovestònde is mèr ’n imprèssie van min beléévenisse. Zòas ik al begoos is ’t “mi gén pèèn te besjrieve”. ’n Bietje óp pepier, hél veul op footoos, ’n gedélte óp fillem, mèr ALLES vur ’t lééve in meen en Miekes geheuge. Méél dank je wel vur ‘ne ónvergéételeke vastelaovend.

Prins Rudy II

Ge zaalt ’t snappe,
Ik gao vastelaovend tappe

D’n 11e van d’n 11e

“De Kievel raolt wér”: zòàs veurmalig vorst Peter aaltidj sjòn verwoorde. Gistere hébbe wér d’n aftrap gegééve vur ’n nééj vastelaovesséjzoen. ’n Séjzoen wà ik as prins Rudy II de kómmende twé mònde nòg intenzief mag meemake, vurdè ik plats gao make vur de vóllegende prins en zèèlef ’n funksie zal gòn vervulle in ’t bestuur van de Kieveloeët.

De butjewacht en sòmmige veurgangers zien dees twé mònde as de naodage van ’t prinssjap en èrreges hébbe ze dòr natuurlek wal geliek in. Mèr toch zin die paar aktievietéjte die nòg rèste te sjòn um d’r nie intèns van te geniete. Zò hébbe we geestermèèrege ’t spits wér afgebeete. Um 9.00 ure smèèreges moocht ik nò ’n laang zómmerreses de steek en septer in óntvangst neeme. Dizze kieër echter nie mèr mi de bemoedigende weurd van (veurmalig) kléjjingméster Arthur en (veurmalige) vorst Peter, mèr dur de néjje kléjjingméster Pascal en de néjje vorst Wiljan. Vrimd? Nee zeker nie! Biezunder? Dè zeker Wàl. Utjeraard waar de nestor van de Kieveloeët: adjudant Hans, d’r ók nòg béj en in ’n mum van tidj waar ’t gevuul wér as vanawds.

Nao ’t installeere van de Roeëj, de Blaow en de nééj ènwinste Benny & Carlijn en Wiljan & Natasja, waar de verénniging wér in funksie. In funksie hébbe we um éllef övver éllef , mi éllef kenónsjeut ’t nééj vastelaoves-séjzoen ingesjoote. Di in ’t béjzin van prins Dirk en vorstin Froukje, de kinjer van groep zis en veul awd prinse.

Tusse de middig haa ik ’t veurrecht um in ’t béjzin van vorst Wiljan, adjudant Hans, kléjjingméster Pascal en ròdslit Wout nòg twieë mènse in de bluumkes te mage zitte. Uurst richting ’t zèùregsentrum wòr Cor van de Móp wér ‘ne bós bloeme names de rò van éllef in ótvangst moocht neeme. Ènslutjend hébbe we ‘ne zuute inval gedao béj Mart Rooijakkers. Want as iemes óp de éllefde van de éllefde , zis kér éllef jaor wért, dan mag de Kieveloeët dòr nie óntbrééke. Éjgelek waar d’r génne tidj vur ’n stukske gebak, mèr goe vur sommige dinge moete ge nòw émmel tidj make…

In de middig hébbe we nòg fòrmeel afsjéjd genómme van veurmalig veurzitter Sibbe en Marion; van Arthur en Jolanda en van Michiel en Karin; wòrbéj veurzitter Peter utjeraard ’n prachtig betoog haa veurberéjd. Övver ’tgeen dees leeje allemòl vur de verénniging han betieëkent.

Nao ’t formele gedélte hébbe we utjeraard nòg lèkker ’n pilske gepakt. ’ne Biezundere dag, wòr de verénniging wér ’n èntal biezundere mènse in ’t zunneke hi gezit.

’t Is zò sjòn um ’s énne kieër de Prins te zin…

Alaaf!

Prins Rudy II

Ge zaalt ’t snappe,
Ik gao vastelaovend tappe