't Prinselééve van Prins Rob I
De uurste wéék as prins van de Kieveloeët
Mòndig fotoos make en dòrnao vergaddering mi de rò van éllef, dinsdig mi de dames. Alles wért veuraf goe veurberéjd en intusse is me ‘t wal duidelek. D’r wért ‘ne hoeëp wèèrek verzit dur ’n paar man en dòrbéj légge ze de lat èrreg hòg.
Dónderdig nò de rippetiesie van de beeste hèrmenie van Méél. De uurste rippetiesie van ’t nééj jaor woor d’r nao afloeëp ’t glas geheve en getoost óp ’n nééj muziekaal jaor. ’t Bestuur verraste me mi ’n prachtig bloemstuk van Floral Art dè óp ‘ne tuuba gemakt waar. Di hi inmiddels ’n sjòn plèkske èn de muur gekrigge. Hèrmenie, bedankt vur dees prachtige verrassing!
P&M
Óp vréjdig 8 jannewarrie stóng de uurste aktievietéjt óp ’t prógramma. Mi ’n vól bus tròkke we nò de Heuf in Panninge um ónze Knoetsorre èn te moedige en ze din ’t geweldig. Zòàs we in Méél gewéénd zin woore ze massaal èngemoedigd. Ècht geniete! Same mi alle prinse óp ’t pódiejumnòg ’n lekker fésje gebaowd. ’n Èntal ginge dòr wà witjer in. Bliekbaar is ’t óp sómmige platse ’n tradiesie um in òw bloeëte pèns óp ’t pódiejum te stao en mi de sèpter óp òw bloeëte pèns te mèppe. De verléjding waar groeët mèr utjéjndelek héb ik de verlejding wérstao um d’r èn mee te doe (dè waar ók bétter vur de bloeddruk van ónze veurzitter).
De aovend vloog eum. Lekker gebuurt mi alleman en ‘ne goeje pót bier gehad. Jammergenóg viele de Knoetsorre nie in de preezje mèr as t’r ‘ne publieksprisj zao zin, dan ha Méél die zeker gekrigge. In ónze hoek hóng ’t gròtste féstgehalte. Mesjien ’n iedee vur P&M 2016. De publieksprisj vur ’t beest féstende dèùrep… De aovend woor gezellig afgeslote béj Toon en Andrea. We ginge dur tot in de late uurkes.
KKKM
Zóndig 18 jannewarrie stóng de Kééj Knappe Kwéékmiddig óp ’t prógramma. Fer en Eef ginge verklét. Fer as meega Toby en Eef wao mee as prinses, want pappa waar prins. Vurhin waar de KKKM ók ’n aktievietéjt wòr ik riggelmaotig bén geweest. Ik bén d’r zèllefs twé kérre zjuurielid geweest. Geweldig um te zie (en te huuëre… Zuuver vals of d’r nééve!) hoe iederieën zin beest ha ha gedao um ’n nummer en èkt óppe buun te brénge.
’n Ónderdél van dizze middig is de ónthulling van de Rò van Éllef en de twieë heersers van de Kéjsjeut (KVW). Marian en Karin baowde de spanning goe óp en nao ’n èkt wòr ik ók ’n kléénj ròl mi de tuuba in ha woore de Rò van Éllef en prinses Syll en vorst Siem ónthuld.
Vur ’t uurst sins jòrre woor ’n laang gekoesterde wèns wér nééj lééve ingeblaoze. Vur de tieners van Méél is ’n nééj vastelaovesverénniging de Véngneuze ónthuld. Prins Bram en prinses Maud gòn same mi urre rò van éllef heerse övver ’t Véngneuzeriek. Wà ’n entoeziejasme en wà ’n geweldig ieniesjatief. Ik wét zeker dè we same mi de Kéjsjeut en de Véngneuze ‘ne vastelaovend gòn baowe vur iederieën.
Zuuver vals of d’r nééve!
Nòw nòg ’n paar daag goe ènstèrreke vur ’t bónte wiekènd wòr óns ’n geweldig prógramma te waachte sté. Nòg gén kartjes gekaocht? Mak d’r mèr ’s wèèrek van!
Prins Rob I
Zuuver vals of d’r nééve, geniet en kóm tot lééve
Éjndelek èfkes tidj
Éjndelek èfkes ’n aovendje de tidj um min beléévenisse as Prins Rob I mi òllie te délle. Wà ’n geweldige ervaring um di mee te mage make.
Prinsebal
4 Jannewarrie, ‘ne dag wòr ik same mi Rian èrreg nò utjgekeke héb.
Begin nóvember vroeg Peter daniëls me of ik in 2015 veuróp wao gao as prins Rob I. Dòr ware Rian en ik snel utj. Dè gòn we doe!
Mèr dan….twé mònde laang dè gevuul nie te kanne délle. Èrreg laastig mi as kliemaks ’t afsjéjd van prins Rudy II. Same mi de hòfkepèèl stóng ik óp ’t pódiejum wòr prins Rudy trug keek óp ’n fantasties jaor. Ik daacht allieën mèr, dòr stao ik vóllegend jaor ók. Óp ’n gegévve móment kwaam Rudy nééve me stao. Ik zee tege ‘m: “Sjiek hè.” “Jao,”zee Rudy, “ècht ónvergéételek.” Dè ware van die mómente, dè ik ècht flink wà binneprèt ha. “Mesjien sté de néjje heerser wal hier en issjie èrreg zinnewèèchtig,”zee Rudy. Dè waar ók zò.. Gelukkig héb ik ’t goe kénne verbèrege.
Hoe fantasties ’t afsjéid van prins Rudy I ók waar, ik waar blééj dè we witjer ginge. En toe ’t móment dè de zuuktocht nò ‘ne néjje heerser gestart woor. Vorst Wiljan zitte de toon en gaf veurzitter Peter de ópdracht um te zuuke nò iemus di di jaor de toon kón zitte. Toon 1,2 en 3 woore ieën vur ieën gehald en suptiel afgeweze.
Toe kwaam nummer 4. Alle èndacht ging nò dizze kandiedaat. Héj zoa ’t gòn wéére, (daachte ze) mèr vorst Wiljan baowde de spanning vakkundig óp en óp ’t móment suuprèème woor nie de vierde kandidaat ónthuld mèr spróng ik utj de hòfkepèèl. ’n Geweldige óntlaajing. Man wà kwaam d’r ‘ne hoeëp spanning vréj. Ik kan me gén ander móment herinneredè t’r inéns zòveul van me afviel.
Goe Gehusseld vergaat spóntaan te toetere, teminste ’n èntal dervan. Utj de geweldige reejaksies bleek dè ‘t ècht ’n verassing waar. Nao me héllemòl in ’t prinsepak geheese te hébbe, woor ik offiesjeel in funksie gestééld en moocht ik éjndelek min weurdje doe vur ’t publiek. ‘n Sjeenbaar ónéjndige resepsie vòllegde. Övverwèldigend wà òw dan övverkumt. Min kinjer Fer en Eef ware wà van slag. Dè kan ik me goe veurstélle. D’r gebeurt ók inéns hél veul wà ze nog nòjt érre hébbe gezie. Gelukkig tròk dè snel béj en hébbe we same lekker gehòst en gefést. De tidj die nao de resepsie övver bleef hébbe we ’n sjòn fést gebaowd. Ècht geniete. Mèr utjeraard veul te kórt. Wà vloog de tidj vurbéj.
Mèr goe èn alles kumt ’n éjndj en woor ’t tidj um nò min prinselek óptrékje óppe Steegstraotnte te trékke um dòr same mi de Kieveloeët, Goe Gehusseld, vriende en femielie ’n bruuëdje te ééte en nog èfkes nao te buurte.
De buurt ha zich drèk nao de bekééndmaking ópgepakt en ’t husj vurzie van ’n uurste versiering.. ’t Husj waar al sjòn verleecht. Geweldig um zò tusj te kómme. Buurt nògmaals bedankt! Nèt vur middernaacht ging Jesse as leeste nò husj en zaat d’n uurste dag as Prins Rob I d’r óp.
Prins Rob I
Zuuver vals of d’r nééve, geniet en kóm tot lééve
Wa make wéj ’t bónt
Wà ’n bónt wiekend hébbe we aachter de rug!
Béj ’t sjrieve van dizze tekst krieg ik spóntaan ‘ne glimlach óp min gezeecht. Wà héb ik genote en wà héb ik andere zien geniete en dòr geniet ik ók wér van. Geniete in ’t kwàdraat zég mèr. ’t Bónte wiekend van 2015 gé béj méj in de buuk as ’t sjònste bónte wiekend òjt. Ik hèb d’r al versjillende verslete kan ik òw wal vertélle. En juust dòrum is ’t fantasties um ’t énne kieër às prins te belééve. Dè is mi gén inkel èrvaring te vergelieke.
Alleruurst kómpliemènte èn ónze ènterteeners van éjge bójjem. Goe Bedoeld en de Érpelmèèndjes ware fantasties. Steekske af vur wà zéj éllek jaor wér vurèlkaar kriege. Gò d’r mèr ènstao. Ók de dans van ónze éjge Méélse Dörskes waar van hòg nievoo. Ze woore verast mi ‘ne zugabe. En dan die mèn in de toon. Wà ’n tóp ènterteeners hàn we dizze kieér. Berry Knapen, Jan Strik, Jan Geraeds en Robert Lamoen. Stuk vur stuk tòppers mèr minne favóriet blieft Berry Knapen.
Um de boel ’n bietje lós te make ware “De Toddezèk” ópgetrómmeld. Man wà makte die d’r ’n fést van. Ik héb d’r nòw nòg spierpinj van. Van ’t begin tot ’t éndj dee de hélle zaal mee en hébbe we kielómééters pólónèèze geloeëpe. Rian en ik han ’n ròl béj béj de de knatsvalse wals “Boem tjing tjing”. Nie zuuver, nie vals mèr wàl d’r nééve!
’t Wiekènd zaat ók vól verassinge. Óp vréjdig zaat min éjge hòfkepèèl óp de buune vur de muziekale umlisjting en zòàs van awds halt de kepèèl de Kieveloeét en de prins óp mi “Veer höbbe zin drin”. Dizze kieér gezóge dur de Klèpbókse. Ók zòtterdig ware de Klèpbókse van de pertééj. Super gedao jónges. Óp zòtterdig zaat de beeste blaoskepèèl van Méél, Die Heimat Kapelle, óppe buune. Ze han van ’t nummer “dem land Tirol" ’n prinseleke verzie gemàkt. Fantastiese verassing! En tot slót natuurlek de Érpelmèèndjes mi ’t nummer vur de prins.
Geert kreeg di jaor de hullep van René en Andy. Ècht ’n wérreld hit. Ik héb ‘m de afgeloeëpe wéék tusj grisj gedrèèjd.. Fer en Eef gòn d’r ók hélemòl lós óp! Hél spesiejaal en èrreg gewàrdeerd!
De kóp is d’r af. Lòt de vóllegende aktievietéjte mèr kómme. Ik kiek d’r in éllek geval nò utj. Às ik dòr nèt zò van gao geniete às di wiekènd en géllie doen dè ók, dan is ’t wér geniete in ’t kwàdraat.
Prins Rob I
Zuuver vals of d’r nééve, geniet en kóm tot lééve