't Prinselééve van Prins Paul I
Prinselééve dél: 5 - Néjaor 2025 is begoos!
Kieveloeëters èn Kieveloeëterinne,
De féstdaach zin wér aachter de ruch. Mi veul vuu:rwèèrek zin we ’t nééj jaor in geknalt. 2025 ’t jaor wòrrin ik as prins Paul I èn verbónge zal zin. Wa ’n gewèldich gevuu:l.
Óppe zòtterdich trappe we ’t jaor af. We starte mi ’n néjaorsresèpsie vanutje Kieveloeët in de Heerekamer. Sjòn um ’t jaor zoeë, saame, te beginne èn wa hép ik der énòrmveul zin in! Téjdes de féstdaach hébbe we den akkuu óp kanne laaje, nòw kanne we vól èn de bak. Tis nòch aacht wééke èn dan stòn we béj de Sluttelövverdracht!
Dernao gòn we mi de Kieveloeët óp bezuu:k béj ‘t 2x11 jèùrich-juubbieleejum van Goe Gehusseld. De muuziekante van de Kieveloeët hébbe zich béjéngevat èn as waore Hòfkepèèl kómme we de Heere binne. De sfeer zitter mee lèkker in. Vólle bak béj de Heere, leeje van Goe Gehusseld, aaw-leeje, Kieveloeët, aaw-prinse èn veul Kieveloeëters èn Kieveloeëterinne. Suuksès gegarrendeert!
Der zin veul óptreejes dien aovent, mèr dè kan ók nie anders mi zòveul muuziekante béjén. Tis sjòn um te zie: hoe iedderieën saame spult èn saame meziek makt. Béj de afslutjing griep ik de kans um éffe mee te speule. As èchte slachman stao ik saame mi Silvie óp de troom te slao. Ik zitter lèkker in èn speul vlèkkeloos mee. Teminste zò vuu:lde dè óp ’t mómènt. As ik daachsternao de fillemkes zie:, dan bliekt ’t tòch wa minder vloejjent gegao te zin. Mèr dè mach netuurlek de prèt nie drukke. ’t Waar enne prachtiggen aovent, sjòn juubbieleejum. We maage as verénneging èn as dèùrep gröts zin óp zòn sjòn hòfkepèèl. Dè makt vur enne prins ’n groeët versjil òf de hòfkepèèl der wal òf nie béj is. Sjòn um te zie: dè ik dees klup ’t al twé kérre éllef jaor duu èn dè ze ’t saame zò nòr urre zin hébbe. Vur méj as prins ók hél sjòn dè ik dees èkstra aktievietéjt in min vastelaovesséjzoen mee kan maake!
Óppe mòndich gé dan nao twé wééke vekansie ’t wérkende lééve wér beginne. De leeste jòrre beginne we tradiessiegetròw béj Kuijpers mi ’n gezaamelek néjaorsóntbéjt. Zèèlef start in dòrrum in Dèn Bòs, ik wéér al smèèrgesvruuch verwaacht um hallef zeuve, dus de wèkker gé óppentitj. Min kòlleegas han me gevraocht ’n wèlkómstweurtje te doe:, dè zaat der nèt óp toe ik mi minne kelleega èn ’t óntbéjt stóng. Wòrróp ennen andere kòlleega die derbéj stóng teege me zee: “Paul, vòlleges méj kumt der bezuu:k vur òw”. Ik dingk: “Bezuu:k?”. Veurdè ik ’t in de gatter haa stónge Rianne mi Lukas èn mi vòrst Ron, atjuudant Mark, veurzitter René, ròtsleeje Stijn, Richard, Marc èn Jarno, kómmieteelit Johan èn ók de vraolie Maud, Lonneke, Lisa èn Demi.
Dè is ’n verrassing! Die moette ók suuppervruuch ópgestao zin… Ik mach me eumtrékke èn dan as prins mi min vérre óp dur ’t kentoeër trééje. Vòrst Ron nimt ’t woort èn dan stao ik óppernééj ’n prötje te doe:, mèr nòw as prins. De póllónééze brééke nie drèk lós. ’t Kan èn ’t titjstip ligge. Òf mesjiens dè tie nie-Limburgers ’t tòch anders vie:re as wéj. Al mit al ’n hél sjòn verrassing, alwér ’n verrassing. Suupperbedangt hiervur!
Durdewééks wér ’n ròtsvergaddering èn ók de kléjjingman kumt nòch éffe óp bezuu:k. ’t Begeent lèkker te loeëpe, ’t vastelaovesséjzoen is begoos!
Vier saame mi 'ne lach, geniet tòt de leesten dach!
Prins Paul I
Prinselééve dél: 4 - Éffe niks wies hallef januari
Kieveloeëters èn Kieveloeëterinne,
Zoeë, de lietjesaovent zit deróp èn dan hébbe we pas in 't nééj jaor wér prógramma. Dè betieëkent dè we dètter 'n paar rustigge wééke ènkómme. Teminste dè liekt dan zoeë...
Sòmmigge mènse zin; “Kiek mèr utj dè ge nie in 'n zwart gaat vaalt.” Mèr van 'n zwart gaat is zeeker gén spraake.
De uurste wéék is nòmmenant rustich, mi 'n kómmieteevergaddering èn 'n bezuukske èn de kléjjingman. De wéék deróp wért 't alwir wa drukker. Óp bezuu:k béj Koen Verstappen um éffe de próklemaasie dur te neeme. Wa sjòn um te zie: wa héj allemòl övver méj te weete is gekómme.
Óppe woenzich 11 dizzèmber sté de uurste pótkaast, Kievelpraot óp de plènning. Aaw-prins Jarno waar der al vruuch béj um alles óp te baowe. Toe kwaame veurzitter René Naus èn Rò van Éllef-lit Marc van den Heuvel. We loeëpe 't prógramma dur èn dan kumt de uurste verrassing. Minne sjònvaader Jo Nijssen is gevraocht um èn te slutje béj de póppekaast, òfjè dè waar wa Jo daacht toe héj gevraocht woor vur de pótkaast. Rob Vercoulen, Lins Snijders èn Marjan Stappers maake de tòffel kómpleet. Paast presies èn in 'n uu:r stóng ie deróp. Suupperleuk um te doe:, dernao gezèllich nòch nao kanne klètse. 't Waar wér enne prachtiggen aovent. Gao em vurral éffe lusjtere... Klik hie:r!
Óppe vréjdich kumt Willie Martens èn, héj hi saame mi zen kòlleegas van Inova min prinseplétje gemakt èn kumt dees prizzenteere. Umdè ik ze de vréjje hant gegévve haa, weest ik megòt nie wa ik koos verwaachte. Mèr héj is prachtich gewórre. Óndertusse zin ze der, dus kan ik ze ók gòn utjdélle. Ge gòt ze zeeker zie: de kómmenden titj.
Óppe zòtterdich kómme we mi min voetbaltie:m béj de Lindeboom-braowerééj, dòr wéér ik verrast mi 'n kedoo. Wa willege ók mi 'n aaw-prins èn aaw-veurzitter, Peter Daniels as meedewérker èn netuurlek mi minne naamgenoot Paul Joosten as dirrekteur. Bliekbaar han ze béj Lindeboom ók al wa filliesietaasies gehat, mesjiens dè ze butje Méél nie weete dè we dréj Paul Joostens hébbe in Méél. Fantasties um te zie: hoe ge as prins kieër óp kieër verrast wért èn nie in de watte geli wért.
De aaw-prinse hébbe de lietjesaovent gewónne èn gòn enne klip ópneeme, wéj maage mi 't gezin ók éffe vurbéj kómme in de fillem. Bliekbaar waare ze smèèrges al mi filme begoos béj min sjònaawers tusj. Tis 'n prachtigge klip gewórre. Hérrege em al gezie:? Klik hie:r.
Nao 't ópneeme van de fillem nòch éffe naobuurte béj de Heere, dè wért nòch enne tópaovent. Die wit ik af te slutje mi 't persenieël van de Heere. 't Tie:m van de Heere besprékt óppe zóndich nòch éfkes de wéék. We weete der 'n sjòn fésje van te maake!
Daachsternao mach ik béj de aaw-prinse ènslutje in 't Hitsige Hert béj Luc èn Han. Dòr zitte ze saame um den utjslach vur de halleve fienaales van 't LVK te lusjtere. Óndangs ónze hògge verwaachtinge kómme we hélaas nie derdör, géélt ók vur de ander Méélse inzèndinge. Mèr dè mach de prèt nie drukke. 't Is wir enne sjitterende aovent èn dan gòn we mèr vól vur 't P&M Liedjesfestival.
In de leeste wééke van 't jaor nòch bezuu:k van Fred èn Silvie die me naames Goe Gehusseld 'n prachtich kedoo kómme brénge. Mark minnen atjuudant kumt nòch um 't nöddege dur te neeme èn we loeëpe al enne kieër dur de Sluttelövverdracht hin mi Bertine, Karin, Hidde, Ron, Ger, Hans èn Math. Ók dè wért wér enne prachtigge middich, mi allieën 'n bietje ónderin 't glas (tòch Math?!). Sjòn um te zie: dètter ók butje de Kieveloeët zèèlef al zòveul mènse beezich zin mi de Vastelaovend, iedderieën die óp zen éjge menie:r béjdraacht um der 'n prachtich fést van te maake. Dan zin we vérrich vur de féstdaach, éfkes geniette mi 't gezin èn dan óp nò 't nééj jaor!
Vier saame mi 'ne lach, geniet tòt de leesten dach!
Prins Paul I
Prinselééve dél: 3 - Liedjesaovend
Kieveloeëters èn Kieveloeëterinne,
Dan sté min uurste èchte aktievietéjt as prins vur de deur, tis zòtterdich 30 nóvèmber èn titj vur de Liedjesaovend. Smèèrgesvruuch waar de buurt dan ók mi al die kréjatievvietéjt in ónze buurt. Van graafies, marketing, den baow wies èn de belèttering èn bedrukking, alles is te vinge hier béj ’t Startebós! ’t Rizzeltaat is prachtich, kóm vurral ens kie:ke!
Daachsterveur waar de ginneraale geweest èn ik hép al gehuuërt dètte sfeer der goe inzaat béj de Vangrail. Dè belooft ’n sjòn fésje te wéére.
Di jaor wér dréj nééj groeppe, de Liedjesaovend grèùjt èn dès prachtich um te zie:. We hébbe di jaor tie:n groeppe èn wal hóndertéllef artieste.
We kómme béj de Heere béjén, ópsteeke èn gòn dernao van dòrrutj in de stoet nò de Vangrail. Minne uurste kieër dur ’t dèùrep as prins. Ónze Lukas vroech: “Pappa, mach ik dan nééve òw loeëpe?” Netuurlek! Prachtich um di saame te kanne èrvaare.
Émmel binne béj de Vangrail strömt ’t al gòw lèkker vól. As de Awt Prinse binne zin, véélt méj én ding óp. Dès minne sjònvaader, prins Jo II derbéj is vóng ik nie zò raar. Dètjie enne sjaal eumhat wal, die huuërde béj de èkt. Toe bleek as verrassing vur méj dè Jo èn ók prins Rudie I (2012) zich óp ’t leest nòch èngesloote han béj de Awt Prinse, as verrassing vur méj. Sjitterent! As prins wéérege iedders kieër verrast, dè is ècht zò biezónder.
De Liedjesaovend is ’n prachtigge aktievietéjt, de Vastelaovend drèèjt um meziek. Dè makt ók ’t groeëte versjil tusse de Vastelaovend in Limburch èn de karneval in Braobant. Um èchte Limburchse vastelaovesmeziek. As we dè wille koestere dan is ’t van belang dè we lietjesaovende hébbe as dees hier in óns sjòn Méél.
Zèèlef hòw ik van meziek èn van zinge, al bén ik nòch nie witjer gekómme as ieën óptreeje óp de Liedjesaovend. Èn dè was mi de Lèpkes. Tis 1999 èn toe han we twé tie:ms béj de A-jeucht van RKMSV, de A1 èn de A2. Allebééj zòn ze meedoe: mi de Liedjesaovend, de A1 sté bekéént as Sjuppe Éllef èn wéj as A2 din mee ónder de naam ‘De Lèpkes’. Néjje tèkst gesjrivve óp Peter Koelewijn, Kom van dat dak af. Oeffene, oeffene èn oeffene, wééke zaate we twé aovende in de wéék in de graas béj Bas Peeten. Wéj weeste zeeker dè we in dizze wétstréjt de A1 zòn verslao! Wiesdètte mooder van Bas in de leeste wééke kwaam lusjtere. Urre blik in de oeëge verròjde veul… toe we ennen dach latter in de stuudiejoo stónge béj Johan Maessen verstónge wéj dien blik wa bétter. Want wa Johan ók perbeerde èn in wèlleke saamestèlling dan ók, ’t klóngk vur génne mééter. Van de éllef voetbalspeulers waar der génnenénne as zanger gebórre. We gòn de buu:k in as énnechster die nòjt de cd gehalt hi, enne twieffelèèchtiggen ieër. Gelukkich ging ’t mi de ginneraale al hél wa bétter èn kómpenzeerde ’t poodiejum wa. Dus we maage wal meedoe: mi de Liedjesaovend. We hébbe utjéjndelek enne prachtiggen aovent, krèk wie we toe mi de groep hoe dan ók ’n prachtich jaor han.
Nòw óp dizze Liedjesaovend gòn min gedachtes ók wér truch nòr dè jaor dè we dòr stónge èn nòr die groep. Zeeker ók umdè we al twieë van de éllef moette misse. Jeroen Rutjens hi óns hélaas veulste vruuch in 2021 al verlaote èn ’t afgeloeëpe jaor is Luc Nijssen ónverwaacht gestèùreve. Zò ónverwaacht èn allebééj zòveulste vruuch! Mèr ge lieërt dè ge ók den dach moet plukke èn dè ge moet geniette van iedder mómènt dè ge hét! Dus dè gòn we dan ók zeeker doe: dizzen aovent!
De Kwéékers oopene ’t bal, uurst mi ur nummer van furrech jaor èn ze hébbe ók as uurste gelót, dus ók mee ur nummer van di jaor. Nao de Kwéékers kómme de Awt Prinse Meijel èn as we dees twieë nummers gehat hébbe, sté de tènt al gans óp zinne kóp. De Vangrail is óndertusse bómvól gewórre, wér enne èchte sjraaveltèmpel! Tis geniette van de uurste wies de leeste menutj.
De gansen aovent stao ik veur èn ’t poodiejum te geniette van alle prachtigge nummers èn van alle innerzjie die van ’t poodiejum afkumt. Nèt wie die van Lòt em Loeëpe zinge: “Geniet van ’t mómènt èn blief nie stil stao!”
Ik bén blééj dè ik nie in de zjuu:rie hoef te zitte, want der zin zòveul goe:j lietjes. De tóp dréj èn ’t duumke wéére bekééntgemakt. Saamegevat, den utjslach van de 43e Méélse Liedjesaovend.
1e: De Awt Prinse Meijel - Zònne goejje hébbe wéj nòch nie gehat
2e: De Glitterdörskes - Nòjt mér nò husj
3e: Kumt Goe! – Mi òw!
‘t Duumke: Lòt em Loeëpe – ‘t Plan
Die gòn we allemòl truchzie: óp de Bónte Aovend èn ók zeeker téjdes de Vastelaovend zèèlef. We hébbe netuurlek enne prachtigge winnaar, gewèldich um de beeker te maage utjréjke èn minne sjònvaader, prins Jo II. ’t Daak gé ter van, dè gé ’n fentasties P&M Liedjesfestival wéére mi dizze prachtigge groep. Dòr kie:k ik nòw al nò utj!
Den aovent vlie:cht vurbéj, mèr wéj wille ‘Nòjt mér nò husj’, want ‘zònne goejje hébbe wéj nòch nie gehat’!
Vier saame mi 'ne lach, geniet tòt de leesten dach!
Prins Paul I
Prinselééve dél: 2 - De uurste twé wééke
Kieveloeëters èn Kieveloeëterinne,
Èn dan bénnege prins. ’t Hògge woort is derutj, we hoevve nie mér gehéjmzinnich te doe:, iedderieën mach ’t weete. Heerlek!
De uursten dach, prinsheerlek geslaope, Rianne haa ’t husj alwér ópgeruumt toe ik nò ónder kwaam. Saame béjkómme van dien uursten dach èn dan langksaam kumt der bezuu:k. Uurst femiellie, dernao kammerèùj èn dernao ók de Kieveloeët. Wa rustich óp gang kwaam woor tòch wér ’n óntzittent gezèllich fésje, mi veul sjòn verhaale. Ók sjòn um óp dees menie:r ennen inkie:k te krie:ge in de verénneging.
Ók hébbe we ‘n óntzittent wèèrem wèlkóm gekrigge van C.V. De Kieveloeët, èn de vraolie van dees sjòn verénneging. We vuu:le óns nòw al gans tusj.
Vannaf dach 1 nao de utjroe:ping stroeëme de bereechte, kartjes, kedookes èn bloemme binne. Èn zòveul bezuu:k! Ècht óntzittent biezónder.
Óp min wèèrek mooste ze der nòch wa èn wénne. Vur de mènse die ’t nie weete, ik wérrek béj Kuijpers, hép ónder andere ’n kentoeër in Dèn Bòs, mèr ók in Léjde. In Léjde kénne ze ’t gaars nie èn Braobanders vie:re karneval, mèr dès génne Vastelaovend. Dus vroegge ze méj, hoe wérrekt dè as ge prins béént? Hérrege dòrróp gesóllesieteert? Zaatege al béj de verénneging, nuum ’t mèr óp. Dus ik hép der di jaor ’n taak béj, kie:ke hoe we die mènse ók ’n bietje de Vastelaovend ingesjut krie:ge, èn hoe we ze kanne verbinge èn di prachtigge fést!
Óppe mòndiggenaovent langs de hòffootoograaf, Linde Joosten, vur ’n footoosèssie as prins, saame mi min gezin. Wa duu ze dè goe èn wa zin ’t tòch prachtich footoos gewórre! Linde bedankt! Dan gòw dur nò de Heere vur de uurste ròtsvergaddering. Veurdè we beginne mi de vergaddering wéér ik verrast dur bèkker Dennis van Dikke Mik, héj hi heerleke prinsegebèkskes gemakt! Zòn uurste vergaddering is nòch ’n bietje wénne, want as prins oopene èn slutjege ók de vergaddering naamelek. Mèr wal sjòn um te zie: hoe dè gé èn hoe sirriejeus der vergaddert wért. Iedderieën is suupperfannetiek èn mi mèr én doel, enne gewèldigge Vastelaovend òrganiezeere vur gans Méél.
Daachsternao kómme de kléjjingman Hidde èn Maud naames de vraolie èn um méj èn Rianne béj te praote övver de prootòkólle èn de agènda. Gewèldich um te zie: hoe ’t allemòl wérrekt zoeë binne de verénneging èn waffer sjòn dinger der di jaor óp de plènning stòn.
Óppe woenziggenaovent sté de vergaddering mi de vraolie óp de plènning. We beginne wér mi die heerleke prinsegebèkskes, ik kan ze iedderieën ènraoje. Dus gao vurral nò Dikke Mik èn bestél ze!
De uurste wéék zit de agènda dus lèkker vól, mèr dès juust prachtich. Krie:ge as prins mee ’n goe:j gevuu:l béj wa ’t allemòl inhawt èn ge vuu:lt òw ók drèk ‘de prins’.
Nao die uurste wéék hép ik der allieën nòch mèr mieër zin in.
In de wéék dernao kwaam vòrst Ron langs um saame de Liedjesaovend veur te beréjde. Ók kreege we nòch bezuu:k van minne veurganger, prins Jarno I èn zin dörske Lisa. ’n Hél gezèllich, mèr vurral ók sjònnen aovent wòrrin Jarno me meenaam in hoe héj ’t prinsesjap èrvaare haa.
De uurste twé wééke vlie:ge vurbéj, fantasties um te èrvaare, övveral wòr ge koomt krie:ge filliesietaasies èn poozietievve réjaksies. Suupperbedangkt allemòl!
Èn dan kan de Liedjesaovend gòn beginne. Titj dè we wér wa kanne gòn vie:re!
Vier saame mi 'ne lach, geniet tòt de leesten dach!
Prins Paul I
Prinselééve dél: 1 - Prinsebal
Kieveloeëters èn Kieveloeëterinne,
’t Uurste dél van ’n Prinselééve, di jaor mach ik min Prinselééve gòn sjrie:ve. Èn hoe gewèldich is tè um dè mi òllie te délle.
’t Begoos óppe zóndich 8 septèmber, tis aovent èn ik krie:ch ’n èpke van René Naus. Ik zéch teege Rianne; “Hee, ’n èpke van René Naus…” We kie:ke mekaar èn… dus ik dè èpke lééze. Héj is utjgenöddicht vur ’t fést van Jo & Mia Basten, die zin fieftich jaor getraowt. Mi de vraoch òf ik nòch enne kieër Jo wil speule èn ’n fillemke wil insprééke. Vur de mènse die ’t nie weete: Jo Basten hép ik òjt maage iemmieteere óppe Bónte Aovend.
Dus ik dingk: “Dè liekt me stéérek, mesjiens weeltjie wal wa anders vraoge… òf tòch nie?” Mesjiens hoop ik dè alieën mèr.
Ge begriept, der is mèr én menie:r um dòraachter te kómme. Dus ik dien dach dernao nò René.
Kóm ik dòr… gezèllich zitte te zannikke, nòw zaaltjie ’t wal vraoge. Toe ginge we ècht enne tèkst sjrie:ve, dan zaaltjie ’t nòw wal mesjiens vraoge, mèr nee. Èn veur ik ’t in de gatter haa, waare we al èn ’t filleme.
Ik daacht óndertusse dè ’t ècht ging vur de fillem, wòrróp René asnòch zee: “Ge begriept wal dè ti nie de èchte reeje waar um òw hier te krie:ge. Zòrre géj de heerser van ’t Kieveloeëteriek 2025 wille wéére?”.
Ik zee vòlleges méj al mee jao, mèr ik zee dòrróp dè ik ’t ók nòch effe tusj wao vraoge.
Tusj zaat Rianne al te waachte, èn die zach as daochter van ’n aaw-prins dè ók wal zitte. Hoe sjòn is ’t dè ik dartich jaor nao sjònvaader prins Jo II, ók prins mach zin!
Èn dan hérrege saame inéns ’n groeët gehéjm…
De uurste wééke zin nòch wal te doe:. Moettege enne kieër vur de klieër óp pa. Èn dè is sjòn.
Óp ’n gehéjme plèk afgesprooke mi veurzitter René èn vòrst Ron. Ik netuurlek nie ter hèrkénne, patsj óp èn de jas mi de muts óp, niemmes die méj mach hèrkénne. Ze vatte dè suupperprefèsjeneel èn béj de Kieveloeët. Dus toe we dòr ènkwaame, ging ók uurst Ron kie:ke òf alles wal véjlich waar èn der nie toevallich énne van de Roeëj dòr in de zaak róntlie:p. René èn ik bleeve nòch éffe in den òwtoo zitte.
Ron vergaat ellieën nòch dètje ’n allarm óp den òwtoo hi èn dè tè afgé as der iemmes in zit. Dus gans ónhèrkénbaar zaat ik in ennen òwtoo mi ’n loejjent allarm.
De leeste wééke veur ’t prinsebal waare wal èrrech laastich. Ik koos nörges kómme òf der woore al vraoge gestéélt. Jao géj wért ‘t… èn hoe hòwwege òw dan, ge hét ’t iedee dè ’t óp òwwe kóp gesjrivve sté.
Óppe woenzich veur ’t prinsebal waar ’t utjkómme veur ’t kómmietee, dan begeent ’t al ’n bietje. In ’t lètterlek dóngkerste gehéjm övver straot. Veurzitter René die me örges in ’t gehéjm óppikt, die me mi ’n deeke övver me hin nò binne broocht, dè niemmes ’t koos zie:. Binne sté ’t kómmietee óppe gang. Wéér ik in ’t maskóttepak geheese èn óp enne stoe:l gezit in de kammer. As ze binnekómme, maage ze mee zégge wie ze dingke dètter ónder ’t pak zit. Hidde rie:p mee Paul Joosten. Ik daacht: “Aj, dè koos nòch wal es gòw vurbéj zin.” Gelukkich vur méj zaat de rèst óp ander Méélse mènse.
’t Wérrekt dan as vòllecht, ieën vur ieën, maage ze ’n vraoch stélle die ik moet beantwoorde dur jao te knikke òf nee te sjudde. Ók mach ik énne kieër lie:ge, òf waar ’t nòw twieë? Béj de vraoch òf ik òjt ’n instruumènt bespult hép (blòkflèùtj in min jeuchtjòrre,) wit ik ze um den töjn te léjje. Dur vervòlleges krie:ch ik vraoch óp vraoch èn ’t duu:rt me tòch laang veurdè ze dan tòch éjndelek béj méj utjkwaame. De réjaksies dan as ge utj dè pak koomt zin fantasties. Ge maacht dernao vur ’t uurst òw pak èn, èn òw as béjnao-prins laote zie:. ’n Gewèldich gevuu:l. ’t Waar enne gewèldich sjònnen aovent, nie te laat zéch mèr, hallef vééjf ging ik as leeste béj René wéch. Goe óplitte dè niemmes me ziet.
Nòch ’n paar daach moet ik ’t gehéjm hòwwe. Èn wa waar dè laastich. ’t Koos nie rap genóch prinsebal zin vur óns. Óp den dach zèèlef, nao ’t Sinterklòs kie:ke, ginge we ’t de wichter vertélle. Toe ik de wichter vroech òf dè ze ’n gehéjm kanne bewaare, toe haa óns Hannah ’t gòw in de gatter: “Wéére géj prins?!” Ónze Lukas vlóch me in traone in de èèrem. Prachtich, dè gao ik nòjt vergééte.
Zòtterdich 16 nóvèmber 2024, waar ’t éjndelek zòwitj: ’t Prinsebal in Méél wòr ik utjgeroe:pe woor tòt prins karneval van ’t Kieveloeëteriek in Méél.
Veuraf nòch wa spanning, gelukkich ginge der ’n paar van de kammerèùj mee, mèr hoe hòwwege òw goe? Hoe krie:ge iemmes anders verdaacht? Èn toe éjndelek moocht ik ’t poodiejum óp! Van aachterutj de zaal dur de mènse hin nò vurre. Gewèldich, nie weetende wa ’n fést die utjroe:ping zò wéére. We han der óntzittent veul zin in, mèr ‘t woor nòch zòveul sjònner as wa we óns han veurgestéélt.
Uurst zèèlef de femiellie bèlle, hoe gewèldich waar dè èn hoe gòw waare die dòr aachter béj de Heere vur de uurste filliesietaasies. Dan ’t uurste dél van de klieër èn, èn dan maage éjndelek ’t poodiejum óp. Èn as ge dan nò boove gòt…
Femiellie, kammerèùj, tie:mgenoote, iedderieën die der nòch nie was, was asnòch nò De Heere van Meijel gekómme um óns te filliesieteere èn mi óns mee te vie:re. Dangk òllie allemòl dòrvur!
Dan begeent de resèptie, krie:ge zòn gewèldich réjaksie van iedderieën utje zaal, al die verhaale èn bótsjappe ècht gewèldich. Dangk dòrvur! Nao de resèpsie knalde ’t fést lós. De tènt ging óp zinne kóp. Di waar den uurste, mèr zoeë moette we saame nòch veul fésjes vie:re.
Den aovent vlóch vurbéj, veurdè ik ’t weest waare we al af ènt slutje. Tradiessiegetròw woor den aovent afgesloote béj de prins tusj. Kieveloeët, vraolie van de Kieveloeët, Goe Gehusseld èn kammerèùj ze waare der allemòl. Èn hoe gewèldich waar ’t um te zie: dè dréj van min barbekjoe-kammerèùj (Hans, Mark èn Willie) al hart beezich waare um bruuëtjes mi Jalapeño-péépers, Cheddar-kieës èn woorste te maake vur de gaste. Iedderieën hi kénne geniette van ’n övverheerlek bruuëtje. Kammerèùj, suupperbedangkt!
’t Fésje ging dur wies de laate uurkes, ’t waar wérkelek waor gewèldich!
Di jaor mach ik òllie prins zin, suuppergröts. Ik kie:k der nò utj um saame mi òllie enne prachtigge Vastelaovend te gòn vie:re.
Wa is vur méj nòw Vastelaovend?
- Vastelaovend is den titj wòrrin dè ge vrientsjappe makt;
- Mi de Vastelaovend dróngkege vur ’t uurst ’n pilske;
- Mi de Vastelaovend harrege vur ‘t uurst sjans;
- Mi de Vastelaovend kénnege gèk doe: ;
- Mi de Vastelaovend zingege wiesdè ge gén stèm mér hét;
- Mi de Vastelaovend huuërt iedderieën derbéj;
- De Vastelaovend is ’n fést vur jóngk èn aaw;
- De Vastelaovend vie:rege saame èn iedderieën is geliek;
- Mi de Vastelaovend geniettege van ’t begin wies ’t énjtj;
- De Vastelaovend vie:re kénne wéj hier in Limburg ’t beeste van allemòl!
- Wa is der sjònne as ’t vie:re in òw éjge dèùrep. Hier in ’t Kieveloeëteriek.
Dus we moette die Vastelaovend koestere, vie:re èn durgééve èn de kómmende ginneraasie. Zòdè ti vur aaltitj blieft bestao!
Èn we kénne um di jaor vie:re want we hébbe di jaor ’n lèkker laang sezoen, mi veul sjòn dinger vur de boech. Twé Bónte Aovende, dòr kie:k ik nòw al nòr utj. Mèr ók ’t juubbieleejum van de Véngneuze, énne kieër éllef, èn van Goe Gehusseld zèllefs twé kérre éllef, èn utjeraart ók alle ander aktievietéjte. Dus zèùrech dè ge derbéj béént. Zòdè we ’t kénne vie:re èn dè we saame gòn geniette. Want dè ving ik ’t allerbelangriekste in di lééve. Dörrum sjutj ik af mi minne spreuk…
Vier saame mi 'ne lach, geniet tòt de leesten dach!
Prins Paul I