user_mobilelogo

Prins Pascal I

 

 

 

 

't Prinselééve van Prins Pascal I

Beeste Kieveloeëters èn Kieveloeëterinne, 

Vastelaovend 2020 zit t’róp!

Vanaf 5 jannewarrie moocht ik vastelaovesgeluk gòn zèèje, vanaf zòtterdich 22 fibberwarrie waar ’t titj um te ògste. Saame mi Prinsès Femke èn Prins Mick van de Véngneuze èn Prinsès Sofie èn Prins Tijn van de Kéjsjeut hèbbe we d’r ‘ne ónvergéételeke vastelaovend van gemakt.

Óp vréjdich nò Bòlder um de sluttel óp gòn te haale um die vur de Heldese breug wér af te gééve. Óp zòtterdich de aaltitj druk bezoochte eucharristieviering mi as teema “humòr èn geluk”, wòr keplaon óp ’t éjnde nòg ’n verassing haa mi ’n knipoeëg nò ’t Sjééle Waazel Gaala. Ènslutjent de sluttelövverdracht in D’n Binger in Méél, ’n fantastiesie hèppening wòr uurst de jeugt, de kans krich um de sluttel te verdie:ne. Mi ’n prachtich stuk krigge de vòlleksvertiggewórrigers van Pieël èn Maas van repliek dur de jeugt, de jeugt prinse èn prinsèsse din ’t veurwèèrek, wórbéj de jeugtrò èfkes liet zie: hoe ge de sjaowers d’r ónder moost zitte. Dòrnao waar ’t de beurt èn méj zèèlef, ’n nééj eevenemènt is in Méél gebórre, ’t OLV Awt Limburgs Vastelaoves Festieval èn de frikandèlle fabriek kumt wér trug nò Méél. Al mi al ‘ne geslaagde aovent èn mi alle sluttels um de nèk óp wég nò ’t héjse van de verénnegings vlagge um dòrnao ’n fést te gòn baowe in ’t kluphusj. 

Ónder de mis woor döjdelek dè vur de dèrde kieër in ’t bestao van de Kieveloeët de óptòcht woor afgelast, ’n beslutj van de geménjtje. ’n Groeët kómpliemènt èn de verénneging, die gaow ging sjaakele um ’t prógramma van zóndich èn dinzich te röjle., ’t liekt ’n simpel beslutj mèr òrganniezeer dè mèr ‘s. ’t Woor ‘ne zóndich um nòjt te vergééte, ’n bómvól Kieveltrèffe mi veul sjòn óptrééjes èn as kórs óppe taart Bjorn èn Mieke. Diegeene die d’r zin geweest weete wòr ik ’t övver hèp. Allebééj de artieste drèèjde zich halverweege de sèt eum èn gaave èn di zèlde mee te maake, van groeët tòt kléénj iederieën bléérde mee. Dòrnao nòch nò de Véngneuze tèmpel béj de Vangrail, ók dòr hónge ze mi de bieën butje. Wa ’n fést waar dòr gònde!

Mòndich dwéjle dur Méél, startent béj de Stoep mi as traddiesie roeëj soep vur de Rò van Éllef èn gén roeëj soep vur ’t Kómmietee. Nò ’n kléénj uurke wér verder nò Colé. ’t Mómènt um min zoone, Marjan èn min sjònmooder in ’t zunneke te zitte, kómpliemènt èn alle ènwizzige want ge koos ’n spèèlt huuëre valle. Wa is dè ’n uunniek mómènt. Dòrnao nò ’t Kéjsjeute bal béj De Heere van Meijel, ók dòr waar ’t èrreg gezèllich. Nò ’t Kéjsjeute bal waar ’t titj um ’n hèpke te gòn ééte béj ’t Oranje Hotel, wòr ’n befèt klaorstóng. Vandòr utj hèbbe we uurst min sjònvaader èn vaader tusj bezoocht, allebééj zin óndersjééje. Waardevólle mómènte! Èn toe nò de dampende tèmpel óppe Hèldesdiek, de Siem! Dòlle mòndich béj de Siem mi as teema “Óranje”. Fést van de bóvvenste plank! De raame vlooge d’r lètterlek utj. Afslutjent trug nò ’t kluphusj van de Kieveloeët, um dòr nòch ’n aafter paartie te òrganniezeere.

Óp dinzich waar ‘t ‘ne straalende dach, groeëtendéls blaowe leucht. De Bónte stèùrem dur de Méélse straote. Wa ’n belééfenis um te èrvaare vanutj de tórre van de prinsewaage. Femielie, buurt, kammerèùj èn nattuurlek veul andere die zich in ’t zwieët hèbbe gewérrekt um zich te toeëne in de óptòcht. Nao de óptòcht liep d’n Binger vól èn utjéjndelek waar um 18.00 uurre de prisjutjréjking, ‘ne dikke próffiesiejat èn alle délneemers want vur méj zin géllie allemòl winnaars. Èn dan waar ’t zò witj, um 21.30 uurre tròkke we mi alle prinse èn proinsèsse nò ’t Kievelmènneke um de vlagge te striekke. Óp 5 jannewarrie liekt ’t allemòl zò witj wég mèr 11 kérre knippere mi de oeëge èn de
vastelaovend is wér vurbéj. Utjéjndelek in ‘ne bómvólle Heere van Meijel hèbbe we afsjéjt genómme van Prinsès Femke èn Prins Mick van de Véngneuze èn Prinsès Sofie èn Prins Tijn van de Kéjsjeut èn nattuurlek min éjge afsjéjdswoort. Wa bén ik gröts óp ur, saame hèbbe we vastelaovesgeluk maage zèèje èn ògste vur groeët èn kléénj.

’t Waar vur méj ’n ieër um de veurganger te maage zin dizze vastelaovend. Vastelaovesgeluk wao ik òllie gééve èn laote belééve, vur groeët èn kléénj. ’t Zit t’r óp, vastelaovend 2020 is utjgeblaoze um dizze óp de 11 de van de 11 de wér èn te stééke…..

Méél dank je wèl vur de ónvergéételeke vastelaovend die géllie méj, Marjan èn de kinjer hèbbe geévve.

Groeët òf kléénj van stuk,
belééve wéj vastelaovesgeluk

Prins Pascal I

Beeste Kieveloeëters èn Kieveloeëterinne,

We stòn èn de veuraovent van vastelaovent 2020, wa gé ’t allemòl snèl! Inmiddels zin géllie allemòl in bezit van ‘ne sjònne pooster mi ‘ne groeëte mèns d’róp, sjòn as ge die vur de raam haangt.
Èn béj de pooster is ók de vastelaoveskrant èngeboojje, hoopelek hèbbe géllie dòrmi veul léésplezier.
As ge de krant hét gemist, die is te koeëp béj Dikke Mik, Coolen Pluijm of Van den Beuken, uw Slager.

’t Liekt niks veur te stélle mèr zòn krant maake is tòch ’n hél wèèrek. Gò d’r mèr ènstao as ge gewoon ‘ne prins hét die nie zò veul óppe kèrrefstók hi. ’t Is dus ’n kómpliemènt vur dees awteurs in de kléénj Méélse weurt. Dòrrum noem ik ze mi veul tròts, Frans Strijbos, Koen Verstappen, Bart Verstappen, Jeroen Schriks, Fred van Rijt en Annelies Daniëls.

Nò de kranteverkoeëp èffe snèl ’n kóp soep èn ’n bruuëtje èn óp nò Venlo vur de footoo van de Limburger, ’n bietje dòwwe, vringe èn vriendelek lache èn jaowal huuër ik wét zeeker dè ik t’r prómminènt ópstao. Wil die lange prins ’n bietje nò rèchs èn nò aachter gao? Wie ik..? Nee, nee ik stao goe :)

Dan nò ’t FF-bal, de kultuureelekómmissie van RKMSV òrganniezeerde vur de 25 ste kieër ’t FF-bal. Nò wa moejleke vraoge bleef EFFE prinsès Sofie (Janssen) övver. Saame hèbbe wéj genoote van al die poodiejum mómènte èn aktievietéjte. Jammer genóch mèrrek ik wal dè ik ‘ne awwere prins bén want in de hèndighéjts spèllekes waar ik tòch ’n bietje traoger. Prinsès Sofie hi ’t fantasties gedao.

De leeste jòrre is ’t traddiesjónneel dè nò ’t FF-bal de vastelaovesvierders van ’t afgeloeëpe jaor wéére bezoocht. In di geval waar ’t vierders, want de kómpleete femielie Hoefnagels waare vastelaovesvierder gewórre. Nò ’n lèkker stuk taart, flink wa aow Méélse vastelaoves knéjters te hèbbe gedrèèjt hèbbe we ’t Frètske wér meegenómme. Ik bén benéjt wie ’t Frètske kómment jaor in de husjkaamer hi stao.

Inmiddels is de wéék vur de vastelaovent al èngebrooke èn zin we óp dinzich nòch nò ’t prinsetrèffe geweest in Remeunt. Wa ’n vérre parraade, mèr de verénneginge laote zich dòr géér zie: èn de prinse èn prinsèsse kriege dòr ècht wal 15 menutje òf feem mi ‘ne Limburgse artiest.

Óp nò de dréj dólle daag.

Groeët òf kléénj van stuk,
belééve wéj vastelaovesgeluk

Prins Pascal I

Kieveloeëters en Kieveloeëterinne,

We zin kómpleet!
Wa is dè sjòn as alle groeëte èn kléénj Prinse èn Prinsèsse van 2020 bekéént zin. Alle verénneginge kanne zich gòn ópmaake vur de dréj dólle daag èn de kómmende wééke gòn gebruukke um óp stoeëm te kómme. Afgeloeëpe wiekènt waar ‘t 2 X 11 jaor KKKM, ’n uuniek eevenemènt in Méél wòr we gröts óp maage zin. Nèrreges binne Pieël & Maas krie:ge de kinjer zòn poodiejum èn wa waare ze èntoeziejast èn fannatiek die kinjer èn de aawers nòch mieër. Sjòn um te zie: dè di zò lééft in Méél.

Èn dan in de pòwze is ’t zò witj, dè we afsjéit neeme van de Prinsès èn de Vòrst van de Kéjsjeut 2019, Kimberly èn Jens hèbbe ’t fantasties gedao. Titj vur nééj heersers, di jaor vur ’t uurst enne prins èn prinsès. ’n Wisj beslutj van
KVW um di te doe:. Wa ók sjòn waar is dè t’r uurst 13 kinjer geprissenteert woore zónder dè ge drèk koos zie: wie de nééj heersers zòn wéére. Iederieën waar óntdao van zin masker toe d’r ’n vraoge spèl gespult woor, Die
vraoge moochte Prinsès Fèmke èn Prins Mick saame mi de groeëte Prins gòn bedinke. Utjéjndelek waar ’t döjdelek, de nééj heersers van de Kéjsjeut waare bekéént, Prinsès Sofie èn Prins Tijn.

Dòrrum ók sjòn um béj min afsjéjdswoort ze allmòl óp de buunne te vraoge, saame gòn we vastelaovesgeluk belééve èn wille we Méél mee laote geniete. Nie genuumt óp ’t podiejum mèr vur prins Tijn èn de femielie zal ‘t ’n dubbel gevuul
hèbbe, dè de oopa van Tijn di nèt nie hi maage meemaake. Vanutj dees plats wil ik ze veul stèrrekte wènse.

Èn dan kie:ke we al wér ’n bietje vurutj èn dan sté t’r ènkómmende zòtterdich ’t mómbakkesbal óp ’t prógramma. ’t Zal d’r nie druk wéére want niemes hi titj… iederieën moet èrreges anders hin.

Walleecht ieën van de sjònste aovende van de vastelaovent, vermómt èn nie hèrkéént te wéére.. dè is pas vastelaovent. Dus vur diegeene die nie kénne zòtterdichaovent, tòt zòtterdichaovent.

Groeët òf kléénj van stuk,
belééve wéj vastelaovesgeluk

Prins Pascal I

Kieveloeëters en Kieveloeëterinne,

’t Is mòndich nò de bónte aovent as ik di dèrde dél van min prinselééve sjrie:f. Óndangks dè óp dizze mòdich mèèrege ’t nòrmaale lééve wér vèrder gé, kómme Marjan èn ik utj ‘ne óngeluuëfeleke “sjònne” bubbel! 

‘ne Bubbel die bónte aovent hétj èn wa vur ‘ne bonte aovent. ’t Begón al mi de femielie die méj veurafgònt èn dizze bónte aovent in ’t zunneke zaate in de fwajjee. Vóltallich ènwizzig hèbbe zéj Prins Pascal I hier óppe mèrret gezit. De uurste verassing waar al ’n féjt èn de aovent moos nòg beginne. De bónte aovent zèèlef, Méélse mènse wille kwallietéjt óp de buunne, nòw dees eediesie waar kwallietéjt van de bóvenste plank. 

Mi Spèùtj Éllef, de Érpelmèèntjes, JanSeveria’s, de winnaars van de Méélse Liedjesmiddich èn nie te vergééte de Méélse Dörskes van Lets do it waar de Méélse inbréng groeët. Di èngevult mi de Limburgse buutte kampiejoen Theo Nellen èn ’ne Amsterdamse braanie sjupper Riza Tisserand. ne Èchte aawerwètse bónte aovent mi o.a. sketsjes övver ’t OLS èn de kazzematte óppe Vòssebèrreg, gekómbieneert mi Mééls èn Limburgse sjlaagers. Èn dan nattuurlek ók de verassing vur méj as Prins Pascal I, de hélle bónte aovent/middig hèp ik belééft as ‘ngroeëte verassing. 

Mèr ik wil ’n paar mómènte èkstra ènhaale zónder iemes te kórt te doe:, as uurste de énjtj èkt van Spèùtj Éllef wòrin Wendy Dirkx saame min péétekindj Jeroen Stappers ’n sjòn tèkst han gesjrivve óp de klanke van Vastelaovesliefde van de Brummerkes. Ècht ’n ónroerent mómènt um nòjt mèr te vergééte. Dòrnééve ’t fèst wa óntstóng mi de JanSelveria’s (Jan Ghielen èn Selvera Pijnenburg), die ‘ne Limburgse mèdlie tèn gehuuëre broochte wòróp de zaal héllemòl lós kwaam.’t Is zò appart as iederieën mee gé doe: èn de zaal tòt ’n óngekéénde appooteejooze brééngt. Dan de Èrpelmèèntjes die twieë vergééte Neederlantse seldaote nò 75 jaor bevréjde utj de kazzematte, ’t zistal die d’n Um nò Méél hèbbe gesjoote in de sjeenwèrrepers zitte èn utjéjndelek afsloote mi ’n liedje vur Prins Pascal I.

Wélleke weurt die:ne ge te sjrie:ve um al dees artieste te bedanke, ik zal ze éwwich dankbaar zin. ‘Èn dan dòrnééve zal Henk Daems vanaf di wiekènt ’n verdubbeling hèbbe gekrigge van ’t èntal vòllegers óp feesboek um dòrmi zin éjge woordesjat te gebruukke, ’t bónte wiekènt waar “NETUURELUURLEK MARVELUIS” dur die “KLASBAKKE” van de Kieveloeët.
As leeste poopuuléérste zin van de Bónte Aovent, de leegèndaariese weurt van Mark Stemkens van Sint Williebròrdus “nòw zitte we d’rmi”. Ik veurzie: dè dees weurt binnekórt prónke boove de ingang van ’t kluphusj van Sint Williebròrdus. 

As Leeste wil ik CV De Kieveloeët èn mi naame de kómmissie Bónte Aovent de groeeëte kómpliemènte gééve, dangk je wèl vur di fantastiese wiekènt, dangkjewèl dè Marjan de kinjer èn ik di óp dees menier moochte meemaake .

Sjapoo.

Groeët òf kléénj van stuk,
belééve wéj vastelaovesgeluk

Prins Pascal I

Kieveloeëters en Kieveloeëterinne,

De roeëk van ’t prinsebal is ópgetròkke, de staasie footoos èn de uurste vergadderinge mi de verénneging zin alwér aachter de ruch. ’n Drukke wéék, mèr wal hél leuk, vural de reejaksies verbaaze méj nòg ’t meest. Karte Karte, èpjes, bloeme in övvervloet, mèr ók de reejaksies óp straot òf in de winkel zin övverwèldiggent. Nòg èfkes wénne èn al die èndacht mèr wal suuper leuk…

‘t Twédde wiekènt van min prinssjap stóng vur de deur wòrin ’t utjkómme van de nééj Véngneuze heersers en ’t P&M lietjesfèstieval sèntraal stónge. ’t Véngneuze prinsebal dè gehaaw woor in “Stapperééj De Vangreel” is de leeste jòrre ’n waar fésje vur groeët en kléénj. Wa sjòn um te zie: dè t’r zòveul aniemoo vanutj dizze lééftitjsgroep is um dél te neeme èn de vastelaovent èn wa waar ’t gezèllich. Zònne groeëte prins óp ’t poodiejum tusse al dè klénjer spring, hòs en zing gewèlt, dòr haa ik de dag t’r nao nòch laast van. Mèr ‘ne dikke prefiesiejat èn de Rò van Éllef, atjuudante Yara en Nic, vòrst Maurits en nattuurlek de nééj heersers Prins Mick en Prinsès Femke van de Véngneuze èn nattuurlek ók èn de wérrekgroep van de Véngneuze die di allemòl meugelek maake. Ik kie:k d’r nò utj um saame ’t vastelaoves séjzoen 2020 mi òllie te belééve.
De prinse en prinsèsse van ’t séjzoen 2020 zin béjnao kómpleet, de Kievel rolt èn die gé de kómmende wééke allieën mèr snèller ròlle.

Dan zòtterdich 11 jannewarrie is ’t zòwitj, nao mònde van verberéjding wért ‘t 26ste P&M lietjesfèstieval geòrganniezeert. Vur méj dubbel umdè ik nie allieën as prins dòr hin mooch mèr ik waar ók veurzitter van dè eevenemènt. Wa is ’t bezunder um mi ’n kléénj gezèlsjap zòn groeët fést te kanne òrganniezeere, dank èn alle kópmanne van de wérrekgroepe, de leeje van dees groepe en de mènse van butje de verénniging die belangloos hèbbe ingezit um di eevenemènt te doen slaage. Ók alle vréjwilligers die óp de aovent zèèlef hèbbe gewérrekt. Ge kaant nie mèr zónder. Övver hoe ’t waar, kiek mèr nò alle fillemkes, footoos en reejaksies óp feesboek èn nòg daageleks wért di utjgezónde béj eumroep P&M. ’t Waar fantasties, grandiejoos! Wa bén ik gröts óp iederieën, mèr vural wa is ’t bezunder um di as Prins Pascal I mee te maage maake.

Inmiddels zin we óp wég nò ‘t 3de wiekènt van ’t prinselééve, vur asnòg is ‘t ’n rustich wiekènt, mèr dòr de vóllegende wéék mieër övver.

Groeët òf kléénj van stuk,
belééve wéj vastelaovesgeluk

Prins Pascal I

Kieveloeëters en Kieveloeëterinne,

De uurste wéék van min prinsjap zit t’róp en wa vur ’n wéék! As ge gevraogt wéért um Prins te wéére èn ge zéégt “Jao” dan kan ik zégge dè de wééke die nòch gòn kómme tòt èn de utjroe:ping nie héllemòl zónder zinnewe verloeëpe. Óp zóndich 5 jannewarrie wért ’t tòch wal hél spannent. Marjan waar al wég mi Goe Gehusseld èn de jónges woore óp ’n gehéjme plèk ópgehalt um ’n titje te bievakkeere in ieën van de hootèlkaamers van ’t Óranje Hootèl. Èn dòr zitte ge dan, allieën tusj en piekerent de titj wég te kie:ke tòtdè ge kaant gao.

Èn dan gé ’t beginne, Prins Luc I van 2019 is afgtraoje en ’t spèl “Wie is ‘t?” gé van start. De énne nao de andere viel af nòdè Vòrst Wiljan vraoge stéélde èn de veurzitter van CV De Kieveloeët. De utjslach van ’t spèl waar méj bekéént, mèr ’t spèl in ’t puubliek woor vólóp meegespult. Niettemin is ‘t ’n hél ópluchting as òwwe naam is gevalle. Wa t’r dan gebeurt kan ik nie bevatte, ge gòt nò boove um òw te verkléjje, ge maacht nòg iemes bèlle. Dè leeste hi éjgelek gén zin, de soosiejaale meedieja hi méj al ingehalt. Ik moocht minne ajfoon, ajwatsj, pòrteföjje inleevere béj de atjuudant, ik wét aachteraf ók wòrrum want ’t èntal berichte in de uurste uurre ging witj övver de 200.

Ik waar néjsjierich hoe min femielie zao reejaageere, nòw dè héé géllie kanne zie óp Meijel24 èn óppe footoos óppe wèpsajt van CV De Kieveloeët. De femielie waar in ‘ne mum van titj béj ’t Óranje Hootèl, ók ónze pap van 92.
Fantasties dè héj ieën van de uurste van de femielie béj ’t Óranje Hootèl waar, héj wao d’r béj zin! Vanaf ’t poodiejum waar zin èndacht goe te zie:, tjónge wa hèp ik genoote van hèm mèr ók van de rèst van de femielie.

Dan begeent de resèpsie die duurde vur méj 11 menutje mèr in wèkelekhéjt waar ’t ruum twé uurre. Dank je wèl iedreieën vur de lieve reejaksies! Dòrnao snèl mi wa mènse ’n bierke drinke en nòg ’n fésje maake….. mèr ’t waar al
titj. Titj um nò de Sjrank te gao um ‘ne bak kòffie òf tieë te drinke mi ’n bruuëtje.

Mèr vur dè ik nò husj koos gao bén ik nòch èfkes béj min sjònvaader geweest, die wao méj géér feeliesieteere umdè ’t èrreg laastich is um béj ’t Óranje Hootèl ènwizzig te zin. Dòrnao nò De Sjrank, ’t hél pléjn nééve óns husj stóng vól fietse, d’r waar al versie:rt èn de ieëre haag stóng al klaor. Zò raar dè di òw övverkumt, al die eenersjie die mènse stóppe in de uurste uure van òw Prinselééve. Toe ik ónder de ieërehaag liep daacht ik dè iederieën butje stóng, mèr niks waar minder waor binne stóng ’t al vól.

Husjkaamer, keuke, hal èn in de mèènskeef ’t Stappertje woor nòg tòt de kléénj uurkes féstgevieërt.

Groeët òf kléénj van stuk,
belééve wéj vastelaovesgeluk

Prins Pascal I