't Prinselééve van Prins Marcel I
Prinselééve dél 5
Leeste wéék vur de vastelaovend – 2 t/m 7 fibberwarrie 2018
De vastelaovend kumt steeds dichterbéj en wa ginge de leeste wééke as ‘ne èchte sneltréjn vurbéj. Nòw al zòveul sjòn dinge maage meemaake en vural gezie en dan moet de vastelaovend nòg beginne.
VRÉJDIG
De vréjdig vur ’t leeste wiekènd vur de vastelaovend kwaam de krantekómmissie óp bezuuk. Ze kwaame de uurste druk van de Kieveloeëtekrant övverhandige en leuke annèkdootes vertélle övver de dag nao ’t prinsebal. Ze waare mi min vriende béjén gòn zitte en hébbe ’n aovend gebèùkt van ’t lache. Nééve de uurste Kieveloeëte krant kreeg ik ók nòg ’n sjòn attèntsie ter herinnering van de krantekómmissie. Dees attènsie kriegt ’n sjòn plèkske in óns husj. Béj dizze wil ik de krantekómmissie nògmaals bedanke vur dees sjòn herinnering.
ZÒTTERDIG
Óp zòtterdig waare we vruug óp pad vur ’t ènbieje van dees uunieke KIEVELOEËTE KRANT. ’t Zunneke sjeenj en René Naus en ik moochte de krant in de nééj buurt ènbieje. Nòdè de doeës mi krante leeg waar moos ik me snel klaormaake vur de éwwige tradiesie óp zòtterdig, de prinsefootoo van dagblad de Limburger (reegiejó Venlo). Nao ’t vinge van ’n parkeerplats in ’t aaltitj drukke Venlo moocht ik me saame mi vorst Wiljan mèlde béj de Maaspoort in Venlo. Óppe uurste rééj waar helaas gén plats mèr, mèr óppe twédde rééj haa ik min plats gaow gevónge. De prachtige footoo is trug te zie in de zòterdig eediesie van 10 fibberwarrie van ’t dagblad van Limburg!
Béj trugkómst in Méél mooste we drèk dur nò ’t ÈFFE-bal van min voetbalklup RKMSV. Béj ènkómst stóng iederieën al óp méj te waachte en koos ’t fést beginne. Nao jòrre van òrganniezeere béj de aktievietéjte kómmissie moocht ik di jaor as Prins Marcel I ènweezig zin óp ’t ÈFFE-bal. ’n Uunieke belééfenis die ik zeeker nie snèl mèr zal vergééte. Alle ènweezige kinjer waare dan ók in spanning wie de néjje ÈFFE-prins of prinses zao wéére. De nééj prinses van ’t ÈFFE-bal is Pam (van Enckevort). Ze ging drèk veuróp in de pólónééze en téjdes ’t voetballe óppe hindernisbaan versloeg ze méj mi ruume afstand. Ur droeëm is um bétter te wéére dan Lieke Martens en vòlleges méj is ze dòrmi óppe goeje wég. Gò zò dur Pam! ’t Waar ’n zeer spesjaale middig vur iederieën róndum Prinses Pam en ze genoote vólóp van di sjòn mómènt.
Nao ‘ne gezèllige middig in de kantiene van RKMSV ginge we óp bezuuk béj ieën van de twieë vastelaovesvierders, Erwin Verheijen. In de middig waar héj al ’n gedélte óppe högte gebroocht dur de awd prinse Tjerk I en Ron I. Mi énnige verbaazing stóng ‘t husj van Erwin en Lizette binne inkele menutje vól mi inkele leeje van de Keveloeët en ur gevòlleg. De aovend woor óp gepaaste weezje afgesloote béj ’t kluphusj van de Kieveloeët.
MÒNDIG
Dur de goeverneur Theo Bovens waar de Kieveloeët utjgenöddigd óp ’t jaorleks trugkómmend eevenemènt ’t Knoevelemint. Mi ’n tiental persoeëne van de Kieveloeët ginge we saoves nò di eevenemènt óp ’t goevernemènt in Mestreecht.De ròdszaal waar eumgetooverd tot vastelaoveszaal. We woore verwèlkómd dur gedeeputeerde Ger Koopmans en toeën woor drèk gezit vur die aovend. In plats van dur te praote halde héj vur de hélle Kieveloeët ’n rundje Lindeboom Goeverneur Blónd. Verder waare d’r veul Prinse en Prinsesse utj hél Limburg ènweezig, wòrdur ’t ‘n groeëte vérreparaade waar. Ieën vur ieën kwaame de vastelaoveskampiejoene van Limburg vurbéj, van Spik en Span tot Isa Meuwissen tot ’ne buut van ónze éjge Theo Bovens. ‘ne Aovend um nòjt mèr te vergééte, want di maake ge as prins , mèr ók as Kieveloeët, mèr éns in de éllef jaor mee. Èn ’t énjdj van de aovend kreeg ik utj haand van de goeverneur ’n uunieke óndersjééjing as herinnering èn dizze aovend.
DINSDIG
Öppe dinsdigaovend ginge we mi ’n dillegaasie van de Kieveloeët nò ’t internasjónaale Prinsetrèffe in de Oranjerie in Remeund. Wér ’ne aovend mi veul vérre en meziek. Ik zag versjillende Prinse en Prinsesse vurbéjkómme mi allerléj kreejaasies wòrvan ik daacht, kan di? Óp ’t pódiejum kwaame versjillende artieste vurbéj en moocht ik mi Susan ók óp ’t pódiejum óp. ’t Waar én groeët fést. Dizze aovend woor afgsloote dur Big Benny mi vul kónfèttie!
Inmiddels héb ik versjillende aktievietéjte maage meemaake en goe veurberéjd gòn we óns klaormaake vur de dréj dólle daag in Méél.
Prins Marcel I
Goe veurberéjd baowe,
èn ‘ne vastelaovend um van te haawe.
Prinselééve dél: 4
Kééj Knappe Kwéékmiddig - 28 jannewarrie 2018
Óp zóndigmiddig waar ’t éjndelek zòwitj vur de jeugd van Méél. Éjndelek koose ze ur liedjes en prissentaasie ten gehuuëre brénge in d’n Binger. Béj ènkómst waar de zaal van d’n Binger al goe gevuld en dè waar natuurlek sjòn vur de jeugd van Méél. Verassing vur méj waar dè de néjje veurzitter van de sjuurie, minne éjge vriend Jeroen Nijssen is. Tòp dè héj di hi ópgepakt!
De jóngste jeugd tot en mi groep 6 waar as uurste èn de beurt. Wa hébbe we veul talènt in Méél en wa zin de groepe lèkker groeët. De zaal begoos al mèr vóller te raake, vur méj ’n tieëken dè de vastelaovend ónder de jeugd lééft in Méél.
Hiernao woor afsjéjd genómme van Prinses Luna en Vorst Driek. Nao ’n gewèldig jaor, leeste jaor béj de Kéjsjeut, zin ze övvergegao nò de Véngneuze. Nao ’n èntal óptrééjes van de winnaars van furrig jaor koose we éjndelek nò de bekééndmaaking van de winnaars van 2018. Wa stónge ze allemòl veur èn ’t pódiejum in spanning af te waachte. Ieën vur ieën woore de winnaars nò boove gehald.
Nao ’t bekéénd maake van de winnaars tot en mi groep 6 kwaam de ónthulling van de néjje Rò van Éllef, Vorstin en Prins van de Kéjsjeut. Óp de muziek van de Klómpedans (Rowwen Hèze) woor ’t boerebruispaar bekéénd gemakt. Uurst kwaam de rò van Éllef nò boove en utjéjndelek waar ’t dan zò witj. Uurst woor Vorstin Sterre (Cranenbroek) nò vurre gehald en wa haa ze ’t toch wèèrem. Dòrnao kwaam Prins Sem (Hoefnagels) aachter ’t masker utj. ’n Prachtig kóppel dè as nééj heersers van ’t Kéjsjeuteriek d’r drèk ’n fésje van ginge maake! ’t Véjftal heersres in ’t Kieveloeëteriek is nòw kómpleet en de mòndig d’róp hébbe we prachtige footoos gemakt.
Nao de bekééndmaaking van de nééj heersers van ’t Kéjsjeuteriek moochte de awwere van de bazissjool ur kunste vertoeëne. Hier kwaam wér nò vurre dè we veul muziekaaltalènt béj de jeugd hébbe en hoopelek ók vur de toekómst van de liedjesaovend.
Béj dizze wil ik alle winnaars van de Kééj Knappe Kwéékmiddig nògmaals feeliesieteere. ’t Waar ‘ne middig wòrin de jeugd sèntraal stóng en sjòn dè veul aawers, gròtaawers, vriende en femielie óppe bieën waare, zòdè de zaal goe vól stóng. As prins waar ik gröts óp alle kinjer die mee hébbe gedao. Mi Prins Sem en Vorstin Sterre hi de Kéjsjeut twieë fantastiese heersers. We zien óns snel mi de vastelaovend, óppe sjool en ’t Kéjsjeutebal béj ’t Oranje Hotel.
Prins Marcel I
Goe veurberéjd baowe
èn ‘ne vastelaovend um van te haawe
Prinselééve dél: 3
Méélse Vastelaovesparade - 20 en 21 jannewarrie 2018
Óp zòtterdig en zóndig stóng ik vur de uurste kieër vur ’n groeët publiek wòr ge de hélle aovend nò de achterkant van de artieste kaant kieke. ‘ne Spannende aovend vur méj wa vur verassinge d’r allemòl kwaame. Dizze kieër kwaame d’r béjnao allieën mèr Méélse artieste, wa ik natuurlek prachtig vóng. D’r is niks sjònner dan de talènte van éjge bójjem te zien sjittere.
As uurste kwaam d’r ’n skètsj övver de Méélse aktuuwaalietéjt, wòrin natuurlek ónze éjge Frits Berben (Wout Sleegers) ’t woord naam en di prachtig èn èlkaar pròtte, zòas héj di as génne andere kan. Héj moos zèllefs èn de bootcamp van Jim Heeskens mee doe, mèr dòr waar héj nie zò goe in. Saame mi Peter Daniëls (Benny Vaes) nóm héj plats óp ’t bènkske en koos héj alles óp ’n afstand bekieke.
Hiernao vòllegde d’r ’n internasjónaal buuttekampiejoensjap, want dè is veul gezèlliger vòlleges Frits en Peter. Ieën vur ieën kwaame de buutte, Thijs Engels (Ruud Strijbos), Marga Oomen (MarkBasten), Donald Trump (Hidde Knops), Teun Heldens (Bart van Heugten) en Nard Vissers (Paul Joosten), nò vurre.
Wa ’n talènte en wa héb ik gelache, stuk vur stuk ur éjge krejaasie en uunieke mómènte. Nao de uurste èkt kwaam de uurste buuttereedner óp ’t pódiejum. Ónze éjge Koen Verstappen wér mi durdaachte one-liners övver de sleur van ’t awd wéére.
Hiernao kwaam de uurste verassing, ‘ne buut van én menutj, utjgevoerd dur Hans Martens. Héj viel drèk óp ’t pódiejum en de toeën waar gezit. Héj kreeg de lachers binne én menutj óp zin haand. Nao dizze buut van én menutj kwaame de daames van Let’s do it mi urre sjówdans óppe buune.
Nao de pòwze kwaam de muziekaale groep PadaPada óp ’t pódiejum mi ’n oode èn de Méélse vastelaovend en ’t dèùrep Méél. Natuurlek kwaame ók de winnaars van ’t Mééls Vastelaovesfèstieval langs um ur knallers te laote huuëre. De twédde verassing, ’n buut van én menutj, woor utjgevoerd dur Frits Berben. As Goeje Kloeët van de Kieveloeët haa héj zich prachtig veurberéjd en broocht héj ’n oode èn de pólietieke karriejéére mi zin pótloeët. Én menutj um nòjt mèr te vergééte, wa héb ik dubbel geléége. Nao dees buut kwaam Kareltje van ’t kamp, tónpraoter utj Marheeze en in ’t dageleks lééve Erik Mulder genaamd. Wa ’n buut, vanaf de uurste menutj nóm héj min vriende te graaze en ze hapte mèr al te géér. Ik héb nie allieën dubbel geléége, ’t hél publiek lag dubbel. Mi zinne Mercedes hi tjie hél wa avóntuure belééfd die héj óp èrreg luudieke menieër utjbild en vertééld. Ècht aawerwèts bèùke van ’t lache. De Érpelmèèndjes kwaame hiernao mi ’n luudieke skètsj övver versjillende verénniginge die meedoen èn de beeste verénniging van Méél. De Heimat Kepèèl, Brandweer, Biljartklup, Méél en TWC de Vélo waare de verénniginge die mee din en d’r waare wénnig goej antwoorde. Terwiel ge Mark van Rooij tòch wal ècht kaant beréjke as t’r brand is of wannieër ge de uurste Nederlandse Toerwinnaar weelt weete en ge Jan Janssen ópbèèlt. Utjéjndelek moocht ik as prins Marcel I de winnaar utj ’n koom gòn visse. De winnaar waar de Heimat Kepèèl en zéj broocht ónder léjding van Geert de Leeuw, René Basten en Andy Geuijen ’n éjge nummer vur prins Marcel I ten gehuuëre. ’n Èkstra spesjaal mómènt vur méj as prins zinde. ’n Hél groeëte ieër en ’n prachtig nummer.
As kórs óppe taart makte de Breurkes utj Panninge d’r óp zòtterdigaovend nòg ’n fantasties éjnde van. Mi èchte vastelaovesmeezingers broochte zéj iederieën in de zaal in eufórie. Lèkker mi ur meezinge midde in de zaal en dan róndum òw hin kieke en allieën mèr féstende mènse zie is iets wa ge as prins nòjt mèr vergét, ’n uuniek mómènt.
’t Waar ’n ónvergéételek wiekènd mi zòveul spesjaale mómènte wòrin de Méélse talènte zich koose laote zie. As prins bén ik enòrrem gröts óp wa t’r di wiekènd allemòl óppe buune is vurbéjgekómme. Lòt di ’n veurboode zin vur de rèst van de vastelaovend.
Prins Marcel I
Goe veurberéjd baowe,
èn ‘ne vastelaovend um van te haawe
Prinselééve dél: 2
Véngneuze Prinsebal 12 jannewarrie 2018
De uurste vréjdig nao ’t prinsebal stóng min uurste offiesiejeele aktievieteit óp ’t prógramma. ’n Groeëte verassing stóng méj te waachte, mèr dè wees ik natuurlek nie. Béj ènkómst béj de Vangrail waar ’t al ‘n gezellige drukte in ’t kefee. Veul jeugd stóng in afwaachting, van wie zalle de néjje Prins en Prinses van de Véngneuze wéére.
Nao ’n heerleke ènkóndiging van Ellen en verassende persoeëne in ’t puubliek, ónze pap en óns mam, begón d’r béj méj iets te daage. ’t Zal toch nie, dè min nichje Sanne Prinses zal wéére van de Véngneuze? Uurst woor d’r afsjéjd genómme van Prins Merlijn I en Prinses Anne I en moochte ze ur fótó veréwwige in de gallerééj van de Vangrail. Dòrnao woore alle kandiedaate vur de Rò van Éllef, vorst, Prins en Prinses ’t pódiejum ópgeroepe en dòr stóng min nichje Sanne ók tusse. Ze ginge mi z’n alle nò bóve en as uurste kwaam de nééj vorstin, Elke Joosten van de Véngeuze nò ónder. Ze nóm drèk ’t woord, zòas dè ’n vorstin betaamt en vroeg of de andere ieën vur ieën nò ónder kwaame. Utjéndelek bleeve d’r nòg twieë persoeëne övver en dè waare Timo èn Sanne. Ze kwaame nò ónder en éjndelek hoefde Sanne ur gehéjm nie langer te bewaare en koos ze laote zie dè ze de prinses van de Véngneuze is. Wa ’n verassing en zò sjòn, ’t zit béj óns in de femielie!!!!!
Iederieën woor in staat van paraathéjdj gebroocht vur ’t fést en ik mooch natuurlek nòg ’n weurdje doe. Ik kreeg de uurste óndersjééjing van de Véngneuze van Prinses Sanne I. Ók mooch Tante Melanie nò bóve kómme en hébbe we saame óp ’t pódiejum al ’n kléénj fésje gebaowd.
En dòrnao kwaam de ónthulling van urre spreuk: ‘Èffe nie mi de bal èn de zwier, mèr ’n vèt fésje baowe hier!’ Nòw ’n vèt fésje hébbe we saame gebaowd, de Vangrail sjudde óp zin fundeering. Ik wét, dè saame mi de Véngneuze, mi Prins Timo I en Prinses Sanne I, we zeeker ’n vèt fésje gòn baowe de kómmende vastelaovend.
P & M Liedjesfèstieval in Egchel – 13 jannewarrie 2018
Nao ‘ne èrreg gezèllige vréjdigaovend koos ik me gòn ópmaake vur ’t vóllegende fésje. ’t P & M Liedjesfestieval saame mi de Klèpbókse. Béj ènkómst in ’t kluphusj, de Heere van Meijel, zag ik tot min verbaazing dè t’r ’n èntal van min vriende mee ginge nò Egchel. Natuurlek èrreg gezèllig en mi ’n vólle bus ginge we vur ’t uurst de breug övver béj Méwwes.
Èngekómme in Egchel woore we vur de deur afgezit en kreeg ik drèk ‘ne miekrófoon van umroep P & M ónder de neus en waar min uurste intervjoe ’n féjt. De Klèpbókse moochte ’t fèstieval mi ‘ne groeëte “Knal” aftrappe en hébbe Méél wér óppe kart gezit. Dòrnao hébbe we ’t fést durgezit in de hal van ‘Steegs Aanhangwagens’ en hébbe we genoote van ‘ne sjònne aovend mi vriende, Klèpbókse en Kieveloeët. Jòmmergenóg hébbe we génne prisj mee nò husj kanne neeme, mèr saame mi de Klèpbókse hébbe we d’r ’n prachtig fést van gemakt.
Di fésje woor dur min vriende en de Klèpbókse in de bus durgezit en de sfeer zaat t’r goe in óppe trugréjs. Peter Daniëls hi zich koostelek vermakt mi Toon Berben saame óppe aachterbank van de bus. Émmel övver de breug en óp vertraowde bójjem zaate we ’t fésje wér dur in óns kluphusj de Heere van Meijel. ’t Barpersónieël (Ivo Naus) haa zich goe veurberéjd en zitte de juuste plaat van Veul Gère èn béj binnekómst. ’t Vuulde drèk as tusjkómme! De Bubs waar ók ènwizzig, nòdè ze béj CMC alaif 2018 waare geweest. Ze kwaame jòmmergenóg ók mi leeg haand tusj, mèr weeste dè t’r béj ’t kluphusj nòg zeeker ’n fésje te baowe viel.
Saame mi de ènwizzige vastelaovesvierders hébbe we d’r nòg ‘ne tòp aovend van gemakt.
Prins Marcel I
Goe verberéjd baowe,
èn ‘ne vastelaovend um van te haawe
Prinselééve dél: 1
Prinsebal – 7 jannewarrie 2018
Hallef nóvèmber woor ik gevraogd dur de veurzitter van de kieveloeët um Prins van Méél te wéére. Wa ’n ieër en en wa ’n verassing die ik nie zag ènkómme.
Mèr dan… Nòw moete we ’t gròtste gehéjm van Méél vur óns haawe. Hoe gòn we dè doe? Ieën van de uurste wiekènde kwaam ik Erwin Daems teege béj de Heere van Meijel. ’t Uurste wa tjie teege méj zee waar dè ik de néjje prins van de Kieveloeët ging wéére. Ik daacht béj mezèèlef: ‘Hoe kan dè nòw, ziet héj dè èn méj of is ’t puur gisse”. Gelukkig héb ik nie te veul laote blieke en ginge we mi ónze vriendegroep ‘ne sjònne stapaovend tegemoet.
Dòrnao kwaame Maud en René óns footooboek van West-Amerika ‘ne kieër bekieke. En latter óppe aovend kwaame we óp ’t gesprek wie d’r de néjje prins van Méél zao wéére. Maud en René begoose te gisse mèr kwaame nie béj méj utj, terwiel ik toch ècht nééve ur óppe bank zaat. Min vriendin Susan ging vroolek óp di ónderwèrrep verder en zò kwaame we alles te weete wa óns te doe stóng nao 7 jannewarrie. ’n Prachtig veurbild van ‘ne èchte Kieveloeëter die presies wét hoe ’t zit mi de vastelaovend.
Dan is ’t éjndelek zò witj, die bruchte zóndig 7 jannewarrie 2018. Alles waar goe veurberéjd, mèr sommige dinge kanne ge nie in de haand haawe. ’t Waachte duurde toch nèt iets te laang prins John I. Di haa natuurlek zin reeje en ’t is òw te vergééve. John en Jolanda béj dizze nògmaals prófiesiejat en tot óppe brulleft. Jao dòr stóng ik inmiddels in de keuke en ’t leeste stukske van ’t veurstélle waar gestart. Benny Vaes, Toon Berben en Sjoerd Strijbos mooste alle dréj nò boove kómme en de leeste hint woor bekéénd gemakt. Vurdè dizze hint bekéént woor gemakt waare Benny en Toon ’t t’r al övver éns, dè de néjje prins van de Kieveloeët, Marcel Thijssen woor. En dòr kwaam ik dur de deur as néjje prins en ge moost de gezeechte ’s zie van min kammerèùj en bekéénde! Wa ’n óntlaajng en ’n verassing vur veul mènse! Óns mam waar héllemòl van slag af en geluuëfde ’t nòg aaltitj nie dè ik ’t waar gewórre tòtdè ze ènkwaam in Het Oranje Hotel.
Toe begoos de resèpsie en kón ik de veul leuke feeliesietaasies en reejaksies óntvange. De gezeechte en weurd van veul mènse hébbe me diep gerakt en ik héb t’r van genoote. De resèpsie vloog vurbéj en ’t fést koos beginne. Wa waar ‘t ’n fést, saame mi femielie, vriende, bekéénde en alle ènwizzige Méélse vastelaovesvierders, béj Het Oranje Hotel. ’n Spesjaal mómènt is as Susan en ik de leucht in wéére geheesse en ge övver iederieën hin kiekt en saame kéént geniete van ’t mómènt en iederieën um òw hin fést èn ’t viere is. Béj tusjkómst waar ’t husj al sjòn versierd dur ónze nééj buurt. Béj dizze wil ik de buurt vur de snelle sèùrves bedanke. Di waar ‘ne start um nòjt te vergééte en we hébbe nòg tot saoves laat béj óns tusj gebòrreld.