user_mobilelogo

Prins Luc I

 

 

 

 

't Prinselééve van Prins Luc I

‘ne Grötse Prins, die trug dinkt óp ’n fantasties jaor wòrin wéj saame VASTELAOVEND gevierd hèbbe.

Kieveloeëters en Kieveloeëterinne, wòr ik in minne oopeningsspiedsj zéé: “’t Gé gebeure!”, vertél ik nòw in min Prinselééve, dél 11 èn òllie: “’t Zit t’r óp!”. ’n Jaor laang hèp ik as Prins Luc I veuróp maage gao. Wa ’n gewèldig jaor, ’n jaor wa vur aaltitj in min geheuge zal blie:ve stao, ’n jaor wa ik nòjt zal vergééte.

Ik wét as d’n dag van geestere dè de veurzitter méj vroeg of ik de néjje heerser wao wéére. Vanaf dè mómènt beginne ge òw al ’n bietje prins te vuu:le. ’n Gevuu:l wa óp ’t prinsebal allieën mèr bevèstigt woor, want wa bén ik dur òllie óp ’n fantastiese menier ónthalt. Dè gevuu:l is ’t ganse jaor geblivve, béj élleke aktievietéjt. Wòr ik as prins waar, ik vuulde me prins.Ik hèp méj duk afgevraogt wòr dè vanaf kwaam, dè gevuu:l. Zit dè in òw, òf kumpt dè in énne kieër in òw nò boove? Én ding wét ik zeeker, ’t zin de mènse um òw hin die òw dè gevuu:l gééve. Géllie hèbbe méj prins laote zin èn méj laote geniete van di bezundere vastelaoves jaor

Ik hèp ’n jaor veuróp maage gao saame mi Prinsès Kimberly en Vorst Jens van De Kéjsjeut, mi Prins Maurits en Prinsès Isa van de Véngneuze en mi FF prins Joep. Ónzèttent gröts bén ik óp òllie, óp al die sjòn mómènte die wéj saame hèbbe maage belééve. Di zal vur aaltitj “óns vastelaoves jaor” blie:ve.

’t Is vur méj óngeluuëfelek dierbaar geweest dè min femielie en vriende zò intèns mi méj hiervan genoote hèbbe. Övveral zin zéj d’r béj geweest en hèbbe ze méj gesteunt. Saame hèbbe wéj d’r ’n óntzèttent bezunder jaor van gemakt.

D’r is “iets” wa òw prinse jaor kómpleet makt. Èn dè “iets” is De Kieveloeët: ’t Kómmietee, de Rò van 11 en de ÈnHANg. ’t Is óngekéént wa géllie vur méj betieëkent hèbbe. Wa kénne géllie iemes gelukkig laote zin, wa kénne géllie iemes laote straole, wa kénne géllie iemes prins laote zin. Wa bén ik dankbaar dè ik as prins, saame mi òllie en ók saame mi Goe Gehusselt ’t afgeloeëpe jaor hèp maage vie:re.

As ge ’t dan övver SAAME hét, dan kan ik minne Han utjeraart nie vergééte. Wa bén ik blééj dè ik di mi òw hèp maage meemaake. Saame hèbbe wéj d’r ’n fantasties jaor van gemakt Mi òw hèp ik kanne doe: wa ik wao doe: saame mi iederieën vastelaovend vie:re. 

Kieveloeëters en Kieveloeëterinne, dank òllie wèl.

VASTELAOVEND SAAME, DÒR DRÈÈJT ’T UM.
PRINS LUC I EN HAN

Geluukig bénne ge prins vur ’n gans jaor….wéj gòn wér saame VASTELAOVEND viere.

Kieveloeëters en Kiveloeëterinne, nò ’n èntal mònde “reust” is óppe 11 de van de 11 de ’t nééj vastelaovesséjzoen wér van start gegao. Nie dè de Kieveloeët stil hi gezééte want aachter de sjèèreme wért t’r druk vergaddert um d’r vur te zèùrege dè in ’t nééj séjzoen ók de kievvel wér zal ròlle.
 
’t Vuulde goe um de steek wér óp te hèbbe, um de mantel wér eum te vuule en de sèpter wér in de haand te hèbbe. Èn as ge dan wér saame mi iederieën, de Kieveloeët, de ènHANg, Goe Gehusseld, de Kéjsjeut en de Véngneuze, geinstalleert béént dan vuule ge òw wér kómpleet. Sjòn as ge dan groep zis óppe sjool gòt óphaale um vervòlleges mi z’n alle nò ’t Kievelmènneke te gao. As ge dan wér òw femielie, vriende en alle andere vastelaovesvierders ziet stao, dan besèffe ge wér hoe de vastelaovend lééft in Méél en hoe bezunder ’t is um di saame mee te maage maake. ‘ne Fantastiese middig vòllegt dan in óns kluphusj wòr vólóp vastelaovend geviert woor èn ’t nééj séjzoen dus wér féstelek begónne is. Gröts ók óp de dörskes van Lets Do It, die èn hél Limburg wér hèbbe laote zie: hoe goe ze wal nie zin. DANK èn iederieën vur dizze sjònne dag!
 
Daags nò de 11 de van de 11 de stóng de “vastelaoveslès” óppe sjool óppe agènda. Al jòrre ’n traddiesie um èn groep 7 en 8 wa övver de Méélse vastelaovent te vertélle. Sjòn as ge dan ziet hoe èntoeziejast iederieën is èn alles van òw wille weete. Ók ónder de jeugt lééft de vastelaovent, Dank èn de sjool, de jufs èn de mésters vur urre tidj en dank èn méster Hidde vur de goej veurberéjding.
 
’n Aktievietéjt die nie mèr wég te dinke is in ’t vastelaoves gebeure is de Liedjesmiddig.. Vur méj ’n dubbele ròl naamelek as Prins èn as délneemer, mèr allebéé:j mi dezèllefde intènsie, naamelek vastelaovent vie:re. ‘ne Gewèldig sjònne
middig mi ’t gròtste kómpliemènt èn alle délneemers, wa fantastiese liedjes zin d’r wér gemakt. Géér wil ik C&A (Colinda en Anita) speesjaal bedanke vur ur liedje “Sjònne Prins”. ‘ne Dikke prefiesiejat èn de winnaars Blieve Lache. Zéj zalle Méél óp 11 jannewarrie verteegewoordige óp ’t P&M Liedjesfèstieval.

Èn dan in énne kieër sté òw leeste aktievietéjt óp ’t proogramma, ’t Sjééle Waazel Gaala. Nóg énne kieër ’t groeëte poodiejum óp vurdè der straks óp 5 jannewarrie afsjéjd genómme gé wéére. Ik wao dòr nòg ’n speesjaal moomènt van maake… ’t liefst saame mi minne Han. Èn dè ‘t “speesjaal” gewórre is, dè hi iederieën kanne zie: die der béj geweest is. Han stapt gewoon de buute-toon in èn zèùregt dè de hélle zaal moet bèùke van ’t lache. Wa bén ik gröts óp òw èn óntzèttend bedankt dè géj di hét wille doe:. ’n Fantasties begin van dizze gewèldige aovend, want wa hèp ik genoote van alle buutereedners en tónpraoters. Hoe krie:ge ze ’t verzónne, alle woordgrappe en sjééle waazel. ’n Óptrjééje van Lets Do It makte dizze aovend héllemòl kómpleet. ’t Is dan ók sjòn um nò afloeëp van òllie te huuëre dè géllie zò genoote hèbbe.
 
Wéj hèbbe wér saame ’n stukske vastelaovend belééft.
 
VASTELAOVEND SAAME, DÒR DRÈÈJT ’T UM
PRINS LUC I

Nie de dréj mèr véjf Dólle Daag kómme d’r èn! Véjf daag die allieën mèr in ’t tieëken van VASTELAOVEND stòn. 
 
Kieveloeëters en Kieveloeéterinne, ik woor vréjdig mèèrege óppe tidj wakker en wees: ’t gé gebeure! Wa keek ik utj nò de daag die kómme gòn. Vréjdig övverdag nò de sjóle. Uurst nò de allerkléjnste béj de Stichting Kinjer Ópvang. Toe nò de bazissjool wòr wéj de groepe van de ónderbaow in ur klas ’n bezuuk gebroocht hébbe. Vervòlleges hébbe wéj same mi de bóvebaow in de sporthal nòg ’n groeët fést gemakt. De vastelaovend lééft ónder de jeugd! Vréjdigaovend richting Beringe nò de machtsövverdracht van de geménjtje Pieël & Maas. Bezunder um mi alle prinse en prinsesse van ónze geménjtje same vastelaovend te viere en natuurlek “de sluttel” van de burgeméster in óntvangst te mage neme. 
 
Zòtterdig övverdag mi de Kéjsjeut en de Véngneuze de puntjes óppe “i” gezit vur de vastelaovesmis en sluttelövverdracht. Wéj wòn d’r vur zèùrege dè di iets spesjaals zao gòn wéére. ’t Waar ók hél bezunder hoe wéj same mi keplaon Roger en mi meziek van die Heimat Kapelle, de vastelaovesmis, gesjrivve dur Koen Verstappen, moochte ópdrage. Mi wa spanning vertròkke wéj vervòlleges richting d’n Binger um dòr vur ’n groeét publiek de sluttel te gòn bemachtige. Hoe gröts bénne ge dan as Prinses Kimberly, Vorst Jens, Prins Maurits en Prinses Isa dòr óp ’n fantastiese en mi veul humòr ur veurdracht, gesjrivve dur Hidde Knops, èn iederieën veurdrage. As ge dan zèèlef èn de beurt béént vuule ge de spanning, mèr nao de uurste zin kriege vleugels en dan is de tèkst, gesjrivve dur Ger Basten, in énne kieër ’n genòt um te mage veurdrage. Dank èn de geménjtje en iederieën die hier èn meegehòllepe hi. Nao ’t héjse van de vlagge béj ’t Kievelmènneke nòg ’n groeët fést in óns kluphusj gemakt.  
 
Iets wòr ge as Prins nò utjkiekt is natuurlek um bóve óppe prinsewage te stao! As ge dan van bóve af alle sjòn afgewéérekte krejasies vurbéj ziet kómme dan duu dè wa mi òw. Wa kan Méél gröts zin mi zòveul délnemers èn de Bónte Stoet. As de prinsewage dan in beweging kumt en aachter de óptòcht ènslutj dan kómme ge as prins óp ‘n “raoze” wòllek te zitte. Wa ’n vòllek nééve de kant, wa ’n èntóziejasme, ik héb gén sekònde stil kanne blieve stao. En as dan óp ’t éjndj òw femielie en vriende groep ‘ne ieëre haag vèùreme, dan hawe ge ’t nie druuëg! ‘s Aoves nò ’t Oranje Hotel vur  de utjslag van de óptòcht. ’n Gewèldig fést wòr vur méj allieën mèr winnaars béj ènwizzig ware. Ók vandaag wér natuurlek afgeslóte in óns kluphusj. 
 
De mòndig sté in ’t tieëken van:”dwéjle dur ’t Kieveloeëteriek”, same mi hòfkepèl Goe Gehusseld. Wéj begónne óppe Stoep wòr ik verast woor dur de Roeëj mi ’n sjòn kedoo. Van dòr utj nò Colé, wòr wéj dur de Nééj Zwaarze óntvange wóre. ’n Spesjaal bezuuk um dè dòr de femielie óndersjéje wért en ’t woord tòt méj reechte…. DANK! Dòr nao ’t Kéjsjeutebal wòr de jeugd in spanning sté te waachte óppe utjslag van de óptòcht. Hier ók wér allieën mèr winnaars en wa is ’t gewèldig um same mi òllie vastelaovend te viere! In de aovend nò de Siem wòr ze óns mi ‘ne “ieëre haag” stónge óp te waachte. Dólle Mòndig waar vur dizze kieër Raoze Mòndig, dus ik héb mi alle plezier min blaow strikske en pòchet eumgewisseld vur ‘ne raoze variejant. Gewèldig hoe de Siem hier mi eum gegao is! Nòg in de late uurkes vastelaovend gevierd in óns kluphusj. 
 
Al jòrre sté óppe dinsdig ’t Kieveltrèffe óp ’t prógramma. “ne Middig mi spesjale veurdrachte. De Kéjsjeut en Véngneuze liete zie dè ze óp “urre” meziek lós kénne gao. Minne vriendegroep, de COM, awd prinse en alle vastelaovesvierders veraste méj mi ur veurdracht. ’n Groeëte verassing waar dè ’n groeët gedélte van de kaast “Pròt mèr Mééls” ’n stukske van de revuu óppe buune broochte.. Allemòl óntzèttend bedankt vur de sjòn óptrééjes. Óp ’t éndj van de middig woor de vastelaovesvierder 2019 utjgeroepe en da was niemes minder dan de femielie Hoefnagels. Prófiesiejat, géllie verdient ‘t! In ’t begin van de aovend broochte we ’n bezuuk èn de Vangrail, ’t kluphusj van de Véngneuze. Wa ’n enerzjie hébbe die, ’t daak ging d’r af! Toe mi z’n alle, de Kéjsjeut, de Véngneuze en de Kieveloeët mi ‘ne hoeëp vastelaovesvierders nò ’t Kievelmènneke um de vlagge te strieke. Nò ’n paar emósjónele mèr sjòn weurd van iederieën in óns kluphusj hébbe wéj nòg ’n paar uurkes vastelaovend gevierd. 
 
‘ne Vastelaovend um nòjt te vergééte. Same mi de Kieveloeët, hofkepèèl Goe Gehusseld, de Véngneuze, de Kéjsjeut en alle vastelaovesvierders. Wa bén ik gröts óp hoe Méél same vastelaovend gevierd hi! BEDANKT!

VASTELAOVEND SAAME, DÒR DRÈÈJT ’T UM
Prins Luc I

De wéék vur de Dólle daag zaat vól mi spesjale VASTELAOVES mómènte.

Kieveloeëters en Kieveloeëterinne, mòndig in ’t begin van de aovend woor Silvie Geuns utjgeroepe tot vastelaovesvierder van Pieël & Maas. Umroep P&M, femielie en vriende ware béjén gekómme um Silvie te verasse. ’n Sjòn fésje béj iemes die dizze tietel dik en dubbel verdiend hi. Dòrnao nò husj umdè de Vraolie van de Kieveloeët óp bezuuk kwame. Wa ‘ne gezèllige aovend!

Dinsdig mi ’ne man of twénjtjig richting Remeund nò ’t internasjónaal Prinsetrèffe in de Oranjerie. Wa ‘ne hoeëp vérre! D’r wore iederes kieër ’n stuk of 15 prinse veurgestééld en óp ’t pódiejum geroepe die èfkes same mi ‘ne artiest lós kónne gao. Wa waar dè ruig um èn al die mènse te laote zie dè ik de prins van Méél bén!

Dónderdigmiddig hébbe wéj ’n bezuuk gebroocht èn ’t zèùregsèntrum. Gewèldig um te zie dè ’n èntal medewéérekers ur bewoners ‘ne sjònne vastelaovesmiddig bezèùrege. Hél dankbaar um same mi de bewoners van ’t zèùregsèntrum en mi prins Robin en prinses Yvonne van CV. De Ulewappers utj de Nirkant vastelaovend te viere. ’t Bezuuk waar kórt want wéj moose ók nò de BSO SamSam. Wa ’n ónthaal dur al die kiendjes. Veul tieëkeninge en veural sjattige en lieve knuffels gekrigge.

’s Aoves zin vòrst Wiljan en ik nòg óp bezuuk geweest béj ’t wagereechte van de Kéjsjeut en de Véngneuze. Bezunder um te zie hoe de vastelaovend mènse béjèlkaar brééngt. Zòwal de jeugd as de aowers hébbe laote zie dè ze same in ‘ne kórte tidj ‘ne óntzèttende hèchte band mi èlkaar kanne kriege. Gewèldig um mi “de toekómst” veuraf èn de de dólle daag èfkes ’n spesjaal mómènt te belééve.

De ènloeëp is gemakt, wéj gòn same vastelaovend viere!

VASTELAOVEND SAAME, DÒR DRÈÈJT ’T UM
Prins Luc I

‘ne Zónnige zòtterdig die dur spesiejale mómènte de VASTELAOVEND nòg wa èkstraas liet straole!

Kieveloeëters en Kieveloeëterinne, goe um te zie dè t’r óp zòtterdigmèèrege um hallef 10 ‘ne groeëte groep (awd) Kieveloeëters klaor stónge um de krant  te gòn verkoeëpe. ‘ne Krant die vól sté mi ludieke stukskes en fotoos en natuurlek mi advertensies van óndernemers die de Kieveloeët ’n wèèrem hart toedrage. Alwér de 68e ediesie! Dank èn de krante kómmissie vur ’t samestélle van de krant en natuurlek DANK èn diegene die de krant gekaocht hébbe. Moochte ge nòg ‘ne krant wille, ze zin nòg te koeëp béj Coolen-Pluijm, van den Beuken uw slager en Pluijm Relaxstoelen. De moejte wért um d’r ’s goe vur gòn te zitte en alle sjòn verhale te lééze.

Tussendur nòg èfkes nò Venlo, ’t riek van Jocus geweest um de “Prinse fótó” te make. Mi mieër dan vértig prinse stòn wéj óppe fótó. ‘ne Hoeëp, mèr ónzèttend sjòn um die allemòl same te zie. Vur de vastelaovend kumptjie in de gezit te stao.

Zòtterdigmiddig stóng ’t EFFE BAL óp ’t prógramma. ’n Aktievietéjt die al mieër dan 20 jaor dur de aktievietéjte kómissie van RKMSV geòrganniezeerd wért. Versjillende E-tjes en F-jes zate in spanning te waachte. Wie wért vur èfkes ‘ne EFFE prins of prinses? ’t Woor ‘ne prins en wa vur énne: Prins Joep I (Joep Bots) Ik héb genóte umdè ik zag hoe Prins Joep I zò èn ’t geniete waar. En nie allieën prins Joep I, mèr ók de hél famielie Bots die d’r béj ware zag ik straole. ‘ne Bezundere middig die dur de Kieveloeët nòg èfkes spesiejaler woor gemakt dur prins Joep I mi zin femielie en min pap en mam ’n bezunder mómèntje te gunne! RKMSV ók géllie bedankt vur dizze fantastiese middig.

Hoe sjòn en spesjaal is ’t um mènse te zien geniete as t’r same vastelaovend gevierd wért!

VASTELAOVEND SAAME, DÒR DRÈÈJT ’T UM
Prins Luc I

’t Héélt mèr nie óp. Wa gewèldig as ge mi òw tènnesverénneging LTC Meijel, mi òw wèèrek Holand Casino Venlo, De Fieëstnaaze utj Héjtse en alle Kieveloeëters same VASTELAOVEND maagt viere.
 
Kieveloeëters en Kieveleoeëterinne ’t gé mèr dur, de ieën verrassing nao de ander. Óngeluuëfelek wa d’r allemòl vur méj geòrganniezeerd wért. Dónderdigaovend nò min klupke wòr ik al mieër dan dartig jaor lid van bén, LTC Meijel. Natuurlek moos d’r uurst èfkes getènnist wéére, mi ’n èntal Roeëj en dames van de Kieveloeët, wa ’n talènte! Dòrnao de kantiene in, wòr ik mi ’n èntal (awd) leje gezèllig hép kanne buurte en aaw verhale van ‘vruuger’ óp koos hale. Sjòn, um ók mi òllie vastelaovend te viere.
 
Wa hép ik vréjdig ók genóte zég. Wéj zin mi ’n hél bus Méélse vastelaovesvierders, mi mieër as 60 man, nò Mestreecht vertròkke um béj ’t LVK ènwizzig te zin. Fantasties um mi zeuve duzjend man utj hél Limburg same vastelaovend te viere! Wa ’n vastelaovesgewèld dòr in de “Fieësttent”. Ik kreeg d’r spóntaan kiepevèl van!
 
Zòtterdigaovend stóng ’t mómbakkesbal óp ’t prógramma, trug van wéggeweest. Mèr övverdag moos ik uurst nòg ’n paar uurkes wééreke. Niks vermoedend woor ik tege vier uur èfkes appart genómme, um vervòlleges in énne kieër de hélle Kieveloeët óp min wèèrek, in de “Spulzaal” te zien stao. Ze han min prinsepak meegenómme dus ik moos me umkléjje zòdè ik t’r wér utjzag as prins Luc I. Gewèldig hoe de Kieveloeët same mi Holland Casino Venlo di vur méj geòrganniezeerd han. Bezunder um min wèèrek èfkes mee te laote geniete van min prinsjap en sjòn um de Kieveloeët te laote zie hoe min wèèrek d’r utjziet. DANK!
 
Saoves ’t mómbakkesbal en dòr valle ge de ieën in de ander verbazing. Béj binnekómst béj “De Vangrail”, ut kluphusj van de Véngneuze die dur òk waare, zitte d’r al drèk ’n paar ónhèrkénbaar méj óp te waachte. Wa ’n gewèldige krejasies hép ik gezie. En as dan um 22.11 uur demaskee is dan is de verbazing nòg gròtter. Wa hép ik genóte. Toe ók nòg twieje Misterie gèsts bekéénd gemakt wóre , haa ik ’t èfkes nie mèr. Vader Bubs, Jos janssen en José Stemkens, ’n lieve vriendin van méj die spesjaal héllemòl utj Ammerieka waar gekómme, makte dizze aovend héllemòl af.
 
Zóndig réjzde wéj af nò ’t Fieëstnaazeriek Heidebuurt in Héjtse, wòr wéj béj ’t aftrééje ware van Prins Jos I, ‘ne rasèchte Kieveloeëter. Sjòn um te zie hoe prins Jos van zin prinsejaor hi genóte. Mi de Bubs hébbe we dòr nòg ’n paar liedjes mage zinge en de zaal óppe kóp gezit.
 
’n Wiekènd, wòrbéj we zòwal butje dörrepsgrenze as in óns éjge Kieveloeëteriek wér hébbe laote zie hoe sjòn ’t is um same vastelaovend te viere.

VASTELAOVEND SAAME, DÒR DRÈÈJT ’T UM
Prins Luc I

Nò dè ik óp 6 jannewarrie utjgeroepe bén, Prins Maurits en Prinses Isa van de Véngneuze óp 11 jannewarrie, waar ’t vur de Kéjsjeut zóndig 10 fibberwarrie zò witj. Wéj zin dus kómpleet. Nòw kan de VASTELAOVEND ècht beginne.

Kieveloeëters en Kieveloeëterinne, wa hébbe wéj gewèldige heersers van de Kéjsjeut gekrigge. Nò ‘ne sjònne en spannende èkt wòrbéj awt prins Sem en awt Vorstin Sterre óp zuuk ginge nò de nééj heersers bleek al snel dè wéj te make han mi ‘ne gewèldige Rò van Éllef. Fantasties um te zie hoe zéj drèk vól entoeziejasme zich zéélef prizzenteerde. En hoe bezunder is ’t dan as òw éjge petekindj, Lotte van Enckevort, as uurste rò van éllef lid ónthuld wért. As énnò leeste woor de néjje Vorst ónthuld en dè waar niemes minder dan Jens (Basten). Tòt slòt woor de nééj prinses van de Kéjsjeut Prinses Kimberly (van der Asdonk) utjgeroepe. Wa sjòn dè ik same mi òllie dizze vastelaovend mag gòn belééve. Hoe gröts bénne géj dan as awers, as ge òw kindj as Prinses, Vorst of lid van de rò van Éllef óppe bune ziet stao. Tege òllie zég ik: “Geniet van dizze bezundere tidj”.

En dè ’t bezunder is en d’r steeds wér verassinge ópduike, bleek zóndig ók wér. Béj ènvang van de middig woor d’r dur adjudant Mark ‘ne groeëte pooster ónthuld… hoe sjiek. En toe Blieve lache méj en Han en ók de Bubs óppe buhne vroeg, kreeg ik ècht kiepevèl. As zéj dan same ’n prachtig prinseliedje vur óns gòn zinge, dan hawe ge ’t nie mèr druuëg. ’n Hél spesjaal mómènt wòrvur groeëte DANK!

Dizze middig stóng natuurlek in ’t tieëken van de Kééj Knappe Kwéékmiddig. Hoe gröts mage we in Méél dan zin as ge huuërt dè mèr liefst 14 groepe en in tótaal 78 kinjer óppe buhne gestao hébbe, die stuk vur stuk ’n gewèldig vastelaovesliedje gezónge hébbe. Óngeluuëfelek hoe die dòr zónder zinnewe stòn te zinge. Wa héb ik gewèldig sjòn tèkskte verbéj huuëre kómme um övver de danspasjes en ur gewéldige sjòn pèkskes mèr te zwiege. ’n Groeët kómpliemènt èn iederieën die meegedao hi, géllei zin allemòl winnaars.

Awers bedankt dè géllie òllie kinjer stiemeleert um mee te doe. Kinjer Vekansie Wèèrek en kómmissie KKKM van de Kieveloeët bedankt vur de òrganniezasie van dizze gewèldige middig. Ók óp dizze zóndig bleek alwér…

VASTELAOVEND SAAME, DÒR DRÈÈJT ’T UM
Prins Luc I

’t Wiekènd van 2 fibberwarrie. ’n Wiekènd wòr éjgelek gén òffiesjele aktievietéjt van De Kieveloeët óp ’t prógramma stóng, mèr wa dur ieën bezunder mómènt, ’n wiekènd vól VASTELAOVEND zò gòn wéére.

Beeste Kieveloeëters en Kieveloeëterinne wa hi de Kieveloeët méj óp minne verjèùrdag kiepevèl bezèùregd. Ik lag nèt 4 uurkes te slaope, want ik haa moete wééreke, toe ik smèèreges um kwart vur aacht wa huuërde. Ik woor wakker van ’t zinge: Lééve de Kieveloeët. En ik moet érlek zégge dè ik in uurste instansie daacht: “Stélletje gèkke, wörrum zò vruug?” Mèr toe ik de raam van min slòpkamer oope makte en dòr de hélle Kieveloeët zach stao, toe ging d’r tòch wal wa dur méj hin. Nao “Laang zal héj lééve”, gezónge te hébbe woor méj vertééld dè ik min prinsepak èn moost trékke.
Ónder gekómme stóng de koffie klaor en krege de Blaow en ik de ópdracht um in Méél ’t óntbéjt béj mekaar te gòn zuuke. Toe wéj wér trug kwame béj ’t Hitsige Hert han de Roeëj alles klaor stao um ’n gewèldig óntbéjt te gòn make. Heerlek spek mi ééjer, soep en ók nòg lekkere taart geééte. Gewèldig sjòn hoe de Roeëj di pèrfèkt geòrganniezeerd hébbe. Alwèr ’n bezunder mómènt, dank òllie wèl dòrvur. Natuurlek moos t’r ók nòg ’n pilske gedrónke wéére en de leeste ginge um hallef vier smiddes nò husj.

Um kwart övver vééjf moos ik wér klaor stao want mi de Bubs stónge wéj in de fienale van CMC Alaif. Mi ’n bus mi vierèntwénjtjig man vertròkke wéj nò Heerlerheide. Wa ‘ne gewèldige aovend waar dè, mi allemòl gezèllige mènse. Vòlleges méj hi de Bubs mi alle suupòrters dòr laote zie dè Méél vastelaovend kan viere. En dè wéj óppe trugwég nòg vól enerzjie zate bleek wal, want wéj hébbe de hélle trugwég Méélse vastelaoves sjlagers gezónge.

‘ne Zòtterdig die vruug begoos en wér laat éjndigde, mèr wòr wéj wér mi z’n alle same vastelaovend gemakt hébbe.

VASTELAOVEND SAAME, DÒR DRÈÈJT ’T UM
Prins Luc I

Dan probere gè òw, vur dè De Méélse Vastelaoves Parade begeent, ‘n bietje ‘n veurstélling te make hoe ‘t “Bónte Wiekènd” zal gòn verloeëpe. Mèr ik zal òllie vertélle mènse, wa bén ik tòch wér verrast. ‘n Wiekènd wa van ‘t begin tòt ‘t éjndj VASTELAOVEND òjjumde.

Beeste Kieveloeëters en Kieveloeëterinne lòt ik dizze kieër ‘s beginne um De Kieveloeët en dan speciejaal de kómmissie van De Méélse Vastelaoves Parade te bedanke vur de òrganniezasie. Mèr um zòn aktievietéjt te laote slage, hé ge nòg twieëje belàngrieke ingrediejènte nöddig en dè zin TOP artieste en ‘n TOP publiek. En dè is nòw presies wa ‘t vur méj ‘t afgeloeëpe wiekènd zò speciejaal hi gemakt.

Wa kénne wèj, mage wèj en moete wèj mi z’n alle gröts zin óp alle Méélse artieste die ‘t afgeloeëpe wiekènd òp ’t pódiejum hébbe gestao. Zòas ‘t huuért, wiere zèj allemòl óp en van ‘t podiejum begeléjid dur de twieëje prachtige dansmariekes!

Spèùtj Éllef die bakte d’r in de ópenigsèkt wa van en broocht de zaal drèk tot ‘t kookpunt. Hun parródie óp “Heel Holland Bakt”, “Hél Méél Bàkt”, viel goe in de smaak. Tónieëlverénneging C.O.M. hi laote zie dè ze van alle mèrrete tusj zin. Ur debuut óp De Méélse Vastelaoves Parade zal zeker ‘n vervòlleg kriege. En hoe gewèldig is ‘t dè alle winnaars van de Liedjesmiddig ‘t publiek van urre stoel afkriegt um vurvòlleges ‘ne groeëte pólónééze te vèùreme mi óp zóndig de Véngneuze veuróp! Ut ‘Suuksès van furrig jaor, “buut van een minuut” woor òk di jaor wér fantasties nér gezit. Wa ‘n talènt zit t’r in Méél! Let’s Do It, ‘t beeste èkspòrtpródukt van Méél, hi urre néjje dans gepresènteerd. Óngeluuëfelek hoe die kénne danse. Wòr hale ze de enerzjie vanaf! De énnige “butje Méélse” èkt, Rob Scheepers….. tjònge jònge wa hi díe in zin mars. As t'r iemés kan impróviezere dan is héj ‘t wal (ók al stong hèj énne kieër mi z’n mónd vól taand). De Méélse Muzikale Verrassingsèkt sloot de aovend swingend af mi 'ne sjònne Méélse vastelaovesmèdlie. ‘t Daak ging d’r af.

‘t waar gewèldig um vanàf ‘t pódiejum ‘t èntoeziejaste puubliek te zien geniete. Ik kan nie anders zégge dan dè ik zòtterdig en zóndig heb genote. Dè makt méj 'ne grötse prins. Di alles makt wèr ‘s duidelek..…..

VASTELAOVEND SAAME, DÒR DRÈÈJT ’T UM
Prins Luc I

Hoe gröts kan iemand zin? Dè hébbe Han en ik óns de afgeloeëpe wéék duk afgevraogd. Wellek woord kumt t’r nò sjòn, sjònner, sjònst….? ‘t Kan béjnao nie anders dan dè dè woord VASTELAOVEND moet zin.

Beeste Kieveloeëters en Kieveloeëterinne, wa ‘n fantastiese wéék, wa kan ‘ne mèns dòr van geniete! Vanaf min utjroepe zin wèj övverdónderd mi gewèldige rejaksies, karte, bloeme, kaddoos en mènse die gewoon èfkes óp bezuuk kómme. Die uurste daag van min prinselééve hébbe óns goe gedao. Ik hép al tege sòmmige gezi: “Hier kan ik wal èn wénne!” ‘t Vuulde ók wér spesjaal dè ik afgeloeëpe vréjdig wér min prinsepak èn moocht, want wèj ware te gast béj de utjroeping van de Véngneuze. Hoe sjòn is ‘t um te zie hoe die Véngneuze geniete van de vastelaovend. Ik hép ‘ne hoeëp grötse vaders en moders gesproke, die ók ‘n spesjaal séjzoen tegemoet gòn. Gewèldig um te zie hoe de wéérekgroep van de Véngneuze same mi ur kluphusj De Vangrail di vur de jeugd organnisere. Wà heb ik genote van Prins Maurits I, Prinses Isa I, Vorstin Elke, de Adjudante Sven en Timo, de Rò van Ellef en ur Kammerèùj. Ik wit zeker dè wèj d’r saame un fantasties jaor van gòn make.

En dan wéére ge zòtterdig mèèrege wakker en dinke ge, vanaovend nò P&M Liedjesfestival um dòr same mi Blieve Lache ‘n gewèldig fést te gòn make, mèr dan wért t’r um 10.00 uure èngebèèld! Stòn d’r un man of dartig vur de deur die óns husj kómme versiere. De buurt, De Bubs en kammerèùj hébbe alles utj de kaast gehald um óns husj zò te versiere, dè iederieën die hier nééve kumt wét dè hier de prins van ’t Kieveloeëteriek wónt. Óntzèttend BEDANKT ! En dan zitte ge drèk wér vól adrenaliene en wille ge ‘t liefst dur gao. En gelukkig ging ‘t ók dur, want mi ‘n vólle bus vertròkke wèj um hallef zeuve richting Kessel nò ‘t P&M Liedjesfestival. Hoe gewèldig is ‘t um dòr dan BLIEVE LACHE, same mi de GLITTERDÖRSKES òp de buune te zien stòn geniete. Géllie hébbe ‘t fantasties gedao en hél Peel & Maas laote huuëre en laote zie hoe Méél vastelaovend viert. En dè Méél vastelaovend kan viere de hébbe wèj òk nòg óppe aafterpartie in ’t klubhusj van De Kieveloeët, De Heere van Meijel, kanne zie. Gewèldig hoe wèj mi z’n alle dòr nòg ‘n groeët fést gemakt hébbe…!

En dan wérd t’r tege óns gezi: “Di is pas ‘t begin!” As ‘t waor is dè ‘t nòg sjònner géè wéére, dan vraoge wèj óns af………
Kieveloeëters en Kieveloeëterinne, BEDANKT ALLEMÒL vur dees fantastiese uurste wéék.

VASTELAOVEND SAAME, DÒR DRÈÈJT ’T UM
Prins Luc I

Al ‘n uur zit ik te dinke mi wéllek woord, mi wélleke zin ik “ ’t prinselééve van Prins Luc I” moet beginne. Besté t’r uuberhaopt ‘n woord dè òk mèr ‘n klééinj bietje in de buurt kumpt um ’t gevuul van de afgeloeëpe daag te besjrieve? Dòr besté mèr én woord vur en dè is….VASTELAOVEND !

Bééste Kieveloeëters en Kieveloeëterinne, wà hébbe Han en ik genóte, wa is ‘t fantasties en vuult ‘t gewèldig um óp zòn menier óntvange te wéére as Prins Luc I. ‘t Waar 13 nóvèmber toe veurzitter Rudy mèj gevraogd hi of ik de néjje prins wao wéére. ‘t Hi nie langer as ‘n haalef uur geduurt vurdè ik Rudy trug gebèèld héb um te laote wete dè ik ‘t ‘n groeëte ieër zao vinge um di jaor veuróp te mage gao. En dan begeent t’r òk drèk ‘ne spannende tidj èn te kómme, want ge draagt ‘n groeët gehéjm béj òw, wà niemes mag wete. Nòw héb ik de afgeloeëpe jòrre wal dukker de vraog gekrigge of ik de néjje prins zò wéére dus ik waar wal wa gewéénd. Mèr tòch vuulde ‘t di jaor anders umdè ‘t di jaor dan ècht zao gòn gebeure. Vòlleges mèj bén ik t’r beest goe in geslaagd um ‘t vur mèj te hawe, want ‘t waar tòch nòg vur veul ‘n groeëte verassing. 

En as ge dan zóndigmiddig 6 jannewarrie um kwart vur dréj óp òw fietske stapt um nò ‘t Oranje Hotel te gao, dan gé t’r van alles dur òw hin. Ge parkeert òwwe fiets béj de kéérek, gòt nò binne, haangt òwwe jas óp en lòpt de zaal in. Dan moete ge nòg ‘n dik uur alles utj de kaast hale um òwwe mónd te hawe. ‘t Mómènt dè dan òwwe fantastiese veurganger Prins Marcel I ‘t podieum afstapt en de start gemakt wért mi de ónthullingsèkt dan hawe ge ‘t béjnao nie mèr. Wà is ‘t dan bezunder as minne eige Han minne naam nuumt en de veurzitter Rudy de miekrófoon drèk övverpakt um vervòlleges mej òffiesjeel utj te roepe tot Prins Luc I. (ónder di sjrieve loeëpe de traone alwér uvver min wange) Wa t’ur toe gebeurde, dè véélt vur mèj ècht nie te besjrieve. Um te vuule wa dòr toe gebeurde dòr haa ge béj moete zin…!

Beeste Kieveloeëters en Kieveloeëterinne…DANK, DANK DANK !

VASTELAOVEND SAAME, DÒR DRÈÈJT ’T UM
Prins Luc I