user_mobilelogo

Prins Jeroen I

 

 

 

 

't Prinselééve van Prins Jeroen I

Het is bijna onbeschrijfelijk wat er door je heen gaat wanneer je wordt onthuld als Prins van de Kieveloeët. In een woord Fantastisch, echt waar. Dat ik daar als verse Prins tussen al die oud Prinsen onthuld mocht worden was op zich al een hele eer. Gevolgd door een schitterend ontvangst op het Prinsenbal, door familie, vrienden, bekenden en andere aanwezige vastelaovendvierders van Meijel. En dit is nog maar het begin van de vastelaovend 2009. Mede namens Joyce, Anne, Silke en Femke wil ik jullie bedanken voor een warm onthaal in het Oranje Hotel.

Natuurlijk een speciaal woord van dank aan het Comité dat mij geweldig verraste, Vorst Peter, Adjudant Hans, de Raad van Elf, de dames, Goe Gehusseld en natuurlijk alle Méélse artiesten die deze avond hebben opgetreden. Ook wil ik mijn voorganger Prins Jurgen I danken voor zijn vastelaovesrace van 2008.

Voor ons kon de vastelaovend niet beter beginnen en dan staat er nog zoveel moois op ons te wachten. Laten we een kleurrijk geheel vormen tijdens de komende activiteiten zoals de bonte avonden, Kééj Knappe Kwéékmiddig, het Mombakkesbal en niet te vergeten de drie dolle dagen.

We gaan er samen een geweldige vastelaovend van maken, en dan eindig ik met mijn spreuk:

”Mi alle klurre ééve bónt , haaw ik de kievel rónd”

Prins Jeroen I

'ne Sjònnere tietel han ze nie kanne bedinke. Nao ‘t prinsebal smèèreges èffe rustig nò de kartverkoeëp gegoa en dòr wa gedrónke mi die mèn die ik d’r sáoves of zég mèr smèèreges béj óns tusj èn ut afpilse ware. Die kooste wal wa morele steun gebruuke van de néjje Prins daacht ik zoeë .

Smiddes kwaam de hél buurt oppè koffie um méj te vertélle dè ze zòtterdig zòn goan versiere. Ik haaw min hart vaast as géllie wete wa vur baowvakkers hier in die stroate wone.

Mòndigaovend hébbe we wa vergaddert mi de Kieveloeët. Ik moocht hier vur ‘t uurst béj zin. Dè gold övveriges ók vur de dinsdigaovend mi de dames van de Kieveloeët same mi min vraow Joyce. Wa kénne die dames kake zeg!!!!! Van te vurre bèèlde radio P&M méj nog vur ‘n interview wòr ik toch zòn 8 menutje övver méj en de Kieveloeët moocht zieëvere.

Woensdigaovend mooste we óppe tidj béj Ruud van de Foka zin mi óns gezin um de Prinsefoto te make. ‘t Blieft altidj afwaachte béj Ruud wòr dè tjie mi kumt. Héj zal zeker ‘n sjòn fotoke óp de pooster zitte geluuëf ik. Héj hi footoos zat gemakt dus dòr li ‘t nie èn.

Naow moete we óns kloar make vur ‘t P&M liedjesfestieval van zòtterdig dus ik sjrief latter wal hoe dè gegao is.

Ik hoop ók dè min Mééls nie al te veul faowte bevat. In ‘t Nederlands is ók niks as Prins wal??

Tot zòtterdig in de bus of in Beringe

Prins Jeroen I

 

Mi alle klurre ééve bónt, hiele wéj de kievel rónd

Ze han al vertééld dè ze zòtterdig zòn gòn versiere. En wa min buurt dòr zòtterdig gedao hi dè waar nie te geluuëve.

De ganse stroat sté vól mi korsbuuëm utj gans Méél. Allemol ééve sjòn versiert mi roeë, géél en gruun lintjes. Laote we nie vergééte dè ‘t zòtterdig -12 grade waar en dè Noor van Tju van Wippe Pieër gelukkig ‘ne kittel èrtesoep ha gemakt. De ganse buurt hi ‘t d’r nòw nog övver.

Ginne C1000 roeëkwoorst mer echte Méélse broajwoorst. Um beurte kwame ze dan ók ‘ne telder ééte. Dè we veul baowvakkers in de buurt hébbe dè kénne géllie nòw wal zie èn ‘t éndjrezultaat. En dan sprééke ze d’r nog övver dè ‘t nog nie ‘t leeste is wa dè gé gebeurre.

No afloeëp hébbe ze allemol gezellig een glééske kruidenbitter gedrónke en nog naogebuurt tot dè ik ‘t wit jeske èn moos um nò P&M te goa,

De hél buurt niemes butjegeslote HARTSTIKKE BEDANKT.

Prins Jeroen I

 

Mi alle klurre ééve bónt, hiele wéj de kievel rónd

Umstreeks 19.00 ure vertrokke we mi twieë busse van Roetje vur ‘t uurst di Vastelaovesseizoen de Kievelgrens övver. Ónze réjsléjder: Meneer Frits moos snel beginne mi de bezienswaardighede te vertelle die we allemol tege kwame ónderweeges. Net övver de Kuusweg belde Radio P&M al vur ‘n interview en wòr dè we bleeve.

In de tent èngekómme waar ‘t gelukkig nie zò kaaw as butje. De Brummerkes moochte drèk as uurste beginne en dè din ze kéj goe. Het naodél van beginne is dè ge van de rest van ‘t prógramma niks mèr ziet.

Wa waar ‘t gezellig dòr in die bómvólle tent. Méél waar goe vertiggewórrigd. Ónze awd Prins Jurgen I zaat in de zjuurie mèr héj bleef mèr èn ‘t sjrieve. Wij begrepe d’r niks van want nò de Brummerkes ha tjie toch niks mèr te doe?

D’n utjslag waar d'r dan ók érder dan dè we daachte. Jammergenóg génne prisj vur Méél. Óvveriges ónze Vorst Peter moocht ’t Lindebuimke utjréjke names de Lindenboom.

Nao afloeëp nog lekker ieën, twieë of dréj pilskes gedrónke bij Andrea en Toon wòr ik de ieër ha um mi De Brummerkes same te mage zinge.

Prins Jeroen I

 

Mi alle klurre ééve bónt, hiele wéj de kievel rónd

Mòndigmèèrege han we afgesproke um Kieveloeëteles óp sjool te gééve èn groep 7 en 8. Nao dè we óns kórt veurgestééld han: Vorst Peter, Adjudant Hans, Prins Jeroen I, Rò van élleflid Jurgen en penningméster Fred begoose we drèk mi ‘ne póllónééze um d’r drèk goe in te kómme. Sjòn um te zie dè ‘t nòjt vruuggenóg kan zin vur ‘ne póllónééze.

We hebbe kleuriek vertééld övver de Kieveloeët, d’n óptocht en de Kéj Knappe Kwéékmiddig. Wòr toch al veul kinjer entóziejast övver ware. In iedere klas bleve we ‘n halef uurke en dan wir afslutje mi óns klublied en dòrnao de vóllegende klas vur ‘ne néie póllónééze en als mèr moejleker wéérende vroage.

Dè de vastelaovend lééft béj de kinjer is nòw zeker ‘n féjt. Ze weete wa minne spreuk inhééld en zin d’r héllemòl kloar vur geluuëf ik.

Als ge smiddes dan wir gòt wééreke dan witte ge hoe groeët ‘t versjil is. Wà sjòn dè we nie hoeve te kieze en dè we ‘t allemòl mee moochte make.

Prins Jeroen I

 

Mi alle klurre ééve bónt, hiele wéj de kievel rónd

En dè hébbe we gedao ‘t afgeloeëpe wiekènd.

Vréjdig begoose we nao ‘ne dag lekker wééreke mi de mededélling dè ‘t duwo Keps nog in de fiele stóng. Dus moochte Duo Mona beginne mi Annaleise óp reise. Middels ur mediejum Frits woor de hélle Méélse polietiek besproke mi Nellie Criens.

Jan Geraedts as ónze stierevèèchter waar ók super, mèr wa wille ge van unne Limburgse kampiejoen 2008. Ik wil hier éjgelek mèr én ding óp zégge: De stier weent ók òjt !!

Duo Keps dee natuurlek iets te veul reklame en zóng nog ‘s duidelek of ge hier moocht roeëke.

De robot spees dans van de A groep van de Méélse Dörskes waar sjòn.

Mi de zang van Giel , Perry en Toon woore we ók wir héllemòl óp de högte gehawe övver de Méélse polietiek en woor d’r op verzuuk nog óvver Goode zin Gaat gezónge wòr ik nòw mag wone.

Dur dè de Bubs in de fienale van ‘t LVK wil kómme broochte die bónne utj de krant rónd en zónge ze urre hit Traone óp min wange zò dè de mense ók weeste wòr ze óp stèèmde.

Ton Brekelmans kwaam as sjònste beebie in de toon stao. Wa ’n mènneke. Ik sjrik d’r ‘saoves nog van wakker en lach me nog te barste as ik dè kupke wir vur méj zie. Mèr goe dè we óns papa nie gezie hébbe. De dames van Let’s do it broogte ‘ne sjònne dans wor ze volges méj óp zuuk ware nò Tarzan. Berry Knapen kwaam as Pieër de Sopper de boel efkes béjsjildere.

Hoppe, Hoppe,……. Véélt hier nog wa te Soppe !!! Die was dus nie vur niks kampiejoen 2008 van Brabant. De Méélse winnaars van de leidjesaovend moochte toen ur nummerke nog ‘ne kieër laif zinge.

De Érpelemèèntjes han Paul de Leeuw wete te strikke en ginge óp zuuk nò nééj leeje vur ‘t Mééls mannekoeër. Toe dè koeër ók nog ‘s ‘n liedje speesjaal vur Prins Jeroentje ha gemakt, ha dè méj toch wel èrreg gerakt. Érpelemèèntjes we drèèje de ceedee nog iedere dag, Bedankt. Toe de Érpelemèèntjes ‘n demo sjònzwémme gave lage wéj héllemol in ‘ne deuk.

As afslutjer kwaam dan ók nog ‘s Beppie Kraft en ging ‘t daak van D’n Binger d’r af

Zòtterdig waar ’t zèllefde prógramma natuurlek mèr zóndig woore we wal verrast toe bleek dè ‘t zwémbad van de Érpelemèèntjes echt ha geléjkt in D’n Binger en d’r uurst gedwéjlt moos wéére.

RKMSV 8 dee vur ‘t uurst mee mi de bónte middig en dè waar natuurlek drèk ‘n sukses. De A groep van de Méhlse Dörskes woor vervange dur de B(eeste) groep die óp nummerkes van Abba danste.

Ók moocht ik dizze middig de lóteréj doe en dòr ben ik aaltidj dól óp.

Ik wit zeker dè we övver dréj zeer geslaagde bónte aovende en middig kénne praote. ‘t Zal vur de Kieveloeët moejlek wéére um vólgend jaor di te övvertreffe.

Dus zeker gon kieke vólgend jaor, anders misse ge wa!!

Prins Jeroen I

 

Mi alle klurre ééve bónt, hiele wéj de kievel rónd

Béj óns tusj waar d’r al veul geoeffend dur óns Anne en ur vriendinneke Lieke van Bree. Ik koos het liedje al béjnao druuëme, ‘t is zèllefs zò dè ik de òrreigienele tekst nog nie mèr kén. Toe ze zòtterdigmèèrege moochte oefene óp ‘t groeëte podiejum in D’n Binger weeste we dè ‘t goe ging kómme want ze zóngen in ieder geval ók dur de miekrofoon.

Afgeloeëpe zóndig waar ‘t wir zò witj dè we vur de éllefde kieër de Kééj Knappe Kwéékmiddig hiele. Vur méj zèèllef waar ’t d’r gezellig um veul van min vriende ur kinjer te zien optrééje. Nao de opening dur Vorst Peter, Adjudant Hans en Prins Jeroen I ginge we van start mi ‘t Kwéékliedje dè luidkééls dur de kwéékers woor meegezónge.

Ik heb érlek waor van ieder optrééje genote. Óns Anne en Lieke van Bree as de Confettie Girl din ‘t ók super al woore ze twédde net as de rest butje ‘t Vetlérre Gummiefóddelke wa de uurste kievelprisj ha gewónne. In de pauwze hébbe ze allemòl ‘n óndersjééjing van de Prins gekrigge en unne sambabal umdè ‘t vur de éllefde kieër waar.

Mi veul trots hebbe we de awd Prins Jarno I en Vorstin Tara bedankt vur ur verdienste in ‘t afgeloeëpe jaor en ur de steke afgenómme. Wornao we zin övvergegao mi ‘t ónthulle van de néjje rò van éllef van de Kéjsjeut en Prinses en Vorst.

Ónder èrreg veul roeëk (umdè dè ding in de koeliese stóng en nie richting podiejum) kwame d’r 13 gemaskerd en mi lichtfakkels in de roeëk ‘t podiejum óp. Ieën vur ieën dee de Kéjsjeutekletser Piet middels ‘n paar sjòn weurd de rò van éllef ónthulle wòrnao ik ze de ondersjééjing, mantel en steek moog ópzitte. Ik waar bléj verrast um min auw buurvraow Grit van Enckevort ur kléjnkinjd Lizzy te ónthulle als Prinses van de Kéjsjeut 2009 same mi Vorst Marijn.

Nao unne póllónééze dur de zaal ginge wéj wir verder mi de Kwéékliedjes van ‘t twédde gedéélte wa gewónne woor dur Happy Zis die ók nog ‘s zónge övver unne sjòllek van Sjriks.

Ik wit zeker dè we gröts mage trugkieke op ‘ne geslaagde Kwéékmiddig mi 26 groepe en 102 déélnemers. Dan witte ge ók dè ge de zaal vól hét mi kiekers. En natuurlek gao ge ze straks mesjien ók wal trug zie óp de liedjesaovend van de Kieveloeët.

Ik wit zeker dè ik mag zégge dè minne spreuk wir tot zin rèècht is gekómme.

Prins Jeroen I

 

Mi alle klurre ééve bónt, hiele wéj de kievel rónd

Um goe zeuve ure ging de tillefoon en was dè Vorst Peter mi de vraog of ik èfkes tidj ha um nò ‘t kluplókaal te kómme umdè we bezuuk han van de Prins utj Vierlingsbeek.

Bén nie in funksie mèr wal drèk op min stale pérd gesprónge en nò de Zwaan gefietst wòr ik in ‘n bómvól kefee binne kwaam. Wa waar nòw ’t geval? Prins Bert II (die van aachter Linders hétj) van de Keijesjieters woor ‘n ekskursie èngebóje dur zin Keijesjieters en Keiesjieterinneks um de Linde(rs)boom braowerééj te bezichtige in Néér.

Dòr hébbe ze volges méj ‘n hél sjòn ekskursie gehad en veural in het pruuflokaal. Wòrnao ze wa hónger han gekrigge en wòr kénne ge dien hónger nòw bétter stille as béj Andrea mi ‘n lekker putje……. Jao géllie raoje ‘t al Linde(rs)boom.

‘n Leuk detaij waar ók dè ze allemol iets van de Lindeboom um han hange wa veranderd waar in Lindersboom.

Nao ‘n kórt weurdje van dank dur onze Vorst hebbe wéj ze ‘t jubielejumboek mage ènbieje en héb ik d’r same mi Prins Bert II un paar memórabele weurd in het boek gesjrivve. ‘t Dameskoeër en de rò van éllef hebbe nog van ‘n optrééje van de Keieschieterse sjierlieders mage genieten.

Zò bliekt mèr wir dè as ge iets nie verwaacht in òw Kieveloeëteriek dè ‘t nog ‘s dubbel zò sjòn is. Al ware we nie in funksie we hèbbe wir genote.

Ik hoop dè ze de bus nie gemist hebbe anders hebbe wéj d’r dizze vastelaovend ‘n paar sjòn Keijesjieters en Keijesjieterinnekes béj.

Prins Jeroen I

 

Mi alle klurre ééve bónt, hiele wéj de kievel rónd

De dréj dólle daag stòn al wir béjnao vur de deur. En we beginne al ‘n bietje zinnewèèchtig te wéére of óns pèkske al kloar is en of we genóg schmienk hébbe gekaocht vur de Dréj Dólle Dage.

Prins Jeroen I sté al in de startblokke um fréjdes óp bezuuk te gao óp ‘t kinjerdagverblief en vervolges nò sjool te gao um te kieke of óns wichter ók al ‘n bietje vastelaovend èn ‘t viere zin. Ik dink dè ge as Prins beest die juffe en mésters èffe maagt kóntrólere of ze de wichter wal goe lieëre hoe ze de póllónééze moete loeëpe.

Zòtterdig beginne we mi de vastelaovesmis um de grasie van pestoeër te kriege um op ‘t rèèchte Kievelpa te blieve. Di wérd muziekaal umlisjt dur de Heimatkapel dus wal in òllie banke blieve zitte en génne serpertine mee in de Kerk neme. Dòrnao gòn we de sluttel vur ‘t Kievelriek próbere te bemachtige en hier wil ik nog nie te veul övver verklappe mèr ik zò zégge zèùrig dè ge óp tidj béént want ‘t koos wel ‘s de leetste kieër wéére dè ge di mee makt in Méél. Dan hébbe we zóndig de groeëte bónte stoet van ‘ne óptocht wòrin ik òllie allemòl hoop trug te zie mi alle klurre ééve bónt. Ik wit zeker dè ‘t weer óns ‘n bietje meezit dus loeëpe ge nie méé zèùreg dan zeker dè ge nééve de kant van wég stòt dè ge niks mist zòdè ge d’r övver mee kaant praote. Óp mòndig gòn wéj uurst nò Colé um min fammielie ‘s te loate zie hoe wéj hier béj de Kieveloeët vastelaovend viere. Natuurek is iedereën hier van harte welkóm um ók ‘s te zie wa éjgelek de Joong Harste tiggewórrig doen hier béj Kareltje. Mesjien mage zèèlef òw éjge plètje wal meeneme en zal ‘ne Jónge Harst dè vur òw drèèie. Is ‘t ‘n singeltje van dizze ééw dan zalle ge wal ‘ne kóptillefoon óp kriege.

Vanutj Colé gòn we nò ‘t Kéjsjeutebal vur de prisjutjréjking van de óptocht en lekker mi de Kejsjeute rò van éllef, Vorst Marijn en Prinses Lizzy vasteloavend viere, övver de vloer slibberre en vural veul ranja drinke en óns leeste sente èn de slók ópmake.

Dinsdes zin we al wir béj de lééste dag èngekómme wòr ik òllie gao verrasse óp ’t Kieveloeëte treffe. Ik mag di mi min hél gezin opene dus zèùreg dè ge óp tidj béént want we trééje mèr énne kieër óp anders hébbe de andere artieste génne tidj mèr um ur dingske te doe. Ik wit zeker dè we ók hier wir mi de rò van éllef, het kómietee en zeker nie te vergééte óns éjge hofkepèèl Goe Gehusseld ‘ne hélle gezellige muziekale en ludieke middig mee gòn make. Saoves gòn we nog op kefee bezuuk béj de Nostalgie en de Vangrail um dòrnao ‘t Kievelmènneke te gòn bedanke en de vlag te strieke wòrnao we in óns kluplókaal de traone óp óns wange gòn druuëge umdè ‘t dan alwir béjnao afgeloeëpe is.

Kórtum wir ‘n vól prógramma wòr ik riekhalzend nò utj kiek um di same mi òllie te gòn viere en ik hoop dan ók òllie allemol erges mi dees aktievietéjte te zie en dè minne spreuk tot zin recht kumt want:

Mi alle klurre ééve bónt
Haaw ik de kievel rónd

Prins Jeroen I

Dè waar mieër as 30 jaor geléje dè ik ‘ne voetbal gerakt haa. Zèèlef bén ik volges méj nie verder as de D5 of zoeë gekómme in de dréj jaor dè ik lid van de klub bén geweest en in de offiesjele speultitj nòit en gaol gemakt. Dus géllie begriept wal dè ik verieërt waar um trug te kómme béj RKMSV óp ‘t EFFE bal. D’r zao ‘ne Prins of Prinses utjkómme vur mèr hieël èffe dus.

Krèk gezi mèr énne middig en di aor haa Luuk Joosten dè geluk van Carlo van Wim Joosten wal bekéént béj de klub. Zin opa heb ik nog mage óndersjééje vur zin staat van dienst béj RKMSV. Volges méj issjie ók nog minne léjder èffe geweest toe ik mi Ruud voetbalde mèr nòw moet ik hieël witj trug in d‘n tidj.

Nao ‘t utj kómme van Luuk hébbe we butje same ‘n parkoertje gedao (wa ik natuurlek verloor) wòrnao méj ‘n sjòn verrassing stóng te waachte ónder ‘n D*m?!s paraplu. Van de Vorst moocht ik dè woord nie in de mónd neme. 'n Nèèjmesjien um van twieë stukke stof ‘n prinsemuts inén te stikke vur ónze Effeprins Luuk. Dè ging méj ‘n stuk bétter af as ‘t voetballe.

Wéj hébbe dòrnao nog ‘n stief kwartierkè gevoetbald (léés aachter de bal èngerèènt). En net as vruuger: Nie geskoord wal lol gehad.

Binne hébbe we nog genote van ‘n paar óptrééjes wòrnao ik dur de Effeprins óndersjééje ben mi ‘n prachtig kunstwèèrek mag ik wal zégge. Jan van Rijt haa ‘n prachtige óndersjééjing gemakt wòr min bedriefslogo in trug kwaam same mi ‘ne filmkamera en ‘nè gietarist die óp minnè fèn liekt Neil Young. We hébbe ók nog ‘ne prisj utjgedéélt èn de beest gesjmienkte en verkédde.

Èn ‘t éjndj van de middig moog Luuk same mi zin famielie offiesjeel mee de steek aflégge. Ik verzeker òllie dè hébbe d’r nog nie veul meegemakt en ik dink dè tjie d’r ók van genote hi ondanks dè tjie mèr Èffe Prins waar.

Kórtum ik dink dè we kénne sprééke van ‘n geslaagd èffebal.

Prins Jeroen I

 

Mi alle klurre ééve bónt, hiele wéj de kievel rónd

Mòndigaovend moogte we óp bezuuk komme béj ónze hofdames van de majorette.

Óns Anne die ók lid is van de Mèhlse Dörskès moogt de spits afbitje dur op te trééje mi hur vriendinneke Lieke van Bree as de Confettie Girls. Ik bén nog steeds èn ‘t waachte tot ze de naam verandere in de kónfeksie girls. Ók de Lolliepops hébbe hur liedje nog gezónge en natuurlek moos óns éjge rò van éllef lid René Claasen mi zin vrouw Patries ók ‘n liedje zinge want als die ‘ne miekrófoon zien……. En toe stóng de miekrófoon nie te zaacht viel òllie dè ók óp ???.

Prinses Lizzy en Vorst Marijn same mi de volledige rò van éllef van de Kéjsjeut ware ok ènwezig. We hébbe same hél wa póllónéézes geloeëpe mi de majorette groepe die ènwezig ware. Alle groepe van de Majorette hébbe nog ‘n danje laote zie en dan wérd ‘t wir drèk duidelek dè we de kómmende jòrre nie zónder hoeve te zitte óp de bónte aovende of andere aktievietéjte van de Kieveloeët. Mèr laote we nie vergééte dè de Mèhlse Dörskès veul mieër optrééjes doen ‘t ganse jaor dur en nie allieën mi de vastelaovend.

Prins Jeroen I

 

Mi alle klurre ééve bónt, hiele wéj de kievel rónd

Zòtterdigmèèrege moochte we nò Remeund um same mi de Prinsen utj de regio óppe foto te gao. We ware sjòn óp tidj en kose dus ók gezellig ‘n bekske doe mi wa Kwiebbisse utj Néér. Utj ervaring van veurgònde jòrre wees ónze Vorst Peter dè we óp tidj nò butje mooste um sjòn veuraan te zitte.

Ik kan òllie zégge dè is óns ók gelukt!!! In ‘t midde veuraan en nao ‘n kléénj halef uurke kwaam ók de rest van ‘t bónt gezelsjap. D’r is dus echt nie énne Prins ‘t zèllefde gekléd.

Um 12 uur zòn ze de foto make mèr der ware nog aacht Prinse nie. Dus d’r kumt 'ne reklame bak èngeréje wòr ‘t Prinskè van D’n Uul utj Remeund inzaat. Vreengt zich tusse die sjòn prinse en méénjt ‘t dòr te zégge te hébbe.

Héj hi zich flink laote kénne mèr ik dink nie dè géllie um herkénne aachter min véére.

Bén èrreg benéjt nò ‘t énjdjresultaat in de gezit.

Prins Jeroen I

 

 

Mi alle klurre ééve bónt, hiele wéj de kievel rónd

Smèèreges béj de bèkker woor 't méj al duidelek d’r kumt vanaovend niemes. Iederieën haa ‘ne verjeurdag of ging utj ééte.

Minne Vorst Peter haa in ieder geval un andere verplichting wòrdur dè tjie vur énne kieër verstek moos laote gao. Ónze veurzitter Frits dee 't welkomsweurdje en minne Adjudant Hans en ik zèèlef hébbe de boel ‘n bietje èn èlkaar gezannikt

Um half néége kwame we béj ‘t mómbakkesbal èn in unnè héllemòl lege zaal van Parties ‘r us. Nòw dè fést waar echt vur óns allieën want d’r waar niemes.

Goe kwart övver nege kwame de uurste valentéjntjes binne. We hébbe dòrnao ók veul sjòn krejasies zien binne kómme. Het woor méj al gaow duidelek dè ge waard 100% verkléd of nie mèr d’r was gén tusse óplossing. Joa óke….. awd Prins Geert de Leeuw mèr de rest waar onhèrkénbaar.

Of ze kwame sniekie binne of zò gröts als ‘ne paow of ‘t ware knuffel béérre. Stuk vur stuk han ze ur beest gedao.

Ók mi de Misterie Gest héb ik moete lache. Vur méj waar ‘t gén misterie want ik héb ‘t geluk dè ik aldaag van Frits van Poost Pietje mag geniete.

Toe ik um 11 menutje övver 11 demaskee moog gééve zag ik veul bekéénde gezeechte en kose we mi z’n alle ‘n putje bier drinkè want de mééste krejasies mose ‘t dur ‘n rietje nò binne slurpè.

De dames Koopmans ware ‘t beest verkéd en han dink ik ók de beeste kóndiesie um zòn dréj uur dur de zaal te kruuppe zónder óp te stao. Sjappo !! Natuurlek ók vur de sjòns gesjmienkte en verklédde mèr vur méj zòn ze éjgelek àllemól béj binnekómst al ‘n preesjke mage kriege.

Wa han we geluk dè d’r ók gén slutjingstidj mèr is um twieë uur dus koos ‘t gewoon dur gao tot in de kléénj uurkes tot dè John van Dijk ‘t leecht ènmakte.

Én ding wit ik zeker………. Vólgend jaor héb ik ók ‘ne verjeurdag !

Prins Jeroen I

 

Mi alle klurre ééve bónt, hiele wéj de kievel rónd

As ópwèèremer vur de vastelaovend zin we swoensdes óp bezuuk geweest in het Zèùregsentrum St. Jozef. We wore d’r wèèrem ónthald. Ók de Ulewappers ware óp de utjnöddiging ingegao en ware ènwezig.

Leuk um toch nog wa mieër Méélse wir 's te zie die zich nòw han èngeslote béj de Ulewappers. En natuurlek de óntmoeting mi Prins Patrick I en Prinses Wendy. Grappig waar dè de móder van Wendy de Prinses van de KBO Prins Wiel I van de Ulewappers waar gewrórre. We hébbe d’r ók genote van de dansmarietjes utj Kunningslust, Happy Zis, Heavy Shit, Óngerakkesen Doorst, Rian Vestjes mi Wim Sliepen, RKMSV 8 en De Brummerkes, natuurlek woor di allemòl muziekaal umlisjt dur óns éjge hofkepèèl Goe Gehusseld.

Zòas ge léést is ‘t béjnao gewoon 'ne klénje bónte aovend.

Ik wit zeker dè de mensen van St. Jozef hier geweldig van hébbe genote.

Prins Jeroen I

 

Mi alle klurre ééve bónt, hiele wéj de kievel rónd

's-Mèèreges um tien uur ging ónze vastelaovestréjn van start. We zin d’r mi de Kieveloeët ingestapt um nò óns uurste halte de sosiejalewerkplats van Daelzicht te gao. Hier èngekómme stóng de pliessie al vur de deur um óns in goej orde nò binne te eskortere. Hier héb ik kénnis mage make mi de Prins en Prinses van Daelzicht. We hébbe mi z’n alle ‘ne sjònne póllónééze geloeëpe en nò ‘n bèkske koffie mi wa gebak moose we nò ónze volgende stóp Stichting Kinjerópvang Bambi wòr ók min jóngste dòòchter Femke klaor stóng um mi óns te féste. De rò van éllef wees nie wa ze zage toe ze bove èn kwame. Ze daachte dè ze in ‘ne klénje Binger terèècht ware gekómme.

Nie allieën dur de drukte van de wichter mèr ók dur wa ze dòr zage èn podiejum leecht en geluid.

Ik haa de ieër um mi prisentatriese Silvie ‘n sjòn dansje te doe. Hier bén ik nòrmaal nie zo goe in mèr di ging méj vréj goe af. Allieën de tieën ènrake waar wa moejlek mi dè bukske van méj. Ik héb d’r wal ‘n SKM óndersjééjing mi verdiend.

Wéj zin toe binnedur via de brééj sjool nò de klas van Silke van juf Fyrosée geloeëpe. Dòr han ze ‘n sjòn liedje vur méj gemakt wòrvur alle kinjer ‘n óndersjééjing krigge.

Juf Fyrosée waar zò vriendelek um mi de ganse klas mee te loeëpe nò de klas van méster Koen wòr óns Anne in zit. Hier hi Anne same mi Lieke van Bree ur liedje gezónge en dòrnao de hél klas nog twieje liedjes. Ók méster Koen waar prachtig verkléd en haa wir wa mieër haor gekrigge.

Ók dees kinjer hébbe allemòl min óndersjééjing verdient mèr die koose we pas nao de middig brénge umdè ‘t al wir titj waar. Dus dè hébbe we dan ók drèk uurst gedao in de middig vur dè we wir mi de klasse 1-2-3 nò de féstzaal bove Sam Sam ginge. We hébbe hier nog ‘n paar sjòn óptrééjes gezie en veul pólónééze geloeëpe. Ik kreeg hier nòg ‘n sjòn verzamelwèrèk van tieëkeninge èngeboje en nòg wa sjòn weurd mi aaw klassefotoos van méj.

Dòrnao moogte we nò de echte Binger wòr we mi de rest van Den Doelhof ‘n féstje hebbe gebaowd en wòr de hélle Binger vól jeugd minne spreuk hardop wees te roepe zónder ók mèr ieën woord veur te hoeve zégge. Hier waar ók de hélle kéjsjeut ènwezig en koose we énne lange pólónééze make.

Nao afloeëp zin we nò de Nostalgie gegao um dòr mi de juffe en mésters nòg èfkes wa te drinke.

Toe we trug nò óns kluplókaal ginge stóng méj dòr ‘n groeëte verrassing te waachte.

De Kuus utj Kepèèl stóng ons dòr mi ‘ne ieëre boog óp te waachte. De Vorst van de Kuus is minne kollega en die kwaam méj verrasse mi ‘n bus vól Kepèlse. Ik mag gereust zégge dè hier de uurste samewééreking in de nééj geménjte Peel en Maas begónne is. Ze hébbe óns ‘t versjil tusse ‘ne Kuus en ‘ne Koes ók utjgeli mèr ik dink dè veul Kieveloeëters dè al wir vergééte zin. ‘t Waar in ieder geval stikkus gezellig. De vréjdigaovend hébbe wéj afgeslote mi ‘t wagereechte. Di is onbesjriefelik en dè wil ik dan ók nie verklappe vur iedere Prins die nog nao méj kumt. Mer geluuëf méj….. allieën dòr vur wille ge al Prins wéére.

Prins Jeroen I 

 

Mi alle klurre ééve bónt, hiele wéj de kievel rónd

We zin hier begónne mi de Vastelaovesmis die ók di jaor wir dur Miranda van ónze veurzitter waar utjgesjrivve. Di ware sjòn persoeënleke weurd die méj èrreg ènsproke en ik héb ze dan ók goe bewaard. Pestoeër begoos ók al in te speule óp de vastelaovend want héj zee dè we mèr 's de prisj van 'n pilske in 't mèèndje moose doe. Ik héb dan ók hél wa blaow penninge in dè mèèndje zien ligge. Kan die goeje mens dè nòw allemòl gòn eumruile of zò tjie dòr de keuster vur óp pa stuure ???

Dòrnao hébbe we de sluttelövverdracht gedao. Ik héb same mi Prinses Lizzy en Vorst Marijn flink moete praote um de sluttel te bemachtige mèr dè is toch gelukt en we zalle ‘m nie trug gééve dè wit tjie ók. Hiernao hébbe wéj dan ók de Kieveloeëtevlag gehese béj ‘t nééj kievelpalisj. Wéj zin toe mi B&W nò óns kluplókaal gegao wòr wéj allemòl ‘n persoeënleke zilvere kievel óndersjééjing hébbe gekrigge begléjd mi hél sjòn weurd van Hans Smulders. Ik heb ónder de vastelaovesmis gesproke övver óntmaskere mèr dè waar zeker ‘t geval béj Hans. Moogt ‘t zò zin Hans da di òw leeste sluttelövverdracht waar dan mage méj ieder jaor belle dan doen we ‘t énne kieër per jaor same övver. Én ding sté vaast vur méj ‘t waar zeker de leeste. Want Prins wéére ge mèr énne kieër.

Toe de durre van de féstzaal béj De Zwaan ope ginge stóng ‘t dòr knóts vól mi vastelaovesvierders en hébbe we genote van ‘t leetste óptréje van Flame.

Ók Jan Ghielen hi nog énne kieër zin liedje övver Méél hél diep in min hart gezónge wa tjie ók óp de sluttelövverdracht ha gedao.

Prins Jeroen I

 

Mi alle klurre ééve bónt, hiele wéj de kievel rónd

D’n dag van de groeëte bónte stoet. We han di jaor ‘ne néjje prinsewage wa 'n echte Burgt waar, mèr ók de Kéjsjeut dee di jaor mee mi ‘ne éjge wage dankzéj de inzit van KVW en de aawers van de kinjer. Di jaor waar ‘t de gròtste optocht tot nòw toe mi zò'n 63 groepe en mieër as 515 déélnemers zónder de harmonie en sjutteréje.

Dè de hoofdmoot Méél blieft Méél en minne spreuk waar, zal veul van óllie nie óntgao zin. Ók ware d’r veul sjöllekskes te zie. Biezunder gröts ben ik op min éjge buurt die toch èfkes mi 65 déélnemers mee dee. Super fólgend jaor wir hoop ik.

Wà is dè snoepgòjje sjòn vanaf die Prinsewage en wa han we ‘t weer mee di jaor. D’r is zèllefs ‘n moment van zoonleecht geweest of dè tè kumt dur alle klurre ééve bónt.

Saoves zin we op bezuuk geweest béj de Parties die övveriges ók ’ne éjge prins han di jaor. ‘ne Echte sjoko Prins Raymond zòas dè tjie zèèllef zee. Um d’r aachter te kómme of dè tjie ók wal Mééls koos praote (umdè tjie van de Antille is) vroeg ik um of ie 22 kneenj koos utjsprééke.

Mèr de ging um nie zò goe af mèr dè tjie vastelaoves bloe haa dè koose we wal zie. Héj waar ók dè blaow mènneke béj de deur béj ‘t mómbakkesbal wa òw dè onnuuëzel blaow polsbèèndje eumdee.

Hiernao zin we nò ‘t Oranje Hotel gegao mi d’n utjslag van d’n optocht. Wa ‘n geluk dè we dòr nòg net nò binne koose anders stónge ze nòw nog te waachte óp d’n utjslag zò vól waar ‘t dòr. Volges méj waar d’r niemes die nie mi d’n optocht haa mee gedao. Nokkie nokkie vól mèr béére gezellig.

Nao min óndersjééjing van de béjnao buure zin we trug gegao nò óns kluplókaal dòr waar ‘t ók nie minder druk en d’r bleef mèr vòllek béjkómme.

Saoves mi min prinses Joyce nog béj bubser Monique óp bezuuk geweest mi minne Adjudant die méj dòr in ók nie in de steek liet. Of dè tè kumt umdè tjie dòrnao bubser Linda nò husj moog brénge wit ik nie, mèr minne Adjudant Hans hi méj in ieder geval zat éjer mi spek laote ééte terwéjl héj wees wa t’r nao ‘n paar uur wir stóng te gebeure ………….

Léés mèr ’s béj de mòndig !!!

Prins Jeroen I

 

Mi alle klurre ééve bónt, hiele wéj de kievel rónd

Nao un aovendje dur te hébbe gezakt wore we wakker dur knallende meziek in de straot. Um presies nege ure smèèreges stóng dòr die Prinsewage vur ons husj mi dòr óp de rò van éllef en Adjudant Hans um dòr ‘n serenade te kómme zinge ónder léjding van niemes minder dan ónze éjge hofzènger René Claasen. 'n Prachtig liedje wà ik same mi Joyce in ónze piejama vanutj 't ope raam heb mage ènsjòwwe.

Wòrnao dees groeëte verrassing (die volgens méj nie allieën béj óns as wékker hi gediend mèr wòr hél Méél van wakker is gewórre) woor d’r dur de rò van éllef vur iederieën éjer mi spek gebròòje. Asof we die nog nie zat óp han. Nie allieën de rò van éllef mèr ók 't kómmietee waar ènwezig en 't waar 'n sjitterend óntbéjt um nòjt mèr te vergééte.

's-Middes zin we nò de joong harste gegao béj kefee Colé. D’r waar hél wa femielie kómme kieke dus dè waar dubbel geniete. We hébbe dòr 'n prachtige klok gekrigge van die joong harste umdè we uurst vier ure han gezi en d’r nòw um hallef dréj ware. Ik daacht kóm iets érre dan kan de femielie d’r ók nog mèkkelek inkómme. Mèr ‘t sjònne van die klok is dè tjie stil sté óp éllef övver éllef. Dus we hoeve óns nie mèr övveral te hòste um óp titj te kómme. Héj hééngt nòw in óns kluplókaal, kóm ‘s kieke want héj is echt de moejte wérd.

Hiernao zin we nò ‘t kéjsjeutebal gegao um dòr d’n utjslag van d’n optocht vur de kinjer te brénge.

We hébbe same mi Goe Gehusseld en de Kieveloeët 'n hèpkje geééte béj de Nostalgie wòr we nog ‘n sjòn interaktief tonieëlstukse te zie krege van Goe Gehusseld.

Wòrnao we nò de Dólle Mòndig béj de Siem zin geweest. Ók hier hinge ze wir mi de bieën butje en dan te bedinke dè 't tenmiste hier al um éllef uur smèèreges begónne waar !!!

Ók wir béj trugkómst in ons kluplókaal waar 't wir gezellig druk um nog èfkes ‘n pilske te drinke vur dè we de naacht/mèèrege reust koose ópzuuke um zoewe nòg de groeëte fienale in te gao.

Prins Jeroen I

 

Mi alle klurre ééve bónt, hiele wéj de kievel rónd

Umdè ik geester Tjeu van Wippe Pieër al wir nie gezie haa makte ik méj toch wal zèùrig övver ‘m. Noor vertéélde méj al béj de joong harste dè tjie ók léllek ziek waar. Dus hébbe Vorst Peter en ik ‘m mèr ‘s bezoogt. 't Ging gelukkig al 'n bietje bétter, mèr iederieën wit dè as Tjeu d’r as vastelaoves gèk nie béj is dè t’r iets goe fout zit.

Tradiesie getraow is t’r óp de dinsdigmiddig ’t Kieveloeëte Treffe. Ik bén d’r dan ók gröts óp dè ik same mi Patrick Verstappen de plétjes héb maage drèèje béj de uurste eediesies van ’t Kieveloeëte Treffe. Wa we toe nòg in 't tieëken van de karaoke din um zoewe iederieën 's te laote zinge. Zèèllef moog ik de spits afbitje. Ik waar zò zinnewèèchtig gewórre dur die titj dè ik zòwa nie mèr utj min weurd kwaam. Gelukkig kénne ge dan aaltitj nog zinge zee d’n dokter. Dè héb ik dan ók mèr mi Joyce, Anne, Silke en Femke gedao.

Wa zin d’r veul leuke dinge vurbéj gekómme zeker de buut van Humbertien en Fred en Carla die dòr èfkes ‘t liedje van de vastelaovesliefde utjbilde. Ók alle andere artieste ware super en ók óp di Kieveloeëte Treffe waar ‘t wir bóm vol.

Wa bén ik verieërd as Prins dè ik óp alle aktievietéjte nog vur vólle kefees héb gestao.

Saoves hébbe we nog de Nostalgie en de Vangrail bezoogt wòrnao we langzamerhand afsjéjd van de vastelaovend ginge neme. We zin begónne mi ons afsjéjd béj ‘t kievelmènneke dè sinds de 11 van de 11 wir trug is in Méél. Wéj hébbe ‘m hier nog verieërt en ‘m övver ‘t bölleke en zin buukske gestreke zòdè tjie goe óp óns koos paase tot we wir béj ‘m trug kwame. Béj ‘t kievelpallisj hébbe we de Kieveloeëte vlag laote zakke en hébbe we in óns kluplókaal de afgeloeëpe 7 wééke èffe durgenómme en heb ik alle Méélse mense bedankt vur urre steun en dè ze gröts óp zòn vastelaovend vierend Méél moete zin.

Wéj hébbe óns toe èffe trug getrokke mi de Kieveloeët en Goe Gehusseld um ónze steke vur ‘t leest dizze vastelaovend af te légge. Nò di rietuweel hébbe we ‘n sjòn féstje gemakt mi iederieën die dè mi óns kwaam viere tot in de kléénj uurkes.

Ik bén blééj dè ge gén Prins béént veur 3 daag of én jaor mèr vur hél òw lééve !!!

Ik haa di vur gén gòwd wille misse en wa moet t’r allemòl nog kómme …….

Prins Jeroen I

 

Mi alle klurre ééve bónt, hiele wéj de kievel rónd

As ‘t aswoensdig is zòas vandaag, dan kan ik trug kieke op dréj sjitterende dólle daag.

We begose woensdigaovend al in ‘t zèùregsentrum wòr we genote hébbe van de artieste die dòr optróje en natuurlek ók ‘t same zin mi de Ulewappers. De mense dòr hébbe éjgelek nog ‘ne kléjne bónte aovend gekrigge. Vréjdigmèèrege zin wéj óp de vastelaovestréjn gesprónge en zin as uurste gestópt béj de sosiejale wéérekplats Daelzicht. Dòr heb ik drèk kénnis gemakt mi urre prins en prinses en hébbe wéj dòr same ‘ne hélle sjònne pólónééze geloeëpe. Van dòr utj ging d’n tréjn nò de Stichting Kinjerópvang Méél wòr ik same mi min jóngste dòòchter Femke féstgevierd heb in urre féstzaal die óp ‘ne kléjne Binger liekt.

Ók dòr hébbe wéj wir sjòn óptrééjes gezie en ik heb zèèlef nòg ‘n dansje mee mage doe.

We zin vanutj dòr binnedur geloeëpe (dè is nou mèkkelek béj ‘n brééj sjool) nò de klasse van óns Silke en Anne wòr Juf Fyrosée en méster Koen goe hun beest han gedao en wéj hébbe sjòn liedjes gehuuërd die ze vur óns din zinge. Smiddes hébbe wéj mi de sjool witjer vastelaovend gevierd in D’n Binger. Nao afloeëp béj trugkómst in óns kluplókaal krege we spóntaan bezuuk van de Kuus utj Kepèl wa méj en de rest van de Kieveoeët diep gerakt hi. De uurste stap nò de samewééreking van Pieël en Maas is dòr al gemakt. Saoves heb ik gelieërd wa nou wagereechte inhééld.

Zòtterdig begose we mi de Vastelaovesmis wòrnao we de sluttel hébbe bemachtigd béj de sluttelövverdracht.

Dur dè we nòw de sluttel han moochte we natuurlek ók de vlag héjse vur óns geméntjehusj wa al béjnao ‘t Kievelpalisj is.

En dòrbéj zin we ók nog us dur de Burgeméster ondersjéje mi ‘ne zilvere kievel.

Nao wa hél sjòn weurd van Hans Sulders zin wéj de bómvólle féstzaal van De Zwaan ingegao um di alles nog us te viere.

Zóndig waar ‘t dan zò witj de bónte stoet trok wir dur Méél. Vanutj ónze nééje Prinsewage(burgt) kose wéj alles goe övverzie. Ik vóng ‘t prachtig um al die klurre ééve bónt te zie in ‘n twé en ‘n halef uur duurende óptocht wòrin iedere wage/groep goe was afgewerkt of verzèùregt. Mi 63 groepe en mieër as 500 déélnemers hoef ik allieën mèr te sjrieve CHAPO !

Béj de “Parties zin van óns” héb ik de sjoko prins van Méél óntmoet en hébbe we elkaar óndersjééje.

Toe ginge wéj de utjslag brénge nò ‘t Oranje Hotel wòr dan ók iedereën waar die mi d’n óptocht haa meegedao.

Mòndigmèèrege um 9.00 uure wore wéj utj béd gezóngen dur de Prinsewage mi de hélle rò van éllef as koeërknaapjes die óns ‘n serenade kwame brénge. Ik bén d’r baang vur dè hél Méél hi mee kénne geniete. Smiddes zin wéj béj de joong harste óp bezuuk geweest béj Colé wòr veul femielie van méj ók èfkes kwaam kieke wa vastelaovend viere in Méél inhééld.

Dòrnao ging ónze vastelaoves tréjn dur nò de Kejesjeut um dòr de preesj van d’n óptocht te gòn utjréjke en iedere déélnemer te ondersjééje. Saoves nòg èfkes nò de Siem um te kieke hoe ze dòr Dólle Mòndig viere. Dinsdig moocht ik ‘t Kieveloeëte trèffe opene wa ik mi veul plezier ók héb gedao same mi Joyce en min dréj kinjer. Het prógramma zaat bómvól en de zaal ók. ‘t Was wir ‘ne middig geniete van Méélse artieste die laote zie wa humor en vastelaovend is. Saoves hébbe wéj nòg ‘n bezuuk gebroocht èn de Nostalgie en de Vangrail wòrnao we langsammerhand de fienale in mooste.

Wéj zin mi ónze fienale begónne natuurlek béj óns Kievelmènneke wa gelukkig wir trug is.

Nao ‘t laote zakke van de vlag zin wéj béj óns kluplókaal utj de vastelaoves tréjn gestapt en zage dè we goe óp titj trug ware want ‘t waar dòr nòg aaltidj 11 övver 11.

Ik ben ók bléj dè ‘t dòr nòw veurtaan aaltitj 11 övver 11 is dankzéj dees sjòn klok die wéj van de joong harste hébbe gekrigge zòdè nie allieën vur de Kieveloeët nie mèr alles zò snel hoeft te gao mèr ók dè ‘t vur méj in ‘t kluplókaal aaltitj vastelaovend is want ‘t is dòr nòjt aswoensdig gewórre zal ik dan mèr dinke.

Ik wil nog géér énne kieër Die Heimat kapel en Goe Gehusseld bedanke vur de muziekale óndersteuning. Zeer zeker de mèn van de rò van èllef en het kómmietee vur ‘t gestéélde vertraowe in méj en hél zeker ók de dames van de Kieveloeët.

Mèr zeker wil ik òllie allemòl bedanke vur ‘t mee vastelaovend viere in Méél.

Prins Jeroen I

 

Mi alle klurre ééve bónt, hiele wéj de kievel rónd

Furrig jaor zin wéj mi óns vriende nò de dienstenvéjling van de Kieveloeët geweest. Dòr hébbe wéj aardig wa dienste kénne koeëpe en hébbe 'ne óntzittende gezellige aovend gehad. Ieën van de dienste die we dòr gekaocht hébbe waar ‘n VIP behandelng béj de premjéére van de Tónieëlverénniging C.O.M. Wéj d'r 2 wééke geléje 's hin gebèèld wannieër ze óns mi d’n Liemozien en roeëje loeëper óp kwame hale?

Nòw dè waar de VIP behandeling nie, mèr as we um véjf uur in D’n Binger ware dan moogte we mi de hélle kaast mee-ééte. Dus kwame wéj tegeliek mi Henk van de Nostalgie binne en makte wéj kénnis mi de speulers. Al snel bleek dè d’r Lasagna woor geééte en alles wòr kéés in zit dòr wérd de Prins ziek van dus woor d’r drèk ‘n alternatief gehald. As dè gén VIP behandeling is wit ik ‘t ók nie mèr. Ik sjamde me övveriges wal rót mèr gelukkig waar d’r nog ‘n speulster die ók gén kéés wao. Nò ‘t fantasties ééte en de lekkere isjtaart krege wéj ‘n róndléjding vur en aachter de sjerme van ‘t podiejum. ‘t waar indrukwèkkend hoe dè ze ‘t vur mekaar han. ‘t Tónieëlstuk De Ietaljaanse Méésterhaand spult zich af in ‘n Ietaljaans landhusj en dees setting han ze perfekt néérgezit. We zin ók nòg èfkes béj de sjminkafdélling geweest en hébbe de speulers allemòl veul suukses gewenst mi de premjéére en hébbe ze toe rustig zèèlef zinnewèèchtig laote wéére zòdè Joyce en ik rustig in de fwajee wa koose drinke.

Um acht ure stipt ginge de lampe utj en begoos 't verhaal.

't Gé övver 'n Ietaljaanse femielie Tomb die sjatriek is en wòr de vader van is gestörreve en de kinjer éjgelek allemòl nòg nòjt butje de deur zin geweest. Ze hébbe ók allemòl ur éjge éjgenaardighede wa ‘t stuk ók sjòn makt. De femielie-advekaot kumt de erfenis dan ók veurlééze as alle belanghébbende dan ènwizzig zin en as t’r bekéént is wie wa kriegt en ónder wélleke umstandighede, dan beginne d’r ók de uurste doewej te valle.

't Stuk blieft tot de leeste menutj spannend en ge blieft òw telkes afvraoge wie hi 't nòw gedao. Natuurlek li ut éjnde ók nie vur de hand.

't Waar vur óns mieër as 15 jaor geléje dè we in Méél nò tónieël van de C.O.M ware geweest mèr ik dink zeker dè we vólgend jaor wir gòn want hier hoeve we dus ok nie mèr vur nò de scjaowburg. Nò afloeëp nog gezellig wa gedrónke mi de speulers zòdè we zeker van ‘ne hélle geslaagde aovend kénne spreeke. Wéj zin bléj dè wéj dizze dienst gekaocht han. En toe wees ik nog nie éns dè ik Prins ging wéére en ik dink dè niemes d’r spitj van kriegt as die vólgend wiekend nò dees veurstélling gé kieke. 'ne Ènraojer van Méélse TOP kwalietéjt!

Prins Jeroen I

 

Mi alle klurre ééve bónt, hiele wéj de kievel rónd

Óp utjnöddiging van de Stichting Daelzicht zin wéj afgeloeëpe vréjdigaovend mi ‘n selekt gezelsjap van de Kieveloeët en de dames van Nie Wisj nò Dok 6 afgeréjsd. Wéj gòn ni zo duk övver de kievelgrens mèr as ge dur Daelzicht wérd utjgenöddigd dan zitte we al in d’n taksie. Zeker as ge gezie hét dè Daelzicht in Méél goe wéérek vereecht en dè ge wit dè d’r ók Kieveloeëters wééreke dan gao ge géér nò zòn fésje hin.

Wa ik al zee, de dames van Nie Wisj ware d’r ók utjgenöddigd um 'n haalef uurke te kómme zinge.

Dòr èngekómme woore we óntvange dur ’t strötje 'n Heldese blaoskepèèl. Die we övveriges langer stókstief èn de bar hébbe zien stao as meziek zien speule mèr dè kén ók kómme umdè 't prógramma zò vól zaat. De Towerband die de boel meziekaal umlisjte die spulde de sterre van de himmel. Rónd nege ure waar 't titj vur de dames van Nie Wisj die dòr al hun gròtste Hits ten gehuuëre broochte. De groep woor kompleet gemakt mi iemmes van Daelzicht die géér mee zóng.

Compliment vur Nie Wisj die dòr nie allieën hebbe stòn zinge mèr ók gehost gedanst en de pólónééze hebbe geloeëpe mi de mensen van Daelzicht. Ik dink dè géllie die mense ‘ne ónvergéételeke aovend hébbe bezèùregd. Lòt ik veural nie sjapoo èn de Towerband vergééte die ‘t vur de Kieveloeët ók ónvergéételek makte. ‘t Waar sjòn um ‘s ‘ne kieër fést te viere mi ur as allieën ‘n bezuukske te brénge èn ur wéérekplats. Wéj huuërde van de organniesasie dè alle Carnavalsverénniginge utj Pieël en Maas ware utjgenöddigd mèr die han dink ik allemòl wa anders te doe want Méél waar de énnige die ‘t gevuul haa um as Pieël en Maas óp bezuuk te gao béj Daelzicht.

Wéj hébbe d’r van genoote en ik dink dè we vólgend jaor wir van de partéj zin.

Prins Jeroen I

 

Mi alle klurre ééve bónt, hiele wéj de kievel rónd

Zòtterdig 16 méj waar ‘t dan zò witj. 't Móment wòr de ganse rò van 11 óp stóng te waachte. De beruchte Roeëje Dag. Ik as Prins moocht di ók vur ‘t uurst (en drèk vur ‘t leest) mee maake.

Effe vur de duidelekhédj: Ge hét béj de Kieveloeët Roeëj en Blaow. De Roeëj zin de mèn van de rò van 11 en de Blaow is ‘t kòmmietee.

Smèèreges um 10 ure mooste we óp ‘t geménjtjehusj kómme en wore we verwelkómt dur Wethaower Frits (béj óns ók bekéénd as Veurzitter Frits) Burgeméster Hans Smulders en réjsléjder, Méél deskundige Henk Willems. In de ròdszaal woore we óntvange en ieder moocht ‘n plètske utjzuuke.

Vur óns waar ‘t sjòn um now us èfkes rustig te bekieke wà we now presies gekaocht han mi de sluttelövverdracht vur € 11,11.

Henk liet óns alle sjòn plèkskes en karakterestieke kunstwèèreke van ‘t geméntjehusj zie en de Roeëj hébbe vòlges méj ur naamplétje al óp ménnige deur geplèkt zòdè ze de Blaow veur waare. Nò un lekker bèkske koffie en ‘n stuk Méélse flaaj zin wéj óppe fiets ónder léjding van Henk dur Méél gefietst wòr we béj punte as ‘t Alexanderplein, De Frikkandel, Visvijver, Gòlfbaan, die d’r warsjinjlek nòjt gé kómme, Platveldkassebaow en ’t Sinterklòsputje en nòw bén ik d’r nog zeker ‘n paar vergééte mèr ik geluuëf dè de Roeëj van dees ekskursie ‘n sjòn verslag gòn maake wà dan ók wir hier óppe sajt kumt. Óp al dees plèkskes vertéélde Henk de gesjiedenis, lee Hans utj wà ‘t pólietiek iedee en ziensweezje dr aáchter waar en vertéélde Frits hoe de tiggewórrige stand van zaake waar. Di is èrreg kórt dur de bocht mèr di waar ‘n bietje de verdélling van de réjsléjders.

't Waar ‘n sjòn ervaring um mi di gezèlsjap dur óns Mééls erfgoe te hébbe maage fietse. Nò dees fietstocht van ruum 2 ure kreege wéj ‘n lunsj èngebójje béj ‘t Oranje Hotel.

Nò dè wéj dòr lekker geééte han kwaame ók de Dames binne um saame mi óns nò de Sjutteréj van de Blaow te fietse um dòr óns sjietkunste te laote zie.

Ik moet zégge dè wéj ’t d’r as Kieveloeët nie slèècht van af broochte. Zèllefs nao ‘n paar putjes gerstenaat bleeve we de blökskes d’r van afsjiete. ‘t Ging zò goe dè we mèr óp de hòwtjes zin gòn sjiete.

Tege de aovend zin we nò óns kluplókaal gefietst um dòr wa te ééte mi z’n alle. Jammergenóg han wéj saoves de afspraak um trug te gao nò óns eige vriendewiekend.

Wà tegeliekertidj woor gehaawe dus de rest van de aovend kénne wéj allieën van huuëre zégge en dè is dè t’r allieën nòg mèr verstèndige praot is geweest dien aovend.

Terèècht kénne wéj dus sprééke van 'ne Super Roeëje Dag

Prins Jeroen I

 

Mi alle klurre ééve bónt, hiele wéj de kievel rónd

Ik wit nie òf ik nòw wal of nie wa övver dizze dag moet sjrieve. De straf-fratsdag is 'ne dag wòr niemes 't övver hi tot dè tjie d’r is. Hoe en wa t’r gebeurt wit mèr ‘n kléjnj gezèlsjap.

Vur méj as Prins waar ‘t namelek én groeëte verrassing wa dè t’r dien dag ging gebeure. 't Begoos allemòl in mért toen ik mi meen dochter Anne klem woor gereje mi d’n òwto dur de Straf-frats gerechtsdeurwaarder. Héj is te herkénne dur dè tjie ‘t minste haor hi van de Kieveloeët. Héj gaf me dòr ‘n sjrieve mi van alles wa ik verkieërd gedao haa mi de vastelaovend.

Di alles moochte we kómme verdedige in het gerechtsgebòw óp zòtterdig 27 juni. En wa hébbe we óns moeten verdedige. Wéj zèlef moochte niks zégge allieën óns ròdsvraowe krege 30, 20 of 5 sekònde d’n tidj um óns te verdedige. Géllie begriept wal dè is ónbegónne wèèrek. Vur dè ge zònne rechter van òw ónsjeuld övvertuugd hét…….

Toe 't duidelek woor dè we nie ónder óns straf utj kwame krege we per groep te huuëre wa óns taakstraf inhiel. D’r wóre dréj groepe gemakt die dòrnao vieja ‘n fotospeurtocht nò Helde, Masbree en ónze groep nò Kessel mooste fietse.

In Kessel èngekómme mooste we iemes verkléjje as Kievelmènneke en dòr óp ‘t pléjn ‘n kievelkampiejoensjap gòn òrganniezere. Dè was vur óns nie zò moejlek umdè ‘t dòr kérmes waar. Ók hébbe wéj de Kievelvlag hòg midde in Kessel laote wappere.

Dòrnao mooste we béj wild vrimde mense ènbelle en koffie ópsjudde en koffie insjudde mi 'ne pieëlkoek en 'n pieëlneutje drinke. Dòr zin wéj vural goe in mèr óns gastvraow moocht van hurre mens allieën mèr nippe. En as hurre mens èfkes nie keek………. Leeg dè glas.

Toe han we nog 1 ópdracht en dè waar ‘n relekwie van de platseleke vastelaovesverénniging ruilen. Noa èfkes zuuke kwame wéj béj de veurzitter van de Kesselse Kevers utj. Die waar ècht verieërd mi óns bezuuk. ‘t Weer begoos ók flink eum te slao dus krege we de leetste oriezjienele kerversparaplu die tjie nòg tusj haa mi ‘n sjòn plèstieke tas van de Karnevalsverénniging.

De veurzitter haa natuurlek óns jubielejumboek gekrigge en wa sjitterende Kievel cd’s die nòw nòg dur Kessel sjalle neme we èn.

Dòrnao rap óppe fiets terug nò Panninge wòr we de rest van de Kieveloeët wir tege kwame um zoeë same nò Méél te fietse wòr we béj de Parties óns vur de twédde kieër moochte verdedige en nao ut zie van dees sjòn fotoos en utjlég bleek toch al snel dè de joong die nò Kessel ware geweest 't t'r wir 't beeste van af han gebroocht en Méél wir 's goe op de kart han gezit.

Dur dè we allemol han laote zie dè we echt Kieveloeëtebloe in óns han woor óns sjeuld kwitjgesjòlde zòdè we d’r wir ‘n jaor tegekénne.

We zalle ‘t nöddig hébbe.

Kórteum wir ‘ne super sjònne dag gehad.

Prins Jeroen I

 

Mi alle klurre ééve bónt, hiele wéj de kievel rónd

Óp woensdigmèèrege 11 nóvember moogt ik nao ‘n paar mònd reust min pekske wir èn en kreeg ik minne steek wir ópgezit. Toen de 11 kanónsjeut de leucht in knalde waar ‘t duidelek vur méj dè ‘t vastelaovesséjzoen 2009 -2010 begónne waar. En ja mense dè ik övver de hélleft waar van min Prinsesjap.

Mèr dè tè gén reeje waar um te treure woor al snel duidelek. Wie hi t’r nòw ‘t geluk dè van alle sjoolkinjer net òw peetekinjd béj de opening moogt zin. Saame mi Prinses Lizzy hébbe wéj dè Kievelmènnekke ‘s èffe goe verwéént en goe gewasse zò dè tjie ‘t kómmend séjzoen d’r ók wir sjòn óp sté.

Ónder léjding van ‘t nééj Kieveloeëte meziekkèrke hébbe we dòr saame nog wa gezónge mi de sjoolkinjer en toen richting óns klublókaal gegao wòr óns nééj Rò van 11 lid Léon Bots saame mi zin vraow Belinda offiesjeel zin toegetróje tot de Rò van 11.

Andrea waar in 2009 al 2 x 11 jaor gastvraow en die hébbe we ‘s unne spiegel veur gehaowe zòdè ze d’r nog ‘s 2 x 11 jaor teege kan. Jammergenóg hébbe we ók afsjéjd moete neme van 2 boegbilde van de Kieveloeët.

Uurst woor Fred mi Karin bedankt vur zinne staat van dienst binne de Kieveloeët nao 16 jaor lid te zin geweest. Fred stóng vural bekéént as Penningméster van de Kieveloeët. Ik zal vanaf 2 jannewarrie dè stukske van um gòn övverneme. En ik wil Fred dan ók nogmaals bedanke vur al zin goej tips die tjie nòw al gegévve hi.

Ók ónze veurzitter Frits en vraow Miranda haawe ‘t nao 21 jaor vur gezie. Frits veengt ‘t tidj dè t’r joong bloe in kumt en drèègt zin stukske övver èn Sibbe Gielen.

Vanaf nòw hébbe we dus ók unne ERE-veurzitter. Want dè is de tietel die tjie veur de rest van zin lééve van óns hi gekrigge.

Alle awd prinse hébbe dien dag ók nog ‘n sjòn nééj muts gekrigge mi urre naam en jaortal d’róp.

Prins Jeroen I

 

Mi alle klurre ééve bónt, hiele wéj de kievel rónd

Goe twieë wééke nao de opening van ‘t séjzoen sté dòr al wir de 29e Liedjesaovend vur de deur. In 'ne bómvólle zaal hébbe we di jaor 14 déélnemende artieste kanne ènsjaowe mi in totaal mieër dan 100 déélnemers. Ik haa zèèlef 't geluk dè ik béj de ginnerale repetiesie moogt zin. Dòr héb ik nie al 't ieën en ander kénne huuëre mèr ók de kans gehad um mi iederieën èfkes rustig te praote. Mèr Zotterdig ging 't t'r natuurlek um wie mi de Kievelprisj nò husj zao gao.

Drek um acht uurre woor de zaal al goe gevuld en kón ‘t fést beginne. Nao de opening moogte de winnaars van de Kééj Knappe Kwéékmiddig "Happie 6" beginne mi te laote zie hoe sjòn ‘t is um ók ‘s mi de liedjesaovend op te maage trééje.

Hiernao kwaame de 14 déélnemers die allemol goej teskste han övver: Echte Méélse Dörskes die vastelaovesdinsdig zinge mi de vastelaovend zòdè ze vólgend jaor de vastelaoves burgeméster van Méél nie hoeve te sjudde mèr dè ze alle éllef nog steeds verkikkerd óp karneval zin. Dus lot mèr kómme de roetsj dan gòn we féste umdè ik hier bén groeët gewórre en ik nog saaltidj moet bèùke van ‘t lache

In de pauze moogt ik dieverse déélnemers óndersjééje vur ur 1x 11 jaor déélname en Twan de Bruijn zèllefs vur zin 2x 11 jaor. Ók de jury veurzitter van di jaor Frans Strijbos woor óndersjééje vur zin 3 x veurzittersjap.

Nao 2 kérre te hébben ópgetróóje was ‘t tidj gewórre vur d’n utjslag. De prizzentasieprisj ging nò Nix’n vur ‘t sjudde mi ur kónt. De Bubs ware nummer 3 dus die próbere ‘t ‘t vólgend jaor wir ‘s ‘ne kieër.

Nie wisj woor twéddes umdè ze liete zie dè ze echte Méélse Dörskes waare en de Kievelprisj woor gewónne dur Óngerakkesen Doorst die di séjzoen géér de Vastelaoves Burgeméster van Méél wille wéére. As ge gén Prins béént is dè ók ‘n goej alternatief. Grappig dien aovend waar dè De Prins van de Wiendbuul utj Wanssum ók in de zaal waar umdè Robin Kömhoff di jaor adjudant van Prins Rob is. Ók héj moogt mee féste óp het podiejum nao d’n utjslag. Latter hébbe we saame nog èfkes wa gedrónke en kénne we trug kieke óp ‘ne sjònne Liedjesaovend.

Alle artieste bedankt vur òllie inzit

Prins Jeroen I

 

Mi alle klurre ééve bónt, hiele wéj de kievel rónd

Ik haa ‘t geluk as 2e Prins van ‘t Kieveloeëteriek um di spektakel mee te mage make. Toen ik de utjverkaochte zaal binne kwaam en veul butje Méélse gezeechte zag dee dè méj goe. Sjòn um te zie hoe min vriende van de Kieveloeët ‘t toch wir klaor kriege um te laote zie hoe ge ieën Pieël en Maas vèùremt. En zèllefs van dòr butje ware d’r mense kómme ópdage.

Nao de opening mi óns kluplied koose we drèk van de stoel ópvliege want de Toddezèk die broogte dòr drèk hur kaskrakers ten gehuuëre, dus stil blieve zitte was t’r nie mèr béj.

De uurste buutereedner waar Ben Van Daal die ‘t drèk óp méj gemunt haa en dòr snel aachter kwaam dè nie allieën ik gén verstand van voetballe haa mèr niemes van de Kieveloeët. Dur zin gevòrlek utjtjerlek dörvde de hélle zaal ók niks mèr te zégge. Toen héj vroeg wa de Prins vur wèèrek dee, brook de hélle zaal in ’t lache utj. Sjòn um te huuëre dè Ben van Daal nie de sjòllek nèèjt mèr de inhawd en dòrnao mi de sjòllek alles wir afvéégt!!!

Ók de Pastoeër en de 100 jèùrige broogte hur klassieke buuts ten gehuuëre. Van de 100 jèùrige koos ik méj nog ‘t méste herinnere. Toch blieft ‘t lache al huuëre ge um iedere wéék.

Umdè t’r ók posters dur de gemééntj gemakt ware mi Sjééle Waazel Show broogte "Let’s Do it" urre klassieker Hairspray ten tonieële zòdè we nòw ók echt van urre Show kénne spreeke. Sjòn um te zie dè Méél zò veul talent in husj hi. Dè we hél wa talent in husj hébbe bleek wal toen Koen Verstappen óp moogt trééje mi zinne krant. Sjòn um te zie hoe dè héj zinne klassieker aktuweel ha gemakt.

Ger Frenken kwaam nao Koen en die trooj zèllefs twé kérre óp althans zò leek ‘t. Dè hiernao Andy Marcelissen kwaam mi de lòlligste tusj, dè waar goe te zie en te huuëre.

Veur méj waar di 'n perfekt toetje van min Prinsesjap zòdè ik méj nòw rustig kan veurberéjde óp min afsjéjt. Ik hoop dè we nog duk unne Sjééle Waazel Gala zalle kriege hier in Méél. Want óp zòn sjòn aovende hier in de regiejo mage we gröts zin óp ónze Kieveloeët dè ze ‘t toch wir vur mekaar kriege.

Sjapoo jónges en as ik de kómmende jòrre ók iets kan doe dan huuër ik ‘t wal.

Prins Jeroen I

 

Mi alle klurre ééve bónt, hiele wéj de kievel rónd

't Is gedao, ‘t zit t’r óp, de 365 daag zin eum en ik waar ók eum óp dien zotterdigaovend. Wa hébbe wéj genote mi óns gezin. Um zeuve ure zin wéj nò de Nostalgie geloeëpe wòr wéj rustig èffe de steke óp hébbe gezit en wòr wéj nog sjòn vier nééj leje van Goe Gehusseld hébbe óndersjééje. Zòdè ze wér de boel muziekaal óp stèlte kénne zitte.

Toen zin wéj mi z’n alle nò óns kluphusj De Zwaan geloeëpe wòr wéj vólledige verrast wore dur de massale ópkomst van min vriende, ridders van de Kieveloeët, famielie, bekéénde, awers, buurt, personieël, Prinses Lizzy en Vorst Martijn en de hél Kéjjesjeut en gò zò mèr dur.

Ik haa gevraogt um iets érder dan normaal nò de Zwaan te gao um lekker èffe béj te kletse mi iederieën mèr dòr kwaam wénnig van want ik moost al snel óp de toffel gòn stao vur de leuke weurd van iederieën. Ik haa 'ne hélle sjònne spiech veurberéjd mèr éjgelek han min gaste alles al verwoord wa ik dien aovend wao vertélle. En dan ók nog ‘s al die sjòn kedoos.

Allemòl hél hartelijk bedankt hiervur. Vur de kedoos, weurd en ondersjééjinge. Ik zal ze zeker ‘n sjòn plats gòn gééve.

Rond nege ure woor ‘t tidj um nò ‘t Oranje Hotel te gao um dòr nog de uurste ceedee van di séjzoen èn Johan van Teefelen van de Rabobank te övverhandige. De Rabobank spónserd dees ceedee al vanaf ‘t begin dè t’r Kieveloeët ceedees zin (15). Ók Johan gé zin funksie d’r di jaor béj nér légge dus ik kan al wér gröts zin um de leeste Rabobank Méél direkteur dees ceedee te hébbe mage gééve.

Toen waar ‘t dan ók echt zò witj dè de leetste Prins van de geménjtje Méél afsjéjd moos gòn neme. Nao ‘n paar sjòn weurd van ónze veurzitter Sibbe woor méj de septer, keep, steek en jas afgenómme en stóng dòr wir gewoon Jeroen Schriks.

Jao dan witte ge drèk wa ge mist dè kan ik òllie zégge. Di vuult èffe nie lekker mèr gelukkig kreeg ik drèk ‘n sjòn nééj blaow jeske èn zòdè ik de néjje penningméster van de Kieveloeët bén.

Toen kwaam Wim Basten èn ‘t woord um méj óp te neme béj de awd Prinse en kreeg ik ‘t bekéénde gruun steekske óp de kóp. Ik kreeg ‘ne groeëte klós övver méj hin en d’r woor ‘ne kielómééter roeëj, géél en gruun lint dur de zaal gedao wà ik moost ópròlle as klós. Nee ik waar nie de klós mèr d’r kwaam wér ‘s garre óp de klós.

Dòrnao woor d’r övver gegao mi de ónthulling van Prins Tjerk I mèr dè lééze géllie wal in zin Prinselééve.

Ik kan óprecht sprééke dè nie allieën ik mèr ók min vraow Joyce en min kinjer Anne, Silke en Femke de sjònste Vastelaovend van ur lééve hébbe gehad.

Wéj wille dan ók vur de leeste kieër iederieën bedanke veur dizze geweldige tidj en zeker IEDERIEËN van de Kieveloeët want ‘t vuult echt as femielie.

Méél BEDANKT.

Prins Jeroen I

 

Mi alle klurre ééve bónt, hiele wéj de kievel rónd