user_mobilelogo

Prins Hidde I

 

 

 

 

't Prinselééve van Prins Hidde I

Kieveloeëters en Kieveloeëterinne,

Wa héb ik al ‘n èntal gewéldige daag maage belééve as Prins Hidde I. Afgeloeëpe zóndig um hallef dréj woor ik same mi min kòllega’s Thijs, Ruud en Sander érreges in Méél ópgepikt dur de Kieveloeët en zin we nò ‘t Oranje Hotel geréjje um vervòlleges ’n spannende anderhallef uur tegemoet te gao. De zinnewe begose écht te kómme wie we óp ‘t podiejum stónge, nòdè min andere kòllega Koen ‘n verhaol haa veurgedrage as veurberéjding óp ’t utjkómme van de prins. ‘t Waar dan ók ‘n enòrme ópleuchting toen minne naam woor geroepe en min masker af woor gedao. Sjòn um dan de verbaasde gezeechte te zie van kammerèùj, femielie, kollega’s, voetbalkammerèùj en nòg vul mieër ménse die ènwezig ware.

Gelukkig ha ik hiernao nòg èfkes ‘n momentje um béj te kómme mi óns pap, mam en min zusjes Boukje en Renske, die ók vólóp èn ‘t geniete ware.

De resépsie, die hieróp vòllegde, waar dan ók gewéldig um mee te make. We hébbe écht óntsittend veul entoesiejaste en sjòn rejaksies mage kriege van iederieëen, die d’r béj waar um méj, óns pap en mam, min zusjes en latter gelukkig ók min bruur Jorn en zin vriendin Charlotte te feliesietere. Hier hébben we mi zin alle écht van genote.

Nò de resépsie waar ‘t natuurlek tidj vur ‘n fésje dè ik mooch belééve mi veul ènwezige kammerèùj, femielie, kollega’s enz. Seunt dè ik tidj te kórt kwaam um iederieën persunlek te bedanke vur ur ènwezighéjd, want die ènwezighéjd wérd nòg altidj écht gewaardeerd. Rónd hallef nege vertròkke we mi de Kieveloeët, Goe Gehusseld en ’n èntal kammerèùj nò óns tusj, wòr ‘t al flink waar versierd dur ónze buurtverénneging. Top! Hier hébben we nòg d’n tidj gehad um nao te praote övver ‘ne fantastiese dag ónder ‘t genòt van ‘n hépke en ‘n drènkske. Ók èn ‘t énjd van d’n dag nòg ‘èfkes’ mage geniete van de óngeluufelek veul bereechte, die ik gekrigge ha. Super!

Ik mag, natuurlek ók names onze fèmilie, trugkieke óp ‘ne gewéldige dag en ‘n super óntvangst béj de Kieveloeët. Alle verwachtinge zin dien dag övvertròffe. Ik héb óntsittend veul genote van alle rejaksies van ménse die deecht béj me stòn, de drukbezoochte resépsie, ‘t fésje, de feliesietasies in de vèùrem van berichjes, kartjes, enz. en natuurlek de organiesasie van dizze dag, die dur de hélle Kieveloeët tòt in de puntjes geregeld waar. Minne dànk gè utj nór Voorst Wiljan, Adjedant Mark, veurzitter Rudy, de Rò van 11, ut kommitee, de dames en Goe Gehusseld vur de goej zèùrig béj ut Oranje Hotel en béj ons tusj. Òk wil ik Prins Rob I bedanke vur de mánier wór óp hij de vastelaovend ut vurrig séjzoen klèùr hi gegóvve. Di allemól motieveert méj nòg mieër um d’r same mi òllie allemòl ‘n fantasties vastelaovesséjzoen van te make, ók al is ‘t mèr kórt. Hopelijk zie ik òllie wér vlug óp ieën van de veul aktievietéjte, die de kómmende wééke plats zalle vinge.

Nòg ‘ne kieër bedankt vur ‘n gewéldig start van min vastelaovesséjzoen as Prins Hidde I!

 

Gén réékene of diktee, vastelaovend, dè gééf ik òllie mee!

Prins Hidde d’n Uurste

Wà is t’r veul óp me afgekómme en wà héb ik veul belééfd de afgeloeëpe twieje wééke. Twieje èrreg drukke wééke mi iedere aovend iets óppe plènning, mèr di wéégt natuurlek nie óp tege ’t plezier dè ik belééf èn ’t prins zin van de Kieveloeët. Iedere dag wér mage geniete van èntoeziejaste rejaksies, leuke karte , pakkètjes en nòg veul mieër, dè is me èrreg veul wért. Ik zal òllie meeneme in min belééfenisse!

Daags nao ’t prinsebal moocht ik gelukkig gòn wééreke en ’t èntoeziejasme van de kinjer utj minne groep 7 waar èrreg sjòn um mee te make. Ók de klas waar al versierd dur aktieve kòlleegaas. Smiddes kwaam Umroep P&M nòg in de klas um ’n èntal kinjer utj de klas te intervjoewe. Saoves woore d’r fotoos gemakt wòrnao ik èn moocht sjuive béj de ròdsvergaddering. Óp dinzig woor d’r ók vergadderd mi de dames. In allebééj de vergadderinge woor me steeds duideleker hoe ’t t’r béj de Kieeveloeët èn toe gé; alles tot in de puntjes geregeld dur ‘ne geweldige groep ètoeziejaste en harde wéérekers. ’n KICKen wiekènd!

Véngneuze!

Óp vréjdig 8 jannewarrie ware we mi de Kieveloeët utjgenöddigd um óp bezuuk te gao béj de Véngneuze. Dizze aovend wore de néjje Prins en prinses utjgeroepe, naodè t’r afsjéjd genómme waar van de uurste Prins en Prinses van de Véngneuze; prins Bram en prinses Maud. Di jaor zin prins Sten en prinses Hieke èn de beurt um veuróp te gao in de pólónééze van ’t Véngneuzeriek! ‘ne Èrreg leuke aovend en vur méj natuurlek èkstrà spesiejaal um óp dizze aovend awd-lieërlinge van de bazissjool te trèffe béj de Véngneuze. Prins Sten en prinses Hieke, we zalle de kómmende tidj gegàrrendeerd duk saame de pólónééze loeëpe. Geniet t’r van!

Versierd

Óp zòtterdig moocht ik um nege uure utje vérre. Ik waar al óppe högte van ’t féjt dè t’r nòg mieër versierd zao wéére dur de buurt. De zóndig van ’t prinsebal waar d’r al ’n sjòn begin gemakt, vadaag makte de buurt ’t af. Ik ging utj van ‘ne man of tien, mèr wà ik óppe óprit zag gebeure, waar geniete; 25 tot 30 man die óns husj prachtig versierde, inkluuzief de straot. Èrreg sjòn um te zie hoe di àllemòl dur de buurt woor ópgepakt en ’t èntoesiejasme van al dees mènse mee te make!

De hélle aovend Blieve Lache béj ‘t P&M liedjesfèstieval

Saoves waar ’t dan zò witj; ’t P&M liedjesfèstieval in Kessel-Eik. Blieve Lache moocht as afgevaardigde van Méél óns dèùrep vertiggewoordige. Mi de gròtste bus van Ghielen, die utjeraard bómvól zaat, ginge we vól vertròwwe nò Kessel-Eik. Tot min verbazing ware d’r ók nòg ‘ne hoeëp vriende ènwizzig die same mi óns ’s zòn laote zie dè Méél ènwizzig waar in Kessel-Eik. Super um te zie zéj hier mi meelééve en in ’t féstgedrusj meegòn!

’t Doel van Blieve Lache waar um vur de PJP-bókaal, de prizzèntasieprisj, te gao. Nao ’n spètterend óptrééje krigge we téjdes de prisjutjréjking te huuëre dè di doel ók behald waar. Super! Mede dankzéj de èkt van de Méélse Dörskes moocht Blieve Lache de PJP-bókaal in óntvangst neme en nòg ‘ne kieër óptrééje vur alle bezuukers die ènwizzig ware. Latter kreeg di féstje nòg ’n goej vervòlleg in de Zwaan. Wà gaf di wiekènd me ‘ne KICK!

New Years Party

Óp vréjdig 15 jannewarrie waar de jaorlekse New Years Party van bazissjool Den Doelhof; ‘ne jéjjaorsbòrrel vur al ’t persónieël en ènhang. Afgesproke mi Paul, de dierekteur, um in vól òrnaat èn te trééje same mi Vorst Wiljan en adjudant Mark béj de Nostalgie, as verassing vur de rest van ’t persónieël. Dòr èngekómme daacht ik dè ik min kòlleegas zao verassen, mèr’t waar de eumgekieërde wérreld. Wà ‘ne wèèreme óntvangst Dames mi prinsessekrone óp en maanskéérels mi toeters en ‘ne pólónééze die geloeëpe woor. Nao ’n paar sjòn weurdjes moocht ik plats neme óp ‘ne troon um vervòlleges mee te doe èn ’n leuk spel dè geòrganniezeerd waar dur min kòlleegas. Ik moocht van dierekteur Paul Engels (wòrbéj ’t Mééls praote ‘m goe afging) nòg ’n prachtig kunstwèèrek in óntvangst neme dè méj èngebójje woor names al ’t persónieël van Den Doelhof. Èrreg sjòn um ók ’t èntoeziejasme béj dizze groep te zie, wòrmi ik durdewééks iedere dag te make héb. Kòlleegas en ènhang bedankt!

Kééj Knappe Kwéékmiddig

Zóndig 17 jannewarrie waar ’t tidj um nao ‘ne vréjje zòtterdig ’n bezuuk te brénge èn de Kééj Knappe Kwéékmiddig. Vur méj ‘ne spesiejale liedjesmiddig wòrvan ik, same mi óns pap, de naam vur héb verzónne en wòr ik as kléjnje jóng same mi min zeusters Boukje en Renske en minne goeje vriend Jeroen hél duk èn héb meegedao. Hier hébbe we toe èrreg veul plezier èn belééfd en ’t waar sjòn um te zie dè ók de délnemers van vandaag d’rvan genote. Vur de winnaar van de àwwere groepe waar d’r ’n èkstràverassing, want zéj mage óp vréjdig 5 fibberwarrie óptrééje béj de machtsövverdracht van Pieël en Maas in de Heuf. Dizze prisj ging nò de SuPiSiLi’s. SuPiSiLi’s prófiesiejat! We gòn d’r same ’n sjòn fést van make!

Ók woor d’r vandaag àfsjéjd genómme van Prinses Syl en Vorst Siem van de Kéjsjeut. Zéj hébbe ’n fantasties jaor aachter de rug en hébbe di afgeslóte mi ’n paar sjòn weurd. Zéj moochte sèpter övverdrage èn de twieje nééj heersers van de Kéjsjeut. Geweldig um te zie hoe èntoeziejast Prins Arjan en Vorstin Isa, same mi de rò van Éllef, veuróp ginge in de pólónééze. Ók di blieve spesiejale mómènte vur méj, umdè ik de kómmende tidj natuurlek veul mi dees linjer “te make héb”. Vural in de karnevalsperiejode, mèr natuurlek ók óp sjool. Prins Arjan en Vorstin Isa en Rò van Éllef; geniet van òllie tidj béj de Kéjsjeut. We gòn elkaar de kómmende periejode duk zie!

 

Gén réékene of diktee, vastelaovend, dè gééf ik òllie mee!

Prins Hidde d’n Uurste

’t Wiekènd van 23 en 24 jannewarrie stóng in ’t tieëken van ’t bezuuk èn “De Oelewappers Savelberg”, en de bónte aovend en de bónte middig. Vur méj d’n uurste kieër dè ik ènwizzig waar óp ’n bónt wiekènd. Um di wiekènd dan drèk as prins te belééve, waar echt geweldig.

Óp zòtterdigmiddig ware we béj “De Oelewappers” óp Savelberg, wòr we mi de Kieveloeët utjgenöddigd ware vur ’t utjkómme van de nééj Prinses en Prins. Leuk um ’t entoeziejasme hier te zie en ’ne èrreg speesiejale middig umdè de prinses utj Méél kumt. Prinses Jamie (daochter van Hay en Maria Becks) mag same mi Prins Mark regere övver ’t Oelewapperriek, profiesiejat!

Saoves waar ’t dan ók zò witj; min debuut óp ‘ne bónte aovend. Zinnewèèchtig umdè ik nie wees wà ik d’r van moos verwaachte, mèr ók umdè ik wees dè t’r, zeker èn ’t begin, toch ‘ne hélle hoeëp oeëge óp me gereecht zòn zin. De zaal zaat vól, de bezuukers han d’r zin in en d’r stóng ’n sjòn prógramma vur óns klaor. Allemòl ingreediejente vur ‘ne tóp aovend en di woor ’t dan ók. Óptrééjes van Méélse artieste, mèr ók tòppers utj Brabant en Limburg stónge óp ’t prógramma. Genote van Goe Bedoeld, mi ur leuke interaksie mi ’t publiek, de Érpelmèèndjes mi ur òrriezjieneele iedeeë en ’n liedje dè ze speesiejaal vur méj gemakt han. Super! Ók de dames van Let’s Do It en Go For It din ‘t, Um & Um en de fantastiese Rob Scheepers makte di wiekènd kómpleet. ’t Publiek in de zaal waar èntoeziejast en genoot vólóp mi me mee. ’n Super wiekènd!

’t Leeste wiekènd vurdè ’t ècht lósbarst!

’t Leeste wiekènd, vurdè we d’róp lós gòn. Óp vréjdig kwaam de krantekómmissie óp bezuuk um de uurste vastelaoveskrant èn te bieje, mi dòrbéj ’n prachtig kedoo. ‘ne gezèllige aovend wòrbéj veul leuke verhale mi elkaar utjgewisseld woore en alvast ’n kiekske genómme woor in de krant, die we de vóllegende dag moochte verkoeëpe. ’t Weer zaat jammergenóg nie mee, mer dè moocht de prèt nie drukke. Mi veul vréjwillegers hébbe we ‘ne hélle hoeëp krante verkaocht en veural veul leuke reejaksies gekrigge.

Vervòlleges moos ik wà érre stóppe mi ’t verkoeëpe van dees krant, umdè ik same mi vorst Wiljan nò Venló moos um ’n foto te make mi ‘ne hélleboel prinse utj Limburg. Ók dè waar wér ’n leuke hèppening, ’n sjòn vérreparrade.

Toe de foto gemakt waar, snel de òwtó wér in um óppe tidj béj ’t EFFEBAL te zin! ’n Speesiejale aktievietéjt, umdè ik natuurlek béj RKMSV voetbal bén, mèr ók umdè ik hier vieftien jaor geléjje zèèlef EFFE prins noocht zin. Dè waar al ‘ne dag um nòjt te vergééte, dus koos ik me hél goe veurstélle hoe de EFFE prins/prinses zich vandaag zao gòn vuule. Nào ’n wèèrem ónthaal in de kantiene begónne we al snel mi dees bekééndmaking. Prins Sem Hoefnagels ha ’t geluk um di jaor EFFE prins te zin. Héj hi t’r same mi zin femielie, enorm van genote en durdè zéj d’r van genote, genote wéj natuurlek ók. Méj woor dur prins Sem ’n prachtige óndersjéjjing van de klup eumgehange en ók ik moog prins Sem óndersjééje. Ók Francien Haazen woor nòg dur méj óndersjééje vur ur geweldige inzit die zéj al jòrre hi vur de voetbalklup. ‘ne Tópmiddig mi leuke óptrééjes van jeugdgroepe, Blieve lache en Blieve Kwééke en ‘ne hélleboel pólónéézes. RKMSV bedank!.

Saoves ware we béj de Vangrail te gast um same mi ur ‘t 21 jèùrig bestao van di kefee teviere. Ók di waar speesiejaal, umdè di min stamkroeg is. ’t Waar druk en ók di waar wér ‘ne geslaagde aovend, mi spetterende óptrééjes van Anderkovver en veul leuke reejaksies van bekéénde die wér ènwezig ware!

De afgeloeëpe wééke zin ècht in sneltréjnvaart vurbéjgegao. Ik besef amper dè ’t de kómmende wéék als zò witj is. Ik héb al veul geweldige ervaringe óp mage doe en héb al genote van alles wà t’r kumt kieke béj ’n prinselééve. Ik kiek enorm utj nò de kómmende wéék. Ik hoop òllie natuurlek allemòl ‘ne kieër te zie mi ieën van de veul aktievietéjte de wéére geòrganniezeerd in Méél. Ik zal nao de vastelaovend min vóllegende “Prinselééve” publiesere., wòrin ik trug gao kieke óp hopelek ‘ne geweldige vastelaovend! Geniet t’r vuràl van, want ’t is zoeë verbéj!

 

Gén réékene of diktee, vastelaovend, dè gééf ik òllie mee!

Prins Hidde d’n Uurste

Dè waar ’t dan; vastelaovend 2016. ‘ne Tidj die hél waardevól is geweest vur méj, mèr zeker ók vur min umgééving. Ik héb genóte van alle spesiejale mómènte die ik héb meegemakt. Genóte van groepe die zich vur méj béjèlkaar pakte en geweldige dinge vur méj óp tòw zitte en natuurlek ók van iederieën die béj iedere aktievietéjt, wélleke dan ók, ènwizzig waar. Zónder òllie allemòl ware dees mómènte d’r nie geweest. Mómènte vur ’t lééve, die ik nòjt mèr  zal vergééte. Veul van dees mómènte wore óp kamera vaastgeli, mèr di allemòl wérd vural in ieders geheuge gegrift. Zèllefs vur ‘ne lieërkracht is di mi gén pèèn te besjrieve. Toch doe ik ’n poging. ‘ne Klénje greep utj dizze, vur méj, ónvergéételeke vastelaovend.

  • Óp dinzig 2 fibberwarrie béj ‘t ‘Internasiejónale Prinsetreffe’ in Remeund  geweest. Wà ’n vérreparrade. Veul bekéénde utj Pieël en Maas gezie en ók veul apparte fieguure rónd zien loeëpe. De gèkst geklédde prinse liepe d’r rónd. ’n Belévenis óp zich.
  • Óp woensdig  3 fibberwarrie broochte we ’n bezuuk èn ’t zèùregsentrum in Méél, same mi de karnevalsverénniging utj de Nirkant, ‘ne Gezellige aovend mi ‘ne boel óptréjes, pólónéézes en gezellige praot.
  • De dónderdig waar èrreg spesiejaal. We moochte óp bezuuk béj ’t utjkómme van de prins óppe Vijverhofschool in Tegele. Vur méj ‘ne bekéénde die prins zò wéére; Jeroen Stappers. Jeroen löpt stazje béj óns óp sjool en héélt aaltidj ’n plèkske vur méj bezit in de klénje pòwze en de lunsj, um same te ééte en gezellig te buurte. ’n Echt maatje. Vur Jeroen ’n verassing dè wéj óp bezuuk kwame. Zinne blik toe wéj van aachterutj de zaal binnekwame waar gòwd wérd. Geweldig um zin bléjdsjap en èntoeziejasme, same mi die van de ander kinjer te zie. Nog steeds krieg ik kiepevel às ik èn di mómènt trugdink.
  • Um 15.00 uure moochte wéj ’n bezuuk brénge èn de kultuurkarroesel van SamSam. Hier wore Niek (Basten) en Sterre (Cranenbroek) verkózze tot prins en prinses van die middig. ‘ne Leuke middig mi veul èntoesiejaste kinjer, wòrmi we nog ‘ne leuke kwis makte.
  • Saoves nog 3 X wagereechte. Énne dòrvan waar ’n verassing en dè waar drèk d’n uurste; MINNE GROEP 7! Fantasties… awers die zich béjén han gepakt um di same mi de kinjer óp te zitte en ‘ne wage inén te knutsele. In de klas niks gemèrerkt, dus wà ’n verassing! Toe al zin in de zóndig um ze te zien sjittere mi de óptocht. Vervòlleges béj de Kéjsjeut óp bezuuk geweest, wòr ‘ne prachtige wage stóng béj Arjan tusj. Same mi de kinjer al getest of de wage ’n bietje véérde en dè di tjie. Ók dè waar same mi de awers ’n gezellig uurke. Tot slót ware we welkóm béj de Vèngneuze in de Ketter. Urre wage zao zòtterdig klaor zin, dus makte we d’r in de Ketter ’n sjòn fést van!
  • Vréjdig 5 fibberwarrie waar às tusjkómme vur méj. Nò dizze dag keek ik ’t mést utj; ’t bezuuk èn SamSam en de bazissjool. De èntoeziejaste kinjer en kòlleegaas die al ’n paar wééke mi me “mee èn ’t lééve” ware, ware die dag ók wér geweldig. Övveral ’n prachtige óntvangst gekrigge mi dòrbéj leuke kadootjes, sjón weurd en ‘ne hélle hoeëp pólónéézes. Hél biezunder um hier kòlleegaas te mage óndersjéje mi min spesiejaal plaatje en te zie en te mèrreke wà di mi andere duu. Paul Engels woor óndersjéje, umdè tjie natuurlek degene is die méj óp sjool hi èngenómme en die méj dus ‘ne néjje stap in min lééve booj. Ók Hanneke Stammen woor óndersjéje vur de waardering die ik vur ur héb, geduurende en nao ‘ne moejleke periejode vur ur en ur famielie. ’n Èrreg emosiejóneel mómènt, hél biezunder.
  • Saoves moochte we nò de machtsövverdracht van Pieël en Maas in de Heuf in Panninge. Ók di woor ’n geweldig “Mééls getint” fésje mi de Kieveloeët, Méélse artieste, de Kéjsjeut, prinses Jamie van de Oelewappers en de andere prinse en prinsesse van P & M. De sluttel woor binneghald, dus ’t fést koost beginne!
  • Nao de machtsövverdracht mi de Kieveloeët ónze éjge wage getest béj ’t wagereechte. ’n Super fésje wòrbéj de wage al aardig wèèrem woor gemakt vur zóndig!
  • De zòtterdig moocht ’t héllemòl ècht beginne; Vastelaovend 2016! Begónne mi de vastelaovesmis in de kéérek. Èrreg leuk um di same mi de Kéjsjeut en de Vèngneuze te mage doe. ’n Mis die in ’t teema van “Vastelaovend, Same Viere” stóng.
  • Vervòlleges de sluttelövverdracht in ‘ne bómvólle Binger. Wà ‘ne hoeëp mense ware d’r ènwizzig in de zaal. Van te vurre zaat hier natuurlek veul veurberéjdend wèèrek èn vaast um de planne die ik haa, goe utje te kanne drage béj de geménjtjeròdsleeje. Di woor allemòl goe wéggezit en we hébbe veul kanne lache. Prachtig um di spel mee te mage speule. De sluttel waar binne! Pascal Stappers woor hier mi de “dröppel” óndersjéje vur zinne inzit vur de Kieveloeët. Di allemòl hébbe we vervòlleges ‘gevierd’ béj ’t héjse van de vlagge en de geweldige “aafter paartie” béj de Zwaan, wòrbéj ik Maud Smeets héb óndersjéje vur de gezellige tidj óp ’t Peellandcollege en umdè ze afgeloeëpe wééke zò vur me klaor stóng.
  • Zóndig d’n óptocht. Wà ’n beleévenis. D’r woor veul mi minne spreuk gedao. Nie te geluuëve hoeveul groepe zich vur méj béj èlkaar han gepakt um mee te doe èn ‘ne super verzèùregde óptocht. De buurt, min klas, kòlleegaas, min voetbaltiem en natuurlek as leeste de vriende & famielie & Summer Kick-off veraste méj en liete me die dag optiemaal geniete. Di kwaam natuurlek ók dur ’t weer, want wà han we hier geluk mi. ’t Nummer ‘Sun is Shining’ kwaam hier hél toepasselek in trug. Nie allieén de Sun waar èn ’t shine, mèr alle délnemers, al ’t publiek en dòrdur ik zèèlef ók óppe prinsewage. Mómènte um nòjt mèr te vergééte.
  • Saoves de utjslag van d’n óptocht in ’t Oranje Hotel. Ók dòr wér ’n fantasties fést mage make mi alle ènwizzige. Às kórs óppe taart Judith Volmer nog mage óndersjéje. Zòàs ze zèèlef övver méj sjrieft, zò dink ik ók övver ur; ’n maatje utj duzjende.
  • Mòndig daacht ik lekker utj te kanne slaope en dòrum waar ik de aovend van te vurre ók al “óppe tidj” nò husj gegao um èfkes béj te kómme. Um 9 uure woor ik wakker, mèr nie van de wékker. Wakker wéére van min nummer “Sun is Shining” waar àsof ik nie inéns wakker woor, mèr nog steeds bleef druuëme. Butje stóng tot min verbazing de hélle Kieveloeët mi ’n èntal vriende óppe wage. Zéj broochte méj nò sjool wòr ’n hélle hoeëp kinjer en awers van min klas ènwizzig ware. Um de dag luudiek te ópene en same lekker te óntbéjte. Fantasties!
  • Smiddes de femieliedag béj Colé. Wér woor ik verrast. Dizze kier dur veul femielieleeje die ènwizzig ware. Nie verwaacht en dòrum èkstra sjòn um te zie! Hier moocht ik pap en mam, min zeusters, min bruur en zin vriendin óndersjéje vur alles wa ze altidj vur méj doe en hebbe gedao. Ók ome Henk en Jan van Rijt wore óndersjéje. ’n Èntal geweldige kadoos van femielie, vriende en de Joong Harste in óntvangst mage neme. ’t Allersjònste kadoo; de izjere steek van pap en mam. Mònde trug gedrömd dè pap ‘ne steek vur méj zao make en di woor wèrkelekhéjdj. Óp ’t plètje: “Hidde, soms kómme droeëme utj”. Iedere kieër wér kiepevel en ók nog unne glimlach op min gezeecht às ik hiernò kiek.
  • De prisjutjréjking van de jeugd in de Parties béj ’t Kéjsjeutebal. Top! Mi as hògtepunt de 1e prisj utj te mage réjke èn min éjge klas die d’r die dag ók wér vur me ware.
  • Nao ’t ééte béj de Stoep, wór Patrick Verstappen nog woor óndersjéje, óp bezuuk béj de Véngneuze. Ók dòr ’t daak d’r af mi “Sun is Shining’!
  • Vervòlleges ’n wèèrem welkóm béj de Siem. Umdè de mense dòr die middig nòg nie duk genóg ’t nummer “Beeringe” han gehuuërd, din we di nòg ’n paar kérre sjòn övver. Sylvia Brummans woor hier óndersjéje vur urre inzit vur de buurt en ur ieniesiejatief (same mi veul andere buurtgenóte) vur de óptocht. Ók moocht ik hier Bart Smeets en Anne Vestjens óndersjéje. Wà ware ze me dankbaar. Di terwiel ’t éjgelek de bedoeling waar dè  ik ze mi die óndersjéjing zao bedanke vur wà ze allemòl vur me doen en hébbe gedao.
  • Dinzig mi min awers, zeusters en Jeroen ’t Kieveltreffe mage ópene mi ’t teema “Ik haaw van Méél”. Hier haa ik de ieër um de “Vastelaovesvierder” van ’t jaor 2016 te mage benoeme: Ron Basten!
  • Ók genote van de veul óptréjjes die in ’t tieëken van méj stónge. De buurt die min talente ging óntdékke, kòlleegaas en vriende die vur méj óp zuuk gingen nò ’n prinses, femilie die un sjón nummerke vur méj haa gekómponeerd en netuurlik Summer Kick-off die mi alle ènwizzige de hélle Zwaan óppe kóp zate. Kiepevelmómènt nummer……..
  • Um min (toe al) geweldige vastelaovesséjzoen héllemòl perfekt te make, kreeg ik ’t heugleke néjs dè t’r ‘ne vastelaovestwélling gebórre waar. ’n Gebórte téjdes de vastelaovend gebeurt nie duk, mèr ‘ne twélling is uuniek! Óp zòtterdig 20 fibberwarrie zin we béj Knoxx en Seven óp kraamvieziete geweest.
  • Saoves óp bezuuk béj de Nostalgie. Biezunder, want di wérd vur ur ’t leeste bezuuk van de Kieveloeët in de Nostalgie. ’n Sjòn weurdje dur vorst Wiljam vur Rudy, Henk en Mariet. Biezunder um di “leeste mómènt” mee te mage make às prins.
  • Dòrnao nò min stamkroeg, de Vangrail. Ronald haa Ruud Iglesias wete te strikke um ’n óptréje te verzèùrege en héj haa ’n sjòn weurdje vur me mi dòrbéj ’n leuk èndinke; ’n sjèùrt mi (nie de offiesiejele) spreuk d’r aachteróp. Ók moocht ik hier Dylan Verhaag óndersjéje. Iemes wòr ik aaltidj óp kan baowe, iemes die nie veul mi karneval hi mèr die wal speesiejaal vur méj ènwizzig waar óp ’t prinsebal en hier béj de Vangrail.
  • Nao di bezuuk ginge we mi ‘ne ónwisj groeëte groep richting ’t Kievelmènneke  um dòr de vlag te strieke en vur de leeste kieër “Lééve de Kieveloeët” te zinge.
  • Truggekómme béj de Zwaan moochte we óns ópmake vur ’t slótakkoord; de afslutjing van ‘ne geweldige Vastelaovend. Prins Sten en Prinses Hieke van de Véngneuze en Prins Arjan en Vorstin Isa van de Kéjsjeut han allemòl ’n sjòn afslutjend weurdje, wòr ók de nöddige traone övver de wange raolde. Ók ik haa ’t hier moejlek, want wà hébbe zéj ’t fantasties gedao  mi z’n alle! 
  • Óppe tòffel moocht ik nòg iets hél bezunders doe, vurdè ik min afslutjend weurdje hiel. Jeroen Haazen kreeg hier min allerleeste ondersjéjing, de “dröppel”. Jeroen en ik zin van jóngs afèn al vriende. ‘ne Harde wééreker, ‘ne stille genieter, is t’r aaltidj vur me geweest en zal d’r aaltidj vur me zin. Ók di waar hél speesiejaal um te mage doe.
  • Vur méj ók ’t éjnde van vastelaovend 2016. De septer ingeleverd, de steek af en mi ‘ne bómvólle Zwaan di séjzoen geweldig af mage slutje.

Óngeluuëfelek gröts dè ik téjdes de Vastelaovend van 2016 hép mage heerse övver ’t Kieveloeëteriek. De veule fantastiese mómènte die ik same mi iederieën hép mage belééve, zin vur méj gòwd wérd. Ik wil géér iederieën die wòr dan ók ènwizzig waar en óp wà vur menier dan ók iets vur méj betieëkend hi de afgeloeëpe peeriejode hartelek bedanke vur ‘ne óvergéételeke peeriejode in min lééve. Hopelek hép ik òllie allemòl ’n bietje vastelaovend mee kanne gééve.

 

Gén réékene of diktee, vastelaovend, dè gééf ik òllie mee!

Prins Hidde d’n Uurste

Óp de 11e van de 11e waar ’t wér zòwitj. ’t Pak moocht wér èn, de steeke óp, de mantel eum en de sèpter moocht nao ‘ne lange slaop wér in àksie kómme. De kievel begoos wér te ròlle en dè ín ’n hél spesiejaal wiekènd. ’t Ópeningswiekènd van óns 6 x 11 jubielejumséizoen, inkluzief de ópvuuring van De Mééls Revuu. Óp vréjdigmèèrege waare alle leeje wér geïnstalleerd, inkluzief de nééj leeje Patrick Neessen, Rob Vercoulen en ur partners. Nèt às de Kieveloeët, moochte ók de Kéjsjeut en de Véngneuze wér èntrééje.

Gòwgenóg vertròkke we nò de bazissjool um de groepe 6 óp te hale, wòrmi we richting Kievelmènneke liepe um de vastelaovend offiesjeel te ópene. Às verrassing kwame ók alle groepe 7 en 8 spesiejaal mi méj meegeniete van dees fésteleke ópening. ’t Kievelmènneke woor tradiesiegetròw gepoetst en rónd de klok van 11uure 11 woore d’r 11 kenónsjeut gelóst. Vur ieder kenónssjòt woor d’r ‘ne vastelaoveswens veurgelééze dur ieën van de kinjer van groep 6. Dòrnao woore alle roeëj, geel en gruun balonne lósgelaote. Tot slót woore de vlagge van de Kieveloeët, de Véngneuze en de Kéjsjeut geheese terwiel iederieën vólóp “Lééve de Kieveloeët” meezóng.

’s Middes naame 2 leeje mi ur partners afsjéjd van de Kieveloeët. Patrick en Jeannette en Leon en Belinda naame nao ’n prachtige periejode mi veul herinneringe èn de Kieveloeët, afsjéjd van de klup middels ’n sjòn weurdje en ‘n sjòn gebaar richting de andere leeje. Leon woor tot zin groeëte verbazing nog benuumd tot lid van verdienste, nèt às Jurgen Kessels. Zéj woore óp dees spesiejale menier bedankt vur urre inzit de afgeloeëpe jòrre béj de Kieveloeët. Nao dizze bezundere middig waar ’t tidj um óns vólledig óp te laaje vur de rest van ’t wiekènd: De Méélse Revuu.

 

De Méélse Revuu

’n Spèktakelstuk wòr de Méélse bevòlking al èfkes nò utj keek. Binne ’n paar daag alle 4 de veurstéllinge utjverkaocht. En teréécht. ’n Ieër um hier mi de Kieveloeët ’n sééne in te speule en geweldig um di nog mee te maage maake in min prinsejaor. Hoe dichter ’t béjkwaam, hoe èntoeziejaster iederieën woor. De afgeloeëpe wéék waar ’t geweldig dè veul vréjwilligers zich inzaate um Méél ’n geweldig wiekènd te bezèùrege. 'ne Groep die èlkaar van tevurre nog nie kéénde. Mèr hoe langer iederieën èlkaar kéénde, hoe vréjer en vertròwder iederieën zich vuulde. Ik héb dòrvan genote. Zeker van ieders inzit en èntoesiejasme téjdes, mèr vural ók nao de veurstéllinge. Wà ’n fést waar dè iedere dag.

Sjòn um te zie hoe alle spanning d’r nao iedere veurstélling wér vanaf gedansd woor. Iedere vréjwilliger hi zich ’t afgeloeëpe jaor ingezit um iets geweldigs óppe planke te brénge. De revuu woor gesjrivve vur ’t jubielejumséjzoen van de Kieveloeët en mi dees revuu hi de hélle kaast óns às verénniging in ’t zunneke gezit. Al die vréjwilligers hébbe d’r vur gezèùregd dè wéj óp ’n fantastiese menier óns jubielejumjaor moochte ópene en dòr wil ik iederieën hartelek vur bedanke!

 

’t Méélse Vastelaovesfèstieval

Óp zòtterdig 26 nóvember waar ’t tidj vur de liedjesaovend. ’n Aktievietéjt die di jaor vur ’t uurst in ’n ander jèske woo gestooke. We moochte s’middes al beginne en geniete van gastóptrééjes van de Heimat Kapelle, Bas van Rijt, Frits Strijbos & René Claassen en PUUR, wòrbéj ’t pódiejum in ’t midde van de zaal stóng en d’r dus ’n èchte fèstievalsfeer óntstóng. ‘ne Gezellige middig. ’s Aoves begoose we mi de loting van de jeugd en de vólwassene. Sjòn um te zie dè t’r zich wér nééj groepe béj èlkaar han geràpt um d’r wér ‘ne sjònne aovend van te maake. 5 Jeugdgroepe en 9 vólwassene groepe.

Furrig jaor moocht ik hier ók al geniete mèr toen óp de stoel van de zjuurie. Nòw waar ’t tidj um mee te hòsse en te springe mi de bezuukers en de artieste en dè lukte goe, Goej nummers, 'n lekkere sfeer en gezellige mènse, wà wille ge nòg mieër? Marcel Thijssen en Patrick Verstappen woore óndersjééje vur ur 11e délname èn de liedjesaovend en Geert de Leeuw vur zinne 22e kieër!! Hopelek zalle d’r veul di vurbild vòllege. Béj de jeugd wónne de SuPiSili’s en béj de vólwassene moochte de Klèpbókse de 1e prisj in óntvangst neeme, wòrdur zéj Méél maage vertiggewórrige óp ’t P&M liedjesfèstieval óp vréjdig 13 jannewarrie. Prófisiejat èn allebéej de groepe en alvast veul suukses vur de Klèpbókse. Ók ’n spesiesiejaal woord van dank èn de andere délnemers. ‘t Waar wér tòp!

 

Gén réékene of diktee, vastelaovend, dè gééf ik òllie mee!

Prins Hidde d’n Uurste

Óp zòtterdig 10 dissèmber moochte we wér èntrééje. Min leeste aktievietéjt vur min afsjéjd. Dizze dag stóng in ’t tieëken van ’t Sjééle Waazel Gala.

Normaal gespróke ròlle d’r geduurende dizze aovend traone övver de wange van ’t lache, mèr vandaag woor d’r ók stilgestao béj ’t övverléjje van Noor Verstappen. Zéj moost afgeloeëpe wéék de stréjd tege ’n vreseleke ziekte ópgééve. Noor waar ’n vraow utj duzjende die aaltidj klaor stóng vur iederieën en ieder jaor veurèn zaat mi ’t Sjééle Waazel Gala. Óp gepaaste weezje woor d’r ’n menutj stilte gehaawe um ur te gedinke. Hél indrukwekkend.

Nao di móment woor de drò wér ópgepakt en reechte we óns óp de tónpraoters die óns zòn gòn vermaake. De crèème de la crèème stóng óppe planke en dè waar ók wal te mèrreke. Van wege ‘t 6 x 11 jèùreg jubieleejum woor dees eediesie dus èkstraa speesiejaal, durdè de buuts dur ’t puubliek gekózze waare.

Vòlleges tradiesie woor ’t gala geoopend dur jeudig tallent: Quin Hansen. Dòrnao vòllegde de Brabantse en Limburgse tòppers Ger Frenken, Andy Marcelissen, Harry Sijbers, Jan Strik, Berry Knapen en Gilbert Petit. De slótèkt waar ók wér fantasties. Nèt as béj de bónte aovend, héb ik wér hard moet lache um Rob Scheepers. Tussedur woore we nog vermakt dur Die Heimat Kapelle. En ’n sjòn óptrééje van Let’s Do It. Allemòl bedankt!

Min leeste aktievietéjt alwér vurdè ik afsjéjd neem às Prins Hidde I. Nòg énne kieër knalle, nòg énne kieër geniete van alle mènse um me hin. Wie wét zien we èlkaar nòg óp ’t prinsebal in ’t Oranje Hotel. Vur nòw, be-dankt vur alles.

 

Gén réékene of diktee, vastelaovend, dè gééf ik òllie mee!

Prins Hidde d’n Uurste