5 cm

De 2e tusse-stop van onze toertocht was ok wer un geweldig succes beeste Kieveloeëters en Kieveloeëterinnekes. Vur diegeene die nie weete wor ut euver gé, we zin in Echel geweest no ut liedjesfestival van P&M. Mi 3 busse vol Méélse supporters richting Echel, dor éngekomme moos ik mee de geimproviseerde studio in en dor heb ik mer mee 2 dinge rèègt gezit, ten uurste dé ik nie Fred den uurste ben, mer d'n twedde, en ten twedde moos ik én al die Heljese utlegge hoe ge Óngerakesen Doorst moos utjsprééke.

Doorst kriege der van as ge live op de radio allerhande vraoge moet beantwoorde, dus mer snel no de rest van de Méélse oranje invasie in de groeéte fésthal wor ut allemol te doe was,en dor was ut al unne gezellige boel. Ik heb hier en dor wa ston te zanikke mi ander prinse, en veural mi die van Panningen, bleek dé tjie laang gelei-je bij Silvie op de sjool hi gezééte, Lekker pilske derbij, fototje gemakt ge wit wal hoe dé ge.

En dor inéns: kom jonges, no vurre, daalik komme die van ongerakkesen-doorst.En dor mi un dikke 150 Méélse no vurre, allemol zo'n bordje in de haand, en ut veurdél van Prins zin kumt dan ok goe van pas, ik mog hellemol veuraan sto.

En toen ging ut los, de ski-sjool ut volle borst meezinge mi al die énhang van ongerakkesen-doorst veur aan, wa un feest!, kom zee Twan de Bruin, op minne nek...... Ik zee nog zalle ge dé wal doe?..... jao kom op, dus ik bij Twan oppe nek, en mer meebléére... geweldig! Twan ik vong ut harstikke sjon, mer volges mij benne ge wal 5 cm. kleinjer geworre!

We hebbe nog laang durgefést, en ut sjonste vong ik natuurlijk ut optreeje van onze jonges, en um mi al die andere Prinse en Prinsesse op ut podium saame mi Ben Verdellen ut ons daak te go. Vur de meeste Prinse was ut de lèèste kier dè ze op pad ginge as Prins, mer vur mij as kersverse Prins saame mi die van de Graashook, was ut ieén van de uurste kieër, en ik heb um flink loote go, dè kan ik ollie vertelle.

Trug in Méél hebbe we nog wa dur gefést bij De Zwaan, aaltitj gezellig dor.

Ik brauw der un eind én vur dizze kieër, mèèrege gon we wer op pad, onze volgende tusse-stop, en dizze kieër stoppe we in Venlo. Wa we dor presies gon doe, dé blieft nog un verassing, mer ut wert iets unieks, dè zal ik ollie vast verklappe, waagt mer af.

Tot wer us!

Prins Fred II

Foto

Frans Croonenberg, Beppie Kraft, De Kammeraödjes, Ummer D'r Neaver, Kartoesj, Big Benny, Thei & Marij, Angelina (die van "en dan gaon de lämkes aon"), Limbo Express, Gaston Jacobs, W-Dreej, allemol waare ze dor, afgeloeëpe zotterdig in Venlo en ze won allemol mi mij op de foto.............no ik dè ha gevroagt!

"Laeve in de Brouwerie" in ut stedje wor no min meening ut eepies-centrum van de vastelaovend li : Venlo, en wij mi un select gezelsjap utj Méél moogte der bij zin, dus die kans liete we nie én ons vurbij go.

Nou huur ik ollie dinke, wor gé ut uver? Nou al die artieste die ik net genumt heb die trooje dor op, in Grand Cafe de Maagdenberg in Venlo, der woore T.V opnaames van gemakt, en ok de Prinse die dor énweezig waare moogte wa zegge vur de camera, ik dus ok. Was ik van plan um un hél verhaal af te stééke vur die camera, mer dé was nie de bedoeling, alieën minne naam, welk dörpke of stad, en minne spreuk, vérrig!

Kumt dé nou ok nog op de televisie? jazeeker, vanaf 10 fibberwarrie op TV Limburg, en mesjien kom ik ok nog wal un paar kerre vurbij mi minne kop veuróp!! Umdé we mer mi un paar man (en vraolie) der hin kooste, was de hof-fotograaf René der nie bij dus die hi ok gén foto's kanne maake vur op de Kieveloeëte site, mer wij zin nie vur 1 gaat te vange, dus ik ha zéélef min eige knip-toestelleke mee genomme, en Mark v. R. hi der de helle middig mi op los geknipt, en Mark is nie allieën van de Kieveloeët, mer ok van zin dörske, en van Hangtafel.nl, dus as der iemes is die dinkt dé ik alles utj minne duum én ut zuuge ben, die moet mer us op www.hangtafel.nl kieke, dor ston alle foto"s op.

Ut was wer unne sjonne tusse-stop op onze toer-tocht, nog efkes unne kleinje after-party gehaawe bij Andrea en Toon in 't café, dikke friet spesiaal en wa frikkandelle no binne gewérekt bij Lene en MaLio, en dorno no husj.

Ik go me veurbereide op ieën van de sjonste happenings op weg no de vastelaovend , de bonte-aovende en bonte middig. Énkommend wiekend is ut zo witj, en we gon allemol utj ons daak, afgesprooke?

Ik zie ollie in den Binger

Prins Fred II

SAAME FÉSTE WE LEKKER DUR

IEDERIEÉN IS VAN DE PARTÉÉJ

HOSSE EN SPRINGE WE GON D'R VUR

ALLEMAN IN 'N LANGE RÉÉJ

(Vals Alarm 2006)

Bras!

Groeëte bras.... ik heb ut euver de bonte aovende en bonte middig.... nie dé der niks én is geweest, inteegendél, ut was SUPER !!! Wurrum dan bras?... nou vur diegene die der geweest zin, die weete wal wa ik bedoel, en vur diegene die der nie geweest zin, bras dé kwaam regelmaatig trug in ut stuk wa de Érpelemeendjes op de bonte aovend hebbe lote zie, en ik zal ollie vertelle: ut was genne bras!

De helle bonte aovend en middig was geweldig, zang, dans, cabaret, sjééle waazel, alle ingedriénte vur unne geslaagde bonte aovend waare énweezig en ik dink dé iederieën die der geweest is zich hel goe hi geammuzeerd, ik in ieders geval wal, dè zal ik ollie zegge.

Éngenaam verrast was ik de vrijdig-aovend, toen de Érpelemeendjes vroege of ik bij hun veur op ut podium wo komme sto, ik dink wa gé der nouw gebeure?... han ze un liedje speciaal vur mij gemakt, ( JAO DÉ IS FRED ) en dé woor dor vur unne volle zaal ten gehuure gebroogt. Dan gé der iets dur ouw hin...onbesjriefelik zó sjon!

Ik heb diezelfde aovend nog unne cd meegekrigge wor dé liedje op sté en ut liedje wa ze euver Méél hebbe gesjrivve, kon ik un bietje oefene want de zotterdig en zondig-middig woor dé natuurlik ok wer gezonge, en vol trots heb ik meegezonge.

Wa hi nou ut meeste indruk op mij gemakt di weekend... nou eigelik de helle bonte aovend, mer as ik der dan toch un paar dinge utj mag pikke:

- 't talent wa der in Méél rondlupt en ut op de bonte aovend lut zie, duo mona, de Érpelemeendjes, Méélse zang en dans, doe ut mer us...go der mer sto vur unne volle zaal...klasse!

- 't Liedje wa vur mij is gesjrivve

- zondigmiddig toen Beppie kraft en ut zinge was en ik bij Pé Daniëls op de nek zaat en dur de zaal veurop in de polonaise ging, tusse de generatie(s) die de vastelaovend hebbe gemakt zoas we die nou in Méél kenne.

Ik heb der van genoote, al die drei daag, no afloeëp nog lekker no-zannikke mi jan en alleman, zeeker de zondig middig , nou ja middig, ut was al aovend toen Silvie en ik no husj ginge , nog wa ge-eete , un ruundje mi de hond geloeëpe,de toekomst (onze Tom en Bas) unne kus gegevve, die laage al lekker te slaope, en toen no bed.....koos ik de slaop ni vatte wan ut hel weekend kwaam nog unne kieër vurbij, mer ben utj-eindelik toch in slaop gevalle.. mi unne dikke smile op ut gezeegt, dé wit ik zeeker.

Goed Kieveloeëters en Kieveloeëterinne, van de generatie die de carnaval in Méél groeët hebbe gebroogt gon we no de toekomstige generatie... de Wichter.

Zondig is ut zo witj, de Kééj-Knappe-Kwéék-middig. Liefst 25 groepe doen der mee, dus dé zit wal goe de kommende jorre mi de carnaval in Méél, ik ben der ok wer bij, en ut wert volle bak mi al die talentjes die op gon tree-je en de papa"s en mama's, opa's, oma's, tante's, oom's , en de rest van de familie's, die moete komme kieke.

Tot zondig

Prins Fred II

OPA MAKTE UT HEL BONT, ONS OMA SJUDDE MI UR KONT

ZE GINGE SAAME EN DE ZWIER, MAKTE DOR HEL WAH VERTIER

JAO, UT GING DOR FLINK TE KIER!

( "De kieveloeëte polka, Énne pot druuëg 1997-1998" )

Op-ééte...

Kreju, wa gé un week toch snel vurbij, ut ieën is nog nie geweest, sté ut volgende alwer vur de deur. Mer ik heb wal lekker al un paar daag kenne no-geniete van unne kééj-goe-geslaagde-kééj-knappe-kwéék-middig.

Ut is mij wal duidelik geworre dé der veul talent in Mèèl rondlöpt,ok bij de jeugd, ik was alieën baang dé ik der in de toekomst nie mer veul van zo zie. Wurrum nie? Nou, ik stong in de zaal wa te buurte, woor ik in enne kieër no boove op de bühne geroepe, stonge me dor 2 kannibaale vérrig mi de kookpot in ut midde en 3 kerre rooje wie der in moos.... presies, ikke, Prins Fred II. Gelukkig vur mij ginge die 2 kan-ni-baale zinge, in plats van mij op te peuzele, mer goe anders ha Méél genne Prins mer gehad mi de vastelaovend, mer ik vong ut wal kééj sjon!

Hierbij wil ik ok nog alle prisj-winnaars hartelik proficiat wense, en as der iemes is die presies wil weete wie dé zin, kan ut in ut Mèèls krentje van dizze wéék lèèze, of op de site van de Kieveloeét kieke, dor ston ze allemol op. Ik hoop dé iederieén die op de kwéék-middig is geweest zich goe hi geamuzeerd, ik wal en onze Tom ok, die hi der wa rond-gebasjoerd dur de zaal, en onze Bas hi zin klieën uugskes ok goe de koost gegévve. Mesjien ston ze der euver un paar jaor ok wal op ut podium te zinge....ooooo, wa zal ik dan gröts zin!, foto-toestel mee, videocamera mee, en teege de aovend lekker éngesjoote no husj...ik zie ut al hellemol veur me!

Kieveloeëters en kieveloeëterinne, ut gé echt snel, we zin al euver de helft van onze toertocht hin, nog zon 2 wééke en de vastelaovend barst los. Hé gellie ut al gehuurt, énkommende vrijdig (10 fibberwarrie) komme de Brummerkes op L1 Live op de radio erges tusse kwart euver 1 en 4 urre, mi ur nummer 'Vastelaovesliefde' utj 2003, dus allemol de radio én, en as de Brummerkes der op komme, dé ding op 10, alles laote valle en keihard meebléére:

AS IK OW ZIE LEKKER DING IN DE MAONESJINJ, WIL IK MI OW D'N HÉLLEN DAG EN D'N AOVEND IN.....ENZ.....doe hé.....dan zie ik ollie allemol zotterdig bij dé dokter op ut mombakkesbal, alhoewel ik al van versjillende heb gehuurd dé ze net di jaor nie koose komme (?!) ben ik der zeeker van dé ut wer unne sjonne aovend wert, en as der nog mense zin die twiefele of ze wal zalle go, heb ik enne tip: gekke klier én doe, pruuk op, mombakkes vur de snoet en KOMME....DOE!

Ik go butje ut mombakkesbal ok nog wa ander dinge doe, mer de go ik nog nie veraoje wa dé is, dé lééze gellie wal in min volgende sjrieve,

Mazzel

Prins Fred II

DE VORST VAN VASTENAOVEND BELDE FREDJE OP

IK HEB VUR OU UN VROAG LOEP GIJ AS PRINS VEUROP

FRED BEDAAGT ZICH GEN MOMENT EN LIET UN TROAN

HIJ ZAG ZICHZELF AS PRINS AL STOA

EN MI DE SEPTER IN DE HAND

RIEP FREDJE EN DE KANT

(Pretkwartet mi "Fredje", kééj-knappe-kwéékmiddig, 2006)

Kievelmenneke

Ut is nog donker as smeereges de wekker gè, ik laot um nog un paar kerre af go, mer dan moet ik toch echt min néést utj. Ik dink nao.... wa is ut vandaag? En meteen krieg ik wer goeie zin, ut is vrijdig (10 fibberwarrie) nog enne dag no ut wéérek en dan is ut wer wiekend. Botterhamme mee, thee gezit, Silvie en de jonges unne kus en weg.....tot net no de middig, ik dink nou is ut wal wer welletjes geweest, ik go no hujs, heb minne kop bij de karnaval en nie bij ut wèèrek.

Dé ha ok zin reeje dé ik iets erre no husj ging, want der stong wer iets sjons op ut programma, mer zo witj was ut nog nie, uurst de doesj in, den hond utjgelaote, goe ge-eete mi zin alle, en dor inéns moos ik mij ok nog un bietje jaage, dalik ston ze al vur de deur.....

Vandaag nie in ut prinsepak, mer mi min eige carnavalsklieér, ut hél gezéégt nog geschmienkt...verrig, ik ben der wer klaor vur.

En dor teege half zis, dor kumt ut busje zee Silvie... onze Tom keek zin oeëge utj van wa dor allemol in zaat....allemol Bubsers in vol ornaat mi hoede op en gekke pékskes én, de gezeegter in alle klurre van de réégen boog, effe zwaaje en dor ginge we....richting Stein no de finale van ut LVK... jahoeee..... en ik mog mee! In de bus was ut al unne gezellige boel, zie ik dor in enne kieër aagter mij ut kievelmenneke zitte , ik kiek nog us...Ha Fred I , ok van de partij?... sjon man! Hij ha nog laang moete zuuke wa tjie én moos doe want de leeste 13 jaor hi tjie alieën mer ut pak van de Kieveloeët én gehad.

En dor in Stein én gekomme, man wa un drukte, euveral wor dé ge keek vastelaoves gekke, nog laang in de rééj moete sto vur dé we no binne koose, dé kwaam dur de sekjoeritie (un sort pliesie mi van die dinger in de orre wor ze dur praote), en die moose iederieén kontroleere of die nie van die groeéte borde mee no binne naame, wor un platsnaam of iets dergeliks op sté, alles inleevere anders zwaaje die steeds vur de camera's. En nou hebbe die van de Bubs ok aaltitj zon bord bij zich, en dor weete ze wal ro mi hoe ge zon ding mee no binne smokkeld, hel Limburg wit nou dé der van Méél zin geweest en hoe ut kievelmenneke der utj ziet!

Ik heb van de liedjes nie veul gehuurd, alieén mer sjééle waazel verkoogt en veul bier gez...dronke, mer ut was un ervaaring um dor tusse 4000 karnavalsgekke unne aovend utj de bol te go, en vur dé we wer op husj én ginge uurst nog un paar frikendelle no binne gewertk.zaufen magt hungrig, zegge onze oosterburre aaltitj, en dor hebbe ze geliek in.

En dan is ut in enne kieër zotterdig méérege....aaaaaaw minne kop du ping... zal wal van die dikke sigaar komme die ik van enne heb gekrigge gééster aovend. Eige sjuult krig ik te huure en ik koos ze dor gén ongeliek in gééve,,..finimalletje , goe wa ééte , unne (f)red bull no binne sjudde en ge knapt wal wer op.

Zotterdig....wa gé de titj toch snel, nie? vandaag wal in min Prinsepak, en we blieve ok in Mèèl want ut mombakkesbal sté der en te komme, ik heb der wer zin in!!! Bij De Zwaan bij-en komme mi zin alle en vur ut uurst , no ut prinsebal, op sta mi .... Goe-Gehusseld...min muziek-vriende....blaosmuziek....yes!!!

Moose we uurst de zaal in bij Andrea krig ik unne groeéte grèèzje zak in de haand gedouwd einde goe-gehusseld KIP, allemol in die zak en weg......Goe Gehusseld ok weg, mer ze kwaame trug, mi muziek en.....allemol nééj hoede, en sjon...verekkes sjon hoede, as gellie mi de vastelaovend op stap gon zie ge ze vaast en zééker wal, en allemol mi de haand gemakt. Mer zo as ik al zee, we moose no ut mombakkesbal en de is aaltitj bij d'n Dokter, dus jasse én en gaan met die banaan, mi muziek dur de Dörrepstraot, richting dokter.

Dor éngekomme, ut was nog nie zo druk , en ik daagt dé der nog niemes was, mer dor ha ik mij in vergist, der waare der al 3 vur mij gevalle , de toiletjuffies die zaate al verrig, en un paar Mc.Donals clouwn's waare ok al binne, ut is nog nie zo druk zee onze pap, die kwaam ok efkes kieke mi ons moederke, ik zeg dan go ollie mer us én d'n tap zitte en kiek mer us wa der allemol nog kumt....... die hebbe hun oeëge utj gekééke, en ik trouwes ok.

Méénde ik toch in enne kieér dé ut mij allemol te veul woor, ik dink nouw zie ik iets wa nie kan,, zag ik in enne kieér min eige sto in min goe-gehusseld klieër. die ha ik nog opgeruumt vur dé ik ging.....en dor nééve stong der enne in min wèèrek klieër, en die ha ik toch echt in de wasmaand geknikkerd toen ik vrijdig tusj kwaam, en um ut kompleet te maake stong der ok nog enne in min motor grei, lerre boks, lerre jas, allemol van mij.... ik no de bar, ik zeg spa roeëj,, die opgedronke terug geloeépe en jawel hoor, ze stonge der nog........was toch nejsjierig wie de nouw waare,,,e n no ut démas-kee(zo sjrieve ge dé in ut Mééls) toen zag ik ut pas....mer ik ha ut kanne weete. Silvie zaat der nie bij, en as gellie ut wille weete, effe op www.kieveloeet.nl kieke, dor ston ze op, en ok al die andere die der geweest zin.

Kieveloeéters en kieveloeéterinne ik heb me kostelijk geamezeerd, ut was unne geweldig goe geslaagse aovend, en witte ge wie as allerlééste no butje ging.....jawel IKKE!, umde ik der niks mer dan ok niks van woo misse!

En dan is ut in enne kieér zondig,en ge zaalt ut nie geleuve mer ik ha genne zwaore kop! Wa un paar spaatjes tussendur al nie vur effect hebbe!

Vandaag sté der ok iets op ut programma, we gon no Heerlen, no de bemanning van de Blaaw Sjuut, efkes kennismaake en ut programme durneeme as die no Méél komme. Midden in Heerlen moose we zin, ieën kefeeke in , wer derutj, ander in ,wer derutj, veelt nog nie mee um iets te vinge wa nie zo groeët is, en de was ut lokaaltje wor we utjeindelik moose zin ok nie, mer wal gezellig, en lekker kaaw bier han ze. Wa sjééle waazel verkoogt, wa serieuzere zaake besprooke, en dan is zonne middig toch ok zoeé eum. Mij is opgevalle de ut wal un gezellig klubke is die van die boeët, ben echt nejsjierig wa ze allemol verrig braoje as die no Méél komme, en gellie de ok zin kom dan mer kieke, dinsdig 21 februarrie, ut programma sté in ut Mééls blétje.

ZO, wiekend wer eum, méérege vruug dan ge die wekker wer af, botterhamme mee, thee zitte, unne neije week kumt der wer én, ik heb der nog genne zin in, heb de carnaval nog in minne kop.........

Prins Fred II

DUS IK BLIEF NOG VIJF MENUTJE, IK GO NOG NIE NO BUTJE

IK HEB UM AL GOE HANGE, MER DE TITJ ZAL MIJ NIE VANGE

IN DE WIEG GELI VUR CARNAVAL

WANT LEKKER LACHE, IS IETS WA IK NIE LAOTE ZAL !

('Vur de carnaval gebórre' - Munnummunnup, 2002-2003)

Köppere kittel

Zo vastelaovend vriende, ik zal nog us wa in min dagboek sjrieve want ik heb al wer vanalles meegemakt dizze wéék. Dinsdig en donderdig mèèrege zin we op de sjool geweest bij de groepe 7 en 8 um ut ieën en ut ander te vertelle euver de vastelaovend, ik heb der zèèlef ok nog wa van opgestooke, dus vur mij was ut ok nie verkieërd um der bij te zin. weese gellie bijvuurbilt dé de prins (in di geval ben ik dè) aaltitj ieën véér mieër op de steek hi as de vorst, en twieë mieër as de adjudant, toch goe un te weete.

Donderdig aovend kreege wij hog bezuuk, de redaktie van de vastelaovend krant kwaam mij ut uurste eksemplaar persoonlik euverhandige, en ik moet zegge ut is unne echte jubileum krant geworre. De veur en achterpagina zin in kleur en hij is 10 pagina's dikker as de veurige krant. Ik heb um nog nie hellemol utjgelééze mer dé zal nie laang mer duure.

Min persoonlijke ondersjééinge zin trouwes ok klaor, en de vraolie van de Kieveloeët hebbe der allemol touwkes én geknubbelt, en dé din ze bij ons tujs, wa un gezellig kippehok is dé as der 20 van die kwebbeltantes bij-en zitte, en zeeker as ge nog us mi de videokamera rond got....nee sjei utj....ik hoef der nie op ...go weg mi dé ding....nou is ut genog....min haor zit nie goe.....

Vrijdig aovend ha ik niks, dus ik daagt do us efkes no de repetitie kieke van Goe Gehusseld, mer goe dé ik uurst gebéélt heb of ze mij der wal bij won hebbe, dé was dus nie ut geval (?!), heb ik unne rustige aovend gehad, kwaam ok erges wal goe utj want de zotterdig moos ik al oppe titj in Remunj zin vur de prinse-foto, en dor kanne ge nie mi unne duffe kop op sto, nee dor huure ge in vol ornaat (?!) en mi unne frisse utjsraoling op te sto.

Dor nog effe gebuurt mi de prinse van de heibloem (Rene I), jao die van de frietkraom, en mi de prins van Heitse (Emiel I), unne awt college van mij, en gertouwd mi un echt Mééls dörske, we hebbe niks teege um ge zi de wij die zelfde aovend no zin receptie zon go, anders is de verassing der vanaf, mer dor kom ik daalik nog op terug.

Ut Éffebal, dor moose wij uurst nog hin de zotterdigmiddig, netuurlik wer in vol ornaat, ik ha der gé flauw iedee van wa mij der te waagte stong, dus ik liet mij mer éngenaam verasse. En dé was ik zééker. No un wéérem welkom dur ut bestuur én de C.C (culturééle commissie) zag ik pas dé alle eetjes en efjes sjon verklét waare en de ze der un echt motor-clubhusj van gemakt han. Ik was der al un bietje baang vur, mer ik koos der nie én onderutj um mi un sjon wiebel-fiets un utjgezit parkoers af te moete legge.

Nou is minne conditie nie ju van het, mer ik heb ut toch vurmekaar gekrigge, alhoewel ik de pieëp toen wal leeg ha. Ik blief toch bij min standpunt, dé onder alles wa wiele hi unne moter moet ligge.....! Dorno moos ik unne bal dur un gaat sjiete, ik daagt dé ge wal effe duure want minne baltechniek sté op net zon hog nivoo as min conditie, mer as der gen getuuge bij waare zo mij niemes geluuve dé ik um der de 4e poging réégt dur ut gaat sjoot.....echt waor!

Jammer de ut un bietje réégende zodé we nie zo laang butje koose blieve, dus mer mi zin alle no binne en dor han ze vur mij ok nog un hél programma klaor.

Ik heb dor un hel sjon onderjsééing gekrigge van de C.C. en ok ut comité en de ro van 11 kreege der enne in ut kader van ut 5maal 11 jaorig besto van de kieveloeët, en umde ze zo veul vur de Méélse gemeinj-sjap doen. Mer toen kwaam toch wal ut hoogtepunt van de middig, en de was de onthulling van de neije effe-prins, alle wichter no vurre, en no unne afvalrace kwaam Simon Haaze as Prins Simon I no vurre. Hij was de un bietje beduust van en zin mooder ok. Ut fést koos toen echt losbarste en mi Simon I en ik veurop hebbe we unne geweldige polonaise gemak.Mer zoas én elk fést un einde, zo kwaam en di fest ok un einde, mog ik die Harley Davidson die dor binne stong nog no butje rije, effe flink ut gas derop binne, Prins Simon I en Silvie der op , en dor no butje mi dé ding, ut blieft vur mij toch ieën van de sjonste geluide wa der besté, ut geluid van zonne dikke V-twin.

No ut effe bal effe no husj, wa eete, um ons dorno wer klaor te maake um no Heitse te go no de receptie van minne aawt collega. Effe tsjekke of ik alles en, en eum ha,tja ge moet natuurlik genne flaater slo as ge no zon officieele gelegenheede got, en dor mi Silvie en un delegatie no de Zwaan wor we bij-en kwaame um gezaamelik mi de taxi no Heitse te vertrekke.Dor ëngekomme is ut sjon um te zie en te belééve hoe zoiets nou in sin wèèrek gé, uurst insjrieve, dan wert ouw un toffel éngeweeze, en as ge én de beurt béént(anderhalf uur latter) komme ze ouw haale um de Prins en de rest van de verenining te feliciteere. Woore Silvie en ik ok nog dur de Prins van de Kwakkert ondersjééje in de orde van de Köppere Kittel. Ut was der nog unne gezelligen boel, toe die verekkesen taxi alwer vur de deur stong, dan mer terug no Mèèl,

wor we bij Andrea nog un paar pilskes hebbe gedronke. Ik méénde nog un paar frikkandelle no binne te wééreke, mer de flietklaam was al deegt, toch iets latter geworre as gedaagt.

Ik sjééj der mi utj want ik moet me verrig gon maake vur ut carnavalsconcert van de hermenie, laot me wer verasse, ge huurt ut wal hoe ut is geweest.

Prins Fred II

DE HOFKAPÉÉL BLAOST ZICH DE LONGE UTJ UT LIEF

WIES ZAKKEDUSJTER DRINKE WIJ NOG ÉNNE ASTEBLIEF

(De Kieveloeët - 'Méél op zin beest' 2006)

Gén roeëj

Méél,.........iederieën die um hi gezie of gehuurt die wit ut nou....... de vastelaovend kumt der én! En ik mog der booven op sto saame mi minne 'sjatte-poemel'. De Blauw Sjuut was in Méél, én dé hebbe we geweete, ik kom der aalik nog op terug.

Uurst wil ik ut efkes hebbe euver de zondigge middig. We waare utjgenuddigd dur de Hermenie um ut vastelaovend concert bij te woone. Ik ha wer ut veur-recht um héllemol veuraan te maage zitte zodé ik alles goe koos volge, gelukkig mèr want ik ha der niks van wille misse.

Nodé de jeugd-hermenie zich van urre bééste kant han laote huure, was ut de beurt èn de hermenie zéélef......MAGIE (nee, nie die vur in de soep), MA-GIE, dé is un engels woord vur toovere, en ut was betoverend, opzweepende meziek utj de film van Harry Potter, swingende meziek van K3 (as der iemes is die nie wit wie K3 zin, die hi gèn wichter!), opgevolgd dur sjon klanke van Herman van Veen, en toen kwaam min favoriet nummer: "It's a kind of magic" van Queen, ontroerend vong ik ut.

Nog un bietje beduust van de meziek moos ik no vurre komme, en ik woor mee 20 jaor terug in de titj getooverd.... op un groeët bildsjèèrem zag ik min eige wer bij de hermenie speule, aagter de pauke mi mier haor, en minder buuk! Henry Adams zwééjde toen nog mi ut tooverstukske.Veul die der toen al bij waare zin der tot op de dag van vandaag nog bij, mer ut is wal sjon um te zie hoe ze der toen allemol utj zaage.

Ik was der al baang vur, mer dé ik iets moos doe ha ik toch wal in de gatter. 'Dé delfde stuk meziek wa we 20 jaor gelei-e speulde woor dor ok wer ten gehuure gebroogt en wie moos der aagter de pauke gon sto........juist, die mi de meste verre op de steek...ikke. Han ze sjon de mezieknote op de pepieter der bij gezit.......en inderdaat ik wees wer mee hoe ut ging (!?). Dorno nog un ondersjééing en un tooverstökske gekrigge, effe pauze ingelast, worno de hermenie witjer ging mi ur programma mi allemol vastelaoves slagers, mi en zonder zang, polonaise dur de zaal , lekker mee sjoenkele, korteum: lekker karnavalle. En die frikkandele, die ginge der ok goe in!

De Blauw Sjuut, ik zo der nog op terug komme, die hebbe wal humor die bemanning van die boeët, want dé is de Blauw Sjuut.En punne, dé doen die ok géér. As ge nie wit wa puune is, dan vraoge dé mer us en ieën van die vraolie van de Kieveloeët, of én Mieke van goe-gehusseld.En dan ut hogtepunt, letterlik en figuurlik van die aovend, teminse vur mij: de rit boovenop die boeët no ut gemeinte-husj, in ut donker, mi Méélse meziek, un knallend kanon veurop, de sjééps-toeter , veul lémkes der en, un bèlleur die goe van zich liet heure, en de ro van 11 die veurop ging mi ut trap-cafe......jao mense, de vastelaovend sté vur de deur.

Bij ut gemeinte-husj éngekomme woore we hartelik ontvange dur de hoogwaardigheids beklei-ers van Méél, veul vastelaoves-vierders en goe-gehusseld. Binne woor der un hel programma afgewerkt, worbij un hoofdrol was weggeli vur de muziek-matroos (die hi une speciaale naam mer die ben ik vergééte), die de stemming der wal in broogt dor in de róts-zaal. We hebbe goe gelagge mi al die fratse die dor utgehald woore en bijzonder gröts ben ik op de ondersjééjing die ik dor heb gekrigge. Wer iets wa ik absoluut nie ha wille misse!

Dorno zin we mi ut hel gezelsjap no ons klub-husj gego, wor we nog tot in de laate uurkes mi de bemanning van de Blauw Sjuut, goe gehusseld, en un hoeëp vastelaoves-vierders zin dur gego.

Ut was unne dag die in ut tieëken stong van Blauw, ok umdé de t-shirts die ik én de leden van Goe gehusseld heb gegevve un blauw kleur hebbe, en ok de opdruk hi niks mi roeëi te maake, dé is echt oranje...nou heb ik wal min punte bij die van de ro van 11 (die roei-j) hellemol op. Ben baang dé die nog nie mi mij verrig zin, we waagte wal af. We han wal de beeste utjgezoogt um ut uurste t-shirt op profesioneele wééze te prezentéére,tja, hij hi ut nou emmol, dor doere ge niks én!..dé hi tji us unne helle vastelaovend gekakt(1990)

De Blauw Sjuut hi zin anker wer opgetrokke, en zin utgevaare no hun volgende bestemming, ik hoop dé we un goeie indruk op hun hebbe aagtergelaote, en wie wit komme ze in de toekomst nog us énmeere in ons Kieveloeëte-riek.

Prins Fred II

NÒ AL DÉ VAARE LAOTE WIJ UM DUCHTIG GAO

STRAKKES ÈN WAL, HEBBE WIJ DRÉJ DAAG VUR ONS ZÈÈLEF

WE KÓMME ÈNGEKLÉD EN ZINGEND VAN D"N BOEËT AF

DAN GÉ 'T ROER EUM EN GEDRAAGE WIJ ÓNS KÉÉJ MAF

( Sjuppe Éllef - 'Te gek óp 't dek' 2003-2004 )

Ut is zo witj

Ik kiek no butje,......de weerman hi geliek, genne réégen, en ok mi de windj veelt ut mee, en dè zonneke, och die lut zich vanmiddig wal zie, zèèker weete. Ut is zondig en nie zo mer unne zondig, nee ut is vastelaoves-zondig, butje is ut nog betoverend stil, en toch vul ik unne spanning die in de leugt heengt.

Dé ha ik al toen ik nog un kleenj menneke was, en dé heb ik nou nog,die stilte die butje hèèngt, en ge wit dé der al veul mense in de weer zin um zich klaor te maake vur de optocht. Ik ging net mi de hond un stukske loeëpe, en ut leek wal of Méél utjgesteureve was, niemes op de straot, en dor in enne kier.....dor huurde ik ut. Meziek.......carnavalsmeziek.....YES......ut is zo witj, de uurste waage sté al butje, ik huur um, ik wit ut zééker, en dan gé ut snel, efkes latter zie ik de uurste caravals-gek al loeëpe, un bietje gehost want der moet natuurlik nog vanalles gereegeld weere.

Die paar urre vur de optocht, die spanning die ge vuult, zin vur mij ieën van de sjonste uurkes van de vastelaovend, en dan zo teege de klok van 1 uur, dan komme ze ien vur ieën no de hagelkrusjweg, de waages, de groepe, de enkelinge, mi veul meziek en tam tam, iederieën kiekt, wa ze allemol wer verrig hebbe gemakt vur mee te doe mi die bonte stoet, en dan wit ik ut zééker......de vastelaovend is begonne....ut is zo witj!

Kieveloeëters en Kieveloeëterinne, vrijdig op de sjool hebbe we al un sjon stukske vastelaovens gevierd, en mi Prins Gijs en vorstin Elles van de Kejsjeut, kan de vastelaovend hier in Méél nie mer kepot, de sluttel hebbe we gééster ok meegekrigge, ik kan der nou nie te veul euver vertelle want ok ik moet me verrig gon maake vur de optocht, en ut zal wal wer un paar daage duure vur ik wer in min dagboek sjrief, dus kiek no de vastelaovend nog mer us op de site, dan zal ik min belééfenisse die der én komme wal der op zitte.

Vier vastelaovend zo as ut is bedoeld, zo dé ge der nog laang van kaant no geniete, en doe gén dinge wor ge latter spitj van kriegt, dé zo nog zuunt zin.

Ik zie ollie allemol geer mi die daag,....en ge zaalt ut geluuve of nie, mer ik huur ut, en ut kumt van butje....carnavals meziek, ik go efkes vur de raam kieke of ik wa kan zie......jaowal......ut is zo witj!

Prins Fred II

GENIET VAN UT LÉÉVE , ELLEKE MENUTJ ELLEK UUR ELLEKEN DAG

GENIET VAN D'N TIDJ, DÉ IK VASTELAOVEND VIERE MAG

WE DRINKE GEZELLIG 'N PILSKE, WE HÖFFE MI MEKAAR UT GLAS

IK ZO D'R NIKS UM GÉÉVE, AS 'T VORT WA DIKKER VASTELAOVEND WAS

(De Kwéékers - 'Lòt d'n boel mèr wèèje' 2001 2002)

Éllef

De lémkes zin al utj de toog, de vlagge wer sjon opgevouwe, slingers en serpetines in de container, en de ballonne, dor speule onze Tom en Bas nog mi, tot ok dor génne luugt mer in zit, en minne prinsejas is al utjgestòmt, wer vérrig vur de 11e van de 11e. Was ut mer al zo witj, ik zo der niks um gééve. Mer tot die titj kan ik no geniete van unne carnaval , en nie zo mer unne carnaval, DE carnaval van min lééve!

Man, wa heb ik genoote, en Silvie ok, van alles en iederieën. De optocht, unne kleurrijke en hel goe verzeurigde bonte stoet, mi originele en goe durdaagte idee-e, allemol ééve sjon gebroogt en afgewerkt, en wa un drukte s'aoves bij de prisjutrieking bij ut Oranje Hotel.

Mondig, ik woor smeereges al dur de Kieveloeët en Goe Gehusseld tusj opgehalt, um mi de helle bonte stoet no ut kievel-menneke in de dörrep-straot te go. Uurst mog ik dé menneke un sjon géél Goe Gehusseld jèske èn doe, mi ut logo van Goe Gehusseld aagteróp, en dorno mog ik saame mi onze Tom un hèl groeët cado utjpakke, wor un splinternééj troom utj kwaam, knal-roei-j, un kado van de ro van 11. Ik zal um mi trots gon draage.

En dan de dinsdig, ut Kieveloeëte-treffe. Ik mog saame mi Silvie di festival opene, ik was wal verekkes zinnuwéégtig, mer ut ging toch goe vong ik. En dorno kwaame al die andere artieste, en ze han wer alles utj de kaast gehald um vur unne bom-volle zaal goe vur de dag te komme, en dé is gelukt, geweldig wa dor allemol te zie en te huure was, ze koose allemol zo mi de bonte aovend mee doe. En wa mij ok bijzonder goe hi gedo is dé ik 'De Bubs"ut frétske en un oorkonde utj mog reike, umdè dizze groep utjgeroepe is tot vastelaovend-vierder(s) van 2006.

Kieveloeëters en Kieveloeëterinne, de vastelaovend 2006 is gedoa, afgeloeëpe, vurbij. Unne Vastelaovend die in ut tieëken stong van ut getal 11.

Tuurlik de jubilerende vereniging de Kieveloeët, die di jaor ur 5x11 jaorig besto viert, mer der waare nog un aantal jubilarissen, 5x11 jaor "de siem", 2x11 jaor dolle mondig, 3x11 jaor stamtoffel bij de siem, 1x11 jaor 'de Vangrail', 11 jaor Kieveloeëte Treffe in ons club-husj "de Zwaan', en nie te vergééte ut kievel-menneke in de dörpstraot, die ok di jaor al 11 jaor fier op zinne sokkel sté.

En ik mog as jubileum prins euveral veurop go , en euveral wor ik ben geweest woor ik mi oope éérem ontvange, wa mij bijzonder goe hi gedo, en un bewisj is dé hier in ons Méél vastelaovend gevierd wert zoas vastelaovend bedoelt is.As ik der un punt vur mag gééve dan gééf ik un.....just ja..... un 11.

Ik brooj der un eind én, Vastelaovend- vierders van Méél, en ok van butje Méél die hier vastelaovend gevierd, gellie hebbe minne spreuk ieër én gedo want Méél stong echt, nie 3 ,mer 4 daag op zinne kop, durrum nog enne kieër vur ollie allemol, rechtstreeks utj min hart:

MI MIN TROOM VEURÓP

MÉÉL ÓP ZINNE KÓP

Prins Fred II

'T VASTELAOVESRITME, DÉ ZIN DE SJONSTE DAAG

NO DREI DAAG FLINK WA FÉSTE, DAN VUUL IK GOE MIN MAAG

DE PRINS DIE GÉ NÒ HUSJ, IS 'T NOU ECHT GEDO?

VOLGEND JAOR GON WE WIR WITJER EN GON WE HIER WIR STAO

( Dréj dolle drieka's - 'Dees dréj daag' 2002-2003 )

Hieët en naat!

Zeuve mond is ut al wer gelei-je dé ik in min dagboek heb gesjrivve, dus ik vong dé ut wal wer us titj woor um wa te sjrieve, Kieveloeëters en Kieveloeëterinne, nou is allieén de vraog wor zal ik ut us euver gon hebbe?

A, ja ik go gewoon euver die 7 mond wa zannikke, want de titj die sté nie stil, dè zal ik ollie zegge. Ik zal us beginne euver de afslutjing van ut 5x11 jaorig jubileum:

RIO IN DE PIEËL! De organizasie ha der alles én gedo um der unne sjonne dag van te maake, en in min oeëge is de verekkes goe gelukt! Der was bèèst veul volk op de bieën, ondanks dé ut hellemol niks pofte die dag! Ik zèèluf mog vur de uurste kieër wer mee rampe-tampe mi goe-gehusseld umdè Mike nie koos die dag,en dè vong ik héllemol nie errug! Ok nog mee gedo mi de recordpoging 'macarena-danse', wa toch, ondanks dè der gén record gebrooke is, un unieke gebeurtenis was, en wie wit kumt der nog us unne kieër un vervolg van dizze happening, we waagte af!

Kunninginne dag, ok unne dag wor vanalles te doe is in ons dörpke, en ze han de Kieveloeët gevraogt of die mee won helpe. Gèn probleem vur die manne, en ik ha ok gezi dé ik min steentje wal zo bij draage. Vur dè ik moos go, nog effe snel un plèntje in de tuin verpoote en dan weg, ik stéék de sjup der onder, wil dé pléntje umhog wippe, brèkt me de steel van de sjup midden-dur, rèègt teege min oeëg én, en dè kumt hard èn ,kreju. Koos ik in plats van mee gon te héllepe op ut plein no de husjartse-post in Wieërtj, en ik ha um goe gerakt zi dien heel-mèster, en die stuurde mij mee dur no de oeëg specialist in ut ziekenhusj. Nou li der un sjon ziekenhusj èn den andere kant van de straot, dus ik daagt dor zin we zoeë. Mis gedaagt!, ut was kuninginnedag, dus unne zondig, en de dokter die ik moos hebbe zaat in Remunj!

Nou mer wer den auto in, lap vur min gezéégt en no Remunj. Druppelkes gekrigge rustig èn doe, en dan moet ut wer goe komme woor der mij gezi, en ik moet zegge ut is wer bijno hèllemol better, gelukkig mer. En in de sjup zit alwer unne nei-je steel, ge moet toch af en toe wa spaaje nie?

Allemol op vacantie geweest? Wa was ut toch unne raare zommer di jaor, bloed hie;et in juli, en zeik na;at in augustus, en drei kerre raoje wanier wij vacantie han?

Just ja, in juli. Ge kriegt wa ge verdiend zegge ze aaltitj.Di jaor zin we op safarie geweest, paaste goe bij dé wéérem weer, en ut is nie zo witj rij-e no de Beekse Berge.

En dan is ut september, Mèèlse kermis! aaltitj sjon as ut plein wer vol sté mi al die atracties, en ut weer was ok goe, nie te wèèrem en nie te kaaw, ideaal weer vur unne geslaagde kermis. Onze Tom en Bas vonge ut ok geweldig allemol, muziek, lèmkes, op de kerresel, in de botsauto's, touwke-trekke,poffertjes en ijs èète, en de dag is wer goe! Kermis mondig zin we no Phantasialand geweest, dor han ze wer wa nej-s gebouwd, dus dé moos utjgeprobeerd wèère. Nou ving ik dè allemol harstikke sjon, die 8-baane en alles wa der bij huurt, mer ut gè steeds sneller en harder, en dor ken ik nie mer zo goe teege! Ik kwaam utj de Black-Mamba (dè is de nej-ste 8-baan)en ik was zo gruun as unne kikker, en un gevuul asof ik un krat bier op ha! Ik ben der aagter gekomme dè ik better iets op de kop kan zitte, dan zèèlef euver de kop te go!!

De titj sté nie stil, heb ik straks gezi, en ok in ons eige Méél ste de titj nie stil, behalve de klok van de kerk , mer die kumt wal wer terug. De uurste bewoners hebbe hunne intrek al gedo op de plats wor vruuger de tèntjes en de sleur-hutten van de toeriste stonge, en ok in ut gruun hart is steeds minder gruun te bekenne.Wor moet straks de kermis toch komme te sto?

Mer der zin ok dinge die blieve zo as ze zin, Gebbel Junior sjrieft nog steeds in ut Mèèls kréntje, en nog steeds wit niemes wie hij is, de frikkandelle-fabriek ste al jorre utzelfde derbij , en as der butje-Mèèlse no de frietkraom van Lene en Maljo gon moete ze aaltitj vraoge wa unne kieveloeëte-stick is, haawe zoeë!

En nou go ik ut wer hebbe euver de vastenaovend, want ok dè kumt der wer èn, gelukkig mer. En der zin der al veul mi beezig, waages vur de optocht wor al èn begonne is, liedjes die al verrig zin, ideën vur ut mombakkes-bal zin al klaor. Mer uurst zotterdig allemol unne zak appels koeëpe van de Kieveloeët, lekker dè die zin, en ge kèènt der van alles mi doe, appel-moes! maake, in de pannekoek, gewoon wie vruuger sjiefkes bakke in de paan, sukker en kaneel der op, of ni bloedwoorst, appeltaart van maake, jeu de boelen, tennese, gewoon zoeë op èète, klokke utj haale,soep van trekke(liekt mij nie lekker mer ut kan wal)........Sjonge toch wa unne sjèèle wazel.

Wert titj dè ik der mi utj sjééj ,want ik weer un bietje méélig,en nie vergééte um te komme no de opening van ut nei-j vastenaoves-seizoen,wanier?:

zotterdig den ellefde van den ellefde, s'mèèregug um ellef euver ellef gon we knalle!! mis ut nie! bij 'de Zwaan' in de dörepstraot.

Tot dan!

Prins Fred II

ÓK AL IS D'R DAN VAN VRUUGER NIE VEUL ÖVVER IN DI DÖRP

ÓK AL IS D'R UTJ DIEN TITJ NIE VEUL MER BLIEVE STÒ

GE MOET AS MÉHLSE TOCH OK MI DE TITJ MEE BLIEVE DOE

DÉ ZIT ONS IN 'T KIEVELOEËTE BLOE

(Jan Lenders en Toon Leeuwerik - 'Méhl blieft Méhl' 1981)

Bloeme...

Iederieën de vingers in de orre.....kumtj ie......niks!. Effe plaare, kraantje oope, lipke umhog, iederieën wer de vingers in de orre......kumtj ie....niks. wer effe plaare, niemes de vingers in de orre........KLA-BOEEEEEEEM .........unne knal zal ik ollie zegge, toen nog 2 kerre 'klik'en toen di tjie niks mer! Of ut nou en ut kenon zèèluf hi gelèège of en de nei-je man bij de materiaale-comissie, is nog nie duidelik, mer ik dink en ut kenon. Zal mer nie zegge wor ze dè ding gehald hebbe, alhoewel ik wal unne hint kan gèève: du mos de bruk euvver, en dan bedoel ich neet de Roggelse bruk, wan dan mosse wel hieël wieet gaon.

Goed Kieveloeëters en Kieveloeëterinne, gellie zalle um wal snappe: de 11e van de 11e is wer geweest, dus moos de vastenaovend ingeknald wèère,en dè doen we in ons Kieveloeëte-riek ok al jorre mi 11(!) sjeut, ach ja.....10 kerre mis en enne kie:er raak is ok 11!, en de feestelijkheden dorno waare der nie minder dur.

Um half 10 s'mèèreges moose we al bijmekaar komme bij 'De Zwaan"wor uurst iederieën geinstalleerd woor, en ok de nei-je Vorst, Peter Daniëls, woor in zin functie gezit dur unne sjonne "vorste-ketting"die ik um eum mog hange en de bijbehuurende steek mi de verre vur op zinne bölles. Joost is der no 13 jaor mi gestopt as Vorst, en dor woor ie s'middes nog utj-gebreid vur in ut zonnetje gezit, mi un sjon kedoo en natuurlik unne groeëte bos bloeme vur Wilmie.

Ok de ro van 11 is wer compleet mi as neej lid Robert van Enckevort(ik hoop dè ik ut goe gesjrivve heb).Wie is der dan mi gestopt bij de ro van 11 huur ik ollie dinke, nou ik zal ut effe utjlegge, kumtj ie: Math Peeters is van de roeëi(de ro van 11) no de blauw(ut comitè )euver geloeë.........gestapt, umde Peter van Bree der mi gestopt is, die we s'middes ok nog utjgebreid in ut zonnetje hebbe gezit vur al die jaorre die tjie bij de Kieveloeët is geweest, wor de tjie un hieël sjon èndenke vur hi gekrigge, en natuurlik unne dikke bos bloeme vur Margret, der was dus un plats bij de roeëi vrij gekomme, die dur Robert is ingevuld, en ok Robert hebbe we s'middes utgebreid ontgroend, mi de ondersjèèing van de Kieveloeët die tjie in bruikleen mag draage zolaang ie bij de Kieveloeët is, en natuurlijk unne dikke bos bloeme vur Irma.

Zo, is wer iederieën op de högte hoe ut zit! Mag ik zeeker nie vergèète de ik ok Erwin van den Beuken un speciaale ondersjèèing eum mog hange, umde tjie al 11 jaorre bij de kieveloeët is, en dè ging netuurlik saame mi unne dikke bos bloeme vur Sandra, die der helaas nie bij koos zin die middig, mer ik wit zèèker de Erwin ur die bloeme hi gegevve toen ie tusj kwaam.

Allezz, effe trug no s'mèèreges, um kwart vur 11 zin we no ut Kievel-menneke in de Dörrepstraot gego, en ik vong ut sjon um te zie dè we wer mi zo veul volk der stonge.

De Kieveloeët was der (nee,mer!), de vraolie, al de wichter ,de familie, un delegatie van de áaw-prinse, hof-kapel Goe Gehusseld ,en un afvaardiging van de vastelaovens vierders van 2006 "De Bubs". Geweldig um uurst hier in Mèèl de opening bij te komme woone, um dorno nog no Mestrèèg te go wor de rest van De Bubs ut bordje van Mèèl al en ut rondzwaaje was.( ik heb ut wal gezie bij L11).

We hebbe ut Limburgs volkslied gezonge, lèève de Kieveloeët gezonge, en ut Kievel-menneke blingt wer wie un t...ge wit wa ik bedoel.!

We zin, toen we klaor waarebij ut Kievel-menneke, euvver de Pastoor Frische-straot terug geloeëpe no Andrea en Toon, wor we onderweeges gestopt zin bij ut husj van Sem, de paar daag dorveur geborre zoon van Arthur en Jolanda, Goe-Gehusseld un serenade op de straot ,en ik mi Vorst Peter no binne, um de baby te bekieke en de kersverse aawers te feliciteere. Stukske witjer nog unne bos bloeme(ut hèèlt mer nie op) afgegevve èn Mevrouw Virjo (die ha ze gewonne op de bonte middig, elke 11e van de mond unne bos bloeme), en dorno bij de Zwaan lekkere soep mi bröetjes no binne gewerkt, um dorno nog goe te fèste mi lekkere goeje muziek van Goe-Gehusseld. Sjon um te huure de iederieén wer mee du mi die kapel, alieën mi de instrumente hebbe ze wa gehusseld, mer dè ge natuurlik ok gemèkkelijk as ge zo veul muzikale kwaliteite het binne die club.

Ut vastenaoves seizoen is wer geopend, dè maage duidelik zin. Ik heb der wer zin in, die paar activiteiten die der vur mij as Prins nog èn ston te komme , en ut volgende wa mij wer te waagte stè is de liedjes-aovend. Mer liefst 13 groepe hebbe zich wer èngemeld, dus ut wert wer volle bak. Allemol komme kieke en lusjtere, zotterdig 25 november in d'n Binger. Tot dan!

Prins Fred II

GE ZIET 'M STO MI ZINNE KIEVEL, DÈ MENNEKE VAN BRONS

HIJ KRIEGT WIR UN SJON JESKE ÈN, DE-S ALLEMOL VUR ÓNS

ÉLLEF SJEUT VAN UT KANÓN, DE LEUCHT DIE KLAORT AL ÓP

ONTWAAKT IE DAN UTJ ZINNE SLAOP, VUULT ZICH WIR ÓP EN TOP

('Méél op zin beest' - De Kieveloeët 2005-2006)

Bonte kraaker

"Hallo, héj, goeiedag dan, zin géllie ók wir hier" (Óngerakkesen Doorst). Di is zommer unne regel utj ut liedje van Óngerakkesen Doorst, die op de liedjesaovend in unne bomvolle Binger de 2e prisj hebbe gewonne.

Ja, Kieveloeëters en Kieveloeëterinne, ut hi effe geduurt vur ik der in min dagboek euver go hebbe, ut is nou 6 december, mer hier ben ik dan wir! Anderhalf week geleije was de 26e liedjesaovend en ik ben der ok geweest, ik was diegene mi die vèrre oppe kop. Ik heb me dor verekkes goe geamuzeerd zal ik ollie zegge. De helle Kieveloeët en ok de vraolie, die moose zich de bieën onder de kont utj renne, en ik hoefde niks te doe, allieën de Prins utj hange, en dè heb ik ok gedo ok! Lekker wa sjèèle waazel verkoeëpe, (mer der waare der mieër die dé din, of nie Cor?), en de artieste succes wense as ze ut podium op moose, en netuurlijk geniete van al die sjon liedjes die der te huure en te zie waare.Ik sto der wir aaltitj van te kieke wa der in Mèèl wer elk jaor gemakt wirt.

Nou heb ik ok zon buukske mee no husj genomme wor al de tekste van de liedjes in ston, vur in min plékboek, en die heb ik mij us op min gemak gelèèze, en ik moet zegge dè der wir prachtige rijmpjes en woordspelingen in ston, en alle aspecte van de Vastelaovend komme der wir in veur. Dè begeent al bij ut no toe lééve no die vastelaovend -"De monde die duure, ben nie mèr te stuure, want waagte kan ik nie"- (Vérrig).

En ok ut hoogtepunt van de vastelaovend, de optocht, kumt wir regelmaatig veur: -"veurop in de stoet, nummer eum, vól goeje moed'- (Éngesjoote Wild) of dizze:

-"dan loeépe wéj wir mi de sjutterééj mee, en dè vinge wéj dan oké"- (Hatsjee), en wa daagte ge hier van: -'smiddes no d'n óptocht hin, ;ok al vreesjt 't in de min'- (Nix'n).

Wa ok aaltitj un dankbaar onderwerp is, dè is de Prins: -'ne mens mi 'ne sjonne steek en 'ne witte jas, jao die waar zoeë gevónge, die greepe wéj óns vaast'-

(nie wisj, winnaar kievelprisj 2006-2007). En Krèk Goe die zonge: '-Onze prins is di jaor wir wie fónkelnééj ge ziet um dréj daag sjittere, veurop in 'n réj'- (Krèk Goe)

En dan moet der mi de vastelaovend netuurlijk un pilske gedronke wèère: '-gòj òwe snuffert in 't bier, dan hérrege zeker veul plezier'- (nix'n). En wor drinke ge dan zon lekker pilske?: '-w'ej hèbbe zin, hebbe zin, kefeeke utj en kefeeke in;-(potpoerie), en dan hè ge wal us van die daag dè ge mèènt dè ge nojt genog hèt:'-en snaachts hél laat dan dinke ge, 'k wil mieër, 'k wil mieér, 'k wil mieér'-(de knoetsorre & co, 3e prisj), tot dè ge der aagter koomt dè die lèèste net enne te veul was en di ving ik ieën van de sjonst regelkes van de liedjesaovend '-mieër gedronke as d'n doorst'- (ok van de knoetsorre).

Gelukkig mer dè de vastelaovend 3 daag duurt: '-nów uurst 'n óntbéjtje gon pakke, dan wir lekker dur gon zakke'-(nix'n). Mer witte ge ,as ge ut goe no ouwe zin het, zin die 3 daag ok zoeë eum: '-de hoop is dór, helaas mer dréj, die zin wir veul te snel vurbéj'- (kumtjie).

En wa is nou unne vastelaovend zonder muziek: '-jan ónze pap héj spult de trompet, kontrabas ,alt-viool, klarinet'-(hötje moes), en dan kenne ge um laote go: '-lót ze mer gao, mi unne trékzak eum, jao jao'-(sjuppe ellef, winnaar prizzentaasie prisj 2006-2007).

Zo zie ge wal de der di jaor wer hél wa sjon tekste gemakt zin, en die kenne gellie anderdaag allemol meebléére as de neije cd utj is, die is te koeëp vanaf 6 januari 2007, as de opvolger van mij bekéént gemakt wirt, zin gellie ok al zo nej-sjierrig net as ik?

En de winnaars van de liedjesaovend die zin ok wir te zie en te huure op de bonte aovende en de bonte middig, dè zin de nummers 1,2 en 3 en de prizzentaasie-prisj.

En nou ving ik dè der nog goe un liedje bij kan, want der zin zo veul sjon liedjes gemakt, en dè nummer wirt dan gekozze dur de Mèèlse mense, utj de liedjes die nie in de preesj zin gevalle ,zeg mer un sort publieks-prisj. Via un bon in ut Mèèls kréntje of op de site van de Kieveloeët ken der dan op gestèèmt wéére, en dan noeme we dè liedje de 'bonte-kraaker'.Is mesjien wal un hèl sjon idee!

En nie vergèète Kieveloeëters en Kieveloeëterinne um iemes te nomineere vur Vastelaovesvierder van ut jaor, kiek mer op de site van de Kieveloeët (dor zitte ge nou op as ge di lèèst) of via de bon in ut Mèèls krentje van dizze wéék(dè is de wéék van 6 dec 2006), as ge di latter léést zitte ge in un ander wéék en zuuke ge ou ut laplazerus no dé bönneke!

Komme gellie allemol no ut Prinsebal op 6 januari, kieke wie de neije Prins wirt, ikke wal want ik geluuf dè ik dan wa moet inleevere bij de veurzitter, die hi dè wir nuddig vur minne opvolger, jonge jonge wa is ut toch snel gego, mer ut is nog nie zo witj, dè is volgend jaor pas (klingt wa witjer weg).

Dan wens ik nog iederieën unne sjonne kerst en un goe 2007.

En um te eindige wor ik mi begonne ben in dizze pagina van min dagboek, tekste utj de liedjes van di jaor, 2 regels die vur mij un feit zin en vur de neije Prins un veurproefje:

DE PRINS VEURÓP, MI DE RÓ VAN ÉLLEF , EN GOE GEHUSSELD GÉ VANZÉLEF!

JÓNG WA IS DÉ SJIEK, DI KIEVELOEËTERIEK

(Vals Alarm - 'Alaaf' 2006-2007)

Ik hang!

Ut is me de lééste titj regelmaatig ingevrivve, dé ut toch vur mij bijno is gedo mi ut Prins zin. Ik zee toen mèstal zoiets van: nog lááng nie, volgend jaor pas. Dè klongk wa witjer weg. Mer op ut moment dé ik di sjrief is ut al volgend jaor, en kumt minne eind-spurt as Prins wal aakelig déégtbij. Euvver precies drei daag is ut wer de uurste zotterdig van ut jaor en kumt de neij-e Prins utj. Dé wil dus zegge de de aawe Prins (huur, noem mijzééluf al aawe Prins) dan al dur de aaw prinse 'afgevoerd' is geworre op ut Prinsebal bij ut Oranje Hotel.

Hoef ik mezééluf dan nie op te hange, zoas dé elk jaor gebeurd? Jaowel Kieveloeëters en Kieveloeëterinne, ik hang al! Sjon nééve Wout, in ut Klubhusj van de Kieveloeët: 't cafe van Andrea en Toon, zowa boove de deur van de zaal. Di alles is afgeloeëpe mondig (1 jan 2007) gebeurd nodé we uurst in den Binger waare geweest bij de nei-j jaorsreseptie van de gemeente Méél (wor zo volgend jaor de Receptie van de gemeente.. (?) zin?) Der zal toch wal un bus gereegeld wéére!

Wor vurrig jaor nog de Kieveloeët mi woor verrast, woor di jaor utjgereikt en Wilhelmien Scheepers: de gemeentelijke legpenning. Ze was blij verrast, mer ze hi ut echt verdiend. We hebbe Wilhelmien netuurlik gefeliciteerd, en dorno was ut dus titj um no ut clubhusj te go wor de trap al verrig stong en ut spijkerke al in de muur zaat wor ik mij zéélef op mog hange. En nou zalle der aaltitj mensen zin die ut nie héllemol snappe wa ik bedoel, as ik zeg dé ik mezééluf heb opgehange, dus der kumtj ie: ik blief zééluf echt nie en un spijkerke hange, mer heb un FOTO opgehange wor ik opsto as Prins. En witte ge wor ik nou echt neij-sjierrig no ben?...wie der nééve mij kumt te hange!

Nog un paar daag en dan wit hél Méél ut,en dan hoop ik dé as op 1 jannuarrie volgend jaor de Prins van 2007 zin foto op ge hange, hij net zonne sjonne dag kriegt as ik afgeloeëpe mondig heb gehad, bij de receptie, clubhusj De Zwaan en bij ut Oranje Hotel wor dan ok wer de Heimat-Kapelle vur sjonne meziek zal zeurige.

Mer zo witj is ut nog lááng nie (zee toch dé 'volgend jaor' witj weg klingt). Uurst a.s. zotterdig 6 jan. afscheid neme van un prachtig prinsejaor, en kieke wie minne opvolger wert. Bij d'n Dokter en dorno ut Oranje Hotel gé ut gebeure, mi meziek van Goe Gehusseld en Flame en hél veul vastelaovesvierders want zonne sjonne aovend wil toch niemes misse, dus allemol komme!

Prins Fred II

DE KOP IN DE WOLKEN, DE NEUS IN DE WINDJ

GRÖTS WIE NOG NOJT, EN ZO BLÉÉJ AS UN KINDJ

STOER STÉ DE STEEK, FIER WAPPERT MIN VÉÉR

'NE KIEËR PRINS TE ZIN , DÉ WO IK ZO GÉÉR

(henk hover - 'Prins van Ophaove' 2005, vertaald in ut Mééls dur mij zééluf)

Ere-Lid

Graashook, dor kumt ze vanaf. Ik heb ut euvver ut sjoeënste maedje van de Graashook. Was ik die toch vergééte te zegge op minne leeste spietsj, dé der ok un dörske utj de Grashoek bij de familie meegedoa ha mi de optocht, stom van mij zeg! Mer ik ha beloofd um ut goe te maake. Zoeë goe zat Eefje?

Jao Kieveloeëters en Kieveloeëterinne, minne leeste spietsj, die heb ik afgeloeëwpe zotterdig gehad, op ut Prinsenbal, mer dorveur ha ik nog un persoonlik samenzin bij D'n Dokter, wor ik iederieën nog efkes koos bedanke die ut afgeloeëpe vastelaovesseizoen deegt bij mij hebbe gesto. Tuurlik was dor de familie, de Kieveloeët mi al de vraolie, hofkepéél Goe Gehusseld, Bubsers, Fluiters, Prins Gijs en vorstin Elles van de Kéjsjeut, Prins Emiel I (2006) van de Kwakkert ut Heytse en veul Méélse die ik in min prinsejaor heb maage ondersjééje. Ut was vur mij hél sjon um de hélle "film" nog us veurbij te laote go. Un sjon moment was ok toen ik en vurrig jaor terug moos dinke, toen stong Prins Wout I dor zin verhaal te doe, toen ie op un gegééve moment begoos euver de nei-je Prins, en zee: mesjien sté tjie hier wal binne! Hij ha geliek. Ik stong binne, tusse de andere muzikante van Goe Gehusseld allieën mer beezig zin um nie op te valle. Ik heb di jaor zin weurd herhaald en ok gezi mesjien sté de nei-je Prins ok vandaag al hierbinne, en jaowel , ok ik ha geliek!

Veul van de Kieveloeëters en Kieveloeëterinne die un ondersjééjing hebbe gekrigge, die waare der ok , zoas ik net al zee. Mer der stonge der nog 3 bij die der nog genne han, en die heb ik dan ok nog mi hél veul plezier nog maage ondersjééje as ridder in de orde van Kieveloeët. Uurst heb ik minne kammeraot John no veurre geroeëpe , un sjon verhaaltje der bij vertééld wa wij vruuger us hebbe meegemakt, en um dorno de ondersjééjing eumgehange. En toen waare ze én de beurt, twieë van de vier zusjes van Silvie, onze 'nannies' (dé is engels vur oppas), mer ik moet eigeluk zegge 'SUPER-NANNIES'. Ik heb, toen ze kwaame vraoge of ik Prins wo wéére mee gezi: die 2, die kriege zééker un ondersjééjing van mij, en ze hebbe der ut langste op moete waagte, mer ik wit zééker dé di ut juuste moment was. Nel en Hanny, gellie hebbe ut dik en dubbel verdiend!

Nou hebbe we de hogtepunte wal gehad daagt ik.....mis gedaagt. Ik woor nog verrast, en nie énne kieër!. Uurst kwaam minne kammeraot John, en ome Jan no vurre. Ome Jan die was al baang, as ik daalik de prinssesteek moos afgééve , dé ik unne kaawe kop zo kriege, dus hij ha unne sjone hoed vur mij meegenome, of eigeluk moet ik zegge 2. Enne vur de winter en enne vur de zommer. Zo zie ge wal, der wert goe vur mij gezeurigd. En John die ha unne spiegel vur mij gemakt, mi dorin ut Kievelmenneke en "prins Fred II 2006" gegraveerd, mi verlichting. Prachtig. Ut sté al op un hél sjon plékske bij ons op de kaast.Ik daagt nou hebbe we ut wal gehad, moos ik efkes no de toffel wor die van"de bubs" stonge mij melde. Woore Silvie en ik utjgenöddigd um mi hun mee te go no de LVK finale van di jaor, geweldig!.

Zééker weete dé ut wer net zonne aovend wert as vurrig jaor! En toen kwaam der nog unne klapper! Spreekstalméster Ruud van Goe-Gehusseld nam de microfoon, en begon te vertelle wa un geweldig seizoen ut wal nie was geweest, en um mij dor vur te bedanke hebbe ze mij ondersjééje as ERE-LID van goe-gehusseld.Man, wa ben ik dor gröts op! Ik sto nie gaow mi de mond vol taand, mer toen wees ik nie wa ik moos zegge, zo verieërd was ik.

En hoe kenne ge better zon emotioneele momente afslutje as mi 'ons nummerke' "prins van ophaove" van Henk Hover. Dor ha min prinsesje Silvie vur gezeuregd......kippevel!

Zo ziege wal dé ok dizze aovend wer vol verassinge zaat, en vur dé ik ut wees moose we wer vertrekke no ut Oranje Hotel, wor al veul volluk zaat te waagte op wa nog allemol komme ging. De 11e C.D. van de Kieveloeët die heb ik nog euvverhandigd én de derecteur van de Rabobank Dhr. van Teefelen, en dorno was ut vur mij titj um , no unne poëtische énkondiging van Vorst Peter, min allerlééste woordje as Prins te doe en alle vastelaovesvierders die dor énweezig waare te bedanke, vur un onvergéételuk jaor. Wéérem weurd van de veurzitter van de Kieveloeët, Frits Berben ,hebbe nie verhinderd dé ik minne scepter én um moos afgééve, en onder muzikaale begeleiding van Goe Gehusseld woor ik verder ontdo van min prinsepak dur min naaste kompaane Vorst Peter en Adjudant Henk.

En dan sto ge dor in ouw hemd, leeg haand, niks oppe kop. Mer ik ging mij al wer un stuk better vuule toen ik dor de 3 kunninge én zag komme, die mij van die haggeluke situatie kwaame verlosse. En nou zit ik der bij, as groentje bij de aaw prinse, zo zie ge wal, alles hi zin veurdélle.

En toen kwaam netuurlik ut moment wor dé iederieën vor gekomme was: wie wert de nei-je Prins? En zo as gellie ut allemol het kenne zie is der unne waardige opvolger vur mij teveursjeen gekomme: Prins Peter III (Peter Verstappen). En hoe hij dizze dag hi belééfd, zal ie zééluf wal gon vertelle, want ik dink dé ok Prins Peter III wal un dagboek ge bijhaawe.

Kieveloeëters en Kieveloeëterinne, min sjilderij is klaor, zoas Vorst Peter dé zo sjon énkondigde, den toertocht is vurbij, mer ik blief zwééve...vur aaltitj!

Prins Fred II

MI MIN TROOM VEURÓP

MÉÉL ÓP ZINNE KÓP