user_mobilelogo

De maagiesse (Dólle) mòndich

De Siem - De (zòveulste) verrassing

Lèkker fit zit ik èn min óntbéjt. Tis mòndiggemèèrge èn ik moet um tie:n uurre stééke. Nòrmaal gesprooke, as ik génne prins zò zin, loeëp ik övver 'n hallef uurke nò de Siem vur de Dólle Mòndich. Al mieër as dartich jaor doen wéj di mi 'n vaast klupke Dólle Mòndich-maote. Dòr blie:ve we dan de gansen dach. Vur méj, nééve den óptòcht, 'n vaast hòchtepunt van min dréj dólle daach. Mèr as prins is tè gans anders. Gén próbleem netuurlek, want dan haa ik nee moette zégge. Toe de utjnöddeging binnekwaam van Medelo Narragoniam um 'n óntbéjt te órganiezeere béj de Goejje, èn wéj as Kieveloeët dòrvur utjgenöddicht waare, zee ik dan ók mee jao. In 't belang van vastelaovend in Méél is di 'n sjitterent ieniesjatief. Ók al betieëkent 't dè ik de oo-zò-sjònne èn belangriekke uurtje uurkes van de Dólle Mòndich van de Siem moet misse, tans dè daacht ik.

Vòrst Ron èn ik zitte in den òwtoo ónderweeges nò de Maaspoort in Vènloo vur de prinsefootoo. We dingke nao èn droeëme wa, tòt 't moomènt dè 't derutj kumt. Ók vòrst Ron veengt 't bezónder jòmmer, héj is ók èn van de Dólle Mòndich-maote, dè héj die uurste oo-zò-sjònne belangriekke uurkes béj de Siem moet misse. Besèffende dè di de leeste kieër is dè we di kanne doe: … Ik ving 't ók jòmmer mèr in 't belang van … tis gewoon nie anders.

Tis mòndiggemèèrge hallef tie:n. Nèt wa óntbeete èn ik bén éjgelek al vérrich. ’t Vurdél van geestere óppentitj nò husj gao begeent nòw al zin vruchte af te wèèrpe. Lisette is wal druk mi méj èn de gang um alles vérrich te krie:ge: “Doe nòw ens rustich! ’t Steeke is pas um tie:n uurre.” Dan wérter óp de deur geklòpt èn ik loeëp nòr ónder hin. Atjuudant Mark sté vur de deur mi zinne vrachtwaage. “Ik kóm éfkes wa oppikke, maakegéj de laajklèp vast oope.” Nie naodinkende èn ik maak ‘gewoon’ de laajklèp oope. Ik huuër wa èn kie:k in die laajbak. Wa ik dan zie: is nie te gluuëve. ’n Groeët laang tòffel mi dòrèn de ganse rò van éllef mi ’t kómmietee, mèr ók mi alle Dólle Mòndich-maote. Wir is ter in ’t diepste gehéjm ’n plan gesmeeje. “Dörrum waar Lisette zò druk mi méj. Die waar netuurlek wir óppe höchte. As we nòw ’n uu:r érre nòr de Siem gòn, dan kénne we die oo zò sjònne èn belangriekke uurkes wal meemaake.” Dè te Kieveloeë SAAME mi min Dólle Mòndich di wér vur mekaar krie:ge èn spésjaal vur méj di doen is hél bezónder. Ik gao ’t nie mér de gansen titj vertélle, mèr géllie weete óndertusse watter in min oeëge sté…

Ónderweeges nò de Siem aachter in de laajbak is 't hòst fést èn de bekéénde joeks ónder óns is dòr al van de pertééj. As we béj de Siem ènkómme, zin dòr ók al ingkele vraolie van de Kieveloeët derbéj. Zéj hébbe gezèùrecht vur bruuëtjes èn belèch. Wa is di tòch 'n fentasties klupke èn van stilzitte hébbe zéj nòch nòjt gehuuërt. Klasse wa zéj allemòl doe:. Ók ingkele femiellielijje zin alwér prezènt. Ingkele uurre van puu:re gezèllichhétj vòllege èn der wért wir aawverwétst gelache. Vòrst Ron èn ik kie:ke mekaar èn, èn ik zie: béj em ók óntruu:ring. Sjòn dè we di nòch mee maage maake. Èn as zèèlefs Jacques Simons mi vriendin binnekómme, um der énne óp óns te dringke, is de mèèrge kómpleet. Groeëte klasse!

Kieveloeët èn netuurlek alle Dólle Mòndich-maote vur dizze giegantiesse verrassing èn dè géllie beréjt zin um di alles vur óns te doe:. Dangk òllie allemòl.

Vòrst Ron zi dè wéj moette gao èn ók veurzitter Rudy zèùrecht dè we apperènsie maake. We wéére verwaacht béj de Goejje. Mi énnege ‘teegezin’ mèr ók gaajing in de vòllegende aktievietéjt gòn we. Uurst pak ik éfkes 't woort èn dangk ik iedderieën vur 'tgeen wa se gedao hébbe vur méj. Ik dangk Nard èn Petra vur de gastvréjhétj èn zéch teege Nard: “Ik kie:k wal òf ik dizzen aovent nòch kóm.” Wòrróp Nard antwoort: “Kiek mèr, we zin oope.” Nòw wittegéllie mee wèllek nievoo ónze dólle mòndigge hébbe, ge moet derbéj zin um 't te gluuëve...!

 

Koester ‘t vléjje, verheuch òw óppe toekómst,
mèr geniet nòw saame van dizze vastelaovend

Prins Erwin I