De 11de van de 11de
Mòndich de 11e van de 11e, ik bén vandaach den dach krèk ’n jaor prins van de Kieveloeët. ’n Jaor geléjje zaate Lisa en ik óppe bangk L1 te kie:ke èn te lééve van reklaam nò reklaam. Want iedders kieër as ter reklaam óp waar, dan waare we wér ’n uurke deechterbéj ’t mómènt dè we ’t gròtste gehéjm van Méél moochte ónthulle. Nòw ónderhant ’n jaor latter hébbe we de 11e van den 11e hél anders ingevult.
Den dach begoos al vruuch. Ik haa naamelek ’n plichtpleeging te doe:. Téjdes de Straffratsdach hi de kemissie méj gestraft, umdè ik – ècht per óngeluk – téjdes de Méél/Nirkant-aovent ’n reuntje mi ‘n Ulewappers-vlach lie:p. De straf die ik krich, waar dè ik óp de 11e van de 11e alle vlagge béj de leeje van de Kieveloeët moos gòn óphange. Umdè allieën ’n reuntje réjje ók mèr zò saaj is, vroech ik òf de rèchter van de Straffratsdach, Frits Berben, mi méj mee wao gao. Èn zoeë begooste we den dach um zeuven uurre smèèrgesvruuch. Èn ik moet érlek zégge dè ’t éjgelek gaars gén straf waar. We hébbe enne prachtigge mèèrge gehat wòrbéj we vur neegen uurre al mieër gelache hébbe as wa ik óp enne gewoone mòndiggemèèrge doe:.
Dernao waar ’t titj um me óp te gòn maake as leeste gansen dach as prins. Ik trék méj gòw min pak èn, èn gao richting De Heere van Meijel um ’t vastelaovesséjzoen te gòn oopene. ’t Prógramma begeent mi ’t installeere van de leeje èn mi de installaasie van ’t nééj Rò van Éllef-lit Marc van den Heuvel èn Jannie Sanders. Marc èn Jannie hébbe we al óp ’n paar mómènte lieëre kénne èn dòrmi weeste we al dè ti gans goe ging kómme. Marc èn Jannie, wèlkóm béj de klup.
Van de Heere utj richting ’t Kievelmènneke um dòr de Vastelaovent òffiesjeel te gòn oopene. Ik wit ók dè ti ieën van min leeste weurt zin vur ’t Méélse vòllek. Ik doe: min best um min èntoezjasme övver te brénge èn ók di séjzoen mi enne Kick-start te beginne.
Nòdè we de Vastelaovend geoopent hébbe, sté ’t afsjéjt van Rob èn Rian Vercoulen óp de plènning. Rob hép ik in ’t kómmietee lieëre kénne as enne bevlógge èrvaaringsdèskundege. Dörrum ók hél jammer, mèr wal begrieppelek, dè géllie stóppe béj de Kieveloeët. Alles wa géllie meegemakt hébbe èn betieëkent hébbe vur de club wit veurzitter René prachtich te verwoorde in zin weurt. Mi alle hòchtepunte èn dieptepunte die dòrbéj huuëre. Utjéjndelek wéére de weurt van René afgesloote mi ’n suupperverdiende benuumming as eerelit van de Kieveloeët. Rob, nòchmaals van harte prefiessiejat.
’t Prógramma wért nòch witjer ingevult dur enne sjònnen aftrap van ’t juubbieleejumséjzoen van Goe Gehusseld (twé kérre éllef jaor hòfkepèèl van de Kieveloeët). Wòrnò diezjee Patrick Verstappen èn Lòt em Loeëpe den dach afslutje mi ’n goe:j fésje.
'ne Kick-start mi goejje meziek, veuróp in ’t Kieveloeëteriek!
Prins Jarno I