Activiteiten agenda

Appelaktie
vrijdag 11 oktober
Opening Vastelaovend
maandag 11 november
Prinsebal
zaterdag 16 november
De Méélse Liedjesaovend
zaterdag 30 november
Bónte Aovend Vréjdich
vrijdag 31 januari

Spotify lijst

Vastelaovesvierder 2024

16 feb 2024 Nieuws

Op het Kieveloeëte Treffe is Mark Brummans uitgeroepen tot vastelaovesvierder van Meijel 2024     De vastelaovesvierder van 2024 is iemmes...

Uitslag optocht 2024

12 feb 2024 Nieuws

Rond de klok van 13.30uur konden de eerste deelnemers van start gaan vanaf de nieuwe startlocatie. Dit jaar konden we tijdens de bonte stoet genieten van ruim...

De éllefde van den éllefde

Ennen daatum die ik nòjt mér gao vergééte.

“Willege nòch 'n éjke, prins Erwin?” Vröcht Brendy. “Jao die lust ik nòch wal énne.” antwoort ik. Ik zit èn tòffel béj Ard èn Brendy. Tis aacht uurre smèèrges van den éllefde van den éllefde. Saame mi Rò van Éllef-lit Job hép ik 'n bluumke gebroocht nò Brendy. Zéj hi furrech jaor de prisj gewónne dè ze èlleke éllefde van de mònt 'n bluumke krie:cht van de Kieveloeët. Tradiessie is dè 't leeste bluumke wért gebroocht mi de prins derbéj. 't Toeval wil dè ter in heuzje Van Dijk nòch 'n tradiessie is, èn dè is dè ter smèèrges óp den éllefde van den éllefde dur 'n èntal lijje 'n éjke gebakke wért. Ik zit èn tòffel mi Benny, Karlijn, Roel, Bram, Mark, Ard èn Brendy. 'n Spésjaalen dach vur veule èn dees tòffel. Tis vandaach 't begin van enne néjje Vastelaovend mèr vur sòmmigge éndjicht der ók wa... want Ard èn Brendy, Benny èn Karlijn hébbe besloote te stóppe as lit van de Kieveloeët. Bram zal juust geinstalleert wéére as nééj lit. Ók vandaach is min afsjéjt as prins èn dizzen aovent weete wéj wie minnen ópvòlleger gé wéére. Enne lange, drukken dach, mèr we gòn der enne sjònnen dach van maake. As we de éjkes óphébbe, wért der 'n vòllegende tradiessie in gang gezit... Tis kwart vur neege as we 't uurste pilske oopene. Tradiessies moettege in ieëre haawe vinge wéj... We prooste óp mekaar èn óp de sjònsten dach die kómme gé... Enne sjònne mèr spésjaalen dach!

Saame mi Fenne, Amber èn Lisette loeëpe wéj nòr de Heere. Neegen uurre is afgesprooke èn klòkslach mèlde wéj óns. Veul lijje zin der al èn ik maak éffe 'n reuntje langs iedderieën. Ik wèns ze nòch énne kieër as prins wèlkóm èn gééf 'n hant òf enne knoe:vel. Tis féjn um iedderieën wér te zie:. Ók 't dwéjlòrkèst... wittege 't nòch?... Òf is 't nòw Hòfkepèèl... Goe Gehusseld is wér prezènt. 'n Bèkske kòffie wért gedróngke èn dan vur de leeste kieër 't kammermoomènt. Nòch énne kieër wéér ik as prins gesteekt. 't Wért al mee 'n höchtepunt. Di blie:ve spésjaal moomènte mèr vandaach den dach zeeker. Wa nie ellieën kléjjingman, vòrst, atjuudant, èn de prins stòn in 't kémmerke. Nee, ók aaw veurzitter Rudy èn nééjbakke veurzitter, èn afgeloeëpe sezoen min kléjjingman René is van de pertééj. Èn hier wéére tradiessies wér veurtgezit want vastelaovesdinzich hi Rudy as veurzitter (sèpter èn steek) ingenómme èn fòrmeel moetjie di alles övverdraage èn de néjje veurzitter. Want ók Rudy gé vandaach afsjéjt neeme as lit van de Kieveloeët. Sjòn weurt van Rudy kómme. Sjòn is ók dè 't toeval wil dè Rudy's uurste èn leeste prins in 't kémmerke stòn. Ik bén zinne leest gekózze prins èn Hidde waar zinnen uurste. Èn laot dè nòw nèt de néjje kléjjingman zin. As alles is övvergedraage, krie:ch ik hél sjòn weurt van René vur den allerleeste kieër de sèpter in min haant. 't Vuu:lt wért vertraowt èn ik hép ter zin in. Nèt wie de rèst van de ènweezigge in 't kémmerke... we gòn wér van de kant, de Vastelaovend gé zoeë òffiesjeel beginne.

Rudy sté óppe tòffel èn hi sjòn weurt èn iedderieën. 't Belang van Vastelaovend èn 't sjòn klupke de Kieveloeët wért benuumt. As iedderieën gesteekt is gòn we óns ópstélle um nòr 't Kievelmènneke te gao. Aachter Goe Gehusseld gòn wéj óp pa. Mènse zwèèje wér èn ik vuu:l me wér héllemòl óp min gemak. Béj 't Kievelmènneke èngekómme is 't al behuuërlek druk. De kenónjees utj Bòlder zin der ók al. Want tradiesjooneel gòn we beginne mi éllef kenónssjoote. Naodè vòrst Ron mi sjòn weurt de oopening hi afgetrapt, zal ik kórt 't woort krie:ge.

Wa begeent, dè éndjicht ók... Ennen tèkstreegel utj 't lietje van ‘My Way’ van de Érpelemèèntjes utj 2007. Èn wa bén ik blééj dè vandaach min prinsesjap hier éndjicht. Ik laot 'n stilte valle um dernao witjer te gao. Want dè betieëkent dè 't òjt begoos is. Ik bén zò blééj dè ik furrech jaor gedurreft hép um jao te zégge, óp de vraoch van Rudy òf ik prins wao wéére. 't Prinsesjap hi óns as gezin èn méj as persoon zòveul gebroocht, dè is nie te besjrie:ve. Sjòn hèrrinneringe die we alzelééve gòn koestere. Alle vie:r hébbe wéj ók wér énòrmveul zin in dizze Vastelaovend. Gewoon wér lèkker Vastelaovend vie:re as ‘gewoone’ Kieveloeëters... mèr wal mi 't féjt dè ik òjt veurganger moocht zin. Ik éndjich mi de weurt dè minne spreuk nie ellieën furrech jaor gólt, mèr vannaf nòw vur alzelééve gèlt.

Koester 't vléjje, verheuch òw óppe toekómst,
Mèr geniet nòw saame van dizze Vastelaovend. 

Alle vééjf afsjéjtnimmende Kieveloeëters, Rudy, Ard, Bart, John èn Benny maage in 't béjzin van ur partner nèt veur 't kenónssjòt enne wèns òf verhaal vertélle. Sòmmigge krie:ge mi ur verhaal de lachers al óppe haant, andere hébbe sjòn wènse. Ók prinsès Britt èn prins Niek van de Kéjsjeut maage enne wèns doe:. Dernao kómme vòrstin Joliena èn prinsès Britt van de Véngneuze. Zéj giechele urre wèns ók... wa 'n lòl hébbe die twieë tòch. Vur 't leeste sjòt mach ik enne wèns doe:. Ik hép 'n èntal tekstreegels gevat utj 't lietje ‘Het Ravijn’ van Veldhuis & Kemper. 'n Liet wa perfèkt verweurt zòas ik laang bén gewees èn wòr ik perbeer verrandering in te brénge. As 't mèr 'n bietje spannent zao wéére waar ik ewéch. Mèr méstentitj zèùrechde ik derveur um nie in die sietuuwaasies terèècht te kómme.

“Want de allermooiste bloemen groeien vlak langs het ravijn en om die te kunnen plukken, moet je durven bang te zijn”

Ik wèns dè iedderieën baang durreft te zin!

Nao dees weurt klingt 't éllefde kenónssjòt. Nòw is 't òffiesjeel. 't Vastelaovesséjzoen 2023-24 is begoos... èn we hébbe der zin in.

Nao de slòtweurt béj 't Kievelmènneke dur vòrst Ron, stélle we óns wér óp um nòr 't kluplókaal te gao. Di is dan vur méj de allerleeste kieër dè ik aachter Goe Gehusseld loeëp as prins van de Kieveloeët. Ik besèf alsmèr mieër dè ik alles vur de leeste kieër èn 't doe: bén.

Binne béj de Heere wéér ik óppe tòffel gezit èn krie:ch ik kórt 't woort. Dan is 't titj vur de lunsj. Óns mam, Ellen èn Geert zin der ók èn lunsje lèkker meel. Ik perbeer mi iedderieën wa te buurte mèr den titj gé méj veulste vluch. 't Middichprógrammaa gé van start. Mi vééjf lijje die stóppe wért 't ennen drukke middich. Druk, mèr wal sjòn. Vur èllek lit hi nééjbakke veurzitter enne sjitterende spietsj veurberéjt. Mi af te goe wa joeks dertusse wért èllek lit bedangt veur zin òf ur dienste, mèr ók sirriejeuze verhaale wéére vertéélt.

Ard & Brendy, Benny & Karlijn, Bart & Eef, John & Wendy, èn Rudy & Mieke hébbe zèèlef ók sjitterende afsjéjtsweurt veurberéjt. De émoosies sjie:te béj ur, mèr ók béj alle ènweezigge alle kanten utj... van sjòn weurt wies 'n 6,5 menutj duurent fillemke, wies 'n playbackact van ‘Deurdonderen’ van Normaal. Alles zit derin. Tis sjitterent um te zie: woe iedderieën èn 't genietten is. Van nééjbakke Rò van Éllef-lit wies jòrrelaang Kieveloeëte-érvaaring. 't Is dan ók wér zoeë hòst 't éjnde van de middich... Naodè John èn Rudy benuumt zin tòt lit van verdienste, 'n walverdiende belooning vur ur jòrrelange inzit, vòllecht de klapper van de middich... atjuudant Mark wért óp 't poodiejum geroe:pe. Zinne verbaasde blik zal ik nòjt mér vergééte. De mèns die alles ónder kóntraole hi, de mèns die alle verrassinge hi veurberéjt, wért hier éfkes zèèlef verrast. Émmel óp 't poodiejum begeent veurzitter René mi de weurt dè Mark GÉN afsjéjt gi neeme, mèr tòch, teege alle prootòkólle in óndersjééje gé wéére. De blik van Mark wért nòch verbaasder as gewoon verbaast... Mark wért gén lit van verdienste mèr benuumt tòt eerelit van CV de Kieveloeët. Wa dan gebeurt ving ik fentasties. Der óntsté 'n applòws èn gejoel. Iedderieën mèr dan ók iedderieën veengt di enne walverdiende óndersjééjing. Wa Mark allemòl vur de Kieveloeët duu is ónbesjrie:flek. Ikzèèlef hép 't di jaor maage érvaare. Óngekéént wa dizze kél allemòl duu. De óndersjééjing wért dan ók dur iedderieën gedraage. Gròts bén ik um minne sjònbruu:r dè héj in 't jaor dè ik prins mach zin dees sjitterende óndersjééjing mach óntvange. Klasse Mark, klasse Kieveloeët... Sjapoo!

De middich éndjicht in ‘n groeëte resèpsie. Iedderieën filliessieteert de aftréjjende lijje èn ur partner, èn netuurlek de óntvangers van de óndersjééjinge. Tis al gòwgenóch hallef vééjf. Éjnde middichprógramma. We hébbe wies hallef zis èn dan maage we wér vól èn de bak. Óp 't prógramma: Ónze graande fienaale, óns deefienietief afsjéjt as prinsefemiellie.

De regie van óns afsjéjt hép ik zèèlef in de haant. De leeste wééke hép ik me hiermi beezich gehaawe. Mèr 't afsjéjt begeent uurst mi sjòn weurt van Hans Martens naames de Kievelkrant. Dan ruupt vòrst Ron iedderieën van de Kieveloeët óp um zich truch te trékke. Ik hép 'n oopening bedaacht zòas we dè mi de Érpelemèèntjes dikzat gedao hébbe. Ik hép bedaacht dè alle lijje, roeëj, blaow, èn de vraolie, mi brandende fakkels óppe meziek van ‘Conquest of Paradise’ binnekómme. Di is min ieërbetoon èn de Kieveloeët. 'n Kieveloeët wòr wéj 'n fentasties jaor mi aachter de ruch hébbe. Ik wil ze éfkes in 't middelpunt van de belangstèlling zitte. Aachter de Kieveloeët loeëpe Paul Joosten èn Ruud Strijbos, anders gezi Roland van de Boom èn keplaon Roger Maenen. Dees twieë klasbakke zin beréjt um mee te hèllepe èn di afsjéjt èn voe:re ur èkt wér óp van de afgeloeëpe Bónte Aovend. De tèkst énnechsins èngepaast èn di moomènt. 't Afsjéjt van prins Erwin I èn zin gezin. Wéjzèèlef zin nòch nie in de zaal. Ónder uurst löjt applòws vur de Kieveloeët èn dernao vur Paul èn Ruud begeent vòrst Ron mi de ènkóndeging van óns...

De lampe gòn utj. Vòrst Ron bòwt de spanning óp èn dan klingke de uurste fentastiesse toone wér van Status Quo ‘Whatever You Want’. Ónder dees toone kwaame we binne béj de allerleeste Dólle Mòndich béj de Siem. Ik wil dè dizzen aovent hier béj de Heere dunnetjes övverdoe:. As ge tòch de regie in de haant hét, òf nie!? De ganse zaal duu mee èn béj de övversjaakeling nòr de drums gòn de kefeedurre oope. Dòr stòn we mi óns vie:re. We beginne èn ónze, èn zò vuu:lt 't ècht, zéégetòcht. 't Vuu:lt fentasties um dur de zaal te loeëpe mi de mènse die òw die:rbaar zin. Èn um di saame as gezin te belééve, makt méj énòrm gelukkich. Émmel béj 't poodiejum beslutj ik méj eum te drèèje. Béj de kefeedurre drèèj ik méj wér eum èn perbeer nòch bewuster alles in méj óp te neeme. Lisette, Fenne èn Amber stòn al óp 't poodiejum. Ik loeëp nòch dur de zaal èn 't makt méj énòrm gröts. Gröts óp óns gezin, gröts óp de mènse die hier zin, èn vurral gröts óp min éjge...

Óp 't poodiejum ‘rocken’ we nòch éffe dur. As kléénj mènneke vóng ik Status Quo al sjitterent èn nòw óp min fieftichste is di de plaat van minne Vastelaovend as prins gewórre. Hoe sjòn is di, we geniette mi vólle teuge.

Status Quo zit deróp, de oopening zit deróp èn ik begin èn min oopeningsweurt. Oopeningsweurt die ik énnechsins veurberéjt hép mèr vurral perbeer um ze vanutj min gevuu:l te laote klingke. De ganse spietsj gao ik hier nie ópsjrie:ve, mèr óp 'n gegééve moomènt vraoch ik 'n menutj stilte. 'n Menutj vur de gestèùreve mènse van di jaor. Van Ves Janssen wies de mooder van Anouk, van Tjeu Verstappen wies Lieneke de Leeuw. Mèr ik trék 't bréjjer. Ik wil ók éffe ónze pap hèrdingke. Ónze pap, die zeeker nòch géér hier óp dizze wérrelt haa wille loeëpe, mèr 't afgeloeëpe jaor as èchte vastelaovesvie:rder (ók zò benuumt in 2007) derbéj wille zin. Vastelaovend vie:re mi zinne zoon as heerser van dezèllefde Kieveloeët. Jòmmergenóch moocht 't nie zò zin. Dur middel van zinnen tèkst óp 't prèntje die ik groeëtendéls in minne spreuk van di jaor hép verwérrekt, hép ik em vur min gevuu:l tòch hél deechtbéj gehat 't afgeloeëpe jaor. De menutj stilte is indrukwékkent. Klasse!

Dernao begin ik iedderieën te bedangke. Ónze lisjt is laang, érrech laang, mèr ik wil iedderieën benuumt hébbe, umdè iedderieën dè verdient. As leeste bedangk ik Fenne & Amber èn netuurlek Lisette. Gröts, blééj, óntroe:rt, indrukwékkent dè wéj saame afgeloeëpe jaor hébbe maage belééve. Ge próbeert sòmmigge dinger ónder weurt te brénge, mèr sòms lukt dè gewoon nie... Ók min dangkweurt èn Rudy, Ron, René èn Mark zin alzelééve te kórt. Wa hép ik enne suuppertitj mi dees mèn maage hébbe. Allen, dangk òllie wal!

Nao 't bedangkwoort dè Geert & René ‘My Way’ zinge. De vèrzie van de Érpelemèèntjes walteverstao. Èlleke zin, Èllek woort, Èlleke émoosie van di liet ving ik passent béj di moomènt. Lampe gòn wér utj, iedderieën vat mekaar in de èèrem. Di is puure émoosie èn ik ving 't sjitterent. Ónder 't liet perbeer ik zòveul as meugelek mènse persoonlek te bedangke. Ók Lisette makt urre rónde. De leeste koeplètte van 't liet kniel ik nér èn gao èèrem in èèrem mi de kammerèùj van Fenne & Amber meezinge. Dees dörskes maake méj as prins blééj, mèr vurral maake ze méj enne grötse pappa... fentastiesse vriendinne vur óns daochters.

Wa willege mieër... De leeste ‘My Way’ zinge Lisette & ik saame mi Geert & René. 'n Applòws klingt. Traone stòn in min oeëge èn vòlleges 't ‘draaiboek’ vat Lisette 't woort èn zi terèècht dè we zoeë de Vastelaovend nie kanne beginne. 't Moet 'n fést wéére. 't Liet ‘Tènt óppe kóp’ van de Knoetsòrre is éjgelek ók 'n bietje min vastelaovesplétje gewórre 't afgeloeëpe jaor. Geert & René zétte dizze knéjter in. Téjdes 't refrinj springe de dörskes van Krèk Goe derbéj. Zéj zèùrege vur 'n sjitterende verrassing téjdes de Bónte Aovend èn maage béj óns afsjéjt nie óntbrééke. 't Fést barst inderdaat lós. Iedderieën gé in de póllónééze èn we maake mi zen alle 'n gewèldich slòt van. Èn dè was krèk de bedoelling.

Ik éndjich dan ók mi de weurt dè ik geperbeert hép um dréj ingrédiejènte saame te brénge téjdes min afsjéjt venaovent. Dréj ingrédiejènte die vur méj de Vastelaovend inhaawe: “SAAME, de LACH èn de TRAON.” Èn zòas besjrivve in 't prinseliet wa de Érpelemèèntjes vur méj zónge afgeloeëpe jaor: “De lach weent 't aaltitj van de traon”. As allerleeste mach ik éndjigge mi minne spreuk, enne spreuk die méj die:rbaar is um de rijje zòas érre besjrivve. Mèr ók èn vurral enne spreuk die aaltitj gélt. Want 't waar minne spreuk 't afgeloeëpe jaor, mèr tis ók enne spreuk die gélt vur di jaor èn enne spreuk die gélt vur aaltitj, naamelek:

Koester 't vléjje, verheuch òw óppe toekómst
Mèr geniet nòw saame van dizze Vastelaovend

Dan wéér ik nòch verrast dur kammerèùj. Aaw-vòrst Wiljan vat 't woort èn övverhandicht méj 'n sjòn ingelisjte footookòllaazje. 'n Sjitterent gebaar èn kedoo die 'n sjòn plèkske gé krie:ge. Kammerèùj, bedangt vur òllie fentastiesse béjdraage... klasse! Vòrst Ron zi dè di 't éjnde is van 't afsjéjt van prins Erwin den uurste...

Èn wa dan gebeurt, ik wéér toegezónge dur iedderieën in de zaal. Ók zwèèjt iedderieën mi witte tèsnuzzeke óns toe. Atjuudant Mark dòwt méj nòr vurre èn dòr stao ik dan. Bèùkent van alle émoosies die dur méj hin gao, mèr vurral geniettent dè iedderieën in de zaal óns toejöjcht. Ók vuu:l ik me behuuërlek óngemèkkelek, al dien èndacht. Moet ik nòw böjge? Moet ik nòw zwèèje? Ik wét 't nie èn ik beslutj um gewoon te blie:ve stao èn alles övver méj hin te laote kómme. Ók Fenna, Amber èn Lisette hébbe 't zichbaar zwaor. We hébbe ók 'n fentasties jaor aachter de ruch èn dè besèffe wéj óns tòch wal. Nao 'n paar menutj vat vòrst Ron 't woort want 't aoventprógramma sté vur de deur. 't Belangriekste netuurlek... ‘Wie wért de néjje prins van de Kieveloeët?’

“Het was maar een clown”... ónder de klangke van di liet gespult dur Goe Gehusseld wéér ik óntklét as prins. De sèpter, de steek, de mantel èn de prinseóndersjééjing moet ik inleevere. Nao 'n paar menutje stao ik naks. Dan kómme Tjerk èn Sibbe naames de Awd Prinse èn maake méj vieja 'n kléénj èkt döjdelek dè ik wèlkóm bén béj ur klup èn dè ze vur méj zalle zèùrege. Nao ingkel weurt van aaw-prins Peter Verstappen mach ik dur de rééj gevèùremt wéére dur de Awd Prinse de zaal in. Nòw bén ik òffiesjeel prins af èn huu:r ik béj de Awd Prinse. Èn as awtste prins òjt van de Kieveloeët kan dè netuurlek nie anders.

In de zaal ménge wéj óns tusse de genöddichde. 'n Vèùrem van ópleuchting, óntlaajing èn vólle óntspanning makt zich méster van méj. 'n Gevuu:l die aaw-veurzitter èn aaw-prins Rudy al hél sjòn umsjrif toe héj afsjéjt naam as prins. 't Vuu:lt énòrm lèkker èn ik dringk de nöddege pilskes mi kammerèùj èn bekéénde.

Dan is de ónthulling van de néjje prins. Jarno Schijven is de néjje heerser van Méél. Sjitterent. Enne Schijven nao méj as prins. Éfkes latter sté Jarno al óp 't poodiejum in zin prinsepak. Dan mach ik nòch énne kieër 't poodiejum óp. Utj zin haant krie:ch ik den Druppel. De hòchste óndersjééjing van de Kieveloeët. Enne knoe:vel van Jarno vòllecht èn ik gao wér de zaal in. Ik geniet de gansen aovent van alles èn van iedderieën. Dan is den aovent èn zin énjtj gekómme. 'n Tradiessie is dè de vurrege prins nòch éfkes meegé nòr 't husj van de néjje prins. Béj Jarno & Lisa is 't nòch hél gezèllich. Die twieë van óns zin der ók nòch steets béj, mèr óp 'n gegééve moomènt kómme der tòch sinjaale dè se muu:ch zin, ók al zégge ze van nie. We beslutje um nò husj te gao. We neeme afsjéjt van de ènweezigge èn bedangke Jarno & Lisa veur ur gastvréjhétj. Saame mi zin vierkes loeëpe we hant in hant óp husj èn. Ik kie:k nééve méj èn geniet van óns vierkes. 't Zit deróp, nòw ècht. Tis sjòn geweest, tis goe zoeë.

Dus ik bén nòw énòrm gröts dè ik teege òllie mach èn kan zégge

Dangk òllie wal!

't Waar dangkzéj òllie enne feenoomeenaale Vastelaovend vur óns.

Naames Fenne, Amber, Lisette èn Erwin

Ik hép getracht enne waardigge prins van de Kieveloeët te zin dizze Vastelaovend. Ik hép di gedao mi énòrm veul plezie:r. Ik hép di gedao mi énòrmveul steun van iedderieën, ik hép di gedao óp 'n menie:r, ik hép di gedao óp MIN menie:r,   ‘I DID IT MY WAY’!

My way tekst Mééls

 

 

 

 

 

 

 

 

 

 

 

 

 

 

 

 

Koester ‘t vléjje, verheuch òw óppe toekómst,
mèr geniet nòw saame van dizze vastelaovend

Prins Erwin I

Vastelaovesvierder 2024

Wil je iemand (persoon of groep) nomineren voor vastelaovesvierder?
Laat het ons weten!

Stuur ons je nominatie

Dè moet in de krant

Heb je een ludiek verhaal of annekdote voor in de vastelaoveskrant?
Laat het ons weten!

Stuur ons je verhaal

Save
Cookies voorkeuren
Wij gebruiken cookies om ervoor te zorgen dat u de beste ervaring krijgt op onze website. Als u het gebruik van cookies weigert, kan het zijn dat deze website niet naar behoren functioneert.
Accepteer alles
Weiger alles
Lees meer
Unknown
Unknown
Accepteer
Weiger