Activiteiten agenda

Opening Vastelaovend
maandag 11 november
Prinsebal
zaterdag 16 november

Spotify lijst

Vastelaovesvierder 2024

16 feb 2024 Nieuws

Op het Kieveloeëte Treffe is Mark Brummans uitgeroepen tot vastelaovesvierder van Meijel 2024     De vastelaovesvierder van 2024 is iemmes...

Uitslag optocht 2024

12 feb 2024 Nieuws

Rond de klok van 13.30uur konden de eerste deelnemers van start gaan vanaf de nieuwe startlocatie. Dit jaar konden we tijdens de bonte stoet genieten van ruim...

De maagiesse (Dólle) mòndich

De Goejje - De (zòveulste) verrassing

't Is stil, meusjstil. Vraogende blikke. Óngeluuëf. Énnege peniek zèèlefs. Verbéjstering. Wa gebeurt hie:r? De mènse kie:ke nò Fred, die nèt zò sirriejeus kiekt as 'n uu:r gelijje. Veurzitter van de Kieveloeët vertrékt gén spie:r. Toekrèk hép ik as prins Erwin I bekééntgemakt dè Goe Gehusseld gé stóppe as hòfkepèèl van de Kieveloeët. Dè Fred dè toenèt hi gezi, èn dè ik dè as prins géér èn alle Kieveloeëter mach gòn vertélle. Èn dè IK, prins Erwin den uurste, de òrzaak bén. Min èkskuus dòrvur.

Ik hép ónderweeges nò de Goejje besloote dè ik de grap van Fred gao hèrhaale. Bétter goe gejat as slèècht verzónne, tòch? Téjdes de uurste weurt kie:k ik Fred èn, èn ik zie: èn zin blik dè héj wit wa ik van plan bén. Ik hèrkén ók zin goekeuring èn sirriejeus gao ik witjer. “Goe Gehusseld stópt as hòfkepèèl van de Kieveloeët.” Mi dizze prins kanne ze allieën mèr witjergao as … ‘dweilorkest’ ! Ik hèrkén mee de bekéénde lach van Peter Daniels, gevòllecht dur Frits Berben. Iedderieën laachtsich 'n breuk. De wiets van Fred wért suupper gewardeert èn de stèmming zitter mee goe in. 't Óntbéjt is heerlek èn ik maak van 't moomènt gebruuk um èn iedder tòffel éfkes te zitte. Éfkes béjbuurte. Éfkes kie:ke wie der allemòl zin, gezèllich. SAAME !

Ik bén harstikke naat. Ik hép watter óp plèkke wòrvan ik nie wees dètter watter koos kómme. Nééve méj zit Hans ‘Eddy Merckx” Martens èn we fietse saame óns 't leecht utje oeëge. Zwieët dè drie:ft övver min gezeecht terwiel Hans ók zéjkesnaat is.Nie van 't zwieët, mèr van 't bie:r. Hans kiekt veul wielrènne èn ziet af èn toe die ‘èchte wielrènners’ ur biedón övver ur gezeecht gòjje um af te kuu:le. Hans daacht dè ók te doe:, allieën ditjie de mi 'n (dur óns) èngebòjje pilske. We zin naat, mèr we hébbe wal plezie:r. Hans is minnen teegestander. Ik moet van 'm winne. Allieën dan wéér ik toegelaote tòt de aaw prinse, tòt Medelo Narragoniam. We zitte óp stilstònde fietse èn vieja 'n ingebélde wérrelt fietse wéj 'n parkoe:rs. Hans hi van 't moomènt gebruukgemakt um 'min’ Lisette te kie:ze as verzèùrechster. Minne verzèùreger is John Evers. Ik wil em hiermi beloone vur de óngluuëfleken inzit èn plezie:r dietjie hi béj de Kieveloeët. Èn dè mi enne bréjje glimlach. Ónze rees zit deróp èn ik wéér toegelaote tòt de ieëregallerééj. 't Dwéjle van Goe Gehusseld wéére nòw hantduu:k. Oo wa bén ik blééj dè se nòw 'n ‘dweilorkest’ zin!

Dan krie:ch ik sjòn weurt van Frits èn Peter te huu:re èn krie:ch ik enne sjitterende steek óp. Ik bén de uurste nar van 2023. Vur méj ennen héllen ieër mee dangkzéj die sjòn weurt van mènse die hél wa vur méj betieëkent hébbe vur de vastelaovend in Méél. Èn dòr dangk ik òllie vur!

De miekrefoon trilt in min hant as we beginne èn 't femielliemoomènt. Mèr ók mee besèffende dè ik hie:r vanutj min hart mach èn kan sprééke. De trilling is dan ók gòwgenóch wér ewéch èn mach ik min (sjòn)femiellie toesprééke. Vur sòmmigge hép ik enne èchte óndersjééjing die ik gröts gééf èn ur. Óns mam verdie:nt ter wal hóndert èn min zeuster mach ik 'n óndersjééjing gééve. Ellen nimt 'm gröts èn, wie weetende dè... min sjònaawers, krèk wie min sjònbruurs John èn Geert. Iedder óndersjééjing perbeer ik zòveul meugelek mi weurt te óndersjrie:ve woe waardevól dees zin vur méj. Hél spésjaal is 't netuurlek as ik as prins 'n óndersjééjing mach gééve èn minnen atjuudant die ók min sjònbruu:r is. Òf 't is minne sjònbruu:r die ók minnen atjuudant is... zéch 't mèr. Héj verdie:nt em. Mark kén ik netuurlek al langer mèr ik ving 't hél bezónder um dizze vastelaovend zò saame mi em mee te maake. Mark zin de haant, vuu:t èn oeëge van de prins. Ik hép wèrrekelekwaor gén zèùrech, èn as ik dè wal hép (ónzeeker zin, aart van 't bésje) dan zitjie: “Tis al gereegelt.” òf “Kumt vur mekaar, maak òw mèr nie zò druk.”. Mèr ik hép Mark dees daach ók óp ennen andere menie:r lieëre kénneèn dè ving ik zieër bezónder èn èrrech sjòn. Mark dees óndersjééjing verdienne géj as atjuudant, mèr ók zeeker as sjònbruu:r...

Atje den atjuudant
De beeste van 't stèl
Lusjter wa ik òw vertél
Atje den atjuudant
Sjòn èn hél sjarmant
Hééltjie alles in de hant

Atje den atjuudant
De prins zin rèchterhant
Stétjie èn zin lingkerhant
De prins dè is gebleeke
Raktjie nòjt óp utjgekeeke
Gé aaltitj mee óp sjaow
Övveral hél traow
Mèr dik wértjie vergééte
Dus iedderieën moet 't weete
Dè is Atje den atjuudant

(Tèkst utj ‘Atje den atjuudant’ van de Bubs)

As ik alle femiellielijje hép gehat raak ik de regie kwitj. Dè géft méj alzelééve 'n ónzeeker gevuu:l, dè wéént nòjt. Sjònbruu:r Geert, prins van de Kieveloeët 1998 vat de miekrefoon övver. Klasse dè héj di kan èn wil doe: èngezie: min mooder pas is gestèùreve. Klasse Geert. Der wért 'n fillemke gestart wòrrin döjdelek wért wa ik érre besjrivve hép in dél vie:r. Dè ik smèèrges geblindoekt in 't buske saame mi atjuudant/sjònbruu:r Mark örges nòrtoe bén gewees. Tòt di moomènt haa ik nòch gén iedee wòr ik bén geweest en wa mi méj gebeurt is. In 't fillemke woort 't döjdelek. Dè ók wér iedderieën in 't kómplòt zit. Ik bén dus nòr 't zie:kenhusj gewees van Éjnthoove. Dòr zin footoos gemakt èn dè is eumgezit in 'n sjitterent 3D-biltje van … prins Erwin den uurste. Wa 'n kedoo, wa 'n ginniejaal kedoo èn óntruu:rt nim ik 't kedoo èn. Tòt in de puntjes zie ik min éjge truch. Beangstegent sjòn van de femiellie, sjònfemiellie, dangk òllie wal! De middich waar netuurlek al geslaacht mèr as sjònvaader Jan dur de miekrefoon ruupt dè ik zin daochter Lisette mach ‘hébbe’ kan minnen dach al nie mèr stuk. Wa 'n verrassing van Jan, èn dè nao 'n relaasie van 25 jaor. Dangke Jan, alzelééve sjòn um toestèmming te hébbe.

't Prógramma is utjgeloeëpe, sòrrie Kieveloeëters dè de prins van di jaor zò langdrèùjich is. Besloote wért um nie mèr truch te gao nòr de Heere, mèr béj de Goejje te blie:ve. Wéj as ‘dreigestirn’ trékke óns éffe truch. We krie:ge van kléjjingman René te huuëre wa we goe èn nie goe gedao hébbe èn ik gééf vòrst Ron min walgeméénjde kómpliemènte vur zin vakkundichhétj. Ónderweeges nòr de Goejje hi vòrst Ron 'n tillefoontje gekrigge. Zinnen oeëm, ennen die:rbaaren oeëm, is die mèèrge plòts gestèùreve. Ik krich di mee èn nao énnech övverléch tusse óns twieë hi vòrst Ron besloote um di nie (drèk) te vertélle. Niemmes behalleve ik wees ter dus van. Téjdes 't moomèntje mi 't ‘dreigestirn’ vertéélt Ron èn René èn atjuudant Mark. Veurzitter Rudy is óndertusse ók goe óppe höchte. Mèr mi de weetesjap dè ge nèt bereecht hét gekrigge dè òwwen oeëm is gestèùreve, èn dan òwwen éjge éévegoe zò vakkundich ópstélle dè ge ‘gewoon’ òw ding doet, dè verdie:nt netuurlek alle kómpliemènte. Klasse Ron, puure klasse!

De émoosies moette wér ópzééj, vastelaovend ‘pur sang’ èn we stélle óns wér óp béj de Goejje um... nòr de Goejje te gao! We loeëpe 't zaalgedélte utj um aachter Goe Gehusseld wér in 't kefeegedélte binne te kómme. Di leevert sjòn taffereele óp, dördè wéj allemòl doe: asòf we mekaar vur jòrre nie mér gezie: hébbe, terwiel we nèt twénjtjich menutje zin wéchgeweest, huumòr.

Huumòr 't ók as Peter Verstappen, prins van de Kieveloeët 2007, naames de Nééj Zwaarze de miekrefoon vat. Héj benuumt dan dè te Kieveloeët nòrmaal gesprooke èngekóndicht wért. Wéj waare binnegekómme èn vòrst Ron haa al mee 't woort gevat. We stòn ónder leechte titjsdruk want wéj wéére verwaacht béj de Heere van Meijel vur 't Kéjsjeutebal. Peter wit netuurlek woe 't wèrrekt mèr koos 't tòch nie laote um der wa van te zégge. Inderdaat huumòr. Zéj gòn witjer mi ur prógramma, èn wéj gòn witjer mi óns prógramma. 't Kéjsjeutebal béj de Heere.

As Kieveloeët zin we dizze middich béj 't Kéjsjeutebal te gast. Jolanda duu naames de Kéjsjeut 't woort èn prinsès Britt èn prins Niek zin hie:r netuurlek de heersers. As ik dur ur 't poodiejum óp wéér geroe:pe, is dè netuurlek 'n eenòrme ieër vur méj. SAAME maake wéj der 'n sjòn fésje van mi dievèrze óptrijjes. Ók is ter enne ‘mystery guest’ èn di zal niemmes minder zin as méster Hidde. Indrukwèkkent zin de femielliemoomènte van prinsès Britt èn prins Niek. Hie:r zie ge wa vastelaovend mi òw duu. Fentasties um te zie:. Ók wéére der sjòn footoos gemakt van óns allemòl. Dees zin méj èrrech die:rbaar. Veule póllónéézes wéére geloeëpe dizze middich mèr vervééle zalle ze zich nòjt doe:. Wa 'n innerzjie èn plezie:r dizze middich. Ge zaalt der mèr hónger van krie:ge. Gelukkich sté der 'n bezuu:k béj Nakal óp 't prógramma. Hie:r ééte we lèkker èn kómme we éfkes óp òjjem. Gelukkich is besloote um mèr twé gange te ééte um 't ‘inkakmoomènt’, wa ter bliekbaar al jòrren is, te veurkómme. Béj méj lukt di perfèkt èn krèk veurdè ge de bieën strékt, moette we óns vérrichmaake. Vérrichmaake vur enne bezónderen aovent. 't Bezuu:k èn de Siem. 't Bezuu:k èn min stamkefee de Siem want dè gé di jaor slutje. 't Bezuu:k èn de Dólle Mòndich. 't Bezuu:k èn de aller, aller, allerleeste Dólle Mòndich. Övver émoosies gesprooke...  

 

Koester ‘t vléjje, verheuch òw óppe toekómst,
mèr geniet nòw saame van dizze vastelaovend

Prins Erwin I

Vastelaovesvierder 2024

Wil je iemand (persoon of groep) nomineren voor vastelaovesvierder?
Laat het ons weten!

Stuur ons je nominatie

Dè moet in de krant

Heb je een ludiek verhaal of annekdote voor in de vastelaoveskrant?
Laat het ons weten!

Stuur ons je verhaal

Save
Cookies voorkeuren
Wij gebruiken cookies om ervoor te zorgen dat u de beste ervaring krijgt op onze website. Als u het gebruik van cookies weigert, kan het zijn dat deze website niet naar behoren functioneert.
Accepteer alles
Weiger alles
Lees meer
Unknown
Unknown
Accepteer
Weiger