Activiteiten agenda

Appelaktie
vrijdag 11 oktober
Opening Vastelaovend
maandag 11 november
Prinsebal
zaterdag 16 november
De Méélse Liedjesaovend
zaterdag 30 november
Bónte Aovend Vréjdich
vrijdag 31 januari

Spotify lijst

Vastelaovesvierder 2024

16 feb 2024 Nieuws

Op het Kieveloeëte Treffe is Mark Brummans uitgeroepen tot vastelaovesvierder van Meijel 2024     De vastelaovesvierder van 2024 is iemmes...

Uitslag optocht 2024

12 feb 2024 Nieuws

Rond de klok van 13.30uur konden de eerste deelnemers van start gaan vanaf de nieuwe startlocatie. Dit jaar konden we tijdens de bonte stoet genieten van ruim...

De “Zònne zóndich, gao ik nòjt mér vergééte” zóndich.

Den óptòcht.

De traone loeëpe övver min wange. Nie um te zumpe, mèr mieër van intèns geluk. Ik loeëp saame mi min kammerèùj van de Kieveloeët övver de Haagelkrusjwéch èn ginswitj hèrkén ik óns fietstenuu. Dan nòch énne, èn nòch énne, èn nòch énne, 't zal tòch nie... Jaowal. Al min fietskammerèùj hébbe zich béjèngepakt èn doen mee in den óptòcht. Dörrum ók min traone van intèns geluk. Dizze klup is uuniek. Ze verraste méj al érre dur mee te doe: èn 'n aktievietéjt van de Kieveloeët, din mee èn de filmópnaames vur de Bónten Aovent èn nòw hébbe ze zich wér béjèngepakt um mee te doe: mi den óptòcht. Alles umdè ik persee de prins wil zin. Klasse. Ik zie: ók dè se der zichtbaar joeks èn hébbe èn as ik ze allemòl enne knoe:vel hép gegévve krie:ch ik den ópdracht dè we wér witjer gao. We loeëpe wéch èn ik kie:k nòch enne kieër aachtereum. Fentasties! Ik drèèj me wér eum èn kie:k rèècht in de gezeechte van min femiellie èn sjònfemiellie. De traone zin der wér. Ik zie óns mam, sjònvaader Jan óp de traktòr wòr veuróp 't Kievelmènneke van ónze pap sté. Héj is ter simboolies tòch béj. Ik zie: Lisette der ók béj. Ók Fenne, Amber èn Pleun zie ik as danserèsse. Ze zin mi zòveul dè ik ze nie allemòl óp gao noemme, mèr 't duu me ècht veul dè ze meedoe: in zòn groeëte getaale. Tantes, nééve, nichte, suupper bedangt. Min traone krie:ge de vréjje loeëp as ik ók óns Ellen zie. Sjònmooder Lieneke is krèk veur de vastelaovent gestèùreve mèr óns Ellen hi tòch besloote um mee te doe:. Ik knoe:vel ur intèns. Klasse Ellen. Èlleke beslissing waar de juuste gewees, mèr ik ving 't netuurlek sjitterent dè se hier is.

Dan kumt Lisette èn ruupt méj mee. We loeëpe richting Ròggelsendiek èn dan sjrik ik méj héllemòl kepót. Dòr sté méj tòch enne groeëte waage èn ik hèrkén der medieën 'n prinsewaage in. Ók hèrkén ik mee de prins van dienst, jaowal... Erwin Daems. Saame mi atjuudant Emiel èn, éfkes truch in zin aaw funksie, vòrst Wiljan stòn ze óp 't hòchste sjavót van de waage. Nòw wit ik drèk wörrum Erwin zò moos lache toe ik smèèrges zee dè ik di jaor WAL mi de groeëte waages mee zò doe:. Héj wees netuurlek ók al dè héj ÓK mi de groeëte waages mee zò doe:. Éjndelek doen we mi de groeëte waages mee, allieën zit der hóndert mééter tusse... Hahahaha. Alle kammerèùj, vriendinne èn zèllefs wichter van de Zuk stòn óp ur prinsewaage 'n fésje te baowe. Dan zie ik ók de nòbbers vurbéj kómme. Wa doen zéj hier, mèr nao énnich naovraoch bliekt dè óns nòbbers zich hébbe gevuu:cht mi ónze kammerèùjgruupke. Saame hébbe ze de waage gebaowt. As di génne vastelaovend is... SAAME. Feenoomeenaal. Ze krie:ge allemòl enne knoe:vel òf enne ‘high-five’ èn naodè ik éffe mi prins Erwin den twédde óp de footoo bén gegao zie: ik minne vòrst wingke. We moette witjer. Kammerèùj, èn dòrmi bedoel ik ók min nòbbers, dangk òllie wal. Feenoomeenaal.

Ónderweeges truch nòr ónze prinsewaage ruupt Lisette méj... kie:k hier.. Zichtbaar óntroe:rt, weesjt ze nòr 'n klutj dörskes. Ik hèrkén mee ur vriendinne. Ze zin al venaf ur prille jeucht béjmekaar èn hébbe 't plan ópgevat um mee te doe: mi den óptòcht. Umdè 't vrientje van òw vriendin prins wil zin, doen ze mee mi den óptòcht. As dè gén èchte vriendinne zin... Ik bén blééj dè ur iedee is gebazeert is óp 't féjt dè ik min immoosies (léés... traone) de vréjje loeëp löt, want ge begriept dè de traone der (nòch steets) zin. Prins Erwin, prins Erwin, prins Erwin. Ik huuër minne naam, nim afsjéjt van de vriendinne van Lisette èn vòllech 't gelöjd. Dan zie: ik hél sjòn roeëj pèkskes èn ik zie: mee dè di de vriendinne van Fenne èn Amber mi ur aawers zin. Wa zien ze der tòch fantasties utj èn wa is di tòch allemòl bezónder. Dè ze allemòl meeode: mi den óptòcht umdè de vaader van ur vriendinne prins is... Ik slao de haant vur min oeëge, ik kan di gewoon nie geluuëve wa hier allemòl èn 't gebeuren is. Dan hép ik 't nòch nie gehat övver de sjutterééj die aaw footoos van méj hébbe béj ur óptòchtdélnaame. Òf kammerèùj Tjerk èn John die meeloeëpe as Lisette èn Erwin, sjitterent! Alle vriendinne van Fenne èn Amber krie:ge enne ‘high-five’ ééve wie ur aawers. Dangk òllie alle, èchte vriendinne èn wa is di tòch 'n sjòn klupke dörskes. Èn ur aawers netuurlek, 't klikt. Hél bezónder.

Tis titj. Titj um min plèkkie in te neeme óppe prinsewaage. Ik klim óppe waage, géf de ènweezigge lijje van de rò van éllef 'n bóks èn wèns ze hél veul plezie:r. Dan klim ik umhòch. Ik zie: enne straolende vòrst die ók zin uursten óptòcht óppe waage gé belééve. 'n Bóks vòllecht èn we wènse mekaar veul plezie:r. Dan kie:k ik nò minnen atjuudant. Héj is ‘èrvaare’ in 't meedoe: mi den óptòcht óppe prinsewaage, mèr héj hi der nao twieë jòrre génnen óptòcht ók hél veul zin in. Héj vult de bèk mi slòk èn óndertusse trékt den óptòch nééve ónze stilstònde prinsewaage. Alles kumt nééve èn dur de traone hén prebieër ik iedderieën te groette. Ók Fred èn Silvie wér prezènt. Wa zien ze der wér ‘béldich’ utj. As de prinsewaage van prins Erwin den twédde vurbéjkumt, starte wéj ók ónze mótoore. Èn as min femiellie néévekumt, beginne wéj ók èn ónze (zeege)tòcht. De gansen óptòcht aachter óns femiellie. Sjònner gé hòst nie. Vannaf de uurste menutj gòjje de leeje van de rò van éllef mi lèkkers asòf ur lééve dervan afhééngt. Geniette mi hoofletter G doe: ik óppe waage. Èn ik nie allieën. Ieën fést van hèrkénning èn tis sjòn um te zie: woe blééj mènse allemòl zin. Vastelaovend ‘optima forma’! Ik hép 'n gréjns óp min gezeecht wiesdè we óp de Sjoolstraot zin.

't Flèùtje van atjuudant Mark klingt èn de meziek gé utj. 't Flèùtje klingt vur de twédde maol èn alle ènweezigge leeje van de Kieveloeët óppe prinsewaage drèèje enne kwartslach nò lings èn doen vervòlleges urre steek af èn zette dizze ónder ur lingkerèèrem. We stòn vur Henk èn Geert de Leeuw èn ur ènweezigge dierbaare. Di is UT ieërbetoon van de Kieveloeët Lieneke. Nao 'n kòrte stilte klingt 't liet van Blieve Lache “Lééf 't Lééve”. Tis indrukwekkent èn kumt nie allieën béj Geert èn Henk binne. Ók óp de waage laote we óns immoosies de vréjje loeëp. Ik ók. Lieneke is de sjònmooder van óns Ellen. 't Nummer “Lééf 't lééve” hi netuurlek béj óns 'n bezóndere betieëkenis. Blieve Lache spulde di nummer óp de Bónte Aovende van 2018 èn droegge di mi indrukwèkkende weurt óp èn ónze pap.

't Flèùtje klingt, de steeke kómme ónder óns linkerèèrem èn wéére wér ópgezit. Nao ingkele goekeurende blikke van Henk èn Geert gòn we wér witjer mi den óptòcht. Dan véélt méj óp dè ter veul puubliek èn óptòcht délneemers truch zin geloeëpe um di ieërbetoon mee te kunne maake. Klasse èn wa sjòn dè de Kieveloeët di duu. 't wért eenòrm gewardeert. De traone, en dizze kieër van verdriet wéére wéchgevéécht. 't Flèùtje klingt nòch enne kieër èn de meziek gé wér èn. Ók wéj gòn wér ‘èn’ èn we beginne wér mi hòsse, springe, èn slókgòjje. Wa enne ‘rollercoaster’ van eemoosies mèr di is 't lééve. Di is vastelaovend. We réjje wéch èn ik kie:k nòch ens aachtereum. 't Verdiende ieërbetoon is geslaagt. Fantasties!

Atjuudant Mark löt méj 'n fillemke zie:. Óp 't fillemke hèrkén ik 't husj van vòrst Ron. 't Husj li èn de roette van den óptòcht. Alle raame stòn oop. Aaw prins èn bruu:r van vòrst Ron, Ger Basten, hi alle raame oopgezit. Ik vraoch èn atjuudant wa di te betieëkene hi. Tis enne óngesjrivve reegel dè, wòr enne raam oopesté van iemmes van de Kieveloeët, der slòk nòr binne wért gegòjt. We drèèje de Zónnedòw óp, ik zie: de bréjje glimlach van Ger, ik kie:k vur me èn zie: dè de rò van éllef de bótsjap hi begreepe. Béj 't husj van vòrst Ron gé de slòk de leucht in èn dur de raame nò binne. Vòrst Ron haa de bèùj al zien hange en li zich nér béj 't gebeure. De joeks óp de waage wért almèr gròtter èn as we De Straot indrèèje èn de mènsemassa zie:, is dizze joeks óp sen gròtst. De meziek klingt vólle bak óppe waage èn we gòn van lings nò rèchs. Wa 'n genót èn wa 'n mènse. Sjitterent um di zò mee te maage maake. As we De Straot utjréjje stóppe we. Lisette, Fenne en Amber maage óppe waage kómme. Amber gòjt mi wa slók asòf ze vur jòrre béj de Kieveloeët is. Lisette èn ók Fenne, óndangs dè ze nie fit is, geniette zichtbaar. 't Rakt méj ók wér um zò mi min fentasties gezinnetje di mee te maage maake. SAAME óppe prinsewaage, wie haa dè òjt gedaacht?!


Koester ‘t vléjje, verheuch òw óppe toekómst,
mèr geniet nòw saame van dizze vastelaovend

Prins Erwin I

Vastelaovesvierder 2024

Wil je iemand (persoon of groep) nomineren voor vastelaovesvierder?
Laat het ons weten!

Stuur ons je nominatie

Dè moet in de krant

Heb je een ludiek verhaal of annekdote voor in de vastelaoveskrant?
Laat het ons weten!

Stuur ons je verhaal

Save
Cookies voorkeuren
Wij gebruiken cookies om ervoor te zorgen dat u de beste ervaring krijgt op onze website. Als u het gebruik van cookies weigert, kan het zijn dat deze website niet naar behoren functioneert.
Accepteer alles
Weiger alles
Lees meer
Unknown
Unknown
Accepteer
Weiger