De Vastelaoveskrant
’t Is fréjdessaoves èn ik zit vérrich in de woonkaamer. Vandaach hòch bezuu:k. De redaksie van de vastelaoveskrant kumt um méj ’t uurste èksemplaar te övverhandigge. Koen, Annelies, Hans, Jeroen, Roel, Bart en Benny hébbe der ’n sjitterende eediessie van gemakt. Fantasties um al die verhaole te lééze. Mèr ik was héllemòl övverdóndert dur ’t kedoo wa se méj gaave. De próklemaasie gehult in ’n footoolisjt. Dizze krie:cht ’n bezóndere plèk in ’t husj. Dangk òllie wal. Wa vòllecht is enne gezèlliggen aovent wòr alwér nééj iedeeje èn verhaole óntstónge vur de vóllegende krant. Um hallef twieë ging de leeste nò husj. Nèt veur dètte nòrmaale krant in de bus li.
’t Is hallef tie:n as ’t prinsegezin zich gemèlt béj de Heere. Vanne mèèrge sté de verkoeëp van de vastelaoveskrant óp ’t menuu. Uurst ’n bèkske kòffie èn utjléch övver de betaaling èn roette, veurdè we óp pa gao. Saame mi Fenne èn de vòrst beginne we béj ’t Alexanderhof. ’t Is ’n ieër um béj de prins van 1985 èn te maage bèlle. Héj lòt óns mee binne èn biet óns wa te dringken èn. Co Basten is de naam èn ’t wért al mee gezèllich. As di zò dörgé dan wéére der wénnich krante verkaocht. Mèr ik vat méj den titj want ik ving di zò sjòn.
Éfkes latter zit ik béj Irm van Joppe èn tòffel. Zéj is nèt zò èntoezjast as Co èn ik ving ’t fentasties dè ik prins bén. “Géj béént vur méj nòch ècht ’n Joppe-gezeecht!” zi ze. Roel van Joppe is enne kammeraot van óns èn vruugger was kefee Joppe de utjvalsbaazes um óp stap te gao. Dè se me zò nuumt, ving ik ‘n héllen ieër. Dangk Irma, èn wéj zien óns! ’t Verkoeëpe van de krant ving ik sjitterent. Ók trèf ik Dien èn Theo Spee. Theo is aaw kòlleega èn zéj koeëpe drèk twieë krante. Zò trèffe we nòch mieër mènse èn ’t is al gòw titj.
Titj um nò de Maaspoort te gao. Dòr zal de prinsefootoo gemakt wéére mi alle prinse utje reegiejoo. Saame mi de vòrst ééte we ’n utjsmitjerke béj de Heere èn we vertrékke nò Vènloo. Dòr èngekómme zien we al gòw ingkele ander bekéénde èn ’t wért alwér gezèllich. Ók trèf ik de prins van Hòwt-Blérrik. Richard Kersten, enne awwe voetbalmaot van vruugger. We haale hèrrinneringe óp, koestere ’t vléjje, zèch mèr wiesdè de bèèl van de ‘Jocus’ klingt. We moetten óns póziesjooneere. Nò ingkele footoos beslutje Ron èn óndergetieëkende um wér nò ’t Méélse te réjje.
We wéére verwaacht béj Anita Kessels, vastelaovesvierder van 2020. We gòn dòr ’t frètske óphaale. Mi ’n èntal van de rò van éllef èn kómmietee maake we der nòch enne gezèlligge middich van. Sjòn is dètte bruu:r van Anita nòch ónverwaachs éfkes binne kumt. Leon, ’t was sjòn òw wir te zie:. Dangk Anita vur de gastvréjhétj èn we gòn óns zeeker zie:.
Saoves belééf ik mi kammerèùj Ard èn Brendy, atjuudant èn zwaoger Mark èn netuurlek min prinsès Lisette enne fantastiessen aovent béj de Zoes in Panninge. Lekker ééte èn ónder ’t genòt van ’n drèngske lusjtere èn lache nòr èn mi Andy Marcelissen, Tom van Osch, Fer Naus, Erik Mulder èn de fentastiesse Knöppele. Dòr kóm ik der ók aachter dè Omroep P&M goe bekeeke wért. Mieërmaals roe:pe der mènse nò méj. “Hey prins van Meijel!” Nao de buutte blie:ve we nòch éffe hange èn de bar. Ók dòr wéér ik èngesprooke óp minne prinsesjap in Méél. ’t Blieft wènne, mèr di alles zèùrechde óppernééj vur enne geslaachden aovent.
Zalle we der nòch énne vatte?
Zalle we der nòch énne vatte?
We vatte der nòch énne
Nee ik gao nòch laang nie mee
Ik hép ’t hier nò minne zin
(Tèkst utj ‘Zalle we der nòch énne vatte’ van Vals Plat)
Koester ‘t vléjje, verheuch òw óppe toekómst,
mèr geniet nòw saame van dizze vastelaovend
Prins Erwin I