Méster Verheijen dél twieë
Van sjooljuf Bo hép ik 'n titje truch 'n verzuu:k gekrigge òf ik 'n kieër wa vraoge van de wichter utj joenit dréj èn vie:r wil beantwoorde. Di is de klas van Amber. Zéj hébbe 't teemaa Vastelaovend. As ik utjléch dè ik dè moet övverlégge, rijjaageert ze verbaast. Ze is nie den énnechste èn as ik utjléch dè ik nie zòmèr dè prinsejèske èn mach doe:, kumt ze der pas aachter dètter hél wa prootekòlle èn 't prinsesjap verbónge zin. Ze toont suupper begrip nò minne utjléch èn we sprééke af óp enne mòndich. Nò övverléch mi de Kieveloeët wért besloote dè ik nie as prins verklét gao. Óppe woenzich hép ik al hél veul brievve maage óntvange èn saame mi Amber (die nie wit dè ik kóm) neeme wéj die brievve dör. Sjitterende vraoge passeere de revuu. Óppe mòndich kóm ik de klas van méster Bram binnegewandelt. Ik krie:ch wér enne fantastiesse knoe:vel van Amber èn nim plats óp de stoe:l die méster Bram vur méj vérrich hi gezit. Ik vuu:l dè veul oeëge óp méj zin gereecht, èn ieën vur ieën stélle ze vraoge. Nao 'n titje zit 't teróp èn mach in nò joenit dréj. Juf Claudia héétj méj dòr wèlkóm èn ók hier kumt den énne vraoch nò den andere óp méj af. As juf Maud zi dètten titj deróp zit, kómme alle wichter méj enne ‘high-five’ gééve. Sjitterent èn tevréjje verlòt ik de sjool. Dè méster zin dè gaajt me wal.
Um twé uurre is de sjool utj. Lisette hi kursus èn afgesprooke is dè ik de wichter gao haale óp sjool. Al keuvelent mi óns Ellen kómme der hél veul wichter nééve die roe:pe: “Héj prins Erwin!” Ellen kiekt méj èn, èn zi: “Ge béént enne beroemthétj vòlleges méj!”. Jao, dè blieft wénne.
Der gebeure dinge die inderdaat sjitterent zin, mèr nòjt wénne. Óppe dinzich kumt Angelique Boumans óp bezuu:k. Ze hi 'n fentasties kedoo laote maake. 't Verhaol wa se derbéj vertéélt makt 't allemòl nòch mieër bezónder. Angelique, dangke! 't Hi intusse al 'n sjòn plèkske gekrigge in ónze husjkaamer. Dizzen èndacht zal nòjt wénne.
Ók óppe woenzich veul èndacht. Bart Nelissen èn Nic Kortenoeven van Omroep P&M kómme ópnaames maake vur 't proogramma ‘Vastelaovend Same’.
Ik hép al de ganse wéék èpkóntakt mi Bart èn utjénjdelek kómme ze um neegen uurre. Flaaj èn drangk is in husj gehalt. Ze zalle weete dè se béj enne prins in Méél zin geweest, èn dètte gastvréjhétj hier suupper is. Saame mi minnen atjuudant wéér ik geïntervjoe:t. Nao afloeëp dringke we nòch wa èn de flaaj wért genutticht. As Bart èn Nic vertrékke, roe:pe Fenne èn Amber: “Dankjewel.” Ze moochte opblie:ve um di mee te maage maake. Tèr verdöjdeleking: Ónze uurste afspraak was um zeuven uurre. Ók naames Lisette, Mark èn méjzèèlef: "Dangk òllie wal!” 't Was leuk um mee te maake, mèr wénne zal 't nòjt.
Wa zòr ge zégge
As ik òw, 'n vraoch veur zao légge
Gén vraoch van jao òf nee
Kóm dingk ens mi méj mee
Wa zòrrege zégge
As ik òw, dees vraoch veur zao légge
Ik zéch lusjter nòw es goe
Hier in Méél dòr is 't te doe:
(Tèkst utj ‘Wa zòr ge zégge’ van Óngerakkesen Doorst)
Koester ‘t vléjje, verheuch òw óppe toekómst,
mèr geniet nòw saame van dizze vastelaovend
Prins Erwin I