Activiteiten agenda

Opening Vastelaovend
maandag 11 november
Prinsebal
zaterdag 16 november

Spotify lijst

Vastelaovesvierder 2024

16 feb 2024 Nieuws

Op het Kieveloeëte Treffe is Mark Brummans uitgeroepen tot vastelaovesvierder van Meijel 2024     De vastelaovesvierder van 2024 is iemmes...

Uitslag optocht 2024

12 feb 2024 Nieuws

Rond de klok van 13.30uur konden de eerste deelnemers van start gaan vanaf de nieuwe startlocatie. Dit jaar konden we tijdens de bonte stoet genieten van ruim...

't Bónte wiekkènt

’t Is alwér twénjtjich jannewarrie èn ’t bónte wiekkènt sté vur de deur. Vur méj alzelééve lang ieën van de höchtepunte in ’t vastelaovesséjzoen. Vruugger as toesjòwwer in de zaal. Veul artieste de revuu zien passeere. Perry, Toon èn Giel, Sister Act, Bertine en Linda, Duo Mona nuum ze mèr óp. Zèllefs ’n èkt wòrrin de Sjraavelzek óns (Erwin & Erwin) óp enne ‘fetsoenleke’ èn fentastiese weezje naodin. Latter, vanaf 2004, hép ik ’t bónte wiekkènt ‘belééft’ as délneemer. Ik haa den ieër èn ’t genógge um délgenoot te zin van de Érpelemèèntjes. Di wiekkènt gao ik wér as toesjòwwer ‘belééve’ mèr dan wal óp ’n spésjaale menie:r èn spésjaale plèk. As prins van de Kieveloeët èn boovenóp ’t poodiejum. Ik kan òllie vast verklappe dè ók di bónte wiekkènt wér ieën van de höchtepunte is gewórre van di vastelaovesséjzoen. Dè wit ik nòw al zeeker.

’t Begeent allemòl mi enne giegantiesen dómper. Óp vréjdich rónt éétestitj kumt Vòrst Ròn binne in ónze husjkammer. Héj véélt mee mi de deur in husj. “We hébbe net moette beslutje um de Bónte Middich nie dur te laote gao. Di alles vanweege de besjéjde kartverkoeëp”. Dizze meededélling kumt ‘binne’ béj méj. Den titj dè ‘t óp fréjdessaoves èn sòtterdessaoves plus de zóndiggemiddich vólle bak was, die li jòmmer genóch (vurluuëpich) aachter óns. Mèr ik hép gelieërt um nie te kie:ke nò de bepèrkinge mèr nò de meugelekhéjje (dangk veurzitter). Gòwgenóch trékke we de kónkluuzie dè 't zòtterdich mee suupper moet zin. Vòrst Ron gé nò D'n Binger um óp te baowe. D'n Binger is vandaach verbójje teréjn vur de prins. Ik blief lèkker tusj. Dan krie:cht Lisette tillefoon. Marielle, ieën van de vraolie van de Kieveloeët, bèèlt ur óp (altans dè zi ze). De daames kómme béjén um te besprééke vur 'n meugelek alternatief vur de zóndiggemiddich (althans dè zi ze). Ik geluuëf ur blinjelings.

Óppe zòtterdiggemèèrge kumt René Naus de prinsejas truchbrénge van de stoeëmerééj. Ók Erwin Daems kumt éfkes óppe kòffie. Erwin vraocht èn René woe de ginneraale rippetiessie was verloeëpe. Èn ik haa niks in de gatter hè...

Saoves kumt 't ‘dreigestirn’ béj óns ééte vurdè we nòr D'n Binger gòn. 't Is gezèllich èn vól goejje moe gòn we nò D'n Binger. We hébbe zin derin. We beginne den aovent mi 'n ‘Meet & Greet’ mi de prins. Di is allieën vur eereléjje èn léjje van verdienste van CV de Kieveloeët. 't Is 'n ieër um de ‘crème de la crème’ van de Méélse Vastelaovend te maage toesprééke èn saame mi ur 't glas te höffe. Pé Daniels zao zégge: “Dangk òllie wal!”.

Dan de èntree in de zaal. Vanaf dè moomènt vuu:lege dè 't mi 't èntoezjasme in de zaal wal goe zit. De mééters nòr 't poodiejum, die zin fantasties. Di kan hòst nie fòwt gao. Nao 't oopeningswoort gòn we zitte óp óns plèkke. Joep de Wildt bitj 't spits af óp enne fantastiesse weezje. As héj zò durgé dan kriechtjie ók sen éjge klétlookaal.

Jao, èn dan... Minnen atjuudant zi dètjie moet plasse. De vòrst zi dè de groep ‘Ta Da’ nie kumt ópdaage. Wa gebeurter allemòl? Héj begeent 'n verhaal te vertélle övver 't mannekoeër van Méél. Min blik gé övver de zaal. Geert zie ik inéns nie mér zitte nééve óns Ellen. Erwin zit nie óp sen plèk. Rob èn Rob zin verdweene. 't Zal tòch nie zò zin dè de Érpelemèentjes hun aagèndaas hébbe vréjgemakt èn hier óppe buun zalle versjinje? Dan huuër ik de uurste toone van de ópkómstmeziek van ingkele jòrre truch toe we dizze èkt din. De uurste traone versjinje dan ók wér mee. Tòmme nòch, wa is di klasse. Ik kie:k nie zò géér nòr men éjge. Mèr as alle érpelemèèntjes (mi die brandende fakkels mi 'n mómbakkes van méj óp) minne kantj utj loeëpe, dan wil ik zégge dè 't tòch wal 'n fantasties plétje is. Ieën vur ieën kómme ze óp 't poodiejum. Ze zin der hòst allemòl. 't Rakt méj èn alle kante. Ók in 't puubliek kan dizze sjitterende ópkómst wardeere. Dan moet ik béj de sprékstalméster van de èkt kómme. Kammeraot Erwin hi den ieër èn begeent èn zinne praot. Dörrum woorter óp de zòtterdiggemèèrge zò gelache. Erwin was netuurlek gewoon zèèlef óp de ginneraale rippetiessie. Ik krie:ch enne dikke knoe:vel ónder de noemmer dè 't vandaach nasjoonaale knoe:veldach is. Dangk Erwin! Ók dizze kumt ‘binne’. Vervòlleges begeenter 'n fést van hèrkénning. Al ónze óptréjjes van de afgeloeëpe jòrre passeere de revuu. Erwin èn ik haale ónder de óptréjjes hèrrinneringe óp van 't jaor wa woort utjgevoe:rt. Nao de èkt is der 'n suupper èn walverdient applòws.

Ók mach ik 'n döjt in 't zèkske doe:. As prins maagege iemmes óndersjééje. Ik hép gekózze um Wim Beeks te óndersjééje. Vur méj ieën van min vastelaoveshèlde. As ieën van de gezeechte van de Hepies èn de uurste Méélse vastelaovesvierder van 't jaor. Alwér twé kérre éllef jaor geléjje. Ók bewaar ik sjònne hèrrinneringe èn de dólle mòndigge béj de Siem, wòr Wim der énne van de stamtòffel is. Prefiessiejat Wim, èn suuppersjòn dè ge dizzen aovent meedit mi de Érpelemèèntjes. Dangk! Min twédde óndersjééjing is vur Frans Nijssen. As apsooluutte kartrekker binne de Érpelemèèntjes hi héj dizze óndersjééjing dik en dubbel verdient. Vur méj géélt Frans ók nòch aaltitj as ieën van min beeste voetbaltrééners òjt. Frans zee aaltitj as we wér 'n èkt bedaacht han, èn wéj wér in ’n pèkske wéére gedòwt: “Waat bin ich bliej dèt ich zòn pèkske neet aanhoof.” Klasse is 't dan as ik zie: hoe Frans dizzen aovent óp 't poodiejum sté. Bedangt Frans, klasse!

Utj de grónt van min hart, bedangt manne. 't Was fantasties. 't Di en 't duu méj hél veul. Dangk òllie wal èn alle érpelemèèntjes.

Ja echte vrienden die heb je voor het leven
Die staan volledig achter jou
Het voelt vertrouwd
Met vrienden om je heen

(Tèkst utj ‘Echte Vrienden’ van Gerard Joling èn Jan Smit)

Dizzen aovent krie:gege gén moomènt ‘reust’. Nie dè ik dè géér wil, want ik geniet mi vólle teuge. Lets Do It kumt mi ur éjge meziek óp. Di is alzelééve 'n fantasties plétje . 't Sjònne èn dizze groep is dè ter èn de boovekant dörskes wéchgao, mèr dè ze ók moejteloos èn den ónderkant wér béjgevult wéére. Di zal ók nòjt ten kooste gao van urre kwallietéjt. Ók dizzen aovent wérter wér enne fantastiesen dans mi teemaa ‘Afrika’ wéchgezit. Ze tréjje óp dur gans Neederlant, mèr vergééte nòjt wòr ze vanaf kómme. Klasse dörskes. Dan makt vòrst Ron bekéént dè Maud èn Linsey èn ur leeste séjzoen beezich zin. Wér twieë van die tóppers die ‘ewéchvalle’ mèr die hél zeeker wér ópgevòllecht gòn wéére. Maud èn Linsey, bedangt vur de sjòn jòrre. Nòch 'n footoo èn de dörskes gòn wér nò ur vòllegende óptréjje. Suuksès dörskes èn nòchmaals bedangt!

Vervòlleges kómme de winnaars van de Méélse Liedjesaovend. Blieve Lache èn de Klèpbókse brénge hun winnende nummers. Bezónder jòmmer is dè de Glitterdörskes èn Butjespèl der nie béj zin. De zaal zeengt èntoezjast mee mi de Méélse sjlaagers van di jaor èn maage nao dizze lietjes éfkes geniette van 'n pòwze. In de pòwze is der 'n looterééj. As der enne knappe daame (Mariëlle) enne prisj weent, dan is Rò van Éllef-lit Ard der as de kippe béj um ur de prisj te övverhandigge. 'vrang' is 't dè éfkes latter zin éjge knappe daame de hooftprisj weent, èn Ard mi léjje oeëge moet toezie: dè de prins ur 't kedoo mach övverhandigge. Géér gedao Ard èn prefiessiejat Brendy.

Nao de ‘pòwze’ èn looterééj kumt Berry Knapen as daakdèkker. Wa kan dizze man óp 'n hélle gemèkkeleke weezje, altans zò liekt 't, de zaal èn 't lache krie:ge. Èn dè al zòveul jòrre. 't Daak ging deraf, wa vur enne daakdèkker mesjien nie gans de bedoelling is. Gewoon feenoomeenaal en 't daaverende applòw is dan ók mieër dan terèècht. Berry bedangt èn hoopelek wies gòw!

't Sjònne van de bónte aovende ving ik de kómbie van butjedèùrepse artieste èn de Méélse artieste. De leeste jòrre behuuëre Spèùtj Éllef tòt de faavooriette van méj. Enne bak Méélse taalènte die der 'n vak van hébbe gemakt um 't Mééls néjs, gekómbieneert mi 't naodoe: van Méélse mènse, de revuu te laote passeere. Wéj as Kieveloeët maage aachter in de zaal gòn stao um di alles te ènsjaowe. Wa wéj te zie: krie:ge is éjgelek nie te besjrie:ve, èn dè wil ik ók nie. Dan harregéllie mèr kartjes moette koeëpe. Veul bekéénde Méélse wéére naogedao, èn óp 'n gegééve moomènt wért min vriendin Lisette èngekóndicht. Ik bén méj èn 't bedingke wie ur nao kan doe:, wiesdè tòt min stómme verbaazing Lisette zèèlef de zaal kumt binneloeëpe. “Aha! Dörrum moest ze de leesten titj zòveul ‘vergaddere’ èn ‘utjééte’. Ze duu gewoon mee èn hi dus veul moette oeffene. Ónder andere Peter Gillis wért naogedao èn ik moet mee dingke èn zin móttoo: “Vertrouwen is goed, controleren is beter!”. Netuurlek is dè vur de joeks. Wa 'n verrassing èn 't hawt mèr nie óp. Lisette vat óp 'n gegééve moomènt de miekrefoon èn ruupt méj 't trèpke van 't poodiejum óp. Ze begeent, saame zittent óp 'n trèpke, èn 'n sooloonummer övver méj. Ik haaw 't al laang nie mèr druuëch, èn der wéére en tisjoe:s gebroocht dur de léjje van Spèùtj Éllef. Ze kénne méj bliekbaar. As 't liet mieërstèmmich wért löpt Lisette 't poodiejum óp. Ik kie:k ur nao, èn zie vervòlleges de vriendinne van Krek Goe 't poodiejum ópkómme. Nòw kan zèèlefs 'n dwéjl min traone nie mér èn. Wa 'n verrassing wér. Klasse dè dees dörskes dè vur méj allemòl doe:. Min eemoosies gòn alle kanten utj. Èn zèèlefs de zaal begeent mi ‘We want more!’, dan wittege dè ge dizze èkt van Spèùtj Éllef èn Krek Goe nie allieën méj eenòrm rakt, mèr ók iedderieën in de zaal. Feenoomeenaal. Spèùtj Éllef èn Krek Goe, eenòrm bedangt!

Èn dan moet 't leeste óptréjje nòch kómme. Toe ik huu:rde dè de Kwéékers nò jòrre wér béjén kwaame (zónder dè ze utj mekaar waare), èn wér óp de Bónten Aovend zòn zinge, 't iedee vóng ik fantasties. Vruugger kwaam ik dikker béj Chritiën en Martiën. Latter toe ze al mi de Kwéékers óptraade, èn ik 'n relaasie krich mi Lisette, die toe ieën van de aachtergróntdanserèsse was, bén ik dikker mi ur meegeweest. Hoe spésjaal is ’t dè ze nòw óp de Bónten Aovend óptréjje in min/ons prinsejaor. Ur óptréjje is fantasties èn minne spreuk zal nòjt mér zò sjòn klingke as hoe zéj em bezónge. 'n Moomènt van hénnevèl. Krèk wie 't moomènt dè Lisette, Mariëlle, èn Jolanda nèt wie vanawts wér ur ròl as aachtergróntdanserèsse ópvatte. Niks verlieërt! 'n Walverdient ‘We want more’ vur de Kwéékers kwaam dan ók utj de zaal. Kwéékers, dangk òllie wal vur dizze fantastiesse afslutjing van ennen aovent die ik nòjt, mèr dan ók nòjt gao vergééte.

Téjdes min slotwoort is 't meusjstil in de zaal. 'n Goe puubliek wit woenieër ze èntoezjast moette zin, mèr ók vurral woennieër ze stil moette zin. Di is dus 'n gewèldich puubliek, èn ik begin min woort dan ók dè se 'n daaverent applòws moette gééve vur... ur éjge! Puubliek, géllie waart fantasties. Ik dangk alle artieste èn gao mi enne glimlach van oeër tòt oeër van 't poodiejum dur de zaal nò de foojee. Ónderweeges vuu:l ik èn alle kante dè we getuu:ge waare van 'n feenoomeenaale Bónte Aovend. Heelaas mèr énnen aovent, mèr wal enne fantastiese!

Kieveloeëters, kieveloeëterinne,
Kóm der in èn dan kan 't fést beginne
De prins èn rò van éllef jao die loeëpe wir veuróp
Tis wir raak, Méél óp zinne kóp.

(Tèkst utj ‘Méél óp zinne kóp’ van De Kwéékers)

De zóndich wéér ik wakker mi enne kaater. Nie van den drangk, mèr vanweege 't féjt dè ik besèf dè ter génne bónte middich is. Ik doe min óntbéjt èn doe min prinsepak èn. Óp 't proogramma sté 'n footoomoomènt mi de Kieveloeët béj 't Kievelmènneke. Dan kómme de uurste gelöjje binne dè Spèùtj Éllef èn Krek Goe ur óptréjje nòch enne kieër gòn doe: béj de Heere. Veurnaamelek vur de wichter èn femiellie van diegeene die meedoen, mèr wéj as Kieveloeët wéére ók utjgenöddicht. Béj 't wéchgao van D'n Binger kómme we Fred teege van Goe Gehusseld. “Wa doerregéllie vanne middich?” Vraocht Fred èn méj. “Wéj gòn nòr de Heere van Meijel”. Trómmel de rèst van Goe Gehusseld mèr óp, dan zien wéj óns dòr.” Tis dan suupperknap dè 'n uu:r latter Goe Gehusseld in tenuu en zèèlefs mi Lins in de geléjjere vérrich stòn um béj de Heere 'n nuuëtje te speule. De èkt van Spèùtj Éllef èn Krek Goe is wér fantasties èn wa dernao óntsté, dè is Vastelaovend. Geniette van sjòn mènse um méj hin mi sirriejeuze praot èn veul joeks èn póllónéézes. Wér enne fantastiese middich èn aovent. De mòndich hép ik gelukkich vréj, nèt wie óns wichter. Um én uurre snaachs gòn we as leeste nò husj. As prins hérrege nòw émmel bepòlde verantwoordelekhéjje.

Same höffe wéj 't glas
Óp woe sjòn 't was, 't is vurbéj
Saame wa gezónge nòch, èn we prooste nòw
Óp òw èn méj.
Di was vur óns Vastelaovend.

(Tèkst utj ‘Same Höffe Wéj 't Glas’, van Ghielen & Strijbos) 

 

Koester ‘t vléjje, verheuch òw óppe toekómst,
mèr geniet nòw saame van dizze vastelaovend

Prins Erwin I

Vastelaovesvierder 2024

Wil je iemand (persoon of groep) nomineren voor vastelaovesvierder?
Laat het ons weten!

Stuur ons je nominatie

Dè moet in de krant

Heb je een ludiek verhaal of annekdote voor in de vastelaoveskrant?
Laat het ons weten!

Stuur ons je verhaal

Save
Cookies voorkeuren
Wij gebruiken cookies om ervoor te zorgen dat u de beste ervaring krijgt op onze website. Als u het gebruik van cookies weigert, kan het zijn dat deze website niet naar behoren functioneert.
Accepteer alles
Weiger alles
Lees meer
Unknown
Unknown
Accepteer
Weiger